Tolokeleni

Tolokeleni muye pa fyebo fya bubili

Tolokeleni muye pa filukusangwamo

Bamboni sha BaYawe

IciLamba

Akatambo ka Wakulama (Akakusambililamo)  |  April 2016

Kani Ukutulisha Kwenu Kuli Koti Cime?

Kani Ukutulisha Kwenu Kuli Koti Cime?

UMULIMO wesu uwa kutulisha ucindeme. Pano, talipo ni bonse tutulishako abaubone’fyo. Nangaba ati abantu balafwayo’kwishiba ifya mu Baibolo, talipo ni lyonse babona ati balyelelwe ukusambilila Amashiwi abaLesa na fwebo.

Ku cabwenako, langulukeni pali ba Gavin. Balukusangwako ku kubungana pa Mulenda wa Bufumu, pano tabaalukufwayapo ukubasambisha Baibolo. Ba Gavin balibuulishishe ati finini lukoso ifya mu Baibolo ifi baishiko kabili ati tabaalukufwayapo bambi ukwishibe’fyo. Baalukutiina ati cipale kambi kasuba bakababuulo’kuba mwi bumba lya fya mapempelo, kabili tabaalukufwayapo ukutumpaikwa. Mulukulangulukapo shani? Kani ba Gavin bangofwewa? Langulukeni pa fiweme ifingafumamo kani umuntu aishiba ifi Baibolo isambisha. BaYawe balibuulile abaIshilaeli ati: “Ukulabila kwanji kukekata koti cime; koti miloce pa cani ca mwefu.” (Ndutelonomi 31:19, 30; 32:2) Popele, nga tusambililepo fimo pa cime ne kupalanyako umulimo wesu uwa kutulisha pakweba ati tubone ifi tungofwako “abantu bonse [abalekenelekene].”—1 Timote 2:3, 4.

 KANI UKUTULISHA KWESU KUNGABA SHANI KOTI CIME?

Icime cilatona panini panini. Icime cilapangwa panini panini kani kabesha iitantile yaaluke’mindondo. Kani amashiwi abaYawe alikete shani “koti cime”? Balukulabila ku bantu babo ne nkumbu, abatekenye, kabili balukubalangulukilako. Tungatenteka baYawe kani tulukucindika ifi bambi basumiinemo. Tulyelelwe ukubakoselesho’kwalakanyapo pali fyefyo balukusambilila ne kulisalulwilapo abene. Kani twacite’fyo, abantu bakafwaisho’kukutika kuli fyefyo tulukubabuula, kabili mukafume’fiweme mu kutulisha kwesu.

Icime cilatontoshe’fintu. Pakweba ati ukutulisha kwesu kulukutontoshe’mitima ya bambi, tulyelelwe ukwalakanya pa nshile’shilekenelekene shesho tungabofwelamo ukusambilila bucine. Umukwabesu Chris, uwatatikilepo ukubuula ba Gavin kani bangatemwo’kusambilila Baibolo, taabapangilishepo. Sombi, alyeseshe inshila ishilekenelekene pakweba ati ba Gavin babe abakakulukile pa kwambaala ifya mu Baibolo. Umukwabesu alibuulile ba Gavin ati kuli icebo icicindeme icilabilwepo mu Baibolo kabili ati ukwishibe’co icebo kukabofwako ukumfwisha ifilabilwapo ku kubungana. Eli pano umukwabesu ababuulishishe ati ukushimika kwa mu Baibolo kwalimulengeshe ukushininwa ati ifi Baibolo isambisha fya cine. Ici calibalengesho’kwambaalapo makosa pa kushimika ukwingi ukwakonshiwe. Uku ukwambaala kwalitontwesheko umutima wa ba Gavin, na mu kupelako balisumiine ukusambilila Baibolo.

Icime cicindeme ku fya mweo. Mu mpindi ya lusuba mu calo ca Israel, cipale imfula tailokapo pa myenshi iingi. Ukwakubule’cime, ifimenwa filoma ne kufwa. BaYawe balishimikile ati mu nshiku shesu, kukaba koti kuli icilala, e kweba ati abantu bakomfwe’cilaka ‘icakufwayo’kumfwa amashiwi abaYawe.’ (Amosi 8:11) Balilaile ati abasufishiwe bakaba “koti cime ica kufuma kuli baYawe” ili balukutulishe’cebo iciweme ica Bufumu, kabili ‘imbelele shimbi’ shikalukubofwako. (Mika 5:7; Yoane 10:16) Icebo tutulisha cili pali fyefyo baYawe bapeele abantunshi ifikalengesha abali ne cilaka ca kumfwa bucine ukupuluka. Kani tulicindikile ici icebo?

Icime lishuko ukufuma kuli baYawe. (Ndutelonomi 33:13) Ukutulisha kwesu kulaba lishuko, neli impese, kuli baabo abakutika. Ba Gavin balibwenenemo mu kusambilila Baibolo ni pakuti kwalibofweleko ukusange’fyasuko ku fyakwipusha fyabo fyonse. Balikulile bwangu mu fya baLesa, balibatishiwe, kabili buno bukumo balalitemwesha ukutulishe’cebo iciweme ica Bufumu pamo ne ba Royce, abakashi babo.

Bamboni sha BaYawe balukutulishe’cebo iciweme ica Bufumu mu calo conse

MWILUKUPUFYA UKUTULISHA KWENU

Ukupalanya umulimo wesu uwa kutulisha ku cime kungatofwako ne kwishiba ati ukupyunga kwesu umo umo muli wuyu umulimo kucindeme. Muli isa nshila? Umundondo umo lukoso tapalipo ifi unganasha, pano kani kwaba imindondo iyakuti ubwingi, umushili unganaka. Fyopele’fyo, ukupyunga kwesu mu mulimo wa kutulisha kungaboneka koti kwa lukoso. Pano, pakuti abapyungishi ba baYawe abengi balapyungako uyu umulimo, tulakonsho’kucitila bumboni “ku mikoka yonse ya bantu.” (Matayo 24:14) Kani ukutulisha kwenu kungalengesha bambi ukushukishiwa kuli baYawe? Inya, icebo tutulisha cikaba koti cime, e kweba’ti cikofwako abantu ukusumina bucine, cikalukubatontoshako imitima, kabili cikabofwako ukuba ne mweo.