Tolokeleni

Tolokeleni muye pa fyebo fya bubili

Tolokeleni muye pa filukusangwamo

Bamboni sha BaYawe

IciLamba

Akatambo ka Wakulama (Akakusambililamo)  |  March 2016

Kani Mungofwako Shani Ukwikatanya Ikelesha lya BuKlistu?

Kani Mungofwako Shani Ukwikatanya Ikelesha lya BuKlistu?

“Kuli bo umubili wonse, uficilwe pamo bwino, ulundene.”—ABAEFESA 4:16.

INYIMBO: 53, 107

1. Cindo icibwenekele mu milimo ya baLesa ukufuma lukoso pa kutanga?

BAYAWE na baYesu balikatene ukufuma lukoso pa mpindi balukulenge’fintu. BaYesu ebo baYawe batangiilepo ukulenga pa fintu fyonse. Panuma, baYesu balipyungiile pamo na baYawe kabili ‘bali nabo, koti ni mfundi wa milimo.’ (Ifisimpi 8:30) Abapyungishi ba baYawe nabo baali abaketane ili baalukupyungila pamo. Ku cakubwenako, Noa ne cisoolo cakwe balukupyungila pamo pa kwibako’bwato. Panuma, abaIshilaeli baalukupyungila pamo pa kwibaka isema, ukulibakulula, ne kulitwala ku mupunda umbi. Pe tempuli, balukwimba ne kulisha inyimbo ili baalukulemya baYawe mu nyimbo ishiweme. Abantu ba baYawe balukucita fyonse ifi pamo ni pakuti baali abekatene.Ifyakutanga 6:14-16, 22; Ifyakupenda 4:4-32; 1 Ifyebo 25:1-8.

2. (a) Cindo icali iciweme pa baKlistu abaali mwi kelesha lya buKlistu ilya kutanga? (b) Ni fisa fyakwipusha ifi twakwambaalapo?

2 AbaKlistu abaaliko mu mpindi ya basambile ba kutanga, nabo baalukupyungila pamo mu kwikatana. Intangishi Paulu yalibuulishishe  ati nangaba’ti baaliishi ifintu ifilekenelekene kabili baalukupyunge’milimo ilekenelekene, baali abekatene. Bonse lukoso balukulonda Intangishi yabo, baYesu Klistu. Paulu alibapalenye ku mubili uuli ne filewa ifilekenelekene pano ifipyungila pamo. (Pendeni 1 AbaKolinto 12:4-6, 12.) Nga pano pali ino mpindi? Kani tungaba shani abekatene mu mulimo wa kutulisha, mwi kelesha, na mu cisoolo?

MULUKULI ABEKATENE ILI MULUKUTULISHA

3. Buulishisheni icakubona ceco intangishi Yoane yabwene.

3 Mu mpindi ya basambile ba kutanga, intangishi Yoane yalibwene inkalamba 7 ishalukulisha impenga. Ili inkalamba ya kulenga 5 yalishisho’lupenga, Yoane alibwene “akabangabanga akaponene kwiulu pa calo ca panshi.” Aka “akabangabanga” kalipyungishe ulufungulo, neli amakii, pa kwisulako ku cikanda icitali makosa. Pa kutanga, icushi califumine muli cici icikanda, eli pano inshe shalifumine ninshi shilukupalala ukufuma mu cushi. Pa mupunda wa konaala ifiti ne fyani, ishi inshe shaliile mu konaala “abo abantu abatabakwete akeshibilo ka baLesa pa mpumi shabo.” (Ukufisulula 9:1-4) Yoane aliishibile ati inshe shingonaala ifintu ifingi; shalicitilepo ifya kube’fyo mu Ijipiti mu nshiku shakwe Mose. (Ifyakufuma 10:12-15) Inshe shesho Yoane abwene shilemakaninako abaKlistu abasufishiwe abatulisha pali fyefyo abali mu kupempela kwa bufi bakasolololwa. Nakabili, amamilyoni abantu abapembelela ukwisa mu kwikala pa calo balatulisha pamo ne basufishiwe. Uyu umulimo ulyofweleko abantu abakuti ubwingi ukufuma mu kupempela kwa bufi ne kuleka ukutangililwa na Satana.

4. Ni wisa mulimo abantu ba baYawe belelwe ukupyunga, kabili cindo cingabofwako ukukonsha uyu umulimo?

4 Tulikwete umulimo wa kutulisha “icebo iciweme” ku bantu ba mu calo conse ili ukushila takungesa. Uyu mulimo wakuti ubukulu! (Matayo 24:14; 28:19, 20) Tulyelelwe ukwita bonse abali “ne cilaka” ukwisa mu kunwa “amenda amweo,” e kweba’ti, tulyelelwe ukusambisha bucine bwa mu Baibolo kuli babo bonse abalukufwayo’kumfwa. (Ukufisulula 22:17) Pano, tungakonsha lukoso ukucite’fi kani ‘tulifiikilwe bwino pamo’ kabili tulukupyungila pamo mwi kelesha.—AbaEfesa 4:16.

5, 6. Kani ukutulishe’cebo iciweme kulatofwako shani ukuba abekatene?

5 Pakweba’ti tulukutulisha ku bantu abengi, tulyelelwe ukulyanshika bwino. Ifi ikelesha litubuulo’kucita fingatofwako ukucite’fi. Panuma ya kukumana kwa kuya mu kutulisha, tulaya mu kutulisha icebo iciweme pa Bufumu. Nakabili, tulapeela abantu amabuuku aalabila pali Baibolo. Na cine, tulipeele amabuuku aakuti ubwingi mu calo conse. Shimbi impindi balatubuula ne kupyungako amakampeni aalibelele. Ili mulukupyungako uyu umulimo, mulaba abekatene ne mamilyoni abantu mu calo conse abatulisha icebo cintu cimo! Nakabili, ninshi mulukupyungila pamo ne nkalamba, ishofwako abantu ba baLesa ukutulishe’cebo iciweme.—Ukufisulula 14:6.

6 Cakusangalasha ukupenda mwi buuku lya Ilyashi lya Nte sha kwa Yehova ifiweme ifilukufuma mu mulimo wa kutulisha mu calo conse! Langulukeni lukoso na pali fyefyo tuba abekatene mu calo conse ili tulukwita abantu ukwisa mu kusangwa ku mabungano esu. Kuli aya amabungano tulakutika ku fyebo fintu fimo. Amalyashi ne fyakulangilila filatofwako ukupyungila baYawe apapelele amakosa esu. Nakabili tulaba abekatene ne bakwabesu ili tulukusangwa ku Cakwanuka umwaka ne mwaka. (1 AbaKolinto 11:23-26) Tulabungana pa kasuba kantu kamo, pa Nisani 14, ili akasuba kawa ku kulangisha ati tulatoota pali fyefyo baYawe batucitiile ne kulonda ukufunda kwa baYesu. Kabili mu milungu ili takungaba Icakwanuka, tulapyungila pamo ukwita abantu abakuti ubwingi ukwisa mu  kusangwako kuli kuku ukubungana ukucindeme makosa.

7. Kani ukupyungila pamo kulatofwako ukukonsha ukucite’ndo?

7 Inshe imo lukoso tekuti yonaalepo ifintu ifingi. Fyopele’fyo, na fwebo kani tuli fwenka tekuti tutulishepo ku bantu bonse. Pano, pakuti tulapyungila pamo, tulabuula abantu abakuti ubwingi pali baYawe kabili tulofwako bambi ukulemya baYawe ne kubacindika.

MULUKULI ABEKATENE MWI KELESHA

8, 9. (a) Kani ni cisa icakupalanya Paulu apyungishe pa kofwako abaKlistu ukuba abekatene? (b) Tungaba shani abekatene mwi kelesha?

8 Paulu alibuulishishe ifi ikelesha lyanshikilwe, kabili alilabiile ati bonse mwi kelesha balyelelwe ‘ukukula mu fintu fyonse.’ (Pendeni AbaEfesa 4:15, 16.) Paulu alipyungishe icakubwenako ca mubili ku kubuulishisha ati umuKlistu onse alyelelwe ukofwako ikelesha ukuba ilikatene ne kulonda baYesu, Intangishi ye kelesha. Alilabiile ati ifilewa fyonse ifya mubili filapyungila pamo ukupitila “kuli fyefyo ifi ipela imilundo yonse.” Popele, nangaba’ti tuli banice neli abakulu, kani tulalwala neli tuli ne mweo uweme, findo ifi fwense umo umo tungacita?

9 BaYesu balipeele abakulu ba mwi kelesha umulimo wa kutangilila ikelesha, kabili balafwaya ati tulukucindika abalukututangilila ne kulonda ifi batubuula. (AbaEbeya 13:7, 17) Ukucite’fi talipo ni lyonse kuba ukupubile. Pano tungalomba baYawe ati batofweko. Umupashi wabo uswetelele ungatofwako ukulonda fyonse lukoso ifi abakulu ba mwi kelesha balukutubuula. Langulukeni lukoso pali fyefyo tungofwako ikelesha kani tuli abalicefeshe kabili tulukupyungila pamo ne bakulu ba mwi kelesha. Ikelesha likaba ilikatene, kabili tukatemwanshanya makosa.

10. Kani abapyungishi bakofwako balofwako shani ikelesha ukuba ilikatene?

10 Abapyungishi bakofwako nabo balofwako ukwikatanya ikelesha. Balapyungisha apapelele amakosa abo ukofwako abakulu ba mwi kelesha, kabili tulatoota pa milimo yonse yeyo bapyunga. Ku cakubwenako, abapyungishi bakofwako balikweto’mulimo wa kubona ati fwense tulikwete amabuuku aakupyungisha mu mulimo wa kutulisha, kabili balapokelela abensu abesa mu kubungana na fwebo. Nakabili, balapyungisha makosa ukulukuwamya ifyonaikile pa Mulenda wa Bufumu ne kuulama uwa bunjino. Kani tulukupyungila pamo na baba abakwabesu, ninshi tuli abekatene kabili tulukupyungila pamo baYawe mu nshila iyanshikilwe bwino.—Boneni na Ifyacitilwe 6:3-6.

11. Kani abanice bangofwako shani ikelesha ukuba ilikatene?

11 Bambi abakulu ba mwi kelesha balipyungile mwi kelesha pa myaka iyakuti ubwingi. Pano, cipale tekuti bapyungishepo koti ni fyefyo balukupyunga akale pakuti pa kucekula. Abakwabesu abanice bangofwako. Kani basambishiwa bwino, bangapyunga imilimo na imbi mwi kelesha. Kabili kani abapyungishi bakofwako bapyungisha, bangelelwa ukuba abakulu ba mwi kelesha. (1 Timote 3:, 10) Bambi abakulu ba mwi kelesha abatabangacekula balipyungishe makosa. Pali ino mpindi, bapyungishi ba luteta kabili balofwako abakwabesu ne nkashi mu makelesha aengi. Tulasangalala pa kubona abanice balukulitemenwa ukupyungila abakwabesu ne nkashi.—Pendeni Amasamo 110:3; Uwakutulisya 12:1.

MULUKULI ABEKATENE MU CISOOLO

12, 13. Findo fingofwako bonse mu cisoolo ukuba abekatene?

12 Kani tungofwako shani aba mu cisoolo cesu ukuba abekatene? Ukukwata amapempelo acisoolo lyonse kungofwako. Abafyashi ne bana kani balukusambilila pamo pali baYawe, balatemwanshanya makosa. Pa mapempelo acisoolo, bangapituluka muli fyefyo bakalabila ili bakaya  mu kutulisha. Ici cikofwako bonse ukulyanshika. Kabili ili balukumfwa bonse mu cisoolo balukubuulishisha bucine ne kubona ati bonse mu cisoolo balitemenwe baYawe kabili balafwaya ukubasangalasha, bonse lukoso bakekatana.

13 Kani abalume ne bakashi bangaba shani abekatene? (Matayo 19:6) Kani bonse balitemenwe baYawe kabili balukubapyungila pamo, bakaba abasangalele kabili abekatene mu cupo cabo. Balyelelwe ukulukulangisha ati balitemwanshenye, koti ni fyefyo Ablaamu na Sala, Isaci na Libeka, na Elikana na Ana baacitile. (Ifyakutanga 26:8; 1 Samweli 1:5, 8; 1 Petilo 3:5, 6) Abalume ne bakashi kani balukucite’fi, ninshi bakaba abekatene kabili bakapalamina makosa kuli baYawe.—Pendeni Uwakutulisya 4:12.

Amapempelo acisoolo angofwako abanice ne bakulu ukuba abekatene (Boneni palakalafu 12 na 15)

14. Mungakosha shani icupo cenu kani bamukakwenu tabapyungilapo baYawe?

14 Baibolo ilabuulishisha apaswetele ati tatwelelwepo ukuupa neli ukuupwa ku muntu uutapyungilapo baYawe. (2 AbaKolinto 6:14) Pano, eko bali abakwabesu ne nkashi abakwete bamukakwabo abatabalipo ni Bamboni sha BaYawe. Bambi balisambilile bucine panuma ya kuupa neli ukuupwa, kabili bamukakwabo tababeelepo ni Mboni. Bambi baalyupile neli ukuupwa ku mupyungishi wa baYawe, eli pano bamukakwabo bafuma mwi kelesha. Mu fya kube’fi, abaKlistu balapyungisha pakweba’ti icupo cabo cilukuli icikosele pa kulukulondo’kufunda kwa mu Baibolo. Ukucite’fi talipo ni lyonse kuba ukupubile. Ku cakubwenako, ba Mary ne balume babo ba David, baalukupyungila pamo baYawe. Pano, ba David baalilekele ukuya mu kubungana. Nangabe’fyo, ba Mary balukwesha ukuba abakashi abaweme ne kulukulangisha imibelo iweme. Balisambishe abana babo 6 pali baYawe kabili balipitilishe ukulukuya mu kubungana kwa pe kelesha na ku mabungano aakulu. Panuma ya myaka iingi, ili abana bakulile ne kutatiko’kulikalila, ba Mary balipitilishe ukupyungila baYawe nangaba’ti cali icikateshe makosa kuli bo ukucite’fi. Pano, ba David baalitatikile ukupenda amamakashini yeyo ba Mary balukubapeela. Mu kupita kwa mpindi, baalitatikileko ukuya mu kubungana nakabili. Umwinshikulu wabo uwali ne myaka 6 alukubalamina icipuna lyonse, kabili kani ba David tabeelepo mu kubungana, lyonse alukubabuula ati, “Bakaapa, nacimufungeni lelo mu kubungana.” Ba David  baalibwelele kuli baYawe panuma ya myaka 25, kabili bo ne bakashi babo bali abasangalele ni pakuti balukupyungila baYawe pamo nakabili.

15. Kani abacekulu abopeene bangofwako shani abanice abopeene?

15 Satana alapenshe’fisoolo pali ino mpindi. E mulandu abalume ne bakashi abapyungila baYawe belelwe ukubeela abekatene. Nangaba ne myaka mwikeele mu cupo, mulyelelwe ukulanguluka pali fyefyo mungakosha icupo cenu. Kani mwebo na bamukakwenu mulicekwile, mungaba icakubwenako iciweme ku banice abopeene. Cipale mungetako aba abanice abopeene ukwisa mu kusangwa ku mapempelo acisoolo. Ukucite’fi kukabofwako ukwishiba ati nangaba ne myaka baikala mu cupo, balyelelwe ukulukulangisha ati balitemwanshenye kabili balikatene.—Tito 2:3-7.

“ISENI NGA TUNININE KU LUPILI LWA BAYAWE”

16, 17. Findo ifi abantu ba baLesa bapembelela?

16 Ili abaIshilaeli baalukuya ku fitenje ifyalukuba mu Jelusalemi, balukupyungila pamo. Baalukwanshika fyonse ifyalukupengelwa pa lwendo. Eli pano, balukwendela pamo ne kulukofwana. Kani bafika pe tempuli, bonse balukulemya ne kupempela baYawe pamo. (Luku 2:41-44) Pali bubuno bukumo, ili tulukulyanshikila ukwisa mu kwikala mu calo ca bukumo, tulyelelwe ukwikatana ne kulukupyungila pamo ne bakwabesu. Kani kuliko inshila ishili shonse shesho mungacitilamo ifyo?

17 Abantu ba muli cicino icalo tabasuminanshanyapo pa fintu kabili balalwa pakuti pa fintu ifilekenelekene. Pano, tulatoota baYawe pa kutofwako ukulukuli ne mutende kabili ne kumfwisha bucine! Mu calo conse, abantu babo balukubapempela mu nshila yeyo bafwaya. Muli shishino inshiku sha kupelako, eli abantu ba baYawe bekatene makosa. Koti ni fyenka filya Yisaya na Mika baashimikile, fwense tulukuya “ku lupili lwa baYawe.” (Yisaya 2:2-4; pendeni Mika 4:2-4.) Mama ifi tukasangalala kuntangiile ili abantu bonse mu calo bakaba ‘abekatene pamo’ ne kupyungila pamo mu kupempela baYawe!