Tolokeleni

Tolokeleni muye pa filukusangwamo

Mwalilubwilwe Pakuti pa Luse

Mwalilubwilwe Pakuti pa Luse

“Ukubifya takukamukomekeni; . . . sombi ni ku luse eko mukomekwa.”—LOMA 6:14.

INYIMBO: 2, 61

1, 2. Nindo amashiwi aali pe lembo lya AbaLoma 5:12 acindamiine kuli Bamboni sha BaYawe?

ALAKANYENI ati mulukufwaya ukulemba amalembo Bamboni sha BaYawe beshi bwino kabili ao bapyungisha makosa. Kani mungatatikilapo ukulemba ilembo lya AbaLoma 5:12? Langulukeni pa mpindi ishi mulabiilepo aya amashiwi: “Pakuti pa muntu umo, ukubifya kwaliinjile mu calo ca panshi, ne mfwa nayo pakuti pa kubifya; popele apo ne mfwa yalikumene ku bantu bonse, pakuti bonse balibifishe.”

2 Ili ilembo lilapyungishiwa makosa mwi buuku lya Kani Findo Baibolo Itusambisha? Ili mulukusambisha abana benu neli abantu bambi muli lili ibuuku, mulalipenda ilembo lya AbaLoma 5:12. Ku cakubwenako, mulalipyungisha ili mulukusambilila mu capitala 3 pa mulandu baLesa baalengele icalo, mu capitala 5 pa mulubulo, na mu capitala 6 pali fyefyo Baibolo ilabilapo pa bafwile. Pano, kani mulalakanyapo makosa pe lembo lya AbaLoma 5:12 ili mulukulanguluka pali bucibusa bwenu na baYawe, ifi mucita, na pa fiweme ifi mukalitemwesha kuntangiile?

3. Findo twelelwe ukulukwanuka?

 3 Fwense tulyelelwe ukulukwanuka ati tatuwamininepo. Tulabifya inshiku shonse. Nangabe’fyo, tulishi ati baLesa balaanuka ati tuli ifukutu, kabili ati balalitemenwa ukutucitile’nkumbu. (Amasa. 103:13, 14) Ili baYesu baalukusambisha abasambile babo ifya kutembela, baalilabiile na pa kulomba kuli baLesa ati: “Mulukutufitulukila ifya kubifya fyesu.” (Luku 11:2-4) Popele, tatwelelwepo ukulukwalakanya pa fya kubifya twacitile ifi baLesa baatufitulukiile. Pano, tungabwenamo kani tulukulanguluka pali fyefyo baYawe baatufitulukiile.

BAALITUFITULUKIILE PAKUTI PA LUSE LWABO

4, 5. (a) Findo fingatofwako ukumfwisha ilembo lya AbaLoma 5:12? (b) Kani ishiwi ‘uluse’ ililabiilwepo pa AbaLoma 3:24 lilaalule’ndo?

4 Mu fyapitala ifili apepi ne lembo lya AbaLoma 5:12 makosa makosa mu capitala 6 muli ifyebo ificindeme ifibuulishisha icebo intangishi Paulu yalabiilepo pali lili ilembo. Ifi ifyebo fyakutofwako ukumfwisha ifi baYawe bangatufitulukila. Mu capitala 3 tulapendamo ati: “Abantu bonse balibifishe, . . .  sombi, pakuti pa luse lwabo, bo ne kulungama pakuti pa kulubuko’ko ukuli muli baKlistu Yesu.” (Loma 3:23, 24) Kani ishiwi Paulu apyungishe ilya kweba ati ‘uluse’ lilaalule’ndo? Ukwelelwa na fyefyo ibuuku limo lilabiilepo, Paulu aalipyungishe ishiwi lya ciGiliki ililosha “ku kofwako umuntu mu kulitemenwa, ukwakubula ukucetekela ifili fyonse ukufuma kuli ye.” Luse ululangishiwa ku muntu utelelwepo ukulangishiwa uluse.

5 Abasambilile ifya mu Baibolo ba John Parkhurst baalilembele ati: “Ukulosha kuli baLesa neli baKlistu, impindi ishingi ili ishiwi [ilya ciGiliki] lilalosha kuli fyefyo bofwako abantu mu kulitemenwa neli inkumbu ishi balangisha pakweba’ti balubule ne kupulusha abantunshi.” Pano, baLesa baalilangishe shani uluse? Kabili uluse lwa baLesa lulakuma shani ubucetekelo bwenu ubwa kuntangiile na bucibusa bwenu nabo? Nga tubone.

6. Kani abantu bonse bangabwenamo shani mu luse lwa baLesa?

6 Pakuti “pa muntu umo,” Adama, ukubifya ne mfwa “kwalinjile mu calo ca panshi.” Popele, “pa kupulaisha kwa muntu umo, imfwa yalibele ne bufumu.” Paulu aalilundilepo ati “ukufula kwa luse” kwalibwenekele “pakuti pali babo bamo, baYesu Klistu.” (Loma 5:12, 15, 17) Kabili abantunshi bonse balibwenenemo mu luse lwa baLesa. “Pakuti pa kutumwa kwa bantu bamo [baYesu] abenji bakaba balungeme.” Muli bucine, uluse lwa baLesa lungatulengesha ukuba ne ‘mweo wa muyayaya muli baYesu Klistu baShikulu besu.’—Loma 5:19, 21.

7. Nindo tungalabilila ati baLesa baalitulangishe inkumbu ishi tatwaelelwepo ukulangishiwa pa kutupeela umulubulo?

7 BaYawe tabaelelwepo ne kutuma abana babo ukwisa pa calo mu kutulubula. Na cine, pakuti fwebo tatuwamininepo, tatwaelelwepo ukutucitila ifi baLesa na baYesu bacitile pa kutupeela umulubulo uulengeshe ati tufitulukilwe ifya kubifya fyesu. Popele, tulifitulukilwe ifya kubifya fyesu kabili tukakwata umweo wa muyayaya kuntangiile pakuti pa nkumbu sha baLesa ishi tashelelwepo ne kulangishiwa kuli fwebo. Tulyelelwe ukutoota makosa pa mpese ya luse yeyo baLesa batupeele ne kulangishe’fyo mu mweo wesu lyonse.

UKULANGISHA UKUTOOTA PA LUSE LWA BALESA

8. Findo ifibipile ifi abantu bambi balanguluka?

8 Pakuti pa kubifya uku tupyene ukufuma kuli Adama, tulabifya kabili tulacita ifibipile. Nangabe’fyo, tekuti ciwamepo ukupufya uluse lwa baLesa pa kulanguluka ati: ‘Nangaba’ti nabifya, nshelelwepo ukubombomana. BaYawe  bakamfitulukila.’ Ku cakubombomanika, na mu mpindi ya basambile, abaKlistu bambi efi balukulanguluka. (Pendeni Juda 4.) Cipale fwebo tekuti tulabilepo ifyakube’fyo, pano ukulanguluka ukubipile kungaba mu mutima wesu kabili kungatatika ukukula panini panini.

9, 10. Kani Paulu na bambi baalilubwilwe shani ku kubifya ne mfwa?

9 Paulu aalifundile ati tatwelelwepo ukulukulanguluka ati: ‘BaLesa balomfwisha. Bakalubako lukoso ku fyakubifya fyanji.’ Nindo tatwelelwepo ukulukulangulukile’fyo? Ni pakuti, ukwelelwa na fyefyo Paulu aalembele, AbaKlistu ‘balifwile ku kubifya.’ (Pendeni AbaLoma 6:1, 2.) Pano, cingaba shani ifyo ati ‘balifwile ku kubifya’ ili baali bacili balabi pa calo?

10 BaLesa baalipyungishe umulubulo kuli Paulu na bonse abaaliko pali ilye’mpindi. Popele, baYawe baalibafitulukiile ifya kubifya fyabo, baalibasufishe ne mupashi uuswetelele kabili baalibetile ati bana babo aba ku mupashi. Penka, baalikwete ubucetekelo bwa kwikala kwiulu. Baali ne kwikala kwiulu ne kwikalika pamo na baKlistu kani bapitilisha ukuba aba bucine kuli baYawe. Pano Paulu aalilabiile pali bo ati ‘balifwile ku kubifya’ ili baali bacipyungila baLesa pa calo. Pa kubuulishisha, aalipyungishe icakubwenako ca baYesu abafwile ne kubuushiwa ku mupashi. BaYesu tabaalipo ne kufwa nakabili. Efi cali na ku baKlistu abasufishiwe, abaalyebele ati “bafwile ku kubifya, sombi balabi kuli baLesa muli baKlistu Yesu.” (Loma 6:9, 11) Amekalilo abo alipuseneko kuli fifilya aali pa kutanga. Tabaalukumfwilapo ifi imibili yabo iitaiwamininepo yalukufwaya. Baalifwile kuli fyonse ifi balukucita ku numa.

11. Ni muli isa nshila abaKlistu “bafwile ku kubifya”?

11 Nga pano fwebo? Ili tatungaba abaKlistu, twalukubifya impindi ishingi, cipale tatwaishibilepo ne kwishiba ifi ukubifya kwesu kwakulile kuli baLesa. Twali koti “basha ba bumbifi ne bakupulaisha.” Tungalabila ati twali “basha ba kubifya.” (Loma 6:19, 20) Pano, twalisambilile bucine bwa mu Baibolo, twalyalwile amekalilo esu, twalilituulile kuli baLesa, kabili twalibatishiwilwe. Ukufumo’lo, tulafwaisha lyonse ukulukumfwila ubusambishi ne mafunde abaLesa ‘ne mitima yesu yonse.’ Mu nshila imbi tungalabila ati ‘twalikakulukile ku kubifya’ kabili ‘twalibeele basha ba kulungama.’ (Loma 6:17, 18) Popele, na fwebo ‘tulifwile ku kubifya.’

12. Findo umo umo angasalululapo ukucita?

12 Pano, langulukeni pali fyefyo mungapyungisha amashiwi akwe Paulu aakweba ati: “Tekusumina ati ukubifya kukomeke imibili yenu iishi ukufwa, mwingatumikwa ku kukumbwa kwa kuko.” (Loma 6:12) ‘Tungasumina ati ukubifya kutukomeke’ kani tulukucita fyonse lukoso ifi umubili wesu uutauwamininepo ulukufwaya. Pakuti tulikwete amakosa ‘akusumina’ ati ukubifya kutukomeke neli ukukaana, tungepusha ati, Findo fwebo tulukufwaisha ukucita? Lipusheni ati: ‘Kani shimbi impindi ndaleka umubili wanji uutauwamininepo ukuntangilila? Neli Kani ndifwile ku kubifya? Kani ndi mulabi kuli baLesa muli baKlistu?’ Mu cinenene, tungakonsha ukusangalasha baYawe kani tulatoota pa luse baatulangishe pa kutufitulukila.

TUNGAKUCIMFYA UKUBIFYA

13. Findo filangisha ati tungakucimfya ukubifya?

13 Abantu ba baYawe balilekele ukulangisha ‘ifisepo ifi baali nafyo’ ili tabangasambilila pali baLesa, ukubatemwa ne kutatiko’kubapyungila. Mu mekalilo abo aakunuma cipale baali “mu fintu ifyo muli fyefyo emo [bali] ne nsoni bukumo” kabili ifyali ne kubalengesha ukufwa. (Loma 6:21) Panuma, baalyalukile. Ifyo efi ne baKlistu abengi mu Kolinto baacitile. Bambi baalukupempela ifibumbwabumbwa, baalukucita ubucende, abalalume baalukulaala ne balalume babyabo ne banakashi baalukucita fyopele’fyo,  baali ni bashilumfundi, baalukupendwa, na fimbi ifili koti ni fifi. Pano, ‘baalisamfiwe’ ne ‘kusweshiwa.’ (1 Koli. 6:9-11) Ne ba mwi kelesha lya buKlistu mu Loma nabo cipale efi bacitile. Paulu aalibalembeele ati: “Kabili tekufiposa ku kubifya ifileba fya mibili yenu, mu kucite’milimo isendeme; sombi mulipose kuli baLesa, koti balabi abafumine ku bafwile, ne kuposa kuli baLesa ne fileba fya mibili yenu mu kucite’milimo ilungeme.” (Loma 6:13) Paulu aalicetekele ati baali ne kupitilisha ukuba abaswetele ku mupashi ne kulukubwenamo mu luse lwa baLesa.

14, 15. Kani tungalangisha shani ati tulomfwila baYawe ‘ne mitima yesu yonse’?

14 Na ino mpindi efi cili. Bambi abakwabesu ne nkashi cipale baali koti ni baabo aba mu Kolinto. Pano nabo baalyalukile. Baalifilekele ifyakubifya ifi baalukucita kunuma kabili ‘baalisweshiwe.’ Nangaba na fyefyo mwaalukilemo, kani bucibusa bwenu na baLesa pali ino mpindi buli shani? Pakuti baLesa balitulangishe uluse ne kutufitulukila ifyakubifya fyesu, kani ifyo fikamulengesheni ukupyungisha pakweba’ti ‘mwilukupoosa ku kubifya ifileba fya mibili yenu’? Kani mukalangisha ati ‘mulukulipoosa kuli baLesa koti balabi abafumine ku bafwile’?

15 Pakweba’ti tucite’fyo, tatwelelwepo ukusalulula ukulukucita ifyakubifya ifi bambi mu Kolinto baacitileko. Ukucite’fyo kukalangisha ati tulatoota pa luse lwa baLesa kabili ati ‘ukubifya takutukomekapo.’ Popele, kani na fwebo tulafwaisha ukulangisha ati tulomfwila baYawe ‘ne mitima yesu yonse’ pa kwesha ne makosa esu onse ukubulo’kucita ifyakubifya ifi bambi babona ati finini?—Loma 6:14, 17.

16. Kani tulishi shani ati abaKlistu tabelelwepo ukupelela lukoso pa kuleko’kucita ifyakubifya ifikulu?

16 Alakanyeni pa ntangishi Paulu. Tungacetekela ati Paulu taalukucitako ifyakubifya ifilabiilwepo pali 1 AbaKolinto 6:9-11. Nangabe’fyo, aalifisulwile ati naye aalukubifya. Alilembele ati: “Nebo ndi wa munefu, uwaulilwe mu kukomekwa ku kubifya. Pakuti ifyo ifi ncita, nshifiishipo; pakuti ifi nshifwayapo, ifyo efi ncita; sombi ifyo ifi mfitilwa fyopele’fyo efi ncita.” (Loma 7:14, 15) Aya amashiwi alalangisha ati kwali na fimbi ifi Paulu aalukubona ati kubifya, kabili aalukulwa na fyefyo ifyakubifya. (Pendeni AbaLoma 7:21-23.) Na fwebo nga tulukutenteka Paulu ne kwesha ne makosa ukulukumfwila baYawe ‘ne mitima yesu yonse.’

17. Nindo mulukufwaila ukubeela aba bucine?

17 Nga tulabile pa kuba uwa bucine. AbaKlistu bonse balyelelwe ukuba aba bucine. (Pendeni Ifisimpi 14:5; AbaEfesa 4:25.) Satana “wa bufi, eubufyala.” Nakabili, Ananaya ne mukashi wakwe baalifwile pakuti pa kubepa ubufi. Pakuti tatulukufwayapo ukutenteka abakube’fyo, tulesha ukubulo’kubepa. (Yoa. 8:44; Ifyacit. 5:1-11) Pano, kani ukuba aba bucine kulapelela lukoso pa kubulo’kubepa? Na cine, tulyelelwe ukulangisha ati tulatoota pa luse lwa baLesa ukupitila mu kuba aba bucine.

18, 19. Nindo tungalabilila ati ukuba aba bucine takupelelapo lukoso pa kubulo’kulabila ifya bufi?

18 Ukubepa kulabila ifintu ifi tafilipo fya cine. Nangabe’fyo, baYawe balafwaya abantu babo ukucita ificilile na pa kubulo’kubepa. Baalikoseleshe abaIshilaeli ati: “Mukalukuswetelele; pakuti nebo ne baYawe Lesa wenu ndiswetelele.” Panuma, baalibabuulile pali fyefyo bangaba abaswetelele. Fimo ifi baLesa baalabiilepo ni fifi: “Teshi mwibe; neli kucite’fyakutumpaika, neli kubulanshanya ifya bufi.” (IfyabaLef. 19:2, 11) Ku cakubombomanika, umuntu cipale tekuti alabilepo ifya bufi, pano angatumpaika bambi.

Kani tukapitilisha ukubulo’kubepa ne kutumpaika bambi? (Boneni palakalafu 19)

19 Ku cakubwenako, umwalalume angabuula  abakulu ba milimo neli aba apyunga nabo ati takabako ku ncito mailo neli ati akafumako bwangu pakuti alyelelwe ukuya ku cipatela. Pano bucine bwa kweba’ti, kani aya ku cipatela, akaya lukoso mu kupoka umuyanda neli mu kubona abalaye pa mpindi lukoso iinini. Umulandu uukulu takabeelako ku ncito wa kweba ati alukufwaya ukuya bwangu mu kwangala neli mu kufakasha ne cisoolo cakwe. Muliko bucine muli fifilya alabila ati akaya ku cipatela, pano mungeba ati aciba wa bucine? Neli acilukubatumpaika lukoso? Mungeshibako na fimbi ifi abantu bacita pa kutumpaika bambi. Cipale abantu balacite’fi pakweba ati bebapanikapo neli pakweba’ti babwenemo. Nangaba’ti tapapo ubufi umuntu abepa, kani mungalabila’ti alonda ukufunda kwa baLesa ukwa kweba’ti: ‘Mwilukucite’fyakutumpaika’? Langulukeni na pe lembo lya AbaLoma 6:19, apali amashiwi akweba ati: “Nga mufipose ifileba fya mibili yenu ati basha bakulungama ati fiswete.”

20, 21. Kani uluse lwa baLesa lulyelelwe ukutulengesha ukucite’ndo?

20 Icebo icikulu ca kweba’ti pa kulangisha ati tulatoota pa luse lwa baLesa, tulyelelwe ukucita ificilile na pa kubulo’kucita ubucende, ukupendwa, neli ukubifya kumbi uku bambi mu Kolinto baalukucita. Ukutoota pa luse lwa baLesa kulaalula ati tulyelelwe ukubulo’kucita ubucencemeshi, eli tulyelelwe ukulukulwisha ifili fyonse ifingatulengesha ukutemwa ifyakulisangalashishamo ifibipile. Kani tuli basha ba kulungama, tatukalukupendwapo kabili tukaleka ne kunwa imfaina ishingi. Cilapengela ukupyungisha pakweba’ti tukonshe ukuleka ukucita ifya kube’fyo; pano tungacimfya muli kuku ukulwa.

21 Ici tulukufwaisha kuleka ukucita ifyakubifya fyonse ne fingaboneka ati finini. Talipo ni lyonse cingaba icipubile kuli fwebo ukucite’fyo. Nangabe’fyo, tulyelelwe ukwesha ne makosa esu onse ukucite’fyo, koti ni fifilya Paulu acitile. Alikoseleshe abakwabo ati: “Tekusumina ati ukubifya kukomeke imibili yenu iishi ukufwa, mwingatumikwa ku kukumbwa kwa kuko.” (Loma 6:12; 7:18-20) Ili tulukwesha ukucimfya ukubifya konse lukoso, tulalangisha ati mu cinenene tulatoota pa luse lwa baLesa muli baKlistu.

22. Findo ifi baLesa bakacitila bonse abalangisha ati balatoota pa luse lwabo?

22 Pakuti pa luse lwa baLesa, tulifitulukilwe ifyakubifya fyesu kabili bacili balatufitulukila. Pa kulangisha ukutoota, nga tupyungishe pakweba’ti tuciicile ukufwaisha ukucitako ifi bambi bangabona ati kubifya ukunini. Paulu aalibuulishishe ifiweme ifi baLesa bakatucitila kuntangiile, alilabiile ati: “Bukumo, ili mukakulukile ku kubifya ne kuba basha ba baLesa, muli ne fisepo fyenu ifileto’kusweta, ne kupela nako mweo wa muyayaya.”—Loma 6:22.