Tolokeleni

Tolokeleni muye pa filukusangwamo

 UMUTWI WA INO MAKASHINI | NINDO TWELELWE UKUBEELA ABA BUCINE?

Kani Ukuba aba Bucine Kucindeme?

Kani Ukuba aba Bucine Kucindeme?

Ba Hitoshi baalipeelwe umulimo wa kuceba pa maboni akampani ka mu Japan. Ili balukulemba lipoti ya ndalama ne bakulu babo aba milimo, ba Hitoshi balibabuulile ati baalyelelwe ukulemba lipoti ya bufi. Ba Hitoshi balilabiile ati cimanga wabo tekuti abasuminishepo ukulemba ifya bufi. Pakuti pali fyefyo, abakulu ba milimo baalibuulile ba Hitoshi ati baali ne kubatamfya incito, na mu kupelako balibatamfishe.

Mu kupita kwa mpindi, ba Hitoshi balitatikile ukubombona kani baali ne kusange’ncito imbi. Ku cakubwenako, ili balukubepusha ku bakulu ba milimo pa kampani kambi apa balukufwaya ukwingila incito, ba Hitoshi balilabiile ati bo tababepapo. Abalukubepusha balibabuulile ati, “Ifi ulukulanguluka webo tafipyungapo!” Abakwabo ne babyabo balukubakoselesha ba Hitoshi ukupitilisha ukuba aba bucine, pano balitatikile ukukanika. Ku cakubwenako, balilabiile ati, “Nalukulanguluka kani ukuba uwa bucine kuli fyefyo nsumiinemo kucindeme.”

Ifyacitikiile ba Hitoshi filatwanushako ati talipo bantu bonse ababona ati ukuba uwa bucine kucindeme. Na cine, bambi bangalukubona ati ukubulo’kuba uwa bucine kungabofwako na mu fya busulwishi. Umwanakashi umo uwa ku South Africa, alilabiile ati, “Ndasangwa ne bantu abatabalipo ba bucine, kabili shimbi impindi na nebo ndeshiwa ukubulo’kuba uwa bucine.”

Ubufi e nshila imo iifulile makosa iya kubulo’kuba uwa bucine. Imyaka iinini kunuma, ba Robert S. Feldman, abasambilile ifi abantu balanguluka, aba pa University of Massachusetts Amherst balilabiile ati abakulu abengi kani balukwambaala, amamineti 10 taapitapo ukwakubulo’kubeepa. Ba Feldman balilabiile ati, “Ifi twasangene fyali fya kukankamika; tatwacetekelepo ati abantu bangalukulabila ifya bufi muli yiyi inshila.” Tali cakukankamika ukwishiba ati abantu abengi tabafwayapo ukubatumpaika pano abene tabalabilapo ifya cine?

Nindo abantu abengi pali ino mpindi balukulabilila ifya bufi, ukwiba, eli ne kucite’fintu fimbi ifilangisha ati tabalipo ba bucine? Kani ukubulo’kuba aba bucine kulakuma shani bambi? Ne cicindeme ca kweba’ti, findo tungacita pakweba’ti tulukuli aba bucine impindi shonse