Tolokeleni

Tolokeleni muye pa fyebo fya bubili

Tolokeleni muye pa filukusangwamo

Bamboni sha BaYawe

IciLamba

Akatambo ka Wakulama (Akakusambililamo)  |  December 2016

BaYawe Balalambula Abo Ababafwaya-fwaya

BaYawe Balalambula Abo Ababafwaya-fwaya

“Uyo uwakwisa kuli baLesa e ungacetekela ati epo bali, nakabili ati bo bakubalambula abalukubafwaya-fwaya.”—EBEYA 11:6.

INYIMBO: 85, 134

1, 2. (a) Kani ukutemwa kungatofwako shani ukuba ne kucetekela? (b) Ni fisa fyakwipusha twakwambaalapo?

TULITEMENWE baYawe ni “pakuti bo e batanjile ukututemwa.” (1 Yoa. 4:19) Pa kulangisha ati baYawe bali ne butemwe, balisalulwilepo ukulukushukisha abapyungishi babo aba bucine. Kani twapitilisha ukutemwa baLesa besu, tukacetekela makosa ati eko bali, kabili ati balalambula abo bonse abatemiwe kuli bo.—Pendeni AbaEbeya 11:6.

2 BaYawe balitemenwe ukulambula abapyungishi babo kabili balalitemenwa ukucite’fyo. Pakweba’ti ukucetekela kwesu kube ukukumene, tulyelelwe ukwishiba ati baLesa bakalambula abo ababafwaya-fwaya, pakuti “ukucetekela e kwishibila kwa fintu ififwailwe.” (Ebeya 11:1) Ca cine, ukucetekela kulisankenemo ukupembelela amashuko baLesa balaile. Kani tulabwenamo shani mu kuba ne bucetekelo bwa kweba’ti tukalambulwa? Kani baYawe baalilambwile shani abapyungishi babo ku mpindi ya kunuma, kabili balalambula shani abapyungishi babo pali ino mpindi? Mwane nga tubone.

 BAYAWE BALILAILE UKUSHUKISHA ABAPYUNGISHI BABO

3. Findo baYawe batulaile pali Malaci 3:10?

3 BaYawe balisalulwilepo abene ukulambula abapyungishi babo, popele balitubuulile ifi tungacita pa kupoka ayo amashuko. Tulapenda ati: “BaYawe ba mabumba balukulabila ati . . . mungeshe nebo  . . kani nshikamwiswileni utumbeluka utwa mwiulu, ne kumwitulwileni ishuko ilya kubulapo ne mwa kulilongelela.” (Mal. 3:10) Tulalangisha ati tulatoota kani twaesha ukucita ifi baYawe batubuulile.

4. Nindo ingatulengesha ukucetekela amashiwi baYesu balabiile aali pali Matayo 6:33?

4 BaYesu baalilaile abasambile babo ati kani batanga ukupensela Ubufumu, baLesa baali ne kubofwako. (Pendeni Matayo 6:33.) BaYesu baalilaile ifyo ni pakuti balibwene ifi baYawe balangishe ati ba bucine. BaYesu baalishibile ati fyonse ifi baLesa balaya filakonshiwa. (Yisa. 55:11) Na fwebo kani twacetekela makosa muli baYawe, bakakonsha ifi batulaile ati: “Teshi nkuleke neli kuleka konse, neli kukusha neli panini.” (Ebeya 13:5) Aya amashiwi angatofwako ukucetekela ifi baYesu balabiile pa kutanga ukupensela Ubufumu bwa baLesa ne kulungama kwabo.

BaYesu baalilangishe ati abasambile babo baali ne kulambulwa pa kulipeelesha kwabo (Boneni palakalafu 5)

5. Nindo tungalabilila ati amashiwi baYesu baasukile Petilo alatukoselesha?

5 Pa mpindi imo Petilo aalipwishe baYesu ati: “Fwebo twalishile fyonse, ne kumulondeni; mba findo lomba tukapoka?” (Mat. 19:27) Pa mupunda wa kumukalipila Petilo pa kwipusha ico icakwipusha, baYesu baalibuulile abasambile babo ati baali ne kulambulwa pali fyefyo baalipeeleshe. Balya abasambile ba bucetekelo eli na bambi bakekalika pamo na baYesu kwiulu. Pano, na pali ino mpindi amashuko eko ali. BaYesu baalilabiile ati: “Abantu bonse uwashile kani mang’anda kani  bakwabo, kani ni nkashi, kani ni bawishi, kani ni banyina, kani bana, kani mabala, pakuti pe shina lyanji, uyo akapoka umwanda, ne kupyana umweo uwa muyayaya.” (Mat. 19:29) Abasambile babo baali ne kupoka amashuko aakuti ubwingi aakucila na pali fyefyo baashiile. Mu cinenene, fwense tungasuminishako ati abaKlistu babyesu abali koti ni bawishifwe, banyinefwe, abakwasu, inkashi, ne bana balicilile ukucindama na pa fintu ifili fyonse ifi tushiile pakuti pa Bufumu.

‘ICAKWIMAKANIKO’BWATO ICA KU MUTIMA’

6. Nindo baYawe balaile ukulambula abapyungishi babo?

6 BaYawe balilaile ukulambula abapyungishi babo. Ici cilofwako abapyungishi babo ukukoselela ili bucine bwabo kuli baLesa bwaeshiwa. Ukulunda pa mashuko balitemwesha mu kwanshika kwa baLesa pali ino mpindi, abapyungishi ba baYawe aba bucetekelo balafwaisha ukwisa mu kulitemwesha amashuko na ambi aaweme makosa kuntangiile. (1 Tim. 4:8) Fya cine, ukwishiba ati baYawe “bakubalambula abalukubafwaya-fwaya,” kukatofwako ukuba abakosele mu kucetekela.—Ebeya 11:6.

7. Kani ubucetekelo bwesu buli shani koti cakwimakaniko’bwato?

7 Ili baYesu baalukulabila Ilyashi lya pa Lupili, baalilabiile ati: “Sangalaleni, mulukusembo’kwakuti, pakuti ukulambulwa kwenu ukwa kwiulu kukulu; pakuti fyopele’fyo efi balukubakululusha akale abakushimika abamutanjilileni.” (Mat. 5:12) Ili bambi bakapoka ishuko lya kuya kwiulu, bambi nabo bakakwata umweo wa muyayaya mu paladaiso pa calo. Ili nalyo lishuko ilitulengesha ‘ukusangalala ne kusembo’kwakuti.’ (Amasa. 37:11; Luku 18:30) Nangaba’ti tukaba kwiulu neli pa calo, ubucetekelo bwesu bulyelelwe ukuba koti ‘cakwimakaniko’bwato ica ku mutima, ubwikalikilwe, ubukosele.’ (Ebeya 6:17-20) Koti ni fyenka filya icakwimakaniko’bwato cofwako ubwato ukukosa ili kwaba icipuupu, ubucetekelo bwa kuntangiile bungatofwako ukucefyako ukubombomana ne kukosha bucibusa bwesu na baYawe. Kabili bungatofwako ukukoselela ili twaba ne makatasho.

8. Kani ubucetekelo bulatofwako shani ukucefyako ukubamba mu mutima?

8 Ubucetekelo tukwete ubulembelwe mu Baibolo bulatofwako ukucefyako ukubamba mu mutima pali ino mpindi. Fyenka filya umuyanda utendulusha icilonda, efi ne milayi ya baLesa itendulusha umutima wesu uubombomene. Cilatusangalasha ukwishiba ati ‘tungabika icipinto cesu pali baYawe’ pakuti tulishi ati ‘bakatukosha’! (Amasa. 55:22) Tulicetekele ati baLesa balishi “ukucite’fintu ifya kucilo’kwakuti na pali fyefyo ifi tulomba neli kulanguluka.” (Efesa 3:20) Langulukeni lukoso, ifyo ifintu talipo fikulu lukoso, sombi fintu “ifya kucilo’kwakuti” na pa fikulu!

9. Nindo itulengesha ukucetekela ati baYawe bakatushukisha?

9 Pakweba’ti tukapoke ilambulo, tulyelelwe ukucetekela makosa muli baYawe ne kulukulonda amafunde abo. Mose aalibuulile abaIshilaeli ati: “BaYawe bakulukukushukisha icine mu calo ico baYawe Lesa wobe balukukupela ati bupyani ubwa kuba nabo webo; kani icine ulukumfwisha ishiwi lya baYawe Lesa wobe, ukulukulanguluko’kucita ifunde ili lyonse ili ndukukufunda akasuba kano. Pakuti baYawe Lesa wobe bakulukukushukisha, koti ni fyefyo ifi balayene na webo.” (Ndute. 15:4-6) Kani mulicetekele ati baYawe bakamushukisheni kani mwapitilisha ukubapyungila muli bucine? Ukwakubula ne kukanika na mwebo mulicetekele!

BAYAWE BAALILAMBWILE ABANTU BABO

10, 11. Kani baYawe baalilambwile shani Josefi?

10 Tulabwenamo mu kupenda ifilembelwe mu Baibolo. Tulapendamo amalyashi pali fyefyo  baLesa baalambwile abapyungishi babo aba bucetekelo. (Loma 15:4) Josefi aali cakubwenako iciweme makosa. Abakwabo baalimushitishe mu busha ku Ijipiti, kabili kulya abakashi bakwe Potifa baalimubepeshe ne kumubika mu jele. Kani ifi fyonse fyalimufumisheko kuli baLesa? Neli panini! “BaYawe bali nakwe Josefi ne kumulanjisha ne nkumbu . . . baYawe bali nakwe; nakabili ifyo ifi acitile, ni baYawe e bafishukishe.” (Ifyakuta. 39:21-23) Ili Josefi aalukupita muli ayo amakatasho, aalipembelele pali baLesa bakwe.

11 Ili papitile imyaka, Falo aalimufumishe Josefi mu jele ne kumubika wa bubili ku bufumu mu Ijipiti. (Ifyakuta. 41:1, 37-43) Ili akwete abana abalalume babili, “Josefi walimwilikile umukulu-bantu ishina lyakwe ati ni Manase; pakuti walilabile ati: BaLesa banengesho’kulubako ukupyunga kwanji konse, ne kubalubako bonse aba ku ng’anda ya batata. Kabili walimwilikile uwa bu babili ishina lyakwe ati ni Efilayimi; pakuti baLesa bamfunusha mu calo ca kupenga kwanji.” (Ifyakuta. 41:51, 52) Pakuti Josefi aali wa bucine kuli baLesa, baalimulambwile ica kweba’ti aalishile mu kofwako abaIshilaeli ne baIjipiti ukupuluka. Icebo icikulu ni cici, Josefi aalishibile ati ni baYawe e bamulambwile ne kumushukisha.—Ifyakuta. 45:5-9.

12. Findo fyaofweleko baYesu ukupitilisha ukuba ne kucetekela ili baalupita mu fyakwesha?

12 BaYesu nabo ili baalukupita mu fyaeseshe ukucetekela kwabo, baalipitilishe ukumfwila baLesa, kabili baalibalambwile. Findo fyabofweleko? Amashiwi abaLesa alabuulishisha ati: “Abasumine [iciti, NWT] pakuti pa kusangalala ukwali pa menso abo, ne kupufye’nsoni, ne kwikala ku lwine lwe tebe lya baLesa.” (Ebeya 12:2) BaYesu baalukulitemwesha ukulemya ishina lya baLesa. Na muli fyefyo, baWishibo baalipokelele umulambu wabo kabili baalibapeele amashuko na ambi aaweme. Baibolo ilabuulishisha ati baYesu baliikele “ku lwine lwe tebe lya baLesa.” Kabili tulapenda ne kweba’ti: “BaLesa balibalemeshe [baYesu] ukwakuti, ne kubapela ishina ilicilile na pa mashina onse.”—Filip. 2:9.

BAYAWE TABALUBAKO KU KUPYUNGA KWESU

13, 14. Kani baYawe balomfwa shani pali fyefyo tubacitila?

13 Tuliishi ati baYawe balatoota pali fyonse ifi tucita ili tulukubapyungila. BaYawe balishi ati shimbi impindi tulalibona ati tuli ba lukoso. Ili babona ati tulukufilwa ukupyungisha mu mulimo wabo pakuti pa kubulo’kukwata indalama, ukulwala, neli ukubombomana, balatulangisha inkumbu. Kabili tulicetekele ati baYawe balatoota pali fyefyo abapyungishi babo bacita pakweba’ti balukuli aba bucine kuli bo.—Pendeni AbaEbeya 6:10, 11.

14 Mulukwanuka kabili ati, tungatembela kuli baYawe ‘abomfwa ukutembela’ ne kucetekela ati bakomfwa ukutembela kwesu. (Amasa. 65:2) “BaWishifwe ba nkumbu, baLesa bakusangalasha konse” bakatusangalasha ne kutofwako ukukosha bucibusa bwesu nabo, cipale ukupitila mu baKlistu babyesu. (2 Koli. 1:3) Tulasangalasha baYawe kani tulukulangisha inkumbu kuli bambi. Baibolo ilalabila ati: “Uyo ubacitile’nkumbu abapengele e ubaapwisha baYawe, Nabo bakamubwesesha kabili ukucita kwakwe ukuweme.” (Ifisi. 19:17; Mat. 6:3, 4) Popele, ili twalitemenwa ukofwako abalukupita mu makatasho, baYawe balabona koti twabakongwesha indalama. Kabili baYawe balilaile ati bakatulambula pa kulangisha inkumbu sha kube’fyo.

UKULAMBULWA PALI INO MPINDI NA KUNTANGIILE

15. Ni esa amashuko mulukufwaya ukwisa mu kulitemwesha kuntangiile? (Boneni icikope pe buula 24.)

15 AbaKlistu abasufishiwe balakoshiwa kani balanguluka pe shuko lya kupokelela ‘umuntinya wa kulungama, uyo bakabapeela  pa kasuba ako baShikulu abasololweshi abalungeme.’ (2 Tim. 4:7, 8) Kani mulikwete ubucetekelo ubupuseneko, na mwebo mukalitemwesha amashuko aaweme. ‘Imbelele shimbi’ isha baYesu shilapembelela ukwisa mu kulitemwesha ishuko lya kwikala umuyayaya mu paladaiso pa calo. Mu paladaiso “bakalukulitemwesha mu kufula kwa butende.”—Yoa. 10:16; Amasa. 37:11.

16. Kani amashiwi tupenda pali 1 Yoane 3:19, 20 alatusangalasha shani?

16 Shimbi impindi tungomfwa koti tatulukupyungishapo, neli tungalanguluka ati tatulukusangalashapo baYawe muli fyefyo tulukucita. Tungakanika ne kukanika kani tukalitemweshako amashuko akuntangiile. Pano tatwelelwepo ukulubako ku mashiwi akweba’ti: “BaLesa e bacilile na pa mitima yesu; baliishi fyonse.” (Pendeni 1 Yoane 3:19, 20.) Balatulambula pali fyonse ifi tupyungisha mu mulimo wabo pakuti pa kucetekela tukwete ne butemwe, nangaba ati fiboneke ukucepa kuli fwebo.—Mako 12:41-44.

17. Ni esa amashuko amo amo tulitemwesha pali ino mpindi?

17 BaYawe balukushukisha abantu babo na muli shishino inshiku sha kupelako mu calo cakwe Satana. Balofwako ababapempela muli bucine ukulitemwesha ukuba muli paladaiso ya kupalanya lukoso, umuli ifyakulya fya ku mupashi ifingi. (Yisa. 54:13) Koti ni fyenka filya baYesu baalaile, baYawe balatulambula pali ino mpindi pa kutulengesha ukuba mu cisoolo ca bakwabesu ne nkashi abali mu calo conse. (Mako 10:29, 30) Ukulunda pali fyefyo, abo abafwaya-fwaya baLesa balalitemwesha umutende wa mwi langulushi, balateeke’mitima, kabili balaba abasangalele.—Filip. 4:4-7.

18, 19. Kani abapyungishi ba baYawe balomfwa shani pa mashuko bapokelela ukufuma kuli baYawe?

18 Abapyungishi ba baYawe mu calo conse balilibwenene amashuko aaweme bapokelela ukufuma kuli baYawe. Ku cakubwenako, ba Bianca abekala ku Germany baalilabiile ati: “Ndabatoota baYawe ukwakuti pa kungofwako ili nabombomana na pa kuba na nebo inshiku shonse. Ifintu mu calo filikateshe makosa. Pano ili ndukupyungila pamo na baYawe, ndalyumfwa uulaminwe mu maboko abo. Lyonse ili nalipeelesha mu mulimo wabo, balampeela amashuko aakuti ubwingi.”

19 Bambi ni ba Paula abali ne myaka 70 abekala ku Canada. Balilwele ubulwashi bwa mu mungololo ubu beta ati spina bifida. Baalilabiile ati: “Ndipitilishe ukutulisha nangaba ati nshikwetepo amakosa akwenda. Ndatulisha ukupyungisha foni na mu kwambaala lukoso. Ndikwete akabuuku umu ndemba amalembo akunkoselesha ne mashiwi aaweme ukufuma mu mabuuku esu. Aka akabuuku ndaketa ati ‘Akabuuku Kanji Aka Kunkoselesha.’ Tatukapitilishapo ukubombomana kani tulukwalakanya pa milayi ya baYawe. BaYawe bakulukutofwako lyonse nangaba na fyefyo tulukupitamo.” Cipale mungapita mu makatasho aapuseneko ne aba Bianca neli aaba Paula. Nangabe’fyo, mungalanguluka pali fyefyo baYawe bamushukisheni na fyefyo bashukishe bambi. Ciweme ukwakuti ukulukwalakanya pali fyefyo baYawe bamushukisheni pali ino mpindi, na pali fyefyo bakamushukisheni kuntangiile!

20. Findo tukalitemwesha kani twapitilisha ukupyungila baYawe ne mutima wesu onse?

20 Lyonse mulukwanuka ati kani mulukulabila na baLesa ukupitila mu kutembela kuli bo ukufuma panshi ya mutima wenu, mukaba “ne kulambulwa ukukulu.” Mungacetekela ati “pa kucita koti kufwaya kwa baLesa, mukapoke ukulaya.” (Ebeya 10:35, 36) Popele, nga tupitilishe ukukosha ukucetekela kwesu ne kupyungila baYawe ne mutima wesu onse. Tungakonsha ukucite’fi, pakuti tulishi ati ni baYawe e bakatulambula.—Pendeni AbaKolosai 3:23, 24.