Tolokeleni

Tolokeleni muye pa fyebo fya bubili

Tolokeleni muye pa filukusangwamo

Bamboni sha BaYawe

IciLamba

Akatambo ka Wakulama (Akakusambililamo)  |  February 2017

Ifyakwipusha Abantu Bepusha

Ifyakwipusha Abantu Bepusha

Intangishi Paulu yalilembele ati baYawe “tabakasumina ati mukeshiwe ukucila na pa makosa enu.” (1 Koli. 10:13) Kani ici cilukwalula ati baYawe baleshibila limo ifi tungakonsha eli basalulula amakatasho aakesa pali fwebo?

Umfweni ifi ukulanguluka muli yeyo inshila kungakuma umuntu. Umukwabesu umo woyo umwana wakwe alipeye alipwishe ati: ‘Kani baYawe baalishibile limo ati nebo ne bakashi banji tukakoselela ili umwana wesu akalipaya? Kani ifi, fyalicitikile pakuti baLesa baalishibile ati tungakonsha ukukoselela muli bubu ubukatasho?’ Kani cili icelelwe kuli fwebo ukulanguluka ati baYawe bangalengesha ifyakube’fyo ukucitika mu mweo wesu?

Ukulanguluka makosa pa mashiwi Paulu alembele pali 1 AbaKolinto 10:13 kulatulengesha ukusumina ati: Tapalipo umulandu uuli onse uwa mu Malembo uungatulengesha ukusumina ati baYawe baleshibila limo ifi tungakonsha, eli panuma ya fyefyo, basalulula amakatasho aakesa pali fwebo. Nga tulabile pa milandu 4 iyatulengesha ukulabila muli yeyo inshila.

Ica kutanga, baYawe balipeele abantunshi amakosa akulisalulwilapo ifyakucita. Balafwaya fwebo ukulisalulwilapo fwe bene ifi tuli ne kucita mu mweo wesu. (Ndute. 30:19, 20; Jos. 24:15) Kani twasalululapo ukucita ifilungeme, tungalomba baYawe ukulukututangilila. (Ifisi. 16:9) Pano kani twasalululapo ukucita ifibipile, tukelelwa ukusumina ifibipile ifikafumamo. (Galatya 6:7) BaYawe nga baalukusalulula amakatasho aali ne kwisa pali fwebo, tali ico nga calilengeshe abantunshi ukubulo’kupyungisha amakosa abo aakulisalulwilapo ifyakucita?

Ica bubili, baYawe tabatulamapo ku ‘mpindi ne kucitika.’ (Uwaku. 9:11) Ifintu ifibipile, ifingafumamo ne mfwa, fingacitika kani tuli ku mupunda uku tatwelelwepo ukuba pali yeyo impindi. BaYesu baalilabiile pa fyacitikile ifyalengeshe ati abantu 18 bafwe ili ing’anda iitali yabaponene, kabili baalibuulishishe ati filya tafyalipo kufwaya kwa baLesa. (Luku 13:1-5) Tali cingaba icibipile ukulanguluka ati baLesa bangasalulwila limo abantu abali ne kupitilisha ukulukuli abalabi eli ne bali ne kufwa ku fintu ifyakubulo’kwishiba?

Ica butatu, fwense umo umo tulikuminweko ku lyashi lya kuba aba bucine. Anukeni ati Satana aalikanikile bucine bwa bapyungishi ba baYawe, ili alabiile ati tekuti bapitilishepo ukuba aba bucine ili balukupita  mu makatasho. (Jobo 1:9-11; 2:4; Ukufisulula 12:10) BaYawe kani baciicila amakatasho amo ukwisa pali fwebo pakuti babona ati tekuti tukonshepo, tali ico cingakosha icebo Satana alabiile ati tulapyungila baLesa pakuti pa kulitemwa?

Ica kulenga 4, baYawe tabelelwapo ukwishiba fyonse ifili ne kutucitikila kuntangiile. Ukusumina ati baYawe balasalulwila limo amakatasho tuli ne kupitamo kulukwalula ati baYawe balyelelwe ukwishiba fyonse ifili ne kutucitikila kuntangiile. Pano ilyo ilangulushi talipo lya mu Malembo. Ukuba, baLesa bangeshiba ifikacitika kuntangiile. (Yisa. 46:10) Pano Baibolo ilalangisha ati talipo ni fyonse ifya kuntangiile ifi bafwaya ukwishiba. (Ifyakuta. 18:20, 21; 22:12) Popele tabalengeshapo amakosa abo aakwishiba ifya kuntangiile ukutulengesha ukubulo’kupyungisha amakosa esu aakulisalulwilapo ifyakucita. Tali ifyo efi tungacetekela kuli baLesa abacindikile amakosa tupeelwe aakulisalulwilapo kabili abalangisha imibelo iiweme?—Ndute. 32:4; 2 Koli. 3:17.

Pano, kani filya Paulu alabiile ati: “BaLesa . . . tabakasumina ati mukeshiwe ukucila na pa makosa enu” filaalule’ndo? Apa, Paulu taalukulabilapo pali fyefyo baYawe bacita ili amakatasho taangesa, sombi ifi bacita ili tulukupita mu makatasho. Amashiwi intangishi yalabiile alatubuula ati nangaba ne makatasho tungapitamo, baYawe bangatofwako kani twabacetekela. (Amasa. 55:22) Amashiwi akukoselesha ao Paulu alabiile alyeyamine pa fintu fibili.

Ica kutanga, ‘abantu bonse’ balapita mu makatasho ao na fwebo tupitamo. Popele, amakatasho onse ao tupitamo, ne bantu bambi balapitamo. Kani twacetekela muli baYawe, tungakonsha ukukoselela mu makatasho akube’fyo. (1 Pet. 5:8, 9) Mu malembo ambi aali apepi ne lembo lya 1 AbaKolinto 10:13, Paulu alilabiile pa makatasho ao abaIshilaeli bapitiliemo ili baali mu mpanta. (1 Koli. 10:6-11) AbaIshilaeli ba bucetekelo baali ne makosa akukoselela mu makatasho onse ao baalukupitamo. Pa mpindi 4 Paulu alilabiile ati “bambi” baalipulaishe. Ku cakubombomanika, bambi abaIshilaeli baalitatikile ukuba ne kukumbwa ukubipile kabili baalifililwe ukucetekela baLesa.

Ica bubili, “baLesa balitekenye.” Ifi baLesa baacitile ku bapyungishi babo akale filalangisha ati balaba aba bucine “kuli babo abalukubatemwa, abalukulama amafunde abo.” (Ndute. 7:9) Ici cilukulangisha ati lyonse baLesa balakonsha ukulaya kwabo konse. (Jos. 23:14) Abatemenwe ne kucetekela baYawe kani balanguluka pali fyefyo baYawe baacitile ku bapyungishi babo aba kale balacetekela ati baYawe bali ne kukonsha imilayi yabo ibili iya kweba’ti: (1) Tabakasuminishapo ubukatasho ubuli bonse ukuba ubukulu icakweba’ti abapyungishi babo bafilwa ne kukonsha ukukoselela, na (2) “bakalenga ne mwa kupulukila” abapyungishi babo.

BaYawe ‘balatusangalasha fwebo pa kupenga kwesu konse.’

Kani baYawe balalenga shani umwa kupulukila kuli baabo abalukupita mu makatasho? Ukuba, kani balukufwaya, bangafumyapo lukoso ubukatasho. Pano anukeni ifi Paulu alabiile ati: “[BaYawe] bakalenga ne mwa kupulukila, ati mukeshibe ukucipinta.” Popele, impindi ishingi, ‘balalenga ne mwa kupulukila’ ukupitila mu kutupeela ifi tulukupengela pakweba’ti tungakoselela. Langulukeni pali shishi inshila shimo ishi baYawe bangalengelamo umwa kupulukila.

  • ‘Balatusangalasha fwebo pa kupenga kwesu konse.’ (2 Koli. 1:3, 4) BaYawe bangatupeela umutende wa mwi langulushi, ne kutusangalasha ukupyungisha Amashiwi abo, umupashi uswetelele, ne fyakulya fya ku mupashi ifi batupeela ukupitila mu mupyungishi ucetekelwe.—Mat. 24:45; Yoa. 14:16, Loma 15:4.

  • Bangatutangilila ukupyungisha umupashi uswetelele. (Yoa. 14:26) Ili kwaba amakatasho, umupashi ungatwanushako amalyashi amu Baibolo ne kufunda ukungatofwako ukwishiba ifi twelelwe ukucita.

  • Bangabuula inkalamba shabo ukutofwako. —Ebeya 1:14.

  • Bangatofwako ukupitila mu baKlistu babyesu abacita ne kulabila ‘ifitusangalasha.’—AbaKolo. 4:11.

Popele, kani tungalabila ati amashiwi akwe Paulu aali pali 1 AbaKolinto 10:13 alaalule’ndo? BaYawe tabasalululapo amakatasho tupitamo. Pano ili ifyakwesha fyaisa, tungacetekela ati: Kani twacetekela makosa muli baYawe, tabakasuminishapo ati ifyakwesha fibe ifikulu ukucila na pa makosa esu; lyonse bakalukulenga umwa kupulukila pakweba’ti tungakoselela. Mame’fi ici citusangalasha!