Tolokeleni

Tolokeleni muye pa fyebo fya bubili

Tolokeleni muye pa filukusangwamo

Bamboni sha BaYawe

IciLamba

Akatambo ka Wakulama (Akakusambililamo)  |  October 2016

Langisheni Ukucetekela Kwenu mu Milayi ya BaYawe

Langisheni Ukucetekela Kwenu mu Milayi ya BaYawe

“Ukucetekela . . . e mboni ya fintu ifi tafibwenwe.”—EBEYA 11:1.

INYIMBO: 54, 125

1. Kani tulyelelwe ukumfwa shani pa kucetekela tukwete?

UKUCETEKELA mibelo iicindeme ku baKlistu. Pano talipo ni bonse abali ne kucetekela. (2 Tesa. 3:2) Nangabe’fyo, baYawe balipeele abapyungishi babo bonse “ifya kwesha ifya kucetekela.” (Loma 12:3; Galatya 5:22) Bonse abali ne kucetekela balyelelwe ukulukutoota.

2, 3. (a) Ni esa amashuko umuntu uuli ne kucetekela angalitemwesha? (b) Ni fisa fyakwipusha twakwambaalapo?

2 BaYesu Klistu balilabiile ati baWishibo bakwiulu balaleta abantu kuli Bo abene ukupitila mu Bana Babo. (Yoa. 6:44, 65) Umuntu kani acetekela muli baYesu, alafitulukilwa ifyakubifya fyakwe. Ici cilamulengesha ukuba ne shuko lya kuba icibusa ca baYawe umuyayaya. (Loma 6:23) Findo twacitile pakweba’ti twelelwe ukushukishiwa muli yiyi inshila? Pakuti tuli bakubifya, ilambulo ilitwelelwe lukoso ni mfwa. (Amasa. 103:10) Pano, baYawe baalibwene ubune  muli fwebo. Pakuti pa luse lwabo, baalitusambishe icebo iciweme. Popele, twalitatikile ukucetekela muli baYesu pakweba’ti tukakwate umweo wa muyayaya.—Pendeni 1 Yoane 4:9, 10.

3 Pano, kani ukucetekela cindo? Kani kwishiba lukoso mwi langululushi ifintu ifi baLesa bakatucitila kuntangiile? Ne cicililepo ukucindama, tungalangisha shani ati tuli ne kucetekela?

‘MULUKUCETEKELA MU MUTIMA WENU’

4. Buulishisheni umulandu tungalabilila ati ukucetekela talipo kwishiba lukoso ifintu.

4 Ukucetekela kulicilile na pa kwishiba lukoso ukufwaya kwa baLesa. Cintu icilengesha umuntu ukulukucita ifintu ifilukusuminanshanya ne kufwaya kwa baLesa. Ukucetekela inshila baLesa bakapyungisha pa kupulusha abantunshi kungalengesha umuntu uuli ne kucetekela ukubuulako bambi icebo iciweme. Intangishi Paulu yalibuulishishe ati: “Pakuti kani wakufisulula ku kanwa kobe ati baYesu ni baShikulu, ne kulukucetekela mu mutima wobe ati baLesa balibabushishe pakati ka bafwile, wakupuluka; pakuti mu mutima abantu balacetekela ukwakuleta ukulungama; na ku kanwa nako balafisulula ukwakuleta ukupuluka.”—Loma 10:9, 10; 2 Koli. 4:13.

5. Nindo ukubeela ne kucetekela kucindamine, kabili tungakulama shani? Labileni pa cakubwenako.

5 Kanshi twabona ati kani tulukufwaya ukwikala umuyayaya mu calo ca baLesa ica bukumo, tulyelelwe ukuba ne kucetekela ukukosele eli ne kukulama. Ukulama ukucetekela ukukosele tungakupalanya kuli fyefyo iciti cipengela amenda. Ukupusanako ne citi ca kupanga lukoso, iciti ca cinenene cilaaluka-luka. Iciti ca cinenene cingafwa kani takuupo amenda neli cingakula bwino kani kuli amenda aengi. Kani takulipo amenda, ne citi icalukuboneka bwino kabili iciweme cilafwa mu kupelako. Efi cili na ku kucetekela kwesu. Kani tatubikileko akalango ukucetekela kwesu kukafwa. (Luku 22:32; Ebeya 3:12) Pano kani twapyungisha, ukucetekela kwesu ‘kukalukukulo’kwakuti,’ kabili tukaba “bakosele mu kucetekela.”—2 Tesa. 1:3; Tito 2:2.

IFI BAIBOLO IBUULISHISHA UKUCETEKELA

6. Ni muli shisa nshila shibili ilembo lya AbaEbeya 11:1 libuulishisha ukucetekela?

6 Ifi Baibolo ibuulishishe ukucetekela fililembelwe pa AbaEbeya 11:1. (Pendeni.) Ukucetekela kulyeyamine pa fintu fibili ifi tatubonapo: (1) ‘Ifintu ififwailwe.’ Pali fifi ifintu pangaba ne fintu ifi baYawe batulaile ati bakatucitila kuntangiile pano ifi tafingacitika, ifili koti kushila kwa bumbifi ne kwisa kwa calo ca bukumo. (2) ‘Ifintu ifi tafibwenwe.’ Pali lili ilembo, ishiwi lya ciGiliki ilyalwilwe “e mboni” lilalosha ku bushininkisho ubwa fintu ifi tafibonwa, ifili koti kucetekela ati baYawe, baYesu Klistu, ne nkalamba eko bali kabili ne kucetekela ati ifintu ificitwa ne Bufumu bwa kwiulu fya cinenene. (Ebeya 11:3) Tungalangisha shani ati ukucetekela kwesu kwa cinenene kabili ati tulicetekele mu fintu ifi tafibonwa ifilabiilwepo mu Mashiwi abaLesa? Ukupitila muli fyefyo tulabila na fyefyo tucita, ni pakuti ifi e filangisha ati ukucetekela kwesu kulikumanine.

7. Kani icakubwenako cakwe Noa cilatofwako shani ukwishiba ifi caalula ukuba ne kucetekela? (Boneni icikope icili pe buula 26.)

7 Pa AbaEbeya 11:7 palabuulishisha ukucetekela kwakwe Noa woyo “pa kucenjeshiwa ifya fintu ifi tafingabonwa, eko abele ne kutonda, ne kwibako’bwato ubukulu mu kupulucilamo aba mu cisolo cakwe.” Noa alilangishe ati ali ne kucetekela pa kwibaka cibwato icikulu. Ukwakubula ne kukanika, bambi abantu balukumwipusha umulandu alukwibakila cibwato. Kani Noa alukwikala celele neli alukubabuula  ati babike lukoso akalango ku fintu fyabo? Neli panini! Ukucetekela kwakwe kwalimulengeshe ukutulisha ne lupata ne kucenjesha abantu pa konaala uku baLesa baali ne kuleta. Nakabili, cipale Noa alukulabila mu kushinkamika amashiwi baYawe balabiile kuli ye aakweba’ti: “Ukupelako kwa ba minefu bonse kwamficila pa menso; pakuti icalo cilikumene ubungwa pakuti pali bo . . . ndukuleto’bulobe bwa menda pa calo, mukonala fyonse ifya minefu, ifili ne kupema kwa mweo, panshi yeulu; ifintu fyonse ifili pa calo ca panshi fikafwa.” Nakabili, Noa alukubuula abantu inshila ya kupulukilamo lukoso pa kulukubweleshapo ukukomeka kwa baLesa ukwa kweba’ti: “Ukenjile mu bwato.” Popele, Noa alilangishe ati aali ne kucetekela pa kuba “uwa kutulisha ukulungama.”—Ifyakuta. 6:13, 17, 18; 2 Pet. 2:5.

8. Findo Jakobo abuulishishe ukulosha ku kucetekela uku abaKlistu belelwe ukuba nako?

8 Cilaboneka koti inkalata yakwe Jakobo yalilembelwe panuma lukoso ili intangishi Paulu yabuulishishe ifi ukuba ne kucetekela kwalula. Koti ni Paulu, Jakobo alibuulishishe ati ukucetekela takupelelapo lukoso pa kusumina, kulyelelwe ukulangishiwa na mu ficitwa. Jakobo alilembele ati: “Undanjishe ukucetekela kobe apakubule’fyakucita, na nebo na kukulanjisha ukucetekela ku fya kucita fyanji.” (Jako. 2:18) Nakabili Jakobo alibuulishishe ukupusana  ukuli pa kusumina lukoso na pa kulangisha ukucetekela. Ifibanda filisumiine ati baLesa eko bali, pano tafilipo ne kucetekela kwa cinenene. Pakuti tafilipo ne kucetekela kwa cinenene, filacita ifipusene ne kufwaya kwa baLesa. (Jako. 2:19, 20) Mu kupusanako, ukulosha ku muntu na umbi uwa kale uwali ne kucetekela, Jakobo alipwishe ati: “Ablaamu wishifwe kanshi taalilunjicilwe ku fyakucita, pa ku muposa Isaci umwana wakwe pa conto ica milambu? Wabona ati ukucetekela kwalicitile pamo ne fyakucita fyakwe; nakabili ati ku fyakucita eko kwawaminine ukucetekela.” Pano, pa kubuulishisha ati ukucetekela kulyelelwe ukulukubwenekela mu fyakucita, Jakobo alilabiile nakabili ati: “koti ni fyopele’fyo ifi ufwile umubili apa kubulo’mupashi, fyopele’fyo ne kucetekela apa kubule’fyakucita kulifwile.”—Jako. 2:21-23, 26.

9, 10. Kani ifi Yoane alembele filatofwako shani ukumfwisha umulandu cicindamine ukulukulangisha ukucetekela kwesu?

9 Panuma ya myaka ukucila pali 30, intangishi Yoane yalilembele ibuuku lya cebo iciweme ne nkalata shitatu. Kani ifi Yoane alembele ukulosha ku kucetekela fyalukusuminanshanya ne fyalembele bambi abalembeshi ba Baibolo? Ukucila ne balembeshi bambi, Yoane alipyungishe ishiwi lya ciGiliki ilyalulwa shimbi impindi ati “ukupemamo.”

10 Ku cakubwenako, Yoane alibuulishishe ati: “Uyo ulukupemamo mu Mwana e uli ne mweo uwa muyayaya; sombi uyo utaasuminino’Mwana taakabonapo umweo; sombi ubukali bwa baLesa bulukwikala pali ye.” (Yoa. 3:36) Mu kuba ne kucetekela mulisankene ne kumfwila baYesu. Impindi ishingi Yoane alukwambula amashiwi baYesu balabiile aabuulishisha ati tulyelelwe ukupitilisha ukucita ifilangisha ati tuli ne kucetekela.—Yoa. 3:16; 6:29, 40; 11:25, 26; 14:1, 12.

11. Tungalangisha shani ati tulatoota pa kwishiba bucine?

11 Tulyelelwe ukulukutoota pali fyefyo baYawe bapyungishe umupashi wabo uswetelele pa kutubuulishisha bucine ne kutupeela ishuko lya kulangisha ukucetekela kwesu mu cebo iciweme. (Pendeni Luku 10:21.) Tatwelelwepo ukuleka ukutoota baYawe pa kutupalamisha kuli bo ukupitila mu Bana babo, “abalengele ne kukuwaminisha ukucetekela kwesu.” (Ebeya 12:2) Pa kulangisha ati tulatoota pa luse baLesa batulangishe, tulyelelwe ukupyungisha ukulukukosha ukucetekela kwesu ukupitila mu kutembela ne kulukulisambisha Amashiwi abaLesa.—Efesa 6:18; 1 Pet. 2:2.

Mulukulangisha ukucetekela kwenu pa kulukutulishe’cebo iciweme lyonse ili mwaba ne shuko (Boneni palakalafu 12)

12. Kani tungalangisha shani ati tuli ne kucetekela?

12 Tulyelelwe ukupitilisha ukulangisha ukucetekela kwesu mu milayi ya baYawe. Tungacite’fyo mu fintu ifi na bambi bangabona. Ku cakubwenako, tulapitilisha ukulukutulisha pa Bufumu bwa baLesa ne kupyungako umulimo wa kupanga abasambile. Nakabili, tulacite’fiweme “ku bantu bonse, tanje cine kuli babo aba mu cikoto ca kucetekela.” (Galatya 6:10) Kabili tulapyungisha ukufuula “ubuntu bwa kale pamo ne fyakucita fya bubo fyonse,” pa kubulo’kucita ifili fyonse ifingonaala bucibusa bwesu na baLesa.—AbaKolo. 3:5, 8-10.

UKUCETEKELA MULI BALESA KULI KABEYA KA CAKWIBAKILAPO CESU

13. Kani ukuba ne ‘kucetekela ukwa kuli baLesa’ kulicindeme shani, kulipalanishiwe ku’ndo, kabili nindo?

13 Baibolo ilalabila ati, “apa kubulo’kucetekela tapeshiba ukubatemwesha [baLesa]: pakuti uyo uwa kwisa kuli baLesa e ungacetekela ati epo bali, nakabili ati bo bakubalambula abalukubafwaya-fwaya.” (Ebeya 11:6) Amashiwi abaLesa alabuulishisha ‘ukucetekela ukwa kuli baLesa’ ati kuli kabeya ka cakwibakilapo icipengelwa ku muntu uuli onse pakweba’ti abe ne kupitilisha ukuba umuKlistu wa  cine. (Ebeya 6:1) Pali ceco icakwibakilapo, abaKlistu balyelelwe ukulundapo ‘ukucetekela kwabo’ ne mibelo imbi iicindeme pakweba’ti ‘balukulilame mu butemwe bwa baLesa.’—Pendeni 2 Petilo 1:5-7; Juda 20, 21.

14, 15. Nindo ukuba ne butemwe kucindamine ukucila ukuba lukoso ne kucetekela?

14 Abalembele Amalembo AciGiliki AabuKlistu baalilangishe ifi ukucetekela kucindeme ukupitila mu kukulabilapo imiku iingi. Tapalipo imibelo imbi iilabilwepo makosa ukucila pa kucetekela. Kani ici cilukwalula ati ukucetekela e mibelo iicililepo ukucindama ku baKlistu?

15 Pa kupalanya ukucetekela ku butemwe, Paulu alilembele ati: “Kani nshikwete-butemwe, ndi wa lukoso.” (1 Koli. 13:2) BaYesu balibuulishishe umulandu cicindamine kuli fwebo ukutemwa baLesa ili balukwasuka icakwipusha cakweba’ti: “Mba lise’funde lya kucila ubukulu pa mafunde onse?” (Mat. 22:35-40) Imibelo iingi yeyo abaKlistu belelwe ukuba nayo ilacitwa pakuti pa butemwe, ukubikako ne kucetekela. Baibolo ilalabila ati “ubutemwe . . . bulacetekele’fintu fyonse.” Pakuti pa butemwe tulacetekela ifintu ifi baLesa balabiile mu Mashiwi abo ati fya cine.—1 Koli. 13:4, 7.

16, 17. Kani imibelo ya kucetekela ne butemwe ilabuulishishiwa shani mu Malembo, pano ni isa mibelo iicililepo ukucindama, kabili nindo?

16 Pakuti pali fyefyo ukuba ne mibelo ya kucetekela ne butemwe kucindeme, abalembeshi ba Baibolo abaali abaKlistu balukulabila pali yiyi imibelo mu kulondana. Paulu alikoseleshe abaKlistu babyakwe ukufwala “ica kulaminamo intibi ica kucetekela ica butemwe.” (1 Tesa. 5:8) Petilo alilembele ati: “Nangaba’ti tamwababwene [baYesu], mulibatemenwe. Nangaba’ti tamubabonapo, mulabacetekela.” (1 Pet. 1:8; NWT) Jakobo alipwishe abaKlistu babyakwe abasufishiwe ati: “BaLesa kanshi tabalisalulwile abo abapengele ifya buboni ubwa mu calo ca panshi ukwikala babile ne kucetekela, ni mpyani sha bufumu ubo ubu balaile ukubapela abo ababatemwa?” (Jako. 2:5) Yoane alilembele ati: “Ifunde [lya baLesa] ni lili, ati tungacetekela mwi shina lya Mwana wakwe, baYesu Klistu, ne kulukutemwansyanya, koti ni fyopele’fyo ifi batufundile.”—1 Yoa. 3:23.

17 Nangaba’ti ukucetekela kucindeme, kuntangiile, tatukelelwapo ukucetekela mu milayi ya baLesa iya kutupeela icalo ca bukumo ni pakuti pali yeyo impindi ninshi balikosenshe ukulaya kwabo. Pano lyonse tukalukupengela ukulangisha ubutemwe kuli baLesa na ku bantu babyesu. Penka, Paulu alilembele ati: “Pano palekala ukucetekela ne kupembelela ne butemwe, ifi fyotatu; sombi ica kucilo’bukulu butemwe.”—1 Koli. 13:13.

ICILANGISHA ATI TULI NE KUCETEKELA

18, 19. Findo ifilangisha ati tuli ne kucetekela pali ino mpindi, kabili ni bani abalengele ifi ukukonshiwa?

18 Pali bubuno bukumo, abantu ba baYawe balalangisha ati balicetekele Ubufumu bwa baLesa. Ici cililengeshe abantu ukucila pali 8 milyoni ukuba muli paladaiso ya kupalanya lukoso iya mu calo conse. Muli yiyi paladaiso muli ifisepo fya mupashi. (Galatya 5:22, 23) Ici cilalangisha ati mu cinenene tuli ne kucetekela kabili tuli ne butemwe!

19 Tapalipo umuntu uungalabila ati e ukonseshe ukucite’fyo. Ni baLesa besu e bakonseshe. Uyu umulimo ulukuleta ubuleme “kuli baYawe, ne keshibilo ka muyayaya akatakashimanganishiwa.” (Yisa. 55:13) Mu cinenene, “ni mpese iya fumine kuli baLesa” pakweba’ti tupuluke “pakuti pa kucetekela.” (Efesa 2:8) Paladaiso yesu iya kupalanya lukoso ikapitilisha ukukula mpaka mu calo conse mukesule abantu abawaminine, abalungeme, kabili abasangalele pakweba’ti balukulemya ishina lya baLesa umuyayaya. Nga tupitilishe ukucetekela mu milayi ya baYawe!