Tolokeleni

Tolokeleni muye pa filukusangwamo

Ofweniko Ukuwamya Paladaiso ya Kupalanya

Ofweniko Ukuwamya Paladaiso ya Kupalanya

“Nkapalemya pantu apali amakasa anji.”—YISA. 60:13.

INYIMBO: 102, 75

1, 2. Mu Malembo aciEbeya, kani amashiwi akweba ati ‘icipuna ca ku makasa’ alalosha kundo?

BAYAWE balilabiile ati: “Iulu litebe lyanji, ne calo ca panshi na co cipuna ca ku makasa anji.” (Yisa. 66:1) Ukulosha ku “cipuna ca ku makasa” abo, baalilabiile ne kweba ati: “Nkapalemya pantu apali amakasa anji.” (Yisa. 60:13) Kani balacita shani ifyo? Kabili ifyo filaalule’ndo kuli fwebo fwe bekala pa “cipuna ca ku makasa” abo?

2 Amashiwi akweba ati ‘icipuna ca ku makasa’ taaloshapo lukoso ku calo, sombi alipyungishiwe na mu Malembo aciEbeya ku kubuulishisha itempuli lya kale apa abaIshilaeli balukupempelela baLesa. (1 Ifye. 28:2; Amasa. 132:7) Pakuti lyali pa calo, pe tempuli epalukucitilwa ukupempela kwa cine. Popele, baYawe balukumfwa bwino ili balukulibone’tempuli kabili ukubapo kwaliko kwalukulemya apali amakasa abo.

3. Kani itempuli lya baLesa ilya kupalanya lukoso cindo, kabili ni lwisa lyatatikile?

3 Shino nshiku, apacitilwa ukupempela kwa cine talipo ni pe tempuli lya cinenene pa calo. Nangabe’fyo, kuli itempuli lya kupalanya lukoso, ililemya baYawe ukucila na pa cakwibaka icili conse lukoso. Ili itempuli ni nshila baYawe babikileko iilengesha  abantunshi ukuba ifibusa fyabo pakuti pa bupapatilishi bwa baYesu Klistu ne mulubulo wabo. Lyalitatikile mu 29 C.E. Uyu e mwaka baYesu babatishiwe kabili eli basufishiwe ukuba Umupapatilishi Umukulu uwa mwi tempuli lya baYawe ilya kupalanya lukoso.—Ebeya 9:11, 12.

4, 5. (a) Ukwelelwa na Amasamo 99, findo abapyungishi ba cine aba baYawe bafwaisha ukucita? (b) Ni ciisa cakwipusha twelelwe ukulipusha?

4 Pa kulangisha ati tulatoota pali kuku ukwanshika, tulalemya baYawe pa kulukutulishe’shina lyabo kabili tulabatoota pakuti pa kutupeela umulubulo. Cakusangalasha makosa ukwishiba ati abaKlistu ba cine ukucila pali 8 milyoni balukulemya baYawe. Ukupusanako ne ba mu mapempelo ambi abalanguluka ati bakalemya lukoso baYawe kani bakaye kwiulu, Bamboni sha BaYawe bonse baliishi ati balyelelwe ukulemya baLesa yenka ino mpindi kabili penka pano pa calo.

5 Na muli fyefyo, tulalonda icakubwenako ca bapyungishi ba bucetekelo aba baYawe abalabiilwepo pa Amasamo 99:1-3, 5-7. (Pendeni.) Koti ni fyefyo ici icapitala ca Amasamo cilabila, Mose, Aloni, na Samweli balyofweleko ukupempela kwa cine ukwalukucitwa mu mpindi baaliko. Shino nshiku, ili abasufishiwe abashelepo tabangaya kwiulu mu kuba abapapatilishi pamo na baYesu, balapyunga mu bucetekelo mu lubansa lwe tempuli lya kupalanya lukoso. ‘Imbelele shimbi’ ishingi shilabofwako. (Yoa. 10:16) Nangaba ati imbelele shimbi ne basufishiwe balicetekele ukwikala ukupusene, bonse balikatene mu kupempela baYawe pano pa calo icili cipuna ca ku makasa abaLesa. Nangabe’fyo, fwebo umo umo tulyelelwe ukulipusha ati, ‘Kani ndukofwako ukuwamya ukwanshika kwa cinenene uku baYawe babikileko?’

ABAPYUNGILA PE TEMPULI LYA BALESA BAISHIBIKWA

6, 7. Kani ni bwisa ubukatasho ubwatatikile ukuba mwi kelesha lya kutanga ilya buKlistu, kabili bwalishilile shani?

6 Ili papitile lukoso imyaka iinini ukufuma apa ikelesha lya buKlistu lyapangiilwe, bambi mwi kelesha balitatikile ukwalukila baLesa koti ni fyefyo cashimikilwe. (Ifyacit. 20:28-30; 2 Tesa. 2:3, 4) Panuma ya fyefyo, cali icikateshe ukwishiba abaalukupyungila baLesa pe tempuli lyabo ilya kupalanya lukoso. Ili papitile imyaka iingi, impindi yalifikilwe iya kweba ati baYawe balungike’fintu ukupyungisha Imfumu baikalikile, baYesu Klistu.

7 Ukufika mu 1919, abapyungishi ba baYawe abaalukupyungila pe tempuli lyabo ilya kupalanya lukoso baalishibikilwe. Baalisweshiwe mu fya baLesa pakweba ati baLesa balukupokelela imilimo yabo. (Yisa. 4:2, 3; Mal. 3:1-4) Ifi intangishi Paulu yabwene mu cakubona fyalitatikile ukukonshiwa panini panini.

8, 9. Buulishisheni utubeya tutatu utwa ‘paladaiso’ yeyo Paulu abwene mu cakubona.

8 Icakubona Paulu abwene tulacipenda pali 2 AbaKolinto 12:1-4. (Pendeni.) Paulu alilabiile ati icakubona ca kukankamika ici abwene cali ca kufisulula ifyamfiso. Tacalukubuulishishapo ifyaliko mu mpindi yakwe Paulu, sombi ifyali ne kucitika kuntangiile. Kani ‘paladaiso’ yeyo Paulu abwene ili ‘aiketwe ne kutwalwa kwiulu lya buatatu’ ilaalule’ndo? Paladaiso Paulu abwene yali ne tubeya tutatu—lwa ku munefu, lwa ku mupashi, na kwiulu—tonse utwali ne kubako pa mpindi intu imo kuntangiile. Iyi paladaiso ingalosha kuli paladaiso ya pa calo iikabako. (Luku 23:43) Ingalosha na ku butende bwa cinenene ubukaba pa bantu ba baLesa mu calo ca bukumo. Nakabili, ingalosha na kwi shuko lya kuba na baYawe  kwiulu ‘muli paladaiso ya baLesa.’—Ukufisulula 2:7.

9 Pano, lomba, nindo Paulu alabiliile ati ‘alyumfwile amashiwi amfiso, ataelelwe umuntu ukulabila’? Ni pakuti impindi ya kweba ati abuulishishe fyonse lukoso pali cici icakubona yali taingafika. Pano ino mpindi cili icelelwe ukulabila pa mashuko ao abantu ba baLesa balitemwesha.

10. Kani “paladaiso ya kupalanya” ne “tempuli lya kupalanya lukoso” filaalula fintu fimo? Buulishisheni.

10 Impindi ishingi tulalabila pali “paladaiso ya kupalanya.” Aya amashiwi alabuulishisha umutende woyo tulitemwesha na baLesa eli ne baKlistu babyesu. Pano, tatwelelwepo ukulanguluka ati “paladaiso ya kupalanya” ne “tempuli lya baLesa ilya kupalanya lukoso” filaalula fintu fimo. Itempuli lya kupalanya lukoso ni nshila baLesa babikileko iya kubapempelelamo muli bucine. Paladaiso ya kupalanya ilofwako ukwishiba abapyungishi ba baLesa abalukupyungila pe tempuli lyabo ilya kupalanya lukoso.—Mal. 3:18.

11. Kani ni liise’shuko tuli na lyo?

11 Cakusangalasha makosa ukwishiba ati ukufuma mu 1919, baYawe balisuminiishe abantunshi abakubulo’kuwaminina ukupyungila pamo nabo mu kukosha ne kukusha paladaiso yabo iya kupalanya. Kani na mwebo mulapyungako uyu umulimo? Kani mulafwaisha ukupitilisha ukupyungila pamo na baYawe mu kulemya ‘apantu apali amakasa abo’?

UKWANSHIKA KWA BAYAWE KULUKUWAMINAKO

12. Kani findo tucetekele pa kukonshiwa kwa filabiilwe pali Yisaya 60:17? (Boneni icikope pe buula 11.)

12 Umulimo wa kuwamya ukwanshika kwa baYawe ukwa pa calo walishimikilwe pali Yisaya 60:17. (Pendeni.) Ababeele Imboni bukumo balipendelepo pa filangisha uyu umulimo wa kuwamya ukwanshika kwa baYawe neli balyumfwilepo pali o kuli bambi. Pano bambi abakwasu ne nkashi baali ne shuko lya kulibwena uku ukwaluka. Pakuti pali fyefyo, balicetekele ati baYawe balukupyungisha Imfumu bekalikile ukutangililo’kwanshika kwabo. Ukucetekela kwabo ne kwesu kulikoshiwe ukwakuti. Ukumfwe’fi balabiilepo kwakukosho’kucetekela kwenu muli baYawe.

13. Kani findo Amasamo 48:12-14 atubuulo’kucita?

13 Nangaba ne myaka iipitilepo ukufuma apa twabelele Imboni, tulyelelwe ukubuulako bambi pa kwanshika kwa baYawe. Muli cicino icalo muli abantu aba mibelo iibipile, kabili aba kubulo’butemwe. Nangabe’fyo, icakukankamika ca kweba ati pa bantu ba baYawe pali umutende. Tulyelelwe ukubuulako “icitentekwa icikesapo” ifi ‘Sayoni,’ neli ati ukwanshika kwa baYawe kucitile, na bucine ubu twishi pali paladaiso ya kupalanya.—Pendeni Amasamo 48:12-14.

14, 15. Kani ni kwisa ukwaluka ukwacitilwe muli ba 1970, kabili findo fifuminemo?

14 Pa myake’ingi, abakwabesu bambi balibweneko ukwaluka ukucitilwe ukulengeshe ukwanshika kwa baYawe ukwa pa calo ukuwaminako. Balanuka ili mwi kelesha mwali umupyungishi we kelesha uwalukuceba pe kelesha pa mupunda we bumba lya bakulu ba mwi kelesha. Balanuka ili mu fyalo mwali umupyungishi wa mutano pa mupunda wa Komiti ya Mutano. Kabili balanuka na lyelyo plesidenti wa Watch Tower Society alukusalululapo ifyaelelwe ukucitwa pa mupunda we Bumba Ilitangilila ilya Bamboni sha BaYawe. Nangaba ati kwali abalukubofwako, umuntu umo lukoso ewalukusalululapo ifyaelelwe ukucitwa mu makelesha, pa mitano, na pa maofeshi aakulu. Muli ba 1970, ifintu fyalyalukile  pakweba ati uyu umulimo upeelwe ku mabumba abakulu ba mu makelesha pa mupunda wa muntu umo lukoso.

15 Kani tulibwenenemo muli kuku ukwaluka ukucitilwe? Inya. Mba nindo? Ni pakuti uku ukwaluka kwalicitilwe pa mulandu wa kumfwisha ifi Amalembo alabiilepo pa belelwe ukuceba pa makelesha. Pa mupunda wa kutangililwa ne muntu umo lukoso, ukwanshika kwa baYawe kulibwenenemo mu ‘fya mpese’ baYawe bapeele abalalume bonse baabo babikileko.—Efesa 4:8; Ifisi. 24:6.

BaYawe balukupeela abantu konse lukoso ifyebo fya kubofwako pa mpindi balukufipengela makosa (Boneni palakalafu 16 na 17)

16, 17. Kani ni kwisa ukwaluka ukumusangalesheni makosa, kabili nindo kumusangalashisheni?

16 Langulukeni na pa kwaluka ukucitilwe bukumo, ukuli koti kwalulako ifi amabuuku esu aboneka, ifisangwamo, ne nshila sha kuapeelelamo ku bantu. Icine na mwebo mungasumina ati pakuti amabuuku esu alaboneka bwino kabili alalabila pa fyebo ifingofwako abantu, mulaba abasangalele ili mulukuapeela ku bantu pa kutulisha. Kabili, kani twapyungisha ifyakupangapanga fya ino mpindi pa kutulisha bucine, ifili koti ni webusaiti ya jw.org, tulatuntulula baYawe abafwaisha ati abantu konse lukoso balukupokelele’fyebo fya kubofwako pa mpindi balukufipengela makosa.

17 Tungaanuka ifi tubwenamo mu kwaluka ukwacitilwe pakweba ati tulukukwata Amapempelo Acisoolo neli ukulisambisha Baibolo. Nakabili, tulatoota pa kwaluka ukucitilwe ukulosha ku mabungano. Impindi ishingi tulalabila ati amabungano alukuwaminako. Kabili tulabwenamo muli fyefyo tusambilila mu masukuulu amu kwanshika kwa baYawe. BaYawe ebalukushukisha konse uku ukwaluka. Panini panini, balaya ili bawamyako ukwanshika  kwabo ne kukusha umutende tulitemwesha.

IFI NA MWEBO MUNGAWAMYAKO PALADAISO YA KUPALANYA

18, 19. Kani tungofwako shani ukuwamya paladaiso ya kupalanya?

18 Mame’shuko ubukulu baYawe batupeele ilya kuwamyako paladaiso yesu iya kupalanya! Tulacite’fyo kani tuli aba munkonsha mu kutulisha icebo iciweme ica Bufumu ne kofwako abantu ukwisa mu kwanshika kwa baYawe. Impindi shonse twaofwako umuntu ukubatishiwa, ninshi twapyungako umulimo wa kukusha imipaka ya paladaiso ya kupalanya.—Yisa. 26:15; 54:2.

19 Nakabili, tungawamyako paladaiso yesu iya kupalanya kani tulukuwamyako imibelo yesu. Kani twacite’fyo, abantu bambi bakabona ati ukwanshika kwa baYawe kuweme. Ubwishibilo bwesu pali Baibolo talipo ebulengesha lukoso abantu ukwisa mu kwanshika kwa baYawe ne kupalamina kuli baLesa na kuli baYesu. Impindi ishingi, imibelo yesu iiweme eilengesha abantu ukucite’fyo.

Mungapyungako umulimo wa kukusha imipaka ya paladaiso ya kupalanya (Boneni palakalafu 18 na 19)

20. Ukwelelwa na Ifisimpi 14:35, kani findo twelelwe ukulukucita?

20 BaYawe na baYesu balomfwa bwino kani babona umutende uuli pa bantu Babo. Ukusangalala tuba nako ili tulukofwako ukuwamya paladaiso yesu iya kupalanya kulabuulishisha lukoso ukusangalala tukaba nako ili tukalukofwako ukulenge’calo ukuba paladaiso. Nga tulukwanuka ifilabilwe pa Ifisimpi 14:35, ati: ‘Uluse lwa mfumu luli ku mupyungishi uupyunga ne mano.’ Mwane, nga tulukupyunga ne mano inshiku shonse ili tulukofwako ukuwamya paladaiso yesu iya kupalanya!