Tolokeleni

Tolokeleni muye pa filukusangwamo

Langisheni ati Muli ba Bucine Kuli BaYawe

Langisheni ati Muli ba Bucine Kuli BaYawe

“BaYawe bakalukuli pakati pali nebo na mwebo na pakati pa bana banji ne benu inshiku isha muyayaya.”—1 SAMWELI 20:42.

INYIMBO: 125, 62

1, 2. Mba nindo tungalabilila ati ubulunda ubwali pali Jonafani na Dafidi bwali cakubwenako iciweme ica kuba aba bucine?

JONAFANI alikankamene pa kubona ifi Dafidi uwali lukoso umwanice ali ne lupata. Dafidi alipeye Golyati umwalalume wa makosa ne kuleta “umutwi wa muFilishiti” kuli bawishi Jonafani ba Saulu, imfumu ya baIshilaeli. (1 Samweli 17:57) Jonafani alicetekele ati baLesa bali na Dafidi, kabili ukufuma lwenka lulya, Jonafani na Dafidi balibeele fibusa ifipalamishe makosa. Umo umo alilaile ati akalukuli uwa bucine ku mubyakwe. (1 Samweli 18:1-3) Jonafani ali uwa bucine kuli Dafidi mu mweo wakwe onse.

2 Jonafani alipitilishe ukuba uwa bucine kuli Dafidi nangaba’ti baYawe balisalulwile Dafidi, talipo ni Jonafani, ukupyana Saulu pa bufumu. Kabili ili Saulu alukwesha ukwipaya Dafidi, Jonafani alibombomene pa fyali ne kucitikila umubyakwe. Alishibile ati Dafidi ali mwi yamba, popele Jonafani aliile kuli ye ne kumukoselesha ati apitilishe ukulukucetekela  muli baYawe. Jonafani alibuulile Dafidi ati: “Mwitina pakuti ukuboko kwa ba Saulu batata tekuti kukamuboneni; kabili mukalukuli ni mfumu iya kubekalika abaIshilaeli na nebo kabili nkalukuli wa bubabili pali mwebo.”—1 Samweli 23:16, 17.

3. Findo ifyacililepo ukucindama kuli Jonafani ukucila na pa kuba uwa bucine kuli Dafidi, kabili tuliishi shani ifyo? (Boneni icikope icili pe buula 19.)

3 Tulitemenwe abantu ba bucine. Pano, kani tulitemenwe Jonafani pakuti lukoso ali uwa bucine kuli Dafidi? Koku, ukuba uwa bucine kuli baLesa e cali icintu icicindeme makosa mu mweo wakwe Jonafani. Na cine, uyu e mulandu abeelele uwa bucine kuli Dafidi ne kubulo’kumumfwila akaso, nangaba’ti Dafidi ewali ne kuba imfumu pa mupunda wakwe. Nakabili, Jonafani alyofweleko Dafidi ukucetekela makosa baYawe. Umo umo ali uwa bucine ku mubyakwe na kuli baYawe. Balikonseshe ukulayana kwabo ukwa kweba’ti: “BaYawe bakalukuli pakati pali nebo na mwebo na pakati pa bana banji ne benu inshiku isha muyayaya.”—1 Samweli 20:42.

4. (a) Findo fikatulengesha ukuba abasangalele mu cinenene? (b) Findo twakwambaalapo muli cicino iciputusha?

4 Na fwebo tulyelelwe ukuba aba bucine ku ba mu cisoolo cesu, ifibusa fyesu, na ku bakwabesu ne nkashi aba mwi kelesha. (1 AbaTesalonike 2:10, 11) Pano, icicililepo ukucindama ca kweba’ti tulyelelwe ukuba aba bucine kuli baYawe. Ebatupeele umweo! (Ukufisulula 4:11) Kani twaba aba bucine kuli bo, tukaba abasangalele mu cinenene. Kabili tuliishi ne kweba’ti tulyelelwe ukuba aba bucine kuli baLesa na mu mpindi sha makatasho. Muli cicino iciputusha, twakwambaala pali fyefyo icakubwenako cakwe Jonafani cingatofwako ukuba aba bucine kuli baYawe mu fintu fine: (1) kani twabona ati tatwelelwepo ukucindika umuntu upeelwe ubukulu, (2) ili tulukusalulula abakulangishako bucine, (3) ili umukwabesu uulukutangilila atubifya, na (4) ili caba icikateshe kuli fwebo ukucita ifi twalaile.

KANI TWABONA ATI TATWELELWEPO UKUCINDIKA UMUNTU UPEELWE UBUKULU

5. Nindo cabelele icikatashe ku bantu ba mu Ishilaeli ukuba aba bucine kuli baLesa ili Saulu ali imfumu?

5 Jonafani ne bantu ba mu Ishilaeli balyeshiwe ukwakuti. Imfumu Saulu, yalilekele ukuba ne cumfwila, kabili baYawe baliikene iyi imfumu. (1 Samweli 15:17-23) Nangabe’fyo, baLesa baalisuminishe Saulu ukupitilisho’kwikalika pa myaka iingi. Popele, cali icikateshe ku bantu ukuba aba bucine kuli baLesa ili imfumu iyasalulwilwe ukwikala “pe tebe lya baYawe” yalukucita ifintu ifibipile.—1 Ifyebo 29:23.

6. Findo filangisha ati Jonafani alipitilishe ukuba uwa bucine kuli baYawe?

6 Jonafani alipitilishe ukuba uwa bucine kuli baYawe. Langulukeni pali fyefyo Jonafani acitile ili Saulu atatikile lukoso ukubulo’kuba ne cumfwila. (1 Samweli 13:13, 14) Pali yeyo impindi, abashilikani ba baFilishiti balishile ne ngolofwana 30,000 mu kulwa ne baIshilaeli. Saulu ali lukoso ne bashilikani 6,000 kabili ni ye lukoso na Jonafani abakwete ifyakulwilako. Pano Jonafani talukutiinapo. Alyanukile amashiwi uwakushimika Samweli alabiile aakweba’ti: “BaYawe tabakaleka abantu babo pakuti pe shina lyabo ilikulu.” (1 Samweli 12:22) Jonafani alilabiile ku mushilikani umo ati: “Tapalipo ukabakanya baYawe ukupulusha ne bantu abenji neli bace.”  Popele, ye na wuyu umushilikani baliile mu kulwisha abaFilishiti ne kwipaya abantu cipale 20. Jonafani alicetekele muli baYawe, kabili baYawe balimushukishe. BaYawe baaliletele icitulika kabili abaFilishiti balitiinine. Ici calilengeshe ati batatiko’kulipaya, kabili abaIshilaeli balicimfishe.—1 Samweli 13:5, 15, 22; 14:1, 2, 6, 14, 15, 20.

7. Findo Jonafani alukucita kuli bawishi?

7 Nangaba’ti Saulu alipitilishe ukubulo’kuba ne cumfwila kuli baYawe, Jonafani alukubomfwila bawishi lyonse ili caelelwa. Ku cakubwenako, bali pamo ili balukulwilako abantu ba baYawe.—1 Samweli 31:1, 2.

8, 9. Kani ukucindika abapeelwe ubukulu pali fwebo kulalangisha shani ati tuli ba bucine kuli baLesa?

8 Koti ni Jonafani, na fwebo tungaba aba bucine kuli baYawe pa kulukumfwila abekalikishi ba mu calo cesu lyonse ili caelelwa. BaYawe balisuminishe ‘ubukulu ubutwikalika’ ukuba ne bukulu pali fwebo, kabili balafwaya ati tulukucindika abali ne bukulu pali fwebo. (Pendeni AbaLoma 13:1, 2.) Emulandu tucindikila uwa mu bwikalikishi nangaba’ti talipo wa bucine kabili tulukubona ne kweba’ti tatwelelwepo ukumucindika. Na cine, tulyelelwe ukucindika bonse lukoso abapeelwe ubukulu kuli baYawe.—1 AbaKolinto 11:3; AbaEbeya 13:7.

Mungalangisha ati muli ba bucine kuli baYawe kani mulukucindika bamukakwenu, nangaba’ti tabapyungilapo baYawe (Boneni palakalafu 9)

9 Ba Olga, Bamboni aba ku South America, balilangishe ati ba bucine kuli baYawe pa kulukucindika abalume babo abalukubapensha. [1] (Boneni tumashiwi twa pa mpelo.) Shimbi impindi baalukulabila ifibipile kuli bo pakuti lukoso ni Bamboni. Lumbi, balibuulile ba Olga ati baali ne kupinta  abana ne kubasha benka. Pano ba Olga ‘tababweseshe ifibipile.’ Balukupyungisha pakweba’ti babe abakashi abaweme. Balukwipikila abalume ifyakulya, ukubawashisha ifyakufwala, ne kulama bamo aba mu cisoolo ca balume. (AbaLoma 12:7) Kabili lyonse ili balukukonsha, ba Olga balukuya ne balume babo mu kufakashisha icisoolo ca balume ne fibusa fyabo. Ku cakubwenako, ili abalume babo balukufwaya ukuya kwi tauni limbi ku cililo ca bawishi, ba Olga balyashinkile fyonse ifyalukupengelwa pa lwendo. Kabili, ili baali ku cililo, balipembelele posonde ili abalume baali mu calici. Ili papitile imyaka iingi, abalume ba ba Olga balilekele ukubapensha ni pakuti ba Olga baali abatekenye kabili aba mucinshi. Pali ino mpindi, balakoselesha ba Olga ukulukuya mu kubungana kabili balabatwalako na mu kubungana. Shimbi impindi balasangwako na mu kubungana.—1 Petilo 3:1.

ILI TULUKUSALULULA ABAKULANGISHAKO BUCINE

10. Kani Jonafani alishibile shani abo aelelwe ukulangishako bucine?

10 Ili Saulu alabiile ati alukufwaya ukwipaya Dafidi, Jonafani alikatashiwe ukusalululapo ifyakucita. Aalukufwaya ukuba uwa bucine kuli bawishi, kabili alukufwaya ne kuba uwa bucine kuli Dafidi. Jonafani alishibile ati baLesa tabaalipo na Saulu sombi baali na Dafidi, popele alisalulwilapo ukuba uwa bucine kuli Dafidi. Alibuulile Dafidi ukuya mu kufisama ne kubuula Saulu  umulandu taelelwepo ukwipaya Dafidi.—Pendeni 1 Samweli 19:1-6.

11, 12. Kani ukutemwa baYawe kungatofwako shani ukusalululapo ukulukuli aba bucine kuli bo?

11 Ba Alice, Bamboni aba ku Australia, nabo baalyelelwe ukusalululapo abo bali ne kulangishako bucine. Ili balukusambilila Baibolo, balibuulileko aba mu cisoolo cabo ifi balukusambilila. Balibabuulile ati tabakalukusefyako Icilishimishi kabili balilabiile ne mulandu balekeele ukucite’fyo. Pa kutanga aba mu cisoolo cabo balibombomene, pano mu kupelako balibafiitilwe. Balukubona ati ba Alice balilekele ukubabikako akalango. Eli banyinabo ba Alice balabiile ati tabalukufwayapo ukubabona ba Alice nakabili. Ba Alice balilabiile ati: “Nalikankamene kabili nalisoomenwe ukwakuti ni pakuti nalitemenwe makosa aba mu cisoolo canji. Nangabe’fyo, nalisalulwilepo ukubika baYawe ne Bana babo pantangiile, kabili nalibatishiwe pe bungano lyakonkelepo.”—Matayo 10:37.

12 Tatwelelwepo ukuleka ifili fyonse, ifili koti libumba lya bafyakwangala, isukuulu, neli icalo cesu, ukuba ificindeme ukucila pa kuba aba bucine kuli baYawe. Ku cakubwenako, Henry aalitemenwe ukuteya chess ne bumba lya pa sukuulu alukusambililapo kabili alukufwaya ne kucimfya amasukuulu ambi. Pano pakuti alukuteya chess lyonse pa mpelo ya mulungu, talukukwatapo impindi ya kuya mu kutulisha na mu kubungana. Henry alilabiile ati ukuba uwa bucine kwi sukuulu alukusambililapo kwalishile mu kuba ukucindeme ukucila ukuba uwa bucine kuli baLesa. Penka, alisalulwilepo ukuleka ukuteya chess mwi bumba lya pa sukuulu.—Matayo 6:33.

13. Kani ukuba aba bucine kuli baLesa kungatofwako shani ili twaba ne makatasho mu cisoolo?

13 Shimbi impindi cingaba icikateshe ukuba uwa bucine ku ba mu cisoolo abalekenelekene pa mpindi intu imo. Ku cakubwenako,  ba Ken balilabiile ati: “Nalukufwaya ukulukufakashisha bamayo abacekulu kabili nalukufwaya ati balukwikala na fwebo impindi ne mpindi. Pano bamayo ne bakashi banji tabaalukumfwanapo.” Ba Ken balilabiile ne kweba’ti: “Kani nacita ifyakusangalasha bamo ninshi bambi kubombomana.” Ba Ken balyalakenye pali fyefyo Baibolo ilabila kabili balikutulukile ati ili ifyakube’fyo fyacitika balyelelwe ukuba aba bucine ku bakashi babo. Popele balisalulwilepo ukucite’cintu icasangaleshe abakashi babo. Panuma, balibuulile abakashi umulandu baelelwe ukubeela ne nkumbu kuli banyinafyala. Nakabili, balibuulile banyinabo umulandu baelelwe ukulukucindikila abalokashi babo.—Pendeni Ifyakutanga 2:24; 1 AbaKolinto 13:4, 5.

ILI UMUKWABESU ATUBIFYA

14. Findo Saulu acitile kuli Jonafani?

14 Tungaba aba bucine kuli baYawe na lyelyo umukwabesu uulukutangilila tacitilepo ifiweme kuli fwebo. BaLesa ebaasalulwile Saulu, pano alukucite’fibipile ku mwana wakwe. Taishibilepo umulandu Jonafani atemenwe Dafidi. Popele, ili Jonafani alukufwaya ukofwako Dafidi, Saulu alikalipile, kabili alimwanshishe’nsoni umwana wakwe ninshi ne bantu abengi balukubonako. Nangabe’fyo, Jonafani alipitilishe ukulukucindika bawishi. Pa mpindi intu imo, ali uwa bucine kuli baYawe na kuli Dafidi, uwasalulwilwe  kuli baYawe ukupyana Saulu.—1 Samweli 20:30-41.

15. Kani umukwabesu atubifya, findo twelelwe ukucita?

15 Pali bubuno bukumo, abakwabesu abatutangilila mu makelesha balesha ukubulo’kuba ne musalululo. Pano aba abakwabesu tabawamininepo. Pakuti pali fyefyo, cingacitika ati bafilwa ukumfwisha umulandu twacitila fimo. (1 Samweli 1:13-17) Popele kani tabatusololwelepo bwino, mwane nga tupitilishe ukulukuli aba bucine kuli baYawe.

KANI CAKATASHA UKUCITA IFI TWALAILE

16. Ni muli fisa fintu twelelwe ukuba aba bucine kuli baLesa?

16 Saulu taalukufwayapo ati Dafidi akabe imfumu sombi alukufwaya ati Jonafani akabe imfumu. (1 Samweli 20:31) Pano Jonafani alitemenwe baYawe kabili ali uwa bucine kuli bo. Popele pa mupunda wa kulangisha ati alilitemenwe, Jonafani alibeele icibusa cakwe Dafidi ne kucita ifi amulaile. Na cine, uutemenwe baYawe kabili uwa bucine kuli bo alalaya “ukulisomesha, ne kubulo’kwaluka.” (Amasamo 15:4) Pakuti tuli ba bucine kuli baYawe, tulacita fyonse lukoso ifi tulaya. Ku cakubwenako, kani twalaya ukucita ubusulwishi ne bantu bambi, tukacita ifi twalaile, nangaba’ti cili icikateshe ukucita ifi twalaile. Kabili kani tulikwete amakatasho mu cupo cesu, tukalangisha ati tuli ba bucine kuli baYawe pa kulukuli aba bucine kuli bamukakwesu.—Pendeni Malaci 2:13-16.

Kani twalaya ukucita ubusulwishi ne bantu bambi, tulyelelwe ukucita ifi twalayene ni pakuti tuli ba bucine kuli baLesa (Boneni palakalafu 16)

17. Kani lino isambililo lyamofweniko shani?

17 Tulukufwaya ukuba koti ni Jonafani, ekweba’ti ukuba aba bucine kuli baLesa na lyelyo ifintu fyakatasha. Popele, nga tulukuli aba bucine kuli bakwabesu ne nkashi, nangaba’ti bacita ifya kutusoomesha. Kani twacite’fyo, tukasangalasha umutima wa baYawe kabili ici ecitusangalasha makosa. (Ifisimpi 27:11) Tungacetekela ati baYawe bakalukutucitila ifiweme shonse impindi kabili bakalukutulama. Mu ciputusha cakonkapo, tukabona ifi tungasambililako ku bantu na bambi abaliko mu nshiku shakwe Dafidi abali aba bucine ne batabalipo aba bucine.

^ [1] (palakalafu 9) Bambi talipo mashina abo.