Tolokeleni

Tolokeleni muye pa filukusangwamo

Kosheni Ukucetekela Kwenu mu Mashuko Akuntangiile

Kosheni Ukucetekela Kwenu mu Mashuko Akuntangiile

“Ukucetekela e kwishibila kwa fintu ififwailwe, e mboni ya fintu ifitafibwenwe.”—EBEYA 11:1.

INYIMBO: 81, 134

1, 2. (a) Kani ubucetekelo bwa baKlistu ubwa kuntangiile bulipusene shani ne bucetekelo bwa bantu ba mu calo cakwe Satana? (b) Ni fisa fyakwipusha twakwambaalapo?

MAMA ubune ifintu baYawe bakacitila abaKlistu bacine kuntangiile! Fwense lukoso, nangaba’ti tulisufiwe neli tuli mwi bumba lya ‘mbelele shimbi,’ tulapembelela ukubonako uku baLesa bakakonsha ukufwaya kwabo ukwa pa kutanga ne kulemya ishina lyabo. (Yoa. 10:16; Mat. 6:9, 10) Ifi e fintu ificindeme ifi abantu bonse bangafwaisha. Nakabili, tulapembelela ishuko lya kuba ne mweo wa muyayaya mu ‘maulu abukumo’ aabaLesa neli mu ‘calo ca bukumo’ ica baLesa. (2 Pet. 3:13) Nangabe’fyo, pali ino mpindi tulukufwaya ati baYawe bapitilishe ukulukushukisha abantu babo.

2 Abantu abengi mu calo bangakwata ubucetekelo bwabo, pano bangalukukanika kani ifi bacetekele fikacitika. Ku cakubwenako, abantu abakuti ubwingi abateya ifyakwangala fya kushitikapo bangacetekela ati kuntangiile bakawina indalama ishingi, pano tekuti bacetekelepo makosa ati ifyo fikacitika. Pano, ukucetekela kwa cinenene, ‘kwishibila kwa fintu ififwailwe’ ifi abaKlistu bapembelela. (Ebeya 11:1) Pano, mungalanguluka ati, kani mungakosha shani ukucetekela kwenu? Kabili mungabwenamo shani mu kuba ne kucetekela ukukosele?

3. Findo filengesha abaKlistu ukuba ne kucetela?

 3 Abantu tabafyalwapo ne kucetekela, kabili takwisapo ukwine lukoso. Umupashi wa baLesa e ofwako umuntu uuli ne mutima uunakile ukuba ne kucetekela. (Galatya 5:22) Baibolo tailabilapo ati baYawe balapengela ukuba ne kucetekela. Pakuti ba makosa onse kabili balikwatishe amano, tapalipo ifili fyonse ifingabalengesha ukubulo’kukonsha ukufwaya kwabo. BaWishifwe ba kwiulu tabakanikapo ati bakakonsha ukucita ifi bafwaya ukucita kuntangiile. Kuli bo cili koti ifyo ifintu filicitikile kale. Penka balalabila ati: “Fyacitwa!” (Pendeni Ukufisulula 21:3-6.) Ukwishiba ati baYawe ni “baLesa ba bucine” kabili ati balakonsha ukulaya kwabo konse, kulofwako abaKlistu ukuba ne kucetekela.—Ndute. 7:9; NWT.

IFI TUNGASAMBILILAKO KU BANTU BA KALE ABAALI NE KUCETEKELA

4. Ni bwisa bucetekelo abalalume ne banakashi abaliko ili baYesu tabangesa bacindikile?

4 Mu capitala 11 ice buuku lya AbaEbeya muli amashina abalalume ne banakashi 16 abaali ne kucetekela. Umulembeshi wa lili ibuuku alilabiile pali bo na bambi “abashimikilwe pakuti pa kucetekela kwabo.” (Ebeya 11:39) Bonse baali ne ‘kwishibila kwa fintu’ ukwa kweba’ti baLesa baali ne kwimya “umwana” uwali ne konaala Satana ne kukonsha ukufwaya kwa baYawe ukwa pa kutanga. (Ifyakuta. 3:15) Balya abantu ba bucetekelo baalifwile ili “umwana” walailwe, baYesu Klistu, tangesula ishuko lya kuya kwiulu. (Galatya 3:16) Nangabe’fyo, pakuti baYawe balakonsha fyonse ifi balaya, aba abantu bakabuushiwa ne kuba ne shuko lya kuba abawaminine penka pano pa calo mu paladaiso.—Amasa. 37:11; Yisa. 26:19; Osiya 13:14.

5, 6. Findo Ablaamu ne cisoolo cakwe batontomekelepo, kabili balipitilishe shani ukuba ne kucetekela ukukosele? (Boneni icikope icili pe buula 21)

5 Pa AbaEbeya 11:13 palalabila ukulosha kuli bamo abaliko ili baYesu tabangesa ati: “Abo bonse balifwile ili bacicetekela, lomba tabangapoka ne malailo; sombi baliabwene ukutali ne kwasekelela.” Umo pali baba ni Ablaamu. Kani Ablaamu alukwalakanyapo ifi amekalilo ali ne kuba ili “umwana” akalukwikalika? BaYesu balyasukile bwino ico icakwipusha ili balabiile ku bapate babo ati: “Ablaamu wishinwe walukusangalalo’kubona akasuba kanji; naye alikabwene, ne kutemwa.” (Yoa. 8:56) Fyopele’fyo efi cali na kuli Sala, Isaci, Yakobi, na bambi abatontomekele pa mushi “uwa kwibakwa ne kucitwa kuli baLesa,” e kweba’ti Ubufumu bwa baLesa ubwa kuntangiile.—Ebeya 11:8-11.

6 Kani Ablaamu ne cisoolo cakwe balipitilishe shani ukuba ne kucetekela ukukosele? Cipale balisambilile pali baLesa ukufuma ku bantu ba bucetekelo abaali abakulu, ukupitila muli fyefyo baLesa balukubabuula, neli mu kupenda ifyebo ifyaliko pali ilye’mpindi. Ne cicindeme makosa cakweba’ti, tabaalubileko kuli fyefyo basambilile pano balicindikile imilayi ya baLesa ne mafunde abo kabili balukwalakanyapo. Pakuti baali ne kucetekela, aba abalalume ne banakashi baalilyanshikile ukupita mu fyakukatasha ifili fyonse pakweba’ti bapitilishe ukulukuli aba bucine kuli baLesa.

7. Findo baYawe batupeele pa kutofwako ukuba ne kucetekela ukukosele, kabili tulyelelwe ukupyungisha shani ifi batupeele?

7 BaYawe balitulangishe inkumbu pa kutupeela Amashiwi abo Baibolo, aatofwako ukulukuli ne kucetekela ukukosele. Pakweba’ti ‘tushuke,’ tulyelelwe ukulukupenda Amashiwi abaLesa inshiku shonse. (Amasa. 1:1-3; pendeni Ifyacitilwe 17:11.) Eli, koti bapyungishi ba baYawe abaaliko ili baYesu tabangesa, tulyelelwe ukulukwalakanya pa milayi ya baLesa ne kulukumfwila amafunde abo. Nakabili, baYawe balitushukishe pa kulukutupeela ifyakulya fya ku mupashi ukupyungisha “umupyunjishi uyo ucetekelwe uwa mano.” (Mat. 24:45) Penka, kani twacindika makosa ifyakulya fya ku mupashi ifi tupokelela ukufuma kuli baYawe, tukaba  koti bapyungishi babo aba kale abaali ‘ne kwishibila kwa fintu’ ukwa bucetekelo bwabo mu Bufumu.

8. Kani itembelo lingakosha shani ukucetekela kwesu?

8 Itembelo lyalyofweleko makosa abapyungishi ba kale aba baYawe ukulama ukucetekela kwabo. Ukucetekela kwabo kwalukuya ili kukoselako ili baalukubona ifi baLesa balukwasuka amatembelo abo. (Neya. 1:4, 11; Amasa. 34:4, 15, 17; Dan. 9:19-21) Na fwebo tungabuula baYawe fyonse ifili ku mutima wesu, ni pakuti tuliishi ati bakatumfwa kabili bakatukosha pakweba’ti tulukuli abasangalele ili tulukukoselela mu makatasho. Ili amatembelo esu aasukwa, ukucetekela kwesu kulakoselako. (Pendeni 1 Yoane 5:14, 15.) Pakuti ukucetekela kuli pa fisepo fya mupashi, tulyelelwe ‘ukulukulomba’ umupashi wa baLesa, koti ni fyefyo baYesu batukoseleshe.—Luku 11:9, 13.

9. Ukulunda pa kulitembelela fwe bene, ni bani bambi abo tungatembelelako?

9 Mu matembelo esu tatwelelwepo ukulukulomba lukoso ati baLesa batofweko fwebo. “Imilimo iya kukankamana” iyo baLesa bacitile ingi kabili ‘ilicilile ubwingi na pa kupenda.’ Tungabatoota ne kubalemya pali yiyi imilimo. (Amasa. 40:5) Nakabili, mu matembelo esu tulyelelwe ukulangisha ati ‘tulabalanguluka abakakilwe koti kweba’ti tulikakilwe pamo nabo.’ Kabili tulyelelwe ukutembelelako abakwabesu ba mu calo conse, makosa makosa ‘abalukututangilila.’ Tulakoshiwa ukwakuti pa kubona ifi baYawe balukwasuka amatembelo esu fwense!—Ebeya 13:3, 7.

BALIPITILISHE UKUBA ABA BUCINE

10. Ni besa abapyungishi ba baLesa abapitilishe ukulukuli aba bucine, kabili findo fyabofweleko ukukonshe’fyo?

10 Mu AbaEbeya icapitala 11, intangishi Paulu yalibuulishishe amakatasho ao abapyungishi ba baLesa abengi aba tabashimbwilwepo amashina baapitilemo. Ku cakubwenako, intangishi yalilabiile pa banakashi ba bucetekelo abafwililwe abana babo pano abaishile mu kubuushiwa. Eli yalabiile na pali bambi “aba kubulo’kupoko’kupuluka kwabo, ati bakakumane ku kubuka pa mfwa ukucilile ukuwama.” (Ebeya 11:35) Nangaba’ti tatwishipo abo Paulu akwete mwi langulushi, bambi abali koti ni Naboti na Sekaliya, balibepeye pakuti pa kuba ne cumfwila kuli baLesa ne kucita ukufwaya kwabo. (1 Imf. 21:3, 15; 2 Ifye. 24:20, 21) Danyeli ne babyakwe nga balilekele ukuba aba bucine nga ‘balipokele ukupuluka kwabo.’ Pano, pakuti baali ne kucetekela muli baLesa, cali koti ‘baalifubatike inkalamu’ ne ‘kushimya amakosa amulilo.’—Ebeya 11:33, 34; Dan. 3:16-18, 20, 28; 6:13, 16, 21-23.

11. Ni esa amakatasho ao abakushimika bamo bapitilemo pakuti pa kucetekela kwabo?

11 Pakuti pa kucetekela kwabo, abakushimika abali koti ni Mikaya na Jelemiya “balipokele ukweshiwa ukwa kubaseka. . . ne kwa mwi kati.” Bambi, koti ni Elaija, “balukupitana mu mpanga lukoso, na pa mapili na mu macengo na mu micembo iya mu mushili.”—Ebeya 11:1, 36-38; 1 Imf. 18:13; 22:24-27; Jele. 20:1, 2; 28:10, 11; 32:2.

12. Ni bani abaali cakubwenako icicilile abakoselele mu mpindi ya makatasho, kabili nindo yabofweleko ukukonshe’fyo?

12 Panuma ya kulabila pa balalume ne banakashi abalekenelekelene abaali ne kucetekela, Paulu alilabiile pa cakubwenako icicililepo, e kweba’ti baShikulu besu baYesu baKlistu. Pa AbaEbeya 12:2 palalabila ukulosha kuli baYesu ati “abasumine [iciti NWT] pakuti pa kusangalala ukwali pa menso abo, ne kupufye’nsoni, ne kwikala ku lwine lwe tebe lya baLesa.” Mu cinenene, tulyelelwe ‘ukulanguluka’ pa kucetekela uku baYesu baali nako ili baalukupita mu fyakutasha. (Pendeni AbaEbeya 12:3.) Koti ni baYesu, abaKlistu ba kutanga abo baipeye pakuti pa kucetekela kwabo, abali koti ni Antipa, balipitilishe ukulukuli aba bucine.  (Ukufisulula 2:13) Baali ne kukwata ilambulo lya kubuukila kwiulu, ukubuushiwa uku tekuti kupalanishiwepo na ku kubuuka “ukucilile ukuwama” uku abantu abaliko ili baYesu tabangesa balukupembelela. (Ebeya 11:35) Panuma ili Ubufumu bwatatikile ukwikalika mu 1914, bonse abasufiwe abaali ne kucetekela, abaafwile, balibuushiwe ukuya kwiulu mu kwikalika abantunshi pamo na baYesu.—Ukufisulula 20:4.

ABANTU BA BUCETEKELO ABA INO MPINDI

13, 14. Ni esa makatasho ba Rudolf Graichen bapitilemo, kabili findo fyabofweleko ukukoselela?

13 Abapyungishi ba baLesa abengi aba ino mpindi balatuntulula baYesu pa kulukwalakanya pa bucetekelo bwabo ubwa kuntangiile ne kulukuli ne kucetekela ukukosele mu mpindi ya makatasho. Langulukeni pa cakubwenako ca ba Rudolf Graichen, abafyalilwe ku Germany mu 1925. Balyanukile ifikope ifyali mu ng’anda mwabo ifyalukulangisha ifya mu Baibolo. Balilembele ati, “Icikope cimo calukulangisha umumbuulu ne mbelele, imbushi ne ncense, ing’ombe ne nkalamu, fyonse fyali pa mutende kabili fyalukutangililwa ne mwanice. . . . Ifikope fyakube’fyo fyalimfikile pa mutima.” (Yisa. 11:6-9) Nangaba’ti ba Rudolf balikululushiwe pa myaka iyakuti ubwingi, pa kutanga ku ba  Nazi Gestapo eli panuma kuli ba Komyunisiti Stasi aba ku East Germany, balipitilishe ukulukuli ne kucetekela kwabo ukwa kwikala mu Paladaiso pa calo.

14 Ambi amakatasho ao ba Rudolf bapitilemo kufwilwa banyina, abafwile ne bulwashi bwa typhus (Ubulwashi ubuleta ifisemba pa mubili, ubulengesha umubili ukukaba, kabili ubusoomesha umutwi) mu jele ya Ravensbrück, kabili balibweneko uku ukucetekela kwa bawishibo kwanakile icakweba’ti balisaine na pa fipepala ati baleka ukuba Imboni ya BaYawe. Panuma ili ba Rudolf bafumine mu cifungo, balibeele mupyungishi wa luteta kabili balibetile kwi Sukuulu lya Gilyadi. Balibatumine muli bumishonali ku Chile uku baali mupyungishi wa luteta nakabili. Pano amakatasho aba Rudolf ali taangashila. Ili papitile fye umwaka umo ukufuma apo baupile ba Patsy, bamishonali babyabo, umwana wabo umwanakashi alifwile. Panuma ne bakashi babo abali lukoso ne myaka 43 balifwile. Ba Rudolf balikoselele muli onse aya amakatasho, kabili nangaba’ti baali bacekulu kabili abalwashi, balukupyunga bupainiya kabili baali bakulu ba mwi pa mpindi ilyashi lyabo lyafumine mu Akatambo ka Wakulama aka August 1, 1997, amabuula 20-25. [1]

15. Ni besa Bamboni sha BaYawe abapitilishe ukulukusangalala nangaba na fyefyo balukubakululusha?

15 Bamboni sha BaYawe balipitilishe ukulukusangalalila mu bucetekelo bwabo ubwa kuntangiile nangaba na fyefyo balukupenshiwa. Ku cakubwenako, abakwabesu ne nkashi bali mu jele ku Eritrea, Singapore, na ku South Korea, abengi balibakakile pakuti kulonda ukufunda kwa baYesu ukwakubulo’kulwako inkondo. (Mat. 26:52) Pali baba abakwabesu abengi pali na ba Isaac, ba Negede, na ba Paulo, abeekele mu jele ya ku Eritrea pa myaka ukucila pali 20! Aba abakwabesu balibaciicile ku makosa abo aakulama abafyashi babo abacekulu ne kuupa, pano balipitilishe ukulukuli aba bucine nangaba na fyefyo balukubakululusha. Ifi pa menso pabo paboneka, koti ni fyefyo tubona pa webusaiti yesu iya jw.org, filalangisha ati balipitilishe ukulukuli ne kucetekela ukukosele. Na bakalama babo aba mu jele balibacindikile.

Kani mulukubwenamo mu fyakubwenako fya bucetekelo ifya ino mpindi mwi kelesha lyenu? (Boneni palakalafu 15 na 16)

16. Kani ukuba ne kucetekela ukukosele kungamulameni shani?

16 Abantu ba baYawe abengi tabakululushiwapo muli yiyi inshila. Bambi balapita mu fyakwesha ifipusenepusene. Abengi bapengele neli balapenga ku nkondo sha mu calo cabo neli ku fitulika. Bali koti ni Mose ni pakuti balishiile amaboni amu calo. Balalwisha ukwesha kwa kutemwisha amaboni. Cindo cibofwako ukuba ne makosa akucite’fyo? Ukutemwa kwabo ukwa kuli baYawe ne kucetekela kwabo ukukosele ukwa kweba’ti kuntangiile bakalungika ifintu ne kupeela abapyungishi babo aba bucine umweo wa muyayaya mu calo ca bukumo icilungeme.—Pendeni Amasamo 37:5, 7, 9, 29.

17. Findo mulukufwaisha ukucita, kabili findo tukambaalapo mu ciputusha cakonkapo?

17 Muli cicino iciputusha, twasambilila pali fyefyo ukwalakanya pa milayi ya baLesa ne kutembela lyonse kungatofwako ukuba ne kucetekela ukukosele. Ukucetekela ukukosele kukatofwako ukukoselela mu mpindi ya makatasho ili tulukutontomeka pa bucetekelo bwesu ubwa kuntangiile ne ‘kwishibila kwa fintu.’ Pano ukwelelwa na fyefyo Baibolo ibuulishishe, ukucetekela kulisankenemo ifintu ifingi, koti ni fyefyo tukasambilila mu ciputusha cakonkapo.

^ [1] (palakalafu 14) Boneni ne ciputusha icili ne mutwi wa kweba’ti “Despite Trials, My Hope Has Remained Bright” muli Awake! ya April 22, 2002, icilabila pa lyashi lya ba Andre Hanák aba ku Slovakia.