Tolokeleni

Tolokeleni muye pa fyebo fya bubili

Tolokeleni muye pa filukusangwamo

Bamboni sha BaYawe

IciLamba

Akatambo ka Wakulama (Akakusambililamo)  |  September 2016

 UMUTWI WA INO MAKASHINI | KANI NI BANI ABANGAMUSANGALASHENI?

Tulasangalashiwa mu Mpindi ya Makatasho

Tulasangalashiwa mu Mpindi ya Makatasho

Tulapita mu makatasho aalekenelekene. Tekuti tukonshepo ukuciicila amakatasho onse, pano nga tubone ifyakubwenako fya bantu bane abo twalabilapo kale. Boneni ifi abantu abaapitile mu makatasho aalekenelekene basangalashiwe kuli baLesa.

ILI INCITO YASHILA

Ba Seth * baalilabiile ati, “Incito nalukupyunga ne yalukupyunga abakashi banji yalishilile pa mpindi intu imo. Pa myaka ibili twalukupyungisha lukoso ifya mpese ifi abantu balukutupeela kabili twalukupyungako na tumilimo twa pa mpindi inini lukoso. Pakuti pali fyefyo, abakashi banji, ba Priscilla, baalibombomene, kabili nebo nalukulyumfwa uwa lukoso.

“Findo fyatofweleko ukulukuli abasangalele? Ba Priscilla lyonse balukulyanushako amashiwi baYesu balabiile aalembelwe pali Matayo 6:34. BaYesu balilabiile ati tatwelelwepo ukulukubamba mu mitima pakuti pa fya mailo, pakuti akasuba kamo kamo kali ne fyakubamba fya kako. Kabili pakuti ba Priscilla balukutembela lyonse, balukukoshiwa. Kuli nebo, ilembo lya Amasamo 55:22 lyalukunsangalasha. Koti mwimbishi wa masamo, nalukubika icipinto canji pali baYawe, kabili nalibwene ati baalukunkosha. Nangaba’ti pali ino mpindi ndapyunga, tulipufishe amekalilo esu ukulonda ukufunda kwa baYesu ukulembelwe pali Matayo 6:20-22. Ne cicililepo ca kweba’ti, tulipalamine makosa kuli baLesa kabili tulikateene mu cupo cesu.”

Ba Jonathan balilabiile ati, “Ili indalama twalukupyungisha mu busulwishi bwesu shalilile, nalibombomene pa fyali ne kutucitikila kuntangiile. Pakuti mu calo mwali amakatasho amu fya ndalama, nalilufishe fyonse ifi napyungiile pa myaka 20. Nebo ne bakashi banji twalitatikile ukutoosha makosa pa fyakupyungisha indalama. Twalukufilwa ne kushita ifintu ukupyungisha kadi ya ku banki ni pakuti twalukutiina ukutubuula ati tatukwetepo indalama.

“Pano Amashiwi abaLesa ne mupashi wabo fyalitofweleko ukusalululapo bwino ifya kucita. Nalisambilile ukusumina ukupyunga umulimo uuli onse lukoso, kabili twalilekele ukushita ifi tatwalukupengelapo. Pakuti ni fwe Bamboni sha BaYawe, abakwabesu tupempela nabo balukutofwako. Balitofweleko ukulukulibona ati tulicindeme kabili lyonse ili ifintu fyakatasha balukutofwako.”

ICUPO KANI CASHILA

Ba Raquel balilabiile ati, “Ili abalume banji banshiile nalisoomenwe kabili nalikalipile. Penka’po nalibombomene ukwakuti. Pano, nalipalamine kuli baLesa, kabili baalinsangaleshe. Pakuti nalukutembela inshiku shonse, umutende wa baLesa walilamine umutime wanji. Caali koti balukulungisha umutima wanji uutobekele.

“Kabili pakuti pa Mashiwi abo, Baibolo, nalikomekele ubukali nakwete. Nalitemenwe makosa amashiwi intangishi Paulu yalabiile pa AbaLoma 12:21, aakweba’ti: ‘Tekukomekwa ku kubifya; sombi ukukomeke ukubifya ku fiweme.’

“Umubyanji umo alingofweleko ukwishiba umulandu naelelwe lukoso ukulubako ku bukatasho nali nabo. Alindangishe ilembo lya Uwakutulisya 3:6 ne kumbuula ati kulaba ‘ne mpindi ya kulufya.’ Uku kwali kufunda ukwakosele ukulonda, pano eko nalukupengela. Pali ino mpindi ndibikile akalango ku fintu fimbi.”

Ba Elizabeth balilabiile ati, “Icupo kani cashila, tulapengela abakutofwako. Nebo nalikwete umubyanji uwalukungofwako inshiku na nshiku. Alukulilila pamo na nebo, alukunsangalasha, kabili alukufwaya nebo ukulyumfwa utemiwe lyonse. Ndicetekele ati baYawe balimupyungishe pakweba’ti bansangalashe.”

MU MPINDI YA KULWALA NA MU BUCEKULU

Ba Luis, abalabilwapo mu ciputusha ca kutanga, balikwete ubukatasho bwa ku mutima, kabili pa miku ibili baalipulukile mu mfwa. Pali ino mpindi balapengela ukwikala kuli oxygen pa maawashi 16 akasuba kamo. Balilabiile ati, “Ndatembela kuli baYawe lyonse. Kabili panuma ya kutembela kuli baLesa, ndomfwa umupashi  wabo wampeela amakosa. Itembelo lilangofwako ukupitilisha ukuba umukosele ni pakuti ndicetekele muli baLesa kabili ndiishi ati balimbikileko akalango.”

Ba Petra abacilile imyaka 80 balilabiile ati, “Ndafwaya ukucite’fingi, pano tekuti nkonshepo. Ukubonako uku amakosa anji alukushila kulambombomanika. Ndakatala kabili imiyanda eingofwako. Impindi ishingi ndalanguluka pali fyefyo baYesu balombele baWishibo kani fingacitika ukufumyapo ubukatasho baalukupitamo. Pano, baYawe baalipeele baYesu amakosa, kabili na nebo balankosha. Itembelo lilangofwako inshiku shonse. Ndomfwako bwino panuma ya kulabila na baLesa.”—Matayo 26:39.

Ba Julian, abalwele ubulebe pa myaka cipale 30, balilabiile ati nabo balomfwa fintu fimo. Balilabiile ati, “Pa mupunda wa kwikala pa cipuna iciweme ndekala pa ci cinga ca balemene. Pano ndisangalele mu mweo wanji ni pakuti nditemenwe ukofwako bambi. Ukupeelako bambi ifintu kulalengesha amakatasho tulukupitamo ukubako aanini, kabili baYawe balitulaile ukutukosha mu mpindi ya kupenga kwesu. Koti ni ntangishi Paulu, na nebo ningalabila ati: ‘Ndi ne makosa apa fintu fyonse muli [baLesa] abankosha.’”—AbaFilipoi 4:13.

UWA MU CISOOLO KANI AFWA

Ba Antonio baalilabiile ati, “Ili batata bafwile panuma ya kubapunka kuli motoka, pa kutanga nshinasumiinepo. Nalukubona ati ifya kube’fyo tekuti ficitikepo, ni pakuti abene baalukulipitila lukoso mu musebo. Pano tapaalipo ifili fyonse ifi naali ne kucita. Ili tabangafwa baalilwele pa nshiku 5 ica kweba’ti tabaalukulabilapo ne kulabila. Kani ndi na bamayo nshalukulilapo, pano kani naba nenka nalukulila ukwakuti. Lyonse nalukulipusha ati ‘Nindo ifi fyancitikila? Nindo?’

“Muli shonse shilya inshiku sha kulila, nalukulomba baYawe ukunkosha ne kumpeela umutende. Panini panini nalukuya ili ngumfwako bwino. Nalyanukile ifi Baibolo ibuulishisha ati ‘ifyakucitika’ fingafikila uuli onse lukoso. Pakuti baLesa tekuti babepepo, ndicetekele ati nkababona batata nakabili ili bakabuushiwa.”—Uwakutulisya 9:11; Yaone 11:25; Tito 1:2.

“Nangaba’ti umwana wesu alifwile ili indeke yaponene, tucaanuka ifiweme ifi twalukucitila pamo nakwe.”—Ba Robert

Ba Robert abalabilwapo mu ciputusha ca kutanga, nabo balomfwa fintu fimo. Balilabiile ati: “Nebo ne bakashi banji, twalibeele ne mutende uulabilwepo pa AbaFilipoi 4:6, 7. Twalibeele na wuyu umutende pakuti pa matembelo twalukutembela kuli baYawe. Uyu umutende walitofweleko ukubuulako abatulisha ifyebo mu calo pa bucetekelo bwa kubuuka. Nangaba’ti umwana wesu alifwile ili indeke yaponene, tucaanuka ifiweme ifi twalukucitila pamo nakwe. Efi twesha ukulukwalakanyapo makosa.

“Ili Bamboni babyesu batubuulile ati balitubwene pa TV tulukubuulishisha ubucetekelo bwesu ne lupata, twalibabuulile ati twalikonseshe ukucite’fyo ni pakuti pa matembelo ao bambi balukututembelelako. Ndicetekele ati baYawe baalukutusangalasha ukupitila mu fyebo ifiweme ifi abakwabesu baalukutubuulako.”

Koti ni fifi twabona mu fyakubwenako twalabilapo, baLesa bangasangalasha abantu abalukupita mu makatasho aalekenelekene. Nga kuli mwebo? Nangaba ne bukatasho mungalukupitamo, mungasangalashiwa mu mpindi ya kukatashiwa kwenu. * Popele, lekeni baYawe bakamofweniko, pakuti ni “baLesa bakusangalasha konse.”—2 AbaKolinto 1:3.

^ par. 5 Bambi talipo mashina abo.

^ par. 23 Kani mungatemwa ukupalamina kuli baLesa, ne kusangalashiwa kuli bo, mwane boneni Bamboni sha BaYawe abekala ku mupunda kwenu neli lembeleni iofeshi lya mutano mu calo cenu.