Tolokeleni

Tolokeleni muye pa fyebo fya bubili

Tolokeleni muye pa filukusangwamo

Bamboni sha BaYawe

IciLamba

Akatambo ka Wakulama (Akakusambililamo)  |  March 2016

 UMUTWI WA INO MAKASHINI

Nindo BaYesu Bapengeele ne Kufwa?

Nindo BaYesu Bapengeele ne Kufwa?

“Pakuti pa muntu umo, ukubifya kwaliinjile mu calo ca panshi, ne mfwa nayo pakuti pa kubifya.”—AbaLoma 5:12

Mungaasuka shani kani bamwipusheni ati, “Kani mungatemwa ukwikala umuyayaya?” Abantu abengi bangalabila ati bangatemwa, nangabe’fyo balabona ati tamulipo akalango mu kulanguluka na pa fya kube’fyo. Abantu balalabila ati imfwa cintu icelelwe ukucitikila bonse, ecikonkapo pa mweo.

Tulabile ati baalulako icakwipusha ne kumwipusheni ati, “Kani mungatemwa ukufwa?” Ifintu kani fili lukoso bwino, abengi bangakaana. Ici tulukulabilapo ni cici: Fwense tulafwaya ukuba ne mweo, nangaba ne makatasho ao tungakwata. Baibolo ilabuulishisha ati baLesa baalilengele abantunshi ne kufwaisha kwa kuba ne mweo. Ilalabila ati “balibikile umuyayaya mu mutima wabo.”Uwakutulisya 3:11.

Pano, bucine bwa kweba’ti abantu tabekalapo umuyayaya. Cindo calengele? Kani kuliko ifi baLesa bacitile pa kushilisha ubu ubukatasho? Ifi Baibolo yasuka filatusangalasha, kabili filabuulishisha ne mulandu baYesu bapengeele ne kufwa.

CINDO CALENGELE?

Ifyapitala fya kutanga fitatu ifye buuku lya Ifyakutanga filatubuula ati baLesa baalipeele Adama na Efa ishuko lya kwikala umuyayaya, kabili balibabuulile na fyefyo baelelwe ukucita pakweba’ti bakapitilishe ukuba ne mweo. Eli pano ilyashi lyabuulishisha ifi bafililwe ukuba ne cumfwila kuli baLesa ne kulufya ishuko bakwete ilya kwikala umuyayaya. Ilyashi lilibuulishishiwe mu nshila iipubile ica kweba’ti bambi balalabila ati ili lyashi lukoso ilitalicindemepo. Pano, ibuuku lya Ifyakutanga, lilalangisha ati ifilembelwemo fya cine, koti ni fyopele filya amabuuku ane aalabila pali baYesu alangisha. *

Findo fifuminemo mu kubifya kwakwe Adama? Baibolo ilaasuka ati: “Pakuti pa muntu umo, ukubifya kwaliinjile mu calo ca panshi, ne mfwa nayo pakuti pa kubifya; popele apo ne mfwa yalikumene ku bantu bonse, pakuti bonse balibifishe.” (AbaLoma 5:12) Adama alibifishe ili akeene ukumfwila baLesa. Popele, alilufishe ishuko lya kwikala umuyayaya kabili alifwile. Pakuti fwense tulifumine kuli Adama, tulipyene ukubifya kwakwe. Penka tulalwala, tulacekula, ne kufwa. Ici cilasuminanshanya na fyefyo aba fya sayansi babuulishisha ukulosha kuli fyefyo abana bapyana  ukufuma ku bafyashi babo. Pano, kani kuliko ifi baLesa bacitilepo pa kushilisha ubu ubukatasho?

IFI BALESA BACITILEPO

BaLesa balicitilepo fimo pakweba’ti babweshe ici Adama alufishe, e kweba’ti ishuko lya kwikala umuyayaya. Kani balicitile shani ifyo?

Baibolo ilalabila pa AbaLoma 6:23 ati, “Ukulambulwa kwa kubifya ni mfwa.” Ici cilaalula ati icifumamo mu kubifya ni mfwa. Adama alibifishe, popele alifwile. Mu kupalako, tulabifya kabili tulapoka ukulambulwa kwa kubifya, imfwa. Pano, fwebo twalipyene lukoso uku ukubifya ili twafyelwe. Popele baLesa baalilangishe ubutemwe ili batumine Abana babo, baYesu, ukwisa mu kufumyapo “ukulambulwa kwa kubifya.” Kani ici cilakonshiwa shani?

Imfwa ya baYesu ilatupeela ishuko lya kuba abasangalele ne kwikala umuyayaya

Pakuti umuntu umo umuwaminine, Adama, ewaletele ukubifya ne mfwa pali fwebo ili afililwe ukumfwila baLesa, umuntu umuwaminine uwa cumfwila ewalukupengelwa pakweba’ti tulubuke ku kubifya. Baibolo ilabuulishisha ati: “Pakuti pa kupulaisha kwa muntu umo abenji balibele bakubifya, fyopele’fyo, pakuti pa kutumwa kwa bantu bamo abenji bakaba balungeme.” (AbaLoma 5:19) BaYesu ebaali ‘abantu bamo.’ Baalifumine kwiulu, ne kuba umuntunshi umuwaminine, * ne kutufwila. Pakuti pali fyefyo, tungaba abalungeme mu menso abaLesa ne kukwata ishuko lya kwikala umuyayaya.

UMULANDU BAYESU BAPENGEELE NE KUFWA

Pano, nindo baYesu baelelwe ukufwila pakweba’ti bakonshe ukucite’fi? Kani baLesa aba Makosa onse nga tabalabiile lukoso ati abantu bonse batatike ukwikala umuyayaya? Fya cine ati baalikwete amakosa akucite’fyo. Pano ico cali ne kupufya ifunde lyabo ilya kweba’ti ukulambulwa kwa kubifya ni mfwa. Ili talipo lifunde ilinini ilingaalulwa lukoso apa kubulo’mulandu uuli onse. Lilofwako ukwishiba ati baLesa balasololola bwino.—Amasamo 37:28.

BaLesa nga tabasololwelepo bwino muli cici, abantu nga baalitatikile ukulanguluka kani bangacita na fyopele’fyo mu fintu fimbi. Ku cakubwenako, kani cali ne kuba icipubile kuli bo ukusalulula abantu abali abelelwe ukukwata umweo wa muyayaya? Kani  bangacetekelwa ati balakonsho’kulaya kwabo konse? Ifi baLesa basololwele bwino pa kwanshike’nshila ya kupulukilamo filalangisha ati balacita ifilungeme lyonse.

Pakuti pa mulambu wa baYesu, baLesa baalitupeele ishuko lya kwikala umuyayaya mu Paladaiso penka pano pa calo. Umfweni amashiwi baYesu balabiile aalembelwe pali Yoane 3:16: “Pakuti baLesa balitemenwe aba pa calo ca panshi ukwakuti, fyopele filya [balipeele] Umwana wabo uli enka, ati abantu bonse, ulukupemamo muli ye taakonalwa, yo; sombi ati akalukuli ne Mweo uwa muyayaya.” Popele, imfwa ya baYesu tailangishapo lukoso ati baLesa balasololola bwino, pano ilalangisha ati balitemenwe makosa abantunshi.

Pano, nindo baYesu bapengeele ne kufwa koti ni fyefyo ifilabiilwepo mu malembo? Pa kusumina ukupita mu fyakwesha ifikulu makosa ne kupitilisha aba bucine, baYesu baalilangishe ati Satana alibepele ili alabiile ati abantushi tekuti bapitilishepo aba bucine ili balukupita mu fyakwesha. (Jobo 2:4, 5) Ifi Satana alabiile cipale fyalibwenekele ati fya cine ili Adama abifishe. Pano, baYesu, abaali abawaminine koti ni Adama baalipitilishe ukuba aba bucine na lyelyo baalukupenga. (1 AbaKolinto 15:45) Baalilangishe ati na Adama nga alukufwaya nga alipitilishe ukuba uwa bucine. Pa kukoselela mu fyakwesha fyonse, baYesu balibeele cakutuntululako kuli fwebo. (1 Petilo 2:21) Pakuti baYesu baali ne cumfwila, baLesa baalibalambwile pa kubapeela umweo utaufwapo kwiulu.

IFI MUNGABWENAMO

BaYesu mu cinenene baalifwile. Pano tulikwete ishuko lya kwikala umuyayaya. Kani mungatemwa ukwikala umuyayaya? BaYesu balibuulishishe ifi twelelwe ukucita ili balabiile ati: “Nawo umweo uwa muyayaya ni wuyu, ati bakamwishibeni mwebo emwe mwenka mwe baLesa ba cine na woyo uyu mwatumine, Yesu Klistu.”—Yoane 17:3.

Abalembele ino makashini balukumwipusheni kani mungatenwa ukusambilila pali baYawe, abali ni baLesa ba cine, na pa Bana babo, baYesu Klistu. Bamboni sha BaYawe abekela ku mupunda kwenu bangatemwa ukumofweniko. Nakabili mungasangana ifyebo na fimbi ifingamofweniko pali webusaiti yesu iya www.jw.org/lam.

^ par. 8 Boneni iciputusha ca “Bushe Cine Cine Ibala lya Edeni E ko Lyali?” muli makashini ya Akatambo ka Wakulama iya January 1, 2011, ibuula 4, iitulishiwe na Bamboni sha BaYawe.

^ par. 13 BaLesa baalifumishe baYesu kwiulu ne kubabika munda muli Maliya, kabili umupashi wa baLesa uswetelele walilamine baYesu pakweba’ti bapitilishe ukuba abawaminine.—Luku 1:31, 35.