LANGULUKENI pa kasuba mwasangalele makosa. Kani kasuba ka buufi bwenu neli ili mwakwete umwana wenu uwa kutanga? Neli ni pa kasuba mwabatishiwe? Cipale akasuba mwabatishiwe e kasuba akacindeme makosa mu mweo wenu kabili ako mwasangalele makosa. Pali kakalya akasuba, abakwabenu ne nkashi balisangalele ukwakuti pa kubona mwebo mwalangisha ati mulitemenwe baLesa ne mutima wenu onse, umweo wenu onse, ukulanguluka kwenu konse, ne makosa enu onse!—Mako 12:30.

Ukwakubula ne kukanika, mulisangile ukusangalala mu kupyungila baYawe ukufuma pa kasuba mwabatishiwe. Nangabe’fyo, abakutulisha abengi balilekele ukusangalala koti ni fyefyo baali pa kutanga. Findo ificitikile? Nindo twelelwe ukulukupyungila baYawe ne kusangalala?

IFILENGESHE BAMBI UKULEKA UKUSANGALALA

Icebo ca Bufumu cilatusangalasha. Nindo? Ni pakuti baYawe balilaile ati bukumo lukoso Ubufumu bwabo buli ne kushilisha bumbifi bonse ubuli muli cicino icalo icibipile ne kuleta icalo ca bukumo. Pali Sefaniya 1:14 palalabila ati: “Akasuba ka baYawe akakulu kali apepi; kali apepipepi, kalukwangufya.” Pano kani tulukulanguluka ati akasuba ka baYawe kakakola, tungatatika ukuleka ukusangalala. Ici cingatulengesha ukubulo’kupyungisha mu milimo ya baLesa.—Ifisimpi 13:12.

Ukulukusangwa ne bakwabesu ne nkashi kulatulengesha ukulukupyungila baYawe ne kusangalala. Imibelo iweme iya bantu ba baLesa cipale eyalengeshe ati twise mu kupempela kwa cine kabili tutatike ukupyungila baYawe ne nsangalashi. (1 Petilo 2:12) Pano, findo fingacitika kani umukwabesu neli nkashi alicenjeshiwe pakuti pa kubulo’kulonda amafunde abaLesa? Ici cingalengesha bambi mwi kelesha ukuleka ukusangalala ili balukupyungila baYawe.

Ukutemwisha makosa ifya ku munefu nako kungatulengesha ukuleka ukusangalala. Muli isa nshila? Aba mu calo cakwe Satana balafwaya fwebo ukulukulanguluka ati tulyelelwe ukulukushita ifintu ifi tatupengelapo. Popele, nga tulukwanuka amashiwi baYesu balabiile aakweba’ti: “Papo’muntu uwishi ukupyunjila bawishikulu babili; pakuti neli akafitilwapo umo, umbi ne ku mutemwa; neli akalukwikalisha na umo, uyo umbi ne kumupufya. Tamwishi ukupyunjila na baLesa ne maboni.” (Matayo 6:24) Tekuti mupyungile baYawe eli pa mpindi intu imo mulukufwaya ukukwata ifintu ifyakuti ubwingi ifya muli cicino icalo.

IFITULENGESHA UKUSANGALALA ILI TULUKUPYUNGILA BAYAWE

Ukupyungila baYawe takulipo cipinto kuli baabo ababatemenwe. (1 Yoane 5:3) Mulukwanuka ifi baYesu balabiile ati: “Iseni kuli nebo, mwense mwe mwakatala ku milimo ne fipinto ifilemene; eli nakumupeleni ukutusha. Litwikeni icikonkoli canji, musambile kuli nebo; pakuti nebo nditekenye, ndilicefeshe mu mutima; penka mukabona ukutusha kwa mipashi  yenu. Pakuti icikonkoli canji ciliweme; icipinto canji cilipubile.” (Matayo 11:28-30) Ukuba umuKlistu wa cine kulatusangalasha. Kuli imilandu ya cinenene iya kubeela abasangalele ili tulukupyungila baYawe. Nga tuboneko imilandu itatu.—Abakuci 3:18.

Tulapyungila baLesa abasangelele, abapeela umweo. (Ifyacitilwe 17:28; 1 Timote 1:11) Tuliishi ukweba’ti tuli ne mweo pakuti pa Balengeshi besu. Popele, nga tupitilishe ukulukubapyungila, nangaba ne myaka iipitilepo ukufuma apa twabatishiwilwe.

Ukulukwanuka amashuko amu Bufumu ne kulukutulisha lyonse kulyofweleko ba Héctor ukupitilisha ukuba abasangalele

Langulukeni pali ba Héctor, abaali mupyungishi wa luteta pa myaka 40. Na “pa bucekulu,” balasanga ukusangalala mu kupyungila baYawe. (Amasamo 92:12-14) Pakuti abakashi babo balwashi, balafilwa ukupyungisha mu milimo ya baLesa, pano ba Héctor tabalekelepo ukusangalala. Balilabiile ati: “Cilambombomanika ukubona abakashi banji balukulwalilako kabili ukubalama kukateshe, pano ici tacindengeshepo ukubulo’kusangalala ili ndukupyungila baLesa ba cine. Ukwishiba ati ndyelelwe ukupyungila baYawe, abaalengele abantunshi ati balukucito’kufwaya Kwabo, uli mulandu wa cinenene uwa kubatemenwa ne kubapyungila ne mutima wanji onse. Ndesha ukulukutulisha lyonse, kabili ndesha ukulukulanguluka makosa pa mashuko amu Bufumu pakweba’ti ningapitilisha ukulukusangalala.”

BaYawe balitupeele umulubulo pakweba’ti tungaba abasangalele mu mweo wesu. “BaLesa balitemenwe aba pa calo ca panshi ukwakuti, fyopele filya baliposele Umwana wabo uli enka, ati abantu bonse, ulukupemamo muli ye taakonalwa, yo; sombi ati akalukuli ne mweo uwa muyayaya.” (Yoane 3:16) Icine, tungafitulukilwa ifyakubifya fyesu ne kukwata umweo wa muyayaya kani twacetekela mu mpese ya baLesa iya mulubulo. Uyu uli mulandu wa cinenene uwa kubeela abasangalele! Kabili ukulukutoota pa mulubulo kukatulengesha ukuba abasangalele ili tulukupyungila baYawe.

Ba Jesús balipufishe amekalilo abo kabili baalipyungile baYawe ne nsangalashi pa myaka iingi

Umukwabesu uwe shina lya Jesús, uwalukwikala mu Mexico, alilabiile ati: “Nali umusha ku ncito, lumbi nalukupyunga pa mpindi iitali makosa nangaba’ti nshaelelwepo ne kucite’fyo. Nalukucita lukoso ifi pakweba’ti nkakwate indalama ishingi. Eli nasambilile pali baYawe na fyefyo bapeele Abana babo ukufwila abantunshi. Nalukufwaisha ukubapyungila. Popele nalilituulile kuli baYawe, kabili panuma ya kupyunga pa kampani pa myaka 28, nalisalulwilwepo ukuleke’ncito ne kutatiko’kupyunga umulimo wa mpindi shonse.” Ifi efi ba Jesús batatikile ukupyungila baYawe ne kusangalala.

Tulaba ne mibelo iweme, popele tulaba abasangalele. Kani mulanuka ifi mwali ili tamungatatika ukupyungila baYawe? Intangishi Paulu yalyanwisheko abaKlistu abaali mu Loma ati pa kutanga ‘baali basha ba kubifya’ pano ‘baalibele basha ba  kulungama.’ Pakuti baali ne mibelo iweme, balikwete ishuko lya kukwata umweo wa muyayaya. (AbaLoma 6:17-22) Na fwebo tulalonda ukufunda kwa baYawe, popele tatupitapo mu fintu ififuma mu kuba ne mibelo ibipile neli ulukansa. Mame’fi ici cintu citusangalasha!

“Imyaka yonse mpyungile baYawe ndisangalele ukwakuti.”—Ba Jaime

Langulukeni pali ba Jaime, abatabacetekelepo muli baLesa kabili abasumiine ati ifintu fyalisangukile lukoso kabili pa mpindi intu imo abali abakulwa ku fimfumfu. Ba Jaime balitatikile ukuya ku kubungana kwa buKlistu kabili balisangalele ili babwene ifi abantu batemwanshenye. Pakweba’ti ba Jaime baleke ifi balukucita, balilombele baYawe ati babofweko ukucetekela muli Bo. Ba Jaime balilabiile ati: “Panini panini, nalisangile ati baLesa ba nkumbu kabili baWishifwe ba butemwe eko bali. Ukulonda amafunde abaYawe aalungeme kulindamine ku fingi. Nga nshaalukilepo, cipale nga nalipaiwe, koti ni fyefyo bambi abali abakulwa ku fimfumfu baipaiwe. Imyaka yonse mpyungile baYawe ndisangalele ukwakuti.”

TEKUKATALA!

Findo twelelwe ukucita ili tulukupembelela ukushila kwa cicino icalo icibipile? Anukeni ati, tulukucita ukufwaya kwa baLesa kabili tulukupembelela umweo wa muyayaya. “Popele fwebo tekukatala ukulukucite’fiweme, pakuti pa mpindi ielelwe tukalongela, kani teshi tukalemuke.” (AbaGalatya 6:8, 9) Mu kuba ne kofwako kwa baYawe, nga tukoselele, tupyungile pa kukwata imibelo iikatofwako ukupuluka ‘ukukululuka ukukulu,’ ne kulukupyungila baYawe ne kusangalala.—Ukufisulula 7:9, 13, 14; Jakobo 1:2-4.

Nga tucetekele ati baYawe bakatulambula pa kupitilisha ukubapyungila ni pakuti baliishi ifi tubapyungila na fyefyo tubatemenwe na fyefyo tutemenwe ishina lyabo. Kani twapitilisha ukuba abasangalele ili tulukubapyungila, tukaba koti ni Dafidi umwimbishi wa masamo, uwalabiile ati: “Ndibekalicile baYawe inshiku shonse pa menso anji: Pakuti bali palwine lwanji, popele nshikatenkanshiwa. Pakuti pali fyefyo, umutima wanji ulisangalele, kabili ubuleme bwanji bulukusemba: Ne munefu wanji kabili ukalukwikala ne kulamwa.”—Amasamo 16:8, 9.