Tolokeleni

Tolokeleni muye pa fyebo fya bubili

Tolokeleni muye pa filukusangwamo

Bamboni sha BaYawe

IciLamba

Akatambo ka Wakulama  |  August 2015

 UMUTWI WA INO MAKASHINI | ABAFWILE KANI—BANGABA NE MWEO NAKABILI?

Kani Abafwile Balaya Pi?

Kani Abafwile Balaya Pi?

“Nalukulanguluka ati kuli imipunda itatu uku abantu baya kani bafwa: kwiulu, ku mulilo, neli ku mupunda wa kukululushiwako. Nalishibile ati nshalipo umuntu umuweme uungaya kwiulu nakabili nalishibile ati nshalipo imbifi iingaya ku mulilo. Nshaishipo bwino ificitika ku mupunda wa kukululushiwako. Pakuti ifya kube’fyo nshafibwenepo mu Baibolo. Nalukufyumfwa lukoso ku bantu.”—Ba Lionel.

“Nalisambishiwe ati abantu abaweme balaya kwiulu kani bafwa, pano ifi nshaficetekelepo makosa. Nalukulanguluka ati imfwa e kushila kwa bantunshi, nakabili ati abafwile tatukababonapo libili.”—Ba Fernando.

Kani mulingalangulukepo ati: ‘Kani abafwile balaya pi? Kani abakwabesu abafwile balukupenga? Kani tukababonapo libili? Nindo tungacetekela ati tukababona nakabili?’ Umfweni ifi Amalembo asambisha. Nga tutatikilepo ukumfwa ifi Baibolo ibuulishishisha imfwa. Eli panuma twakulabila pa bucetekelo Amashiwi abaLesa alabilapo.

Kani abafwile balaba shani?

IFI BAIBOLO ILABILA:“Pakuti abalabi baliishi ati bakafwa; sombi abafwile tabeshi neli kantu; kabili tabali ne lambulo pano; pakuti ukubalanguluka kwalubwa. Ifintu fyonse ico ukuboko kobe kubona mu kulukucita, kocicita ne makosa obe; pakuti tapalipo neli milimo, neli cakwesha, neli kwishiba, neli mano mu Sheoli uko ulukuya.” *—Uwakutulisya 9:5, 10.

Popele, tungalabila lukoso ati, Sheoli neli Imanda, ekuya abafwile. Mupunda wa kupalanya lukoso uku takulipo abantu abalabi. Kani Jobo aaliishi ati Imanda cindo? Mu kasuba kamo lukoso aalilufishe abana bakwe na fyonse lukoso ifi akwete, kabili alipaminwe ne mapute pa mubili wakwe onse. Alikombetele baLesa ati: “Nga mumfise mu Sheoli, [“mu mulilo,” Catholic Douay Version] mundamine ku mfiso.” (Jobo 1:13-19; 2:7; 14:13) Ukwakubula ne kukanika, Jobo taalukulangulukapo ati Imanda mupunda ukuli umulilo, neli ati mupunda uku angaya mu kukululushiwa. Pano, aalukulanguluka ati mupunda uku angaya mu kutuusha.

Kuli inshila na imbi yeyo tungeshibilamo ifi abafwile bali. Tungasambilila pa bantu 8 ababuushiwe abalabiilwepo mu Baibolo.—Boneni akabokoshi akalukulabila ati “ Abantu 8 Ababuushiwe.”

Pali babalya abantu 8 ababuushiwe tapalipo neli umo uwalabiile ati aali ku mupunda wa kukululushiwako. Kani aba abantu baalile ku mupunda wa kube’fyo ili bafwile, tali nga baalilabiilepo? Kabili, tali ifyo nga fyalilembelwe na mu Baibolo? Mu Malembo, tatupendamo ifya kube’fyo. Tapalipo ifili fyonse ifi balya abantu 8 baali ne kulabila. Nindo? Ni pakuti ili bafwile, tabaishibilepo akantu neli kamo, baali lukoso koti balileele. Na cine, Baibolo ilapyungisha icakubwenako ca muntu uleele ku kubuulishishisha ifi abafwile bali. Ku cakubwenako, ilalabila ati Dafidi na Stefano bonse ‘baaliile mu tulo.’—Ifyacitilwe 7:60; 13:36.

Pano, ni bwisa bucetekelo ubuli ku bakwabesu abafwile? Kani bakabuuka muli tutu utulo?

^ par. 7 Pali lili ilembo, Baibolo ilipyungishe ishiwi lya kweba’ti “Sheoli.” Ili ishiwi lingaalula ne kweba’ti “Imanda.” Ambi amaBaibolo alapyungisha ishiwi lya kweba’ti “umulilo,” pano ubusambishi bwa kweba’ti abafwile balaya mu kupenga mu mulilo talipo bwa mu Malembo.