Tolokeleni

Tolokeleni muye pa fyebo fya bubili

Tolokeleni muye pa filukusangwamo

Bamboni sha BaYawe

IciLamba

Akatambo ka Wakulama (Akakusambililamo)  |  February 2016

BaYawe Balimwitile ati “Icibusa Canji”

BaYawe Balimwitile ati “Icibusa Canji”

“Webo Ishilaeli, we mupyunjishi wanji, we Yakobi we nasalulwile, we mwana wakwe Ablaamu icibusa canji.”—YISAYA 41:8.

INYIMBO: 91, 22

1, 2. (a) Tuliishi shani ati abantunshi bangaba ifibusa fya baLesa? (b) Findo twakwambaalapo muli cicino iciputusha?

MU MWEO wesu onse, tulapengela ukutemiwa. Abantunshi tabapengelapo lukoso ubutemwe ububa pa mwalalume ne mwanakashi, sombi balapengela ne fibusa ifiweme kabili ifibatemenwe. Pano, ici fwe bantunshi tupengela makosa kutemiwa kuli baYawe. Abantu abengi tabacetekelepo ati abantunshi bangapalamina kuli baLesa ni pakuti baLesa tababonekapo kabili ba makosa onse. Pano fwebo tuliishi bucine!

2 Baibolo ilatubuulishisha ati kwali abantunshi ababeele ifibusa fya baLesa. Tulyelelwe ukusambililako ku fyakubwenako fyabo. Nindo twalabilile’fyo? Ni pakuti bucibusa na baLesa e cintu icicindeme makosa mu mweo wesu. Popele, nga tusambilileko ku cakubwenako cakwe Ablaamu. (Pendeni Jakobo 2:23) Kani alibeele shani icibusa ca baLesa? Ukucetekela  ekwamofweleko ukuba icibusa ca baLesa, kabili alishibikilwe ati “ni wishibo abo bonse aba kucetekela.” (AbaLoma 4:11) Ili mulukusambilila pa cakubwenako cakwe, mulukulipusha ati, ‘Kani ningatenteka shani ukucetekela kwakwe Ablaamu ne kukosha bucibusa bwanji na baYawe?’

IFI ABLAAMU ABEELE ICIBUSA CA BAYAWE

3, 4. (a) Buulishisheni ifi ukucetekela kwakwe Ablaamu kwaeshiwe. (b) Cindo calengeshe Ablaamu ukulitemenwa ukupeela Isaci koti mulambu?

3 Alakanyeni ati Ablaamu uuli ne myaka cipale 125 alukuniina ulupili panini panini. [1] (Boneni tumashiwi twa pa mpelo.) Uulukumulonda panuma ni Isaci umwana wakwe, uuli cipale ne myaka 25. Isaci alipintile inkuni, kabili Ablaamu alipintile icibeshi ne fyakwambushishako umulilo. Pa fintu ifi acitilepo mu mweo wakwe, cipale ici e cali cintu icakateshe makosa. Pano, talipo ati cali icikateshe pakuti pa kucekula. Twalabile’fyo ni pakuti pali iyi impindi ninshi acili ne makosa. Sombi cali icikateshe ni pakuti baYawe balimubuulile ukupeela umwana wakwe koti mulambu!—Ifyakutanga 22:1-8.

Ablaamu talondelepo lukoso ifyamubuulile baYawe ukwakubulo’kulangulukapo

4 Ifi baYawe bamubuulile Ablaamu ukucita fyalyeseshe makosa ukucetekela kwakwe. Bambi abantu balalabila ati baLesa tabalangishepo inkumbu pa kubuula Ablaamu ukwipaya umwana wakwe. Kabili bambi balalabila ati Ablaamu alisumiine ukwipayo’mwana wakwe ni pakuti taamutemenwepo. Abantu balalabila ifya kube’fi ni pakuti tabakwetepo ukucetekela kabili tabeshipo ifi ukucetekela kwa cinenene kuli. (1 AbaKolinto 2:14-16) Pano, Ablaamu talondelepo lukoso ifyamubuulile baYawe ukwakubulo’kulangulukapo. Alilondele ni pakuti ali ne kucetekela kwa cinenene. Alishibile ati baYawe tekuti bamubuulepo ukucite’cintu icali ne kumusoomesha umuyayaya. Ablaamu alishibile ati kani aumfwila, baYawe baali ne kumushukisha ye ne mwana wakwe. Findo fyaofweleko Ablaamu ukuba ne kucetekela kwa kube’fyo? Ifyamofweleko ni fyefyo asambilile na fyefyo apitilemo.

5. Kani ni ise’nshila cipale Ablaamu asambililemo pali baYawe, kabili ifi asambilile fyalimofweleko shani?

5 Ifi asambilile. Ablaamu alikuliile mu mushi wa Ule. Abantu muli wuyu umushi,  ukubikako na bawishi, baalukupempela balesa ba bufi. (Josyua 24:2) Pano Ablaamu alisambilile shani pali baYawe? Baibolo ilabuulishisha ati Shemi, umwana wakwe Noa, ali mukwabo Ablaamu. Kabili alifwile ili Ablaamu ali ne myaka cipale 150. Shemi ali ne kucetekela ukukosele, kabili alukubuulako ne ba mu cisoolo cakwe pali baYawe. Tatwishibilepo bwino, pano tungalabila ati cipale ewasambishe Ablaamu pali baYawe. Ifi Ablaamu asambilile fyalimulengeshe ukutemwa baYawe, kabili fyalimofweleko ukukosha ukucetekela kwakwe.

6, 7. Kani ifi Ablaamu apitilemo fyalikoseshe shani ukucetekela kwakwe?

6 Ifi apitilemo. Findo fyaofweleko Ablaamu ukucetekela makosa muli baYawe? Bambi balalabila ati ili tatungacite’cintu, tulatanga ukucilangulukapo makosa. Kanshi tungalabila ati ifi Ablaamu asambilile pali baLesa fyalimulengeshe ukucindika “baYawe Lesa Abacilile, Abene beulu ne calo ca panshi.” (Ifyakutanga 14:22) Baibolo ileta uku ukucindika ati ‘ukutonda baLesa.’ (AbaEbeya 5:7) Pakweba’ti tube icibusa ca baLesa, tulyelelwe ukulukubatonda neli ukulukubatiina. (Amasamo 25:14) Ukuba na yiyi imibelo kwalilengeshe Ablaamu ukulukumfwila baYawe.

7 BaLesa balibuulile Ablaamu na Sala ukusha ing’anda yabo iyali mu mushi wa Ule ne kuya ku calo cimbi. Baali bakulu, kabili baali ne kulukwikala mu matenti mu mweo wabo onse. Nangaba’ti Ablaamu alishibile ati baali ne kupita mu fyakwesha, ye alipitilishe ukulukumfwila baYawe. Pakuti ali ne cumfwila, baLesa balimushukishe kabili balukumulama. Ku cakubwenako, ili Sala, umukashi wakwe Ablaamu bamupintile, Ablaamu nga balimwipeye. Pano, pa mpindi ishilekenelekene baYawe mu cimpempela balimulamine Ablaamu na Sala. (Ifyakutanga 12:10-20; 20:2-7, 10-12, 17, 18) Ifi Ablaamu apitilemo fyalikoseshe ukucetekela kwakwe.

8. Findo tungacita pakweba’ti twishibe ne kubona ifingakosha bucibusa bwesu na baYawe?

8 Kani tungaba icibusa icipalamishe ica baYawe? Inya! Koti ni fyefyo cali kuli Ablaamu, na fwebo tulyelelwe ukusambilila pali baYawe. Na fwebo tungasambishiwa kabili tungapita na mu fintu ifingatofwako makosa mu mweo wesu. Pali bubuno bukumo, tulikwete ifingi ukucila na pali fyefyo Ablaamu akwete. (Danyeli 12:4; AbaLoma 11:33) Mu Baibolo mulilembelwe ifingi ifilabila pa ‘Bene beulu ne calo.’ Ifi tusambilila filatulengesha ukutemwa makosa  baYawe ne kulukubacindika. Kani twabatemwa kabili twabacindika, tulafwaisha ukulukubomfwila. Kani twacite’fyo, tulabona ifi baLesa batulama ne kutushukisha, kabili ukupita muli fifi kulakosha ukucetekela kwesu. Kani twapyungisha mu milimo ya baYawe, tulaba abasangalele kabili tulaba ne mutende. (Amasamo 34:8; Ifisimpi 10:22) Kani twasambilila makosa pali baYawe ne kubona ifi balukutofwako, ubulunda bwesu na bo bulakoselako.

IFI ABLAAMU ALAMINE BUCIBUSA BWAKWE NA BALESA

9, 10. (a) Findo ifipengelwa pakweba’ti bucibusa bube ubukosele? (b) Findo ifilangisha ati Ablaamu alicindikile bucibusa bwakwe na baYawe kabili alukubukosha?

9 Bucibusa ubukosele tungabupalanya ku cintu ca makwebo apatali. (Pendeni Ifisimpi 17:17.) Tabulipo koti liluba lya kupanga lukoso ili babika mu ng’anda pakweba’ti mulukuboneka bwino. Sombi, buli koti liluba lya cinenene ilipengela amenda ne kulamwa bwino pakweba’ti likule. Ablaamu alicindikile bucibusa akwete na baYawe. Kani alicitile shani ifyo?

Bucibusa buli koti liluba lya cinenene ilipengela amenda ne kulamwa bwino pakweba’ti likule

10 Ablaamu alipitilishe ukulukutiina baLesa ne kulukubomfwila. Ku cakubwenako, ili aile ku calo ca Kanani ne cisoolo cakwe eli ne bapyungishi bakwe, alukutangililwa na baYawe muli fyonse lukoso ifi alukusalululapo. Ili kwashele umwaka umo ati Isaci afyalwe, ninshi Ablaamu ali ne myaka 99, baYawe balimubuulile ukukopola abalalume bonse aba mu ng’anda yakwe. Kani Ablaamu alikanikile baYawe neli ukwesha ukukaana ifi bamubuulile ukucita? Koku, alicetekele muli baYawe kabili alicitile’fyo “akasuba ako kopele.”—Ifyakutanga 17:10-14, 23.

11. Nindo Ablaamu abombomanine pa fyali ne kucitika mu Sodoma na Gomola, kabili baYawe balimofweleko shani?

11 Pakuti Ablaamu alukumfwila baYawe mu fintu fyonse lukoso, bucibusa bwabo bwalukukoselako. Alukumfwa ati angalabila na baYawe pa fintu ifili fyonse, ukubikako lukoso ne kulomba ati baYawe bamofweko pa fyalukumubombomanika. Ku cakubwenako, ili baYawe balabiile ati bali ne konaala Sodoma na Gomola, Ablaamu alibombomene. Nindo? Alukutiina ati cipale ne bantu abalungeme bali ne kufwila pamo ne mbifi. Alibombomene pakuti pa mwipwa wakwe Loti ne cisoolo cakwe, abalukwikala mu Sodoma. Ablaamu alicetekele baYawe, “Abakusololola ne fya panshi fyonse,” na muli fyefyo alilabiile na baYawe pali fyefyo alukulanguluka. BaYawe bali abatekenye ku cibusa cabo, Ablaamu, kabili balimulangishe inkumbu. BaYawe balimubuulishishe ati na lyelyo balukusololola, balafwaya-fwaya abantu abalungeme ne kubapulusha.—Ifyakutanga 18:22-33.

12, 13. (a) Kani ifi Ablaamu asambilile na fyefyo apitilemo fyalimofweleko shani? (b) Findo filangisha ati Ablaamu alicetekele makosa muli baYawe?

12 Caboneka apaswetele ati ifi Ablaamu asambilile na fyefyo apitilemo fyalimofweleko  ukulukuli na bucibusa ubukosele na baYawe. Penka, na lyelyo baYawe bamubuulile ukupeela umwana wakwe koti mulambu, alishibile ati baYawe shonse impindi balaba abatekenye, aba nkumbu, abacetekelwe, kabili lyonse balalama abapyungishi babo. Ablaamu alicetekele ati pali ilya mpindi baYawe tabaalukilepo ne kuba abalukansa neli abakubule’nkumbu! Nindo twalabilile’fyo?

13 Ili tangatatika ukunina ulupili, Ablaamu alibuulile abapyungishi bakwe ati: “Ikaleni kuno ne mbongolo, lomba fwebilo ne musankwa twakuyo’ko; popele twakucindika baLesa, eli twakubwelela kuli mwebo.” (Ifyakutanga 22:5) Findo Ablaamu alukulabilapo? Kani alukubeepa ati ali ne kubwela na Isaci, umu eshibile ati ali ne kumupeela koti mulambu? Koku mwane. Baibolo ilalabila ati Ablaamu alishibile ati baYawe bali ne makosa aakubuusha Isaci kani afwa. (Pendeni AbaEbeya 11:19) Ablaamu alishibile ati baYawe balimupeele amakosa akukwata umwana nangaba’ti ye na Sala baali bacekulu. (AbaEbeya 11:11, 12, 18) Popele, alishibile ati baYawe bangacita icili conse. Ablaamu taishibilepo ifyali ne kucitika pali kakalya akasuba. Pano alicetekele ati kani caelelwa, baYawe bali ne kubuusha Isaci pakweba’ti fyonse lukoso ifi balaile fikakonshiwe. E mulandu Baibolo itila Ablaamu ati “ni wishibo abo bonse aba kucetekela.”

Ablaamu alicetekele ati kani caelelwa, baYawe bali ne kubuusha umwana wakwe pakweba’ti fyonse lukoso ifi balaile fikakonshiwe

14. Kani ni esa makatasho mukwata ili mulukupyungila baYawe, kabili icakubwenako cakwe Ablaamu cingamofweniko shani?

14 Nangabe’fyo, pali bubuno bukumo, baYawe tabatubuulapo ukupeela abana besu koti mulambu, pano balatubuula ukulukulonda amafunde abo. Shimbi impindi tekuti tumfwishepo umulandu batubuulila ukulonda fimo neli cingatukatashako ukufilonda. Kani na mwebo mulomfwapo ifya kube’fyo? Kuli bambi, umulimo wa kutulisha ukateshe. Cipale ni pakuti ba nsoni kabili balakatashiwa ukulabila ne bantu baabo tabeshipo. Bambi balafilwa ukuba abapuseneko na baabo basambilila nabo neli abo bapyunga nabo. (Ifyakufuma 23:2; 1 AbaTesalonike 2:2) Ili baYawe bamubuuleni ukucita fimo ifilukuboneka ukukatasha, mulukwanuka icakubwenako cakwe Ablaamu ica kuba ne kucetekela kabili abakosele. Kani twaalakanya pa fyakubwenako fya balalume ne banakashi aba bucetekelo, tungafwaisha ukubatuntulula ne kupalamina ku Cibusa cesu, baYawe.—AbaEbeya 12:1, 2.

MU KUBA ICIBUSA CA BAYAWE MULAFUMA AMASHUKO

15. Nindo tungalabilila ati Ablaamu talukumfwapo ububi pali fyefyo ali ne cumfwila kuli baYawe?

15 Kani Ablaamu alyumfwile ububi pali fyefyo alondele ukufunda kwa baYawe? Baibolo ilabuulishisha ati ili Ablaamu afwile, ‘imyaka yakwe yalikumene bwino iingi, aali mucekulu uwakumene imyaka iingi.’ (Ifyakutanga 25:8) Ili ali ne myaka 175, Ablaamu alukusangalala kani alanguluka pa fyamucitikiile  mweo wakwe onse. Mba nindo? Ni pakuti bucibusa bwakwe na baYawe e cali icintu icicindeme makosa kuli ye. Nangabe’fyo, amashiwi akweba’ti ‘imyaka yakwe yalikumene bwino iingi’ taalulapo ati Ablaamu taalukufwayapo ukuba ne mweo.

16. Findo ifikasangalasha Ablaamu mu Paladaiso?

16 Baibolo ilalabila ati Ablaamu “alipembelele umushi uyo uli ne fya kwibacilapo uwa kwibakwa ne kucitwa kuli baLesa.” (AbaEbeya 11:10) Ablaamu alicetekele ati kambi kasuba ali ne kuubona uyo umushi, e kweba’ti Ubufumu bwa baLesa, ninshi bulukwikalika icalo conse. Kabili mu cinenene akabubona! Alakanyeni ifi Ablaamu akaba umusangalele ukwikala mu paladaiso pa calo ne kupitilisha ukulukukosha bucibusa bwakwe na baLesa. Akasangalala ukwishiba ati icakubwenako cakwe cilyofweleko abapyungishi ba baLesa pa myaka iyakuti ubwingi! Mu Paladaiso akeshiba ati umulambu woyo apeele pa Lupili lwa Moliya walukwimakaninako icintu icikulu. (AbaEbeya 11:19) Nakabili, akasambilila ati ifi aumfwile ili alukwanshika ukwipaya umwana wakwe fyalyofweleko abantu abakuti ubwingi ukwishiba ifi baYawe baumfwile ili bapeele Abana babo, baYesu Klistu, ukuba mulubulo wa bantunshi bonse. (Yoane 3:16) Icakubwenako cakwe Ablaamu cilatofwako ukulukutoota pa cintu icakuti ubukulu icilangisha ubutemwe bwa baYawe, ekweba’ti umulubulo!

17. Findo mulukufwaisha ukucita, kabili findo tukambaalapo mu ciputusha cakonkapo?

17 Fwense nga tufwaishe ukutenteka ukucetekela kwakwe Ablaamu. Koti ni fyopele filya cali kuli Ablaamu, na fwebo tulyelelwe ukusambilila ne kulibwena ifintu ifingakosha ukucetekela kwesu. Ili tulukusambilila pali baYawe ne kulukubomfwila, tukalibwena ifi bashukisha ne kulama abapyungishi babo. (Pendeni AbaEbeya 6:10-12.) BaYawe, nga babe Icibusa cesu umuyayaya! Mu ciputusha cakonkapo, tukambaala pa bantu na bambi batatu aba bucetekelo ababeele ifibusa fya baLesa.

^ [1] (palakalafu 3) Pa kutanga, Ablaamu na Sala balukwitwa ati Ablama na Salai. Pano muli cicino iciputusha, twakulukupyungisha amashina yayo baYawe babapeele.