Intangishi Paulu yalibuulishishe ati baYawe * ni “baLesa bakusangalasha konse; abatusangalasha fwebo pa kupenga kwesu konse.” (2 AbaKolinto 1:3, 4) Popele Baibolo ilatubuula ati tapalipo umuntu uungatofwako koti ni fyefyo baLesa bangatofwa kabili tapalipo ubukatasho ubuli bonse ubungalengesha baWishifwe ba kwiulu ukufilwa ukutusangalasha.

Ukuba, na fwebo tulyelelwe ukucitapo fimo pakweba’ti baLesa batusangalashe. Kani abalaye ba ku cipatela bangatofwako shani kani tatwilepo mu kubabona? Uwakushimika Amosi alipwishe ati: “Abantu babili kani bangenda pamo, apakubulo’kumfwana?” (Amosi 3:3) Popele, Amalembo alatukoselesha ati: “Palamineni kuli baLesa, eli akapalamina kuli mwebo.”—Jakobo 4:8.

Kani tungeshiba shani ati baLesa bakapalamina kuli fwebo? Ica kutanga, ni pakuti impindi  ne mpindi balatubuula ati balafwaya ukutofwako. (Boneni  akabokoshi akali panshi.) Ica bubili, tulyumfwile ifilabiile abantu baabo baLesa basangaleshe, abantu ba cinenene aba kale ne ba ino mpindi.

Koti bantu abengi ino mpindi abalomba baLesa ukubasangalasha, Imfumu Dafidi nayo yaalukupita mu makatasho. Pa mpindi imo Dafidi alilombele baYawe ati: “Mumfwe ishiwi lya kulomba kwanji.” Kani baLesa balimwasukile? Inya. Ni pakuti Dafidi alilabiile nakabili ati: “Balingofweleko. Pakuti pali fyefyo umutima wanji ulukusembo’kwakuti.”—Amasamo 28:2, 7.

UMULIMO BAYESU BAPYUNGA PA KUSANGALASHA ABALUKULILA

BaLesa baalukufwaya ati baYesu balukusangalashako abantu. Pa milimo yeyo baLesa batumine baYesu ukucita, baalibatumine “mu kubacina abo abali ne mitima itobekele” kabili “ne kusangalasha bonse abalukulila.” (Yisaya 61:1, 2) Koti ni fyefyo cashimikilwe, baYesu baalibikile akalango kuli bonse ‘abakatele ku milimo ne fipinto ifilemene.’—Matayo 11:28-30.

BaYesu baalukusangalasha abantu ukupitila mu kubapeela ukufunda ukuweme, pa kubacitila ifiweme, eli shimbi impindi, ukupitila mu kutendulusha abalwashi. Kambi kasuba uwa manata alibakombetele baYesu ati: “Kani mulukufwaya, muliishi ukumposha ifilonda.” BaYesu pa kumumfwila inkumbu, balilabiile ati: “Ndukufwaya; fipole!” (Mako 1:40, 41) Kabili uwali ne manata alipolele.

Pali bubuno bukumo, Abana ba baLesa tabalipo pa calo pakweba’ti batusangalashe. Pano baWishibo, baYawe, “baLesa bakusangalasha,” balipitilishe ukofwako abalukupengela ukusangalashiwa. (2 AbaKolinto 1:3) Langulukeni pa nshila shine ishi baLesa bapyungisha pa kusangalasha abantu.

  • Baibolo. “Pakuti ifintu fyonse ifyalembelwe akale fyalilembelwe ati tufisambile, ati pa kuteke’mitima ne kusangalala pakuti pa malembo tukabe ne lucetekelo.”—AbaLoma 15:4.

  • Umupashi wa BaLesa Uswetelele. Tapapitilepo ne mpindi ukufuma apa baYesu bafwilile, ikelesha lya buKlistu lyonse lyalibeele pa mutende. Mba nindo? “Pa kulukwenda ili litonda [baYawe] ne kusangalala ku mupashi uswetelele.” (Ifyacitilwe 9:31) Umupashi uswetelele, amakosa abaLesa, uli ne makosa ukwakuti. BaLesa bangaupyungisha pa kusangalasha uuli onse uulukupita mu bukatasho ubuli bonse.

  • Itembelo. “Tekubamba mu mitima neli fya cintu cimo; sombi mu fintu fyonse ku kutembela ne kukombetela ne kutota pamo, nga kukeshibwe kuli baLesa ukulomba kwenu. Popele ubutende bwa baLesa, ubukango’kwishibwa konse, bukalame’mitima yenu ne malangulushi enu.”—AbaFilipoi 4:6, 7.

  • AbaKlistu Babyesu bangaba ifibusa ifi tungayako mu kusangalashiwa ili tuli ne makatasho. Paulu aliitile ababyakwe ati “abantu abalukunsangalasha” “mu kupenga ne kukululuka.”—AbaKolosai 4:11; 1 AbaTesalonike 3:7.

Pano mungalukwalakanya ifi baYawe batusangalasha muli shishi inshila. Nga tulabile pa bantu abapitilepo mu makatasho aalabilwapo mu ciputusha ca kutanga. Koti ni bo, na mwebo mungeshiba ati baLesa balakonsha ukulaya kwabo ukuweme ukwa kweba’ti: “Koti ni fyefyo ifi banyina balukusunsa umwana wabo, fyopele’fyo efi nkamusunseni.”—Yisaya 66:13.

^ par. 3 Baibolo ilabuulishisha ati baYawe e shina lya baLesa.