Tolokeleni

Tolokeleni muye pa fyebo fya bubili

Tolokeleni muye pa filukusangwamo

Bamboni sha BaYawe

IciLamba

Akatambo ka Wakulama (Akakusambililamo)  |  April 2016

Nindo Twelelwe Ukulukubungana Lyonse?

Nindo Twelelwe Ukulukubungana Lyonse?

“Baliikele ne munkonsha . . . ne kwambaala.”—IFYACITILWE 2:42.

INYIMBO: 20, 119

1-3. (a) Kani abaKlistu balilangishe shani ati balafwaisho’kubungana pamo? (Boneni icikope icili peulu.) (b) Findo twakwambaalapo muli cicino iciputusha?

ILI ba Corinna baali ne myaka 17, banyina balibekete kabili balibatwite mu busha ukutali. Panuma, ba Corinna nabo balibatwite ku Siberia ukwali ukutali makosa na kwabo. Ili baali kulya, baalukupyungila pe famu kabili balukubalama koti musha. Shimbi impindi balukubabuula ukupyungila posonde apatantile ukwakuti ninshi tabakwetepo ne fyakufwala fya mpepo. Nangabe’fyo, ba Corinna ne nkashi imbi balisalulwilepo ukucita ifili fyonse ifi bangacita pakweba’ti baye mu kusangwa ku kubungana kwa pe kelesha.

2 Ba Corinna balilabiile ati: “Twalifumine pe famu ubushiku kabili twalyendele amakilomita 25 pakweba’ti tufike pa citesheni ce shitima. Ishitima twaninine lyalitatikileko  ukwenda pa 02:00, kabili lyalyendele pa maawashi 6, eli pano twaselukile ne kwenda panshi amakilomita 10 pakweba’ti tufike apa kubunganina.” Ba Corinna balisangalele pali fyefyo bacitile. Balilabiile ati: “Pa  kubungana, twalisambilile Akatambo ka Wakulama kabili twalimbile ne nyimbo sha Bufumu. Ukusangwa kuli kuku ukubungana kwalikosesho’kucetekela kwesu.” Aba bankashi babili balibwelele pa famu panuma ya nshiku shitatu, kabili umwine we famu taishibilepo ne kwishiba ati balifuminepo.

3 Abantu ba baYawe lyonse balafwaisha ukulukusangwa pamo. Ku cakubwenako, abaKlistu ba kutanga balukufwaisho’kulukupempela baYawe pamo ne kusambilila pali bo. (Ifyacitilwe 2:42) Ukwakubula ne kukanika, na mwebo mulafwaisho’kulukusangwa ku kubungana. Pano koti ni fyefyo cili ku bakwabenu ne nkashi abengi, mungalukukatashiwa ukusangwa ku kubungana. Cipale mulapengelwa ukuba ku ncito pa mpindi iikulu, mulikwete ifyakucita ifingi, neli mulakatala lukoso. Findo fingatofwako ukucita ifili fyonse ifi tungacita pakweba’ti tulukusangwa ku kubungana? [1] (Boneni tumashiwi twa pa mpelo.) Tungakoselesha shani abo tusambilila nabo Baibolo ukulukusangwa ku kubungana lyonse? Muli cicino iciputusha twakwambaala (1) ifi tubwenamo mu kusangwa ku kubungana, (2) ifi tungofwako bambi pa kulukusangwako, na (3) ifi ukusangwa ku kubungana kungasangalasha baYawe. [2]—Boneni tumashiwi twa pa mpelo.

IFI TUBWENAMO MU KUBUNGANA

4. Kani ukubungana kulatofwako shani ukusambilila pali baYawe?

4 Ili tuli pa kubungana, tulasambishiwa. Lyonse pa kubungana tulasambilila pali baYawe. Ku cakubwenako, amakelesha aengi bukumo aalukusambilila ibuuku lya Palameni Kuli Yehova pa Ukusambilila Baibolo Ukwa mwi Kelesha. Kani ukusambilila pa mibelo ya baYawe ne kumfwa ifi abakwabenu batemenwe baYawe kwalimofweleniko shani? Ukwakubula ne kukanika, kwalimulengesheni ukutemenwako baYawe. Nakabili, ili tuli pa kubungana tulasambilile’fingi pali Baibolo ukupitila mu kukutika ku malyashi aalabilwa, ku fyakulangilila, ne kukutikisha lyelyo balukupenda Baibolo. (Neyamiya 8:8) Kabili langulukeni lukoso pa fintu ifingi ifi tusambilila ili tulukwanshika ukupenda Baibolo ukwa mulungu ne mulungu eli ne kumfwa ifi abakwabesu bambi basambililemo.

5. Kani ukubungana kulimofweleniko shani ukupyungisha ifi musambilile mu Baibolo neli ukuwamyako ukutulisha kwenu?

5 Ukubungana kulatusambisha ifya kupyungisha ukufunda kwa mu Baibolo mu myeo yesu. (1 AbaTesalonike 4:9, 10) Ku cakubwenako, kani mulisangilwepo kwi Sambililo lya Akatambo ka Wakulama ilyamulengesheni ukufwaisho’kupyungisha mu milimo ya baYawe, ukuwamyako amatembelo enu, neli ukufitulukila umukwabenu neli inkashi? Ukubungana ukubako mu kati ka mulungu kulatusambisha ifya kutulisha icebo iciweme ku bantu bambi kabili kulatofwako ukumfwisha bucine bwa mu Baibolo.—Matayo 28:19, 20.

6. Kani ukubungana kwesu kulatukoselesha shani ne kutukosha?

6 Ili tuli pa kubungana, tulakoseleshiwa. Icalo cakwe Satana cilesha ukunasho’kucetekela  kwesu kabili cingatulengesha ukubombomana. Pano ukubungana kwesu kulatukoselesha kabili kulatukosha pakweba’ti tupitilisho’kupyungila baYawe. (Pendeni Ifyacitilwe 15:30-32.) Impindi ishingi tulasambilila pali fyefyo ifyakushimika fya mu Baibolo filukukonshiwa. Ici cilatofwako ukucetekela ati imilayi ya baYawe yonse iya kuntangiile ikakonshiwa. Abakwabesu ne nkashi balatukoselesha ukupitila mu fyasuko fyabo, mu kulabila amalyashi, eli na mu kwimbila baYawe ne mweo wabo onse. (1 AbaKolinto 14:26) Kabili ili tulukwambaala nabo ili ukubungana takungatatika na panuma ya kubungana, tulasangalashiwa ni pakuti tulikwete ifibusa ifingi ifitubikileko akalango.—1 AbaKolinto 16:17, 18.

Ukubungana kwesu kulatukoselesha kabili kulatukosha pakweba’ti tupitilisho’kupyungila baYawe

7. Nindo cicindamine ukulukubungana pamo?

7 Ili tuli pa kubungana, umupashi uswetelele uwa baLesa ulatofwako. BaYesu balapyungisha uyu umupashi uswetelele pa kutangilila amakelesha. Na cine, balitubuulile ati “uyo uli ne matwi nga omfwe ifi ulukulabila umupashi ku makelesha.” (Ukufisulula 2:7) Umupashi uswetelele ulatofwako ukuciicila ifyakwesha fyakwe Satana ne kubulo’kuba ne mwenso ili tulukutulisha. Nakabili, ulatofwako ukulukusalululapo bwino pa fintu. E mulandu twelelwe ukucita ifili fyonse ifi tungacita pakweba’ti tulukusangwa ku kubungana lyonse ne kupokelela ukofwewa kwa mupashi uswetelele uwa baLesa.

TULOFWAKO BAMBI PA KUBUNGANA

8. Kani tulofwako shani abakwabesu ili tulukusangwa ku kubungana, ukwasukapo, ne kwimba? (Boneni akabokoshi ka “ Balomfwako Bwino Lyonse Panuma ya Kubungana.”)

8 Ili tuli pa kubungana, tulakwata ishuko lya kulangisha abakwabesu ne nkashi ati tulibatemenwe. Abakwabesu abengi mu makelesha balukupita mu makatasho alekenelekene. Intangishi Paulu yalilembele ati: “Nga tulangulukanshanye.” (AbaEbeya 10:24, 25) Tungalangisha ati tulitemenwe abakwabesu ne nkashi kani tulukubungana pamo ne kulukukoseleshanshanya. Kani twaya mu kubungana, tulalangisha ati tulafwaisha ukuba ne bakwabesu pakweba’ti tulukwambaala nabo kabili ati tulibikile akalango kuli bo. Nakabili, tulabakoselesha ili balukumfwa ku fyasuko fyesu ne kwimba kwesu uku twimba ne mweo wesu onse.—AbaKolosai 3:16.

9, 10. (a) Buulishisheni ifi amashiwi abaYesu aali pali Yoane 10:16 atofwako ukumfwisho’mulandu cicindamine ukulukubungana pamo ne bakwabesu. (b) Kani tulukusangwako lyonse ku kubungana, tungofwako shani baabo bakeene ku ba mu cisoolo cabo?

 9 Kani twaya mu kubungana, tulapalamina ku bakwabesu. (Pendeni Yoane 10:16.) BaYesu balilipalenye ku mwembeshi kabili balipalenye abasambile babo kwi tanga lya mbelele. Langulukeni pali cici: Kani imbelele shibili shili pa lupili, shimbi shibili shili mu mukolo, eli imbi imo ili kumbi lukoso, kani mulukulanguluka ati ishi imbelele shili litanga? Koku, ni pakuti itanga lya mbelele lilaba pamo kabili lilalonda umwembeshi. Mu kupalako, tatwelelwepo ukulitalamushako ku bakwabesu pa kubulo’kusangwa ku kubungana. Pakweba’ti tube ‘itanga limo’ tulyelelwe ukulukubungana pamo ne kulonda ‘umwembeshi umo.’

10 Ukubungana kulatofwako ukwikatana koti bana bankashi. (Amasamo 133:1) Bambi mwi kelesha balibakene ku bafyashi babo, abakwabo, neli inkashi shabo. Pano baYesu baalilaile ati aba kube’fi bakasange’cisoolo icibatemenwe kabili icikabalama bwino. (Mako 10:29, 30) Kani mulukusangwa ku kubungana kwa pe kelesha lyonse, mungaba kuli bambi koti ni bawishi, banyina, neli umukwabo. Kani twalanguluka pali fifi, tukalukufwaisho’kupyungisha apapelele amakosa esu pakweba’ti tulukusangwa ku kubungana lyonse.

TULASANGALASHA BAYAWE

11. Kani ukusangwa ku kubungana kulatofwako shani ukupeela baYawe ifi belelwe ukupeelwa?

11 Ili tuli pa kubungana, tulapeela baYawe ifi belelwe ukupeelwa. Pakuti baYawe e Balengeshi besu, tulyelelwe ukubatoota, ukubacindika, ne kubalemya. (Pendeni Ukufisulula  7:12.) Tungacite’fi pa kubungana ili tulukutembela, ili tulukwimba, na lyelyo tulukulabila pali bo. Mame’shuko ubune tukwete ilya kupempela baYawe imilungu yonse!

BaYawe balabona ati tulafwaisha ukulukusangwa ku kubungana kabili balatoota pali fyefyo twesha ukulukusangwako

12. BaYawe balomfwa shani kani twaumfwile’funde lyabo ilya kulukubungana pamo?

12 BaYawe e batulengele, kabili tulyelelwe ukulukubomfwila. Balitupeele ifunde lya kulukubungana pamo, makosa makosa ili ukushila kulukupalamina. Popele, kani tulukumfwila ilyo ifunde, baYawe balasangalala. (1 Yoane 3:22) Balabona ati tulafwaisho’kulukusangwa ku kubungana kabili balatoota pali fyefyo twesha ukulukusangwako.—AbaEbeya 6:10.

13, 14. Kani ukubungana kulatupalamisha shani kuli baYawe na kuli baYesu?

13 Kani twaya mu kubungana, tulalangisha baYawe ati tulafwaisha ukupalamina kuli bo na ku Bana babo. Ili tuli pa kubungana, tulasambilila Baibolo kabili baYawe balatusambisha ifi twelelwe ukulukucita na fyefyo amekalilo esu elelwe ukuba. (Yisaya 30:20, 21) Na lyelyo abatabapyungilapo baYawe basangwako ku kubungana, balabona ati tulatangililwa na baLesa. (1 AbaKolinto 14:23-25) BaYawe balatangililo’kubungana kwesu ne mupashi wabo uswetelele, kabili fyonse ifi tusambilila kulya filafuma kuli bo. Popele, ili twaya mu kubungana, tulakutika kuli fyefyo baYawe balukulabila, tulomfwa ifi batutemenwe, kabili tulapalamina makosa kuli bo.

14 BaYesu, Umutwi we kelesha, balilabiile ati: “Apo apa babungana babili kani batatu mwi shina lyanji, popele apo epo ndi na nebo pakati pali bo.” (Matayo 18:20) Nakabili Baibolo ilalabila ati baYesu ‘balenda pakati’ pa makelesha. (Ukufisulula 1:20–2:1) Ici cilukwalula ati bali apepi ne makelesha, e baceba pali o. Pakuti pali fyefyo, tulapalamina kuli bo kani tulukusangwako ku kubungana. Caboneka apaswetele ati baYawe na baYesu balaba na fwebo ili tuli pa kubungana kabili balatukosha. Mulukulanguluka ati baYawe balomfwa shani ili babona mwebo mulukupyungisha apapelele amakosa enu pakweba’ti mupalamine kuli bo na ku Bana babo?

15. Kani ukusangwa ku kubungana kulalangisha shani baLesa ati tulafwayo’kubomfwila?

15 Kani twaya mu kubungana, tulalangisha baYawe ati tulafwaya ukubomfwila. BaYawe tabatupangilishapo ukucite’fi balukutubuula. (Yisaya 43:23) Popele, ili twasalululapo ukumfwile’funde lyabo ilya kusangwa ku kubungana, tulabalangisha ati tulibatemenwe kabili ati balikwete amakosa aakutubuula ifi twelelwe ukulukucita. (AbaLoma 6:17) Ku cakubwenako, findo tukacita kani abakulu ba milimo balukufwaya fwebo ukulukupyungisha ica kweba’ti tulukufilwa ukulukusangwa lyonse mu kubungana? Neli cipale ubuteko bwalabila ati abali bonse abalukubungana mu kupempela baYawe, bakabalipilishe’ndalama, bakabatwala ku jele, neli bakabapanika. Neli cipale fwe bene tungafwayo’kucitako fimbi pa mupunda wa  kuya mu kubungana. Muli fifi fyonse, tulyelelwe ukulisalulwilapo ifyakucita. (Ifyacitilwe 5:29) Pano lyonse ili twasalululapo ukumfwila baYawe, tulabasangalasha.—Ifisimpi 27:11.

PITILISHENI UKULUKUBUNGANA NE BAKWABENU

16, 17. (a) Tuliishi shani ati ukubungana kwali kucindeme makosa ku baKlistu ba kutanga? (b) Kani Umukwabesu George Gangas alukumfwa shani pa kubungana kwa buKlistu?

16 Panuma ya kubungana ukwaliko pa Pentekosite mu mwaka wa 33, abaKlistu balipitilishe ukulukubungana lyonse mu kupempela baYawe. “Baalikele ne munkonsha mu busambishi ne kwambaala kwa ntanjishi.” (Ifyacitilwe 2:42) Kabili tabalekelepo ukubungana na lyelyo balukubapensha ku bwikalikishi bwa baLoma na ku ntangishi sha mapempelo isha baJuda. Nangaba’ti tacalipo icipubile, baalukupyungisha apapelele amakosa abo pakweba’ti balukubungana pamo.

17 Na bubuno bukumo, abapyungishi ba baYawe balitemenwe ukubungana pamo kabili balalitemwesha ukucite’fi. Ba George Gangas, abaali mwi Bumba Ilitangilila pa myaka ukucila pali 22, balilabiile ati: “Kuli nebo, ukubungana pamo ne baKlistu babyanji kulansangalasha makosa kabili kulankoselesha. Nditemenwe ukufika bwangu pa Mulenda wa Bufumu kabili ndafwaya ukuba uwa kupelako ukufumapo. Ndasangalala ukulukwambaala pamo ne bantu ba baLesa. Kani ndi nabo ndomfwa koti ndi ku ng’anda ne cisoolo canji, muli paladaiso ya kupalanya.” Nakabili balilabiile ati: “Ici mfwaisha makosa kulukusangwa ku kubungana lyonse.”

18. Kani mulomfwa shani pa kubungana kwesu, kabili findo mulukufwaisho’kulukucita?

18 Kani na mwebo efi mumfwe’fyo pa kupempela baYawe? Kani efi mumfwa, pitilisheni ukucita ifili fyonse ifi mungacita pakweba’ti mulukubungana pamo ne bakwabenu, nangaba’ti ifintu fikatashe shani. Balangisheni baYawe ati mulomfwa koti ni fifilya Imfumu Dafidi yalukumfwa, iyalabiile ati: “Mwe baYawe, ndukutemwa ukwikala ukwa mu ng’anda yenu.”—Amasamo 26:8.

^ [1] (palakalafu 3) Abakwabesu ne nkashi bambi balafilwa ukusangwa ku kubungana lyonse ni pakuti pa fintu ifi tabakwetepo amakosa. Ku cakubwenako, bangalwalisha ukwakuti. Kani cabe’fyo, balyelelwe ukucetekela ati baYawe baliishi bwino ifi balukupitamo kabili balatoota pali fyonse ifi bacita pakweba’ti balukubapempela. Abakulu ba mwi kelesha bangofwako aba kube’fi ukukutika ku kubungana, cipale ukupyungisha foni neli ukukopa lukoso amalyashi pakweba’ti balukukutikako.

^ [2] (palakalafu 3) Boneni akabokoshi ka “ Imilandu Twila mu Kubungana.”