Tolokeleni

Tolokeleni muye pa filukusangwamo

Ukubombomana Pakuti pa Cisoolo

Ukubombomana Pakuti pa Cisoolo

Ba Janet baalilabiile ati: “Ili batata bafwile, abalume banji balimbuulile ati balukufwayo’kuupa umwanakashi umbi. Tapapitilepo ne mpindi, baalilongele ifyakufwala fyabo ne kunsha ne bana besu babili.” Nangaba’ti ba Janet balisangene incito, indalama balukufola shali ishinini. Kabili amakatasho baapitilemo alicilile na pa kubulo’kukwate’ndalama. Baalilabiile ati: “Nalukubombomana makosa kani nalanguluka pa milimo yonse yeyo pano naelelwe ukupyunga nenka. Nalukumfwo’bubi kani nabona ati ndukufilwa ukupeela abana banji ifi balukupengela koti ni fyefyo abafyashi bambi baalukucita. Na bubuno bukumo, ncilanguluka pali fyefyo abantu balanguluka pali nebo ne bana banji. Kani balalanguluka ati nalipyungishe apapelele amakosa anji pakweba ati ndame icupo canji?”

Ba Janet

Itembelo lilofwako ba Janet ukulama amalangulushi abo ne kukosha bucibusa bwabo na baLesa. Baalilabiile ati: “Ndabombomana makosa mu mpindi ya bushiku, ili takuupo abali bonse abalukupange’congo. Ndalaala lukoso kani natembela ne kupenda Baibolo. Amashiwi amu Baibolo ao ntemenwe makosa ni yayo aalembelwe pa AbaFilipoi 4:6, 7 aakweba’ti: ‘Tekubamba mu mitima neli fya cintu cimo; sombi mu fintu fyonse ku kutembela ne kukombetela ne kutota pamo, nga kukeshibwe kuli baLesa ukulomba kwenu. Popele ubutende bwa baLesa, ubukango’kwishibwa konse, bukalame’mitima yenu ne malangulushi enu.’ Inshiku shonse nalukutembela kuli baYawe kabili nalukumfwo’butende bwaisa pali nebo.”

Ili baYesu baalukulabila Ilyashi lyabo ilya pa Lupili, baalilabiile amashiwi aangatofwako ukucefyako ukubombomana konse lukoso. Kabalabila amashiwi akusangalasha aakweba ati: “BaWishinwe baliishi ifyo ifi mulukupengela, ili tamungabalomba.” (Matayo 6:8) Kanshi tulyelelwe ukubalomba. Itembelo elitofwako ‘ukupalamina kuli baLesa.’ Findo fikafumamo? BaLesa ‘bakapalamina kuli mwebo.’—Jakobo 4:8.

Muli bucine, itembelo lilatofwako makosa ukucefyako ukubombomana. Nakabili, baYawe, ‘abomfwa ukutembela’ balabofwako bonse abapemamo muli bo. (Amasamo  65:2) E mulandu baYesu bafundile abasambile babo “ukulukutembela impindi yonse ne kubulo’kutembuka.” (Luku 18:1) Tulyelelwe ukulomba baLesa ati balukututangilila ne kutofwako. Kabili tulyelelwe ukucetekela ati bakatulambula pa kubacetekela. Tatwelelwepo ukukanika ukofwako kwabo. Kani ‘tulukutembela ukwakubulo’kuleka,’ ninshi tulukulangisha ati tulibacetekele makosa baYawe.—1 AbaTesalonike 5:17.

IFI UKUBA NE KUCETEKELA KWALULA

Pano, kani ukuba ne kucetekela kulaalule’ndo? Ica kutanga, tulyelelwe ‘ukwishiba’ baLesa. (Yoane 17:3) Tulacite’fyo kani twatanga ukwishiba ukulanguluka kwa baLesa ukubuulishishiwe mu Baibolo. Ifi tusambilila mu Baibolo fya kweba ati baLesa balitwishi fwebo umo umo kabili balafwaya ukutofwako. Pano, ukuba ne kucetekela kulicilile na pa kwishiba lukoso baLesa. Kulisankenemo ne kuba na bucibusa ubukosele na bo. Fyenka filya papite’mpindi pakweba’ti tupange bucibusa ne muntu mubyesu, pa kukwata bucibusa na baLesa napo palapite’mpindi. Ukucetekela kwesu kulapitilisha ‘ukukula’ ili tulukusambilila pali baLesa, ili ‘tulukucita ifyakubatemwesha,’ na lyelyo tulukubona ifi balukutofwako. (2 AbaKolinto 10:15; Yoane 8:29) Ukucetekela kwa kube’fyo e kofwako ba Janet ukucefyako ukubombomana.

Ba Janet baalilabiile ati: “Ukubona ifi baYawe baalukungofwako mu fintu fyonse, kulikoseshe ukucetekela kwanji. Bambi abantu balukutupensha kabili twalukubona ati uku ukukatasha tekuti tukushilishepo. Pano kani natembela, baYawe baalukutofwako ukupyungishe’nshila shesho nshinalukulangulapo ne kulanguluka. Lyonse kani nabatoota, ndanuke’fintu ifingi ifi bangofweleko. Lyonse balukutofwako pa mpindi yenka ilya twalukupengela ukofwewa. Nakabili, balimpeele ifibusa ifiweme ifya mwi kelesha lya buKlistu ifili ne kucetekela ukukosele. Ifi ifibusa filangofwako makosa kabili fyakubwenako ifiweme ku bana banji.” *

“Pano ndiishi umulandu baYawe balabiliile pali Malaci 2:16 ati ‘ndukufitilwa ukulekana.’ Ukukusha ku mubyobe wa mu cupo cili pa fintu ifisoomesha makosa. Nangaba’ti imyaka ilipitilepo ukufuma apo abalume banji batushiliile, shimbi impindi ndalyumfwa uwa lukoso kabili ndaba ne citendwe. Lyonse ili naumfwe’fi, ndesha ukucite’fintu ifyakofwako umuntu uuli onse, kabili ukucite’fi kulangofwako na nebo.” Ukulondo’kufunda kwa mu Baibolo ukwa kubulo’kulitalamusha ku bantu bambi kulyofweleko ba Janet ukucefyako ukubombomana. *—Ifisimpi 18:1.

BaLesa “Ni bawishibo [kuli baabo] abatabakwete bawishibo, basololweshi ba bamukamfwilwe.”—Amasamo 68:5.

Ba Janet baalilabiile ati: “Ukusangalala kwanji kulafuma mu kwishiba ati baLesa ‘ni bawishibo [kuli baabo] abatabakwete bawishibo, basololweshi ba bamukamfwilwe.’ Ndiishi ati tabakatushapo koti ni fyefyo abalume banji bacitile.” (Amasamo 68:5) Ba Janet baliishi ati baYawe tabatweshapo “ku kubifya.” Sombi, balapeela amano ne ‘bukulu ubucilile ubwa makosa’ pa kutofwako ukucefyako ukubombomana.—2 AbaKolinto 4:7; Jakobo 1:5, 13.

Pano findo tungacita kani tulabombomana pakuti pa fibipile ifingatucitikila?

^ par. 8 Boneni 1 AbaKolinto 10:13; AbaEbeya 4:16.

^ par. 9 Kani mulukufwaye’fyebo na fimbi ifilukulabila pa fyakucefyako ukubombomana, boneni ifyebo ifili muli Awake! ya July 2015 iili ne mutwi wa kweba’ti “Are You in Control of Your Life?” Epo ili pa www.jw.org.