Tolokeleni

Tolokeleni muye pa filukusangwamo

Ukutekanya Kulalangisha Ati Tuli ne Mano

Ukutekanya Kulalangisha Ati Tuli ne Mano

Ba Toñi, abasambilile ifya kulama abacekulu, baalikonkwenshe ku cibi kabili umwanakashi uuli cipale ne myaka 50 e waiswileko. Uyu umwanakashi alilabiile ifibipile kuli ba Toñi pakuti pa kubulo’kufika bwangu pakweba’ti balame abafyashi bakwe abanakashi abaali bacekulu. Ba Toñi tabacelelwepo, baalifikile lukoso mu mpindi iyelelwe. Nangabe’fyo, mu kutekanya baalilombele uyu umwanakashi ukubafitulukila pa fyacitikile.

IMPINDI yakonkelepo ili babweleleko, uyu umwanakashi nakabili alilabiile ifibipile kuli ba Toñi. Findo ba Toñi bacitilepo? Balilabiile ati, “Tacalipo icipubile. Baalukulabila ifibipile kuli nebo apakubula ne mulandu.” Nangabe’fyo, ba Toñi nakabili baalilombele ukubafitulukila ne kubuula ulya umwanakashi ati baaliishi ifyakukatasha aalukupitamo.

Tulabile ati ni mwe mwali ba Toñi, kani mulukulanguluka ati mwali ne kucita shani? Kani mwali ne kwesha ukuba abatekenye? Kani cali ne kuba bukatasho kuli mwebo ukubulo’kufiitwa bwangu? Ukulabila lukoso bucine, tekuti cibepo icipubile ukubulo’kufiitwa kani tulukupita mu fipalene ne fyabuulishishiwa peulu. Kani tulikalipile, cilakatasha ukuba abatekenye.

Nangabe’fyo, Baibolo ilakoselesha abaKlistu ukuba abatekenye. Na cine, Amashiwi abaLesa alabuulishisha ati ukutekanya kulalangisha ati tuli ne mano. Jakobo alilembele ati: “Pali mwebo mba ni nani uli ne mano ne kalango? Ku kwikala kwakwe ukuweme nga alanjishe ifyakucita fyakwe ne kutekanya kwa mano.” (Jako. 3:13) Kani  ukutekanya kulalangisha shani ati tuli ne mano? Findo fingatofwako ukuba na yiyi imibelo iweme?

IFI UKUTEKANYA KULANGISHA ATI TULI NE MANO

Ukutekanya kulofwako ukucefyako ubukali. “Ukwasuka ukunakile kulaalulula ubukali; sombi ishiwi ililemene lilasungwila ukukalipa.”​Ifisi. 15:1.

Ukwasuka ninshi tulikalipile kuli koti kusonsela inkuni ku mulimo ni pakuti kungalengesha ifintu ukubipilako. (Ifisi. 26:21) Mu kupusanako, impindi ishingi kani twaasuka mu kutekanya ifintu filabako bwino. Kungalengesha ne muntu uwacikalipa makosa ukucefyako ubukali.

Ba Toñi balilibwenene bucine bwa mashiwi aya. Ulya umwanakashi pa kubona ifi ba Toñi baasukile mu kutekanya, aalililile. Alibuulishishe ati alukatashiwa pakuti pa makatasho akwe ne amu cisoolo. Pakuti pali fyefyo ba Toñi baasukile mu kutekanya, baalikwete ishuko lya kutulisha kuli ye kabili panuma baalitatikile ne kusambilila nakwe Baibolo.

Ukutekanya kungatulengesha ukuba abasangalele. “Balishukile abatekenye, abalicefeshe; pakuti bo bakapyane’calo conse ica panshi.”​Mat. 5:5.

Nindo abantu abali ne kutekanya babeela abasangalele? Imibelo ya kutekanya ililengeshe abengi abaali abakali ukuba abasangalele pali ino mpindi. Amekalilo abo aliwamineko, kabili baliishi ati ifiweme fikabacitikila kuntangiile. (AbaKolo. 3:12) Ba Adolfo, umupyungishi wa luteta ku Spain, balaanuka ifi baali ili tabangasambilila bucine.

Ba Adolfo baalilabiile ati: “Tapalipo ifi nabikileko akalango mu mweo wanji. Impindi ishingi nalukukalipa icakweba’ti ne babyanji baalukuntiina. Pano ifintu fyalyalukile. Ili nalukulwa, balindashile iciswi apali 6, imilopa yalipokomokele ukwakuti kabili nali apepi ne kufwa.”

Pali ino mpindi ba Adolfo balasambisha bambi ukuba abatekenye ukupitila muli fyefyo balabila ne kucita. Abengi balitemenwe ukuba nabo pakuti pa mibelo yabo iweme. Ba Adolfo balalabila ati balisangalele pa kwaluka bacitile. Kabili balatoota baYawe pali fyefyo babofweleko ukuba abatekenye.

Ukuba abatekenye kulasangalasha baYawe. “We mwana wanji ube ne mano, usangalashe umutima wanji, ati mwasuke uyo ulukuntongala.”​Ifisi. 27:11.

BaYawe balabatongala ku mupate wabo, Umusenseshi. BaLesa balikwete ne milandu ya cinenene iya kukalipa pa kubatongala muli yiyi inshila, pano Baibolo ilabuulishisha baYawe ati “abakokolo’kufitwa.” (Ifyakufu. 34:6) Kani twatenteka baLesa pa kubulo’kufiitwa bwangu ne kuba abatekenye, tulalangisha ati tuli ne mano kabili tulasangalasha makosa baYawe.​—Efesa 5:1.

Abantu abengi mu calo balafiitwa makosa. Tuli mu calo umuli abantu “ba mankulubinda, ba kutangala, ba kucobola, . . . basenseshi, ba kubulo’kuteke’mitima, bakali.” (2  Tim. 3:2, 3) Nangabe’fyo, ico tacelelwepo ukulengesha umuKlistu ukubulo’kuba ne kutekanya. Amashiwi abaLesa alatwanushako ati “amano ayo atulile kwiulu . . . abutende, akulelesa.” (Jako. 3:17) Kani tuli ba mutende tulalangisha ati tuli ne mano aafumine kwiulu. Aya amano akatofwako ukwasuka mu kutekanya ili twafiitwa kabili akatofwako ukupalamina kuli baYawe abapeela amano.