Tolokeleni

Tolokeleni muye pa fyebo fya bubili

Tolokeleni muye pa filukusangwamo

Bamboni sha BaYawe

IciLamba

Akatambo ka Wakulama (Akakusambililamo)  |  January 2016

|

Ubune Ubuli mu Kuba Aba Bucine

Ubune Ubuli mu Kuba Aba Bucine

‘Tulukucetekela ati tuli na cimanga uweme, ne kulukufwayo’kulukwikele aba bucine mu fintu fyonse.’—AbaEbeya 13:18.

Mu Baibolo, ishiwi lya ciGiliki ilyalulwa shimbi impindi ati “ukuba uwa bucine” lilaalula “ifintu ifiweme makosa.” Nakabili lingaalula imibelo iweme makosa.

AbaKlistu balicindikile makosa amashiwi baLesa babuulile Paulu ukulemba, aakweba’ti: ‘Tulafwayo’kulukwikele aba bucine mu fintu fyonse.’ Kani tungacita shani ifyo?

UKULWISHA UKUBIFYA TUFYALWA NAKO

Abantu abengi balaceba mwi kalashi lyonse ulucelo ili tabangafumina posonde. Nindo bacitile’fyo? Ni pakuti balafwaya ati balukuboneka bwino. Pano kuli icicilile na pa kuwamya bwino imishishi ne kufwala ifyakufwala ifiweme. Muli bucine, ubuntu bwesu ubwa mukati bulicilile na pa kuboneka bwino.

Amashiwi abaLesa alalabila apaswetele ati tulafwaya ukulukucita ifibipile lyonse. Pa Ifyakutanga 8:21 palalabila ati: “Ukulanguluka ukwa mu mitima ya bantu kulibipile ukufuma na ku bwanice bwabo.” Popele, pakweba’ti tube aba bucine, tulyelelwe ukulwisha ukubifya uku tufyalwa nako. Intangishi Paulu yalibuulishishe bwino ifi yalukulwisha ukubifya kwaiyo ili yalabiile ati: “Pakuti ndatemenwa mwi funde lya baLesa koti buntu ubwa mu mutima; sombi ndukubona ifunde limbi na lyo mu fileba ifya mubili wanji, lilukulwa ne funde lya milangwe yanji, ne kunteka pali bukalume bwe funde lya kubifya ilili mu fileba ifya mubili wanji.”—AbaLoma 7:22, 23.

Ku cakubwenako, imitima yesu ingalukufwaisha ukucite’fibipile ne kubulo’kuba aba bucine. Pano ico tacilukwalulapo ati tulyelelwe lukoso ukucita ifi imitima yesu ilukufwaya. Eko fili ifi tungasalululapo ukucita. Kani twasalululapo ukukaana ukulanguluka ukubipile, tungaba aba bucine nangaba’ti abantu abengi tabalipo ba bucine.

UKUCIMFYA UKUBIFYA

Pakweba’ti tube aba bucine, tulyelelwe ukuba ne mibelo iweme makosa. Ku cakubombomanika, abantu abengi balapoose’mpindi yabo iikulu ku kulanguluka pa fyakufwala ifiweme ukucilo’kulanguluka pa mibelo iweme yeyo belelwe ukuba nayo. Pakuti pali fyefyo, tababapo aba bucine mu fintu fimo. Ibuuku lya The (Honest) Truth About Dishonesty lilalabila ati: “Tulapitilisha ukubulo’kuba aba bucine ica kweba’ti twatatika ne kuboneka ati tuli ba bucine.” Pano, kani kuliko ifili fyonse ifingatofwako ukwishiba kani ukubulo’kuba aba bucine kuli lukoso bwino neli koku? Icakusangalasha ca kweba’ti eko fili.

Amamilyoni abantu mu calo conse balisumiine ati Baibolo ilofwako mu fya kube’fi. Baibolo ilibuulishishe bwino imibelo iweme makosa yeyo twelelwe ukukwata. (Amasamo 19:7) Ilapeelo’kufunda ukuweme pa fisoolo, ifyakusalulula incito iyelelwe, imibelo iweme, na pali bucibusa bwesu na baLesa. Ukufunda kwa mu Baibolo kucipyunga na bubuno bukumo. Ifyebo ifilimo fingofwako abali bonse nangaba ne calo bekalamo, umushobo wabo, ne mulaka wabo.  Ukupenda makosa Baibolo, ukwalakanya pali fyefyo tulukupenda, ne kupyungisha ifi tulukusambililamo, kungatofwako ukusambilila ifya kuba aba bucine.

Pano, pakweba’ti tucimfye ukubifya ukuli muli fwebo, tatwelelwepo lukoso ukupelela pa kwishiba ifilembelwe mu Baibolo. Tulukwikala mu calo umuli abantu abali ne mibelo ibipile kabili abatupangilisha ukulonda ifi bafwaya. E mulandu twelelwe ukutembela kuli baLesa ati batofweko. (AbaFilipoi 4:6, 7) Kani twacite’fyo, tukaba ne makosa akucita ifilungeme kabili tukalukuli aba bucine mu fintu fyonse.

IFIWEME IFIFUMA MU KUBA ABA BUCINE

Ba Hitoshi, abalabiilwepo mu ciputusha ca kutanga, balibwenenemo mu kulukuli aba bucine pa ncito. Pali ino mpindi, balapyungilo’muntu uutoota pali fyefyo bali aba bucine. Ba Hitoshi balilabiile ati, “Ndatoota pa kusangana incito yeyo mpyunga na cimanga umuswetele.”

Na bambi balisangile ati ifi fya cine. Langulukeni pa fyakubwenako fya baabo ababwenenemo mu kulonda ukufunda kwa mu Baibolo ukwa ‘kulukwikele aba bucine mu fintu fyonse.’

  • Mukalukuli na Cimanga Umuswetele

    “Nalilekele isukuulu ili nali ne myaka 13 ne kutatika ukupyungila pamo na bakabwalala. Pakuti pali fyefyo, ifintu ifingi nalifikwete pakuti pa kubulo’kuba uwa bucine. Panuma, nalyupilwe, kabili nebo ne balume banji twalitatikile ukusambilila Baibolo na Bamboni sha BaYawe. Twalisambilile ati baYawe * balipatile ukubulo’kuba uwa bucine. Mu 1990, twalilituulile kuli baYawe ne kubatishiwa, popele twalibeele ni Mboni sha BaYawe.”—Ifisimpi 6:16-19.

    “Akale, mu ng’anda mwanji mwalifulile ifintu fya kwiba, pano pali ino mpindi tamulipo; kabili ici cilalengesha ndukukwata cimanga umuswetele. Kani nalanguluka pa myaka yonse yeyo nshalipo uwa bucine, ndatoota baYawe pa nkumbu shabo. Cakusangalasha ukuya mu kulaala lyonse ubushiku ukulukwishibile ati baYawe balisangalele pali fyefyo ndukucita.”—Ba Cheryl, aba ku Ireland.

    “Ili abakulu ba milimo baishibile ati nalikeene amashinkakanwa ku muntu uwaishile mu kucita ubusulwishi na kampani yesu, balilabiile kuli nebo ati: ‘BaLesa bobe balikulengeshe ukucetekelwa! Lishuko ilyakuti ubukulu ukuba na webo pa kampani yesu.’ Ukuba uwa bucine mu fintu fyonse kulilengeshe ati nkwate cimanga umuweme ili ndukupyungila baYawe. Kabili cililengeshe ati ndukofwako icisoolo canji ne bantu bambi ukulukucita fintu fimo.”—Ba Sonny, aba ku Hong Kong.

  • Mukalukuli ne Mutende wa mwi Langulushi

    “Ndapyungo’mulimo wa kofwako abakulu ba milimo pe banki ilikulu makosa. Ku ncito, ukukwata amaboni kucindeme ukucila ukuba uwa bucine. Abengi balalabila ati, ‘Findo fibipilemo mu kubulo’kuba uwa bucine kani ukucite’fyo kulatuletela amaboni kabili kulofwako ne calo ukulukucita bwino mu fya maboni?’ Pano, pakuti nebo ndi wa bucine, ndi ne mutende wa mwi langulushi. Ndisalulwilepo ukuba uwa bucine nangaba na fyefyo ifingacitika. Abanjingishe’ncito baliishi ati tekuti ndabilepo ifya bufi neli ukubalabililako ifya bufi.”—Ba Tom, aba ku United States.

  • Mukalukumfwa ati Mulicindeme

    “Ili ifintu fimo ku ncito fyalubile, abakulu ba milimo balimbuulile ukubeepa, pano nalikeene. Ili abaibile babekete, abakulu ba milimo balintootele pa kuba uwa bucine. Ukuba uwa bucine mu calo umu tamulipo aba bucine kulapengela ukuba abakosele. Pano ifikafumamo fya kweba’ti abantu bakatucetekela kabili bakatucindika.”—Ba Kaori, aba ku Japan.

Ukuba na cimanga umuswetele, umutende wa mwi langulushi, ne kumfwa ati tulicindeme, fintu ifilangisha ati muli ubune mu kuba aba bucine. Kani na mwebo mwasuminishako kuli fifi?

^ par. 18 Baibolo ilabuulishisha ati baYawe e shina lya baLesa.