Tolokeleni

Tolokeleni muye pa filukusangwamo

“Kamuyeni, . . . Mukalukusambisha Imishobo Yonse ya Bantu”

“Kamuyeni, . . . Mukalukusambisha Imishobo Yonse ya Bantu”

“Kamuyeni, . . . mukalukusambisha imishobo yonse ya bantu, ne kubabatisha; . . . ili mubasambisha ati bakalukulonda fyonse’fyo ifi namufundileni.”—MATAYO 28:19, 20.

INYIMBO: 141, 97

1, 2. Ni fisa fyakwipusha tungepusha pakuti pali fyefyo baYesu balabiile pali Matayo 24:14?

BAYESU balishimikile ati mu nshiku sha kupelako, icebo iciweme ica Bufumu cali ne kutulishiwa ku bantu bonse. (Matayo 24:14) Mu calo conse, fwe Mboni sha BaYawe tulishibikiilwe makosa ku mulimo wesu uwa kutulisha. Bambi abantu balitemenwe icebo tutulisha, bambi tabacitemenwepo. Pano, na baabo abatabatemenwepo icebo tutulisha balitucindikile pakuti pa mulimo tupyunga. Tulalabila ati ni fwebo fwe balukupyunga umulimo baYesu bashimikile ati ukalakupyungwa. Kani ifyo fya cine? Kani tuliishi shani ati umulimo wesu uwa kutulisha e wopele ulya baYesu bashimikile?

2 Amapempelo aengi na o alalabila ati balatulishe’cebo ca baYesu. Pano balatulisha lukoso mu macalici, pa TV, pa Intaneti, neli ukupitila lukoso mu kubuulako bambi ifi bo basambilile pali baYesu. Bambi balalanguluka ati ukuba umulaye wa mu cipatela, ukuba nasi, neli umusambishi wa pa sukuulu ni nshila na imbi iya kutulishishamo. Pano, kani iyi e milimo baYesu balukuloshako ili balukulabila pa mulimo wa kutulisha?

3. Ukwelelwa na Matayo 28:19, 20, ni fisa fintu fine ifi abasambile ba baYesu belelwe ukucita?

 3 Kani baYesu baalukufwaya ati abantu balukuya ku basambile babo mu kusambishiwa? Koku! Panuma ya kubuushiwa, baYesu baalibuulile abasambile babo ati: “Kamuyeni lomba, mukalukusambisha imishobo yonse ya bantu, ne kubabatisha; . . .  ili mubasambisha ati bakalukulonda fyonse’fyo ifi namufundileni.” (Matayo 28:19, 20) Popele, fwe basambile ba baYesu, tulyelelwe ukucita ifintu fine. Tulyelelwe ukupanga abasambile, ukubabatisha, ne kubasambisha. Pano, tulyelelwe ukutanga ukuya ku bantu. Uulabila pa fya mu Baibolo alibuulishishe ati: “‘Ukuya’ cintu ici onse uucetekele muli baLesa elelwe ukucita, nangaba’ti ici cilukupengela ukuya apepi neli ukutali.”—Matayo 10:7; Luku 10:3.

4. Findo fisankenemo mu mulimo wa ‘kwikasha abantu’?

4 Findo baYesu baalukufwaya abasambile babo ukulukucita? Kani balukufwaya ati balukutulisha umo umo, neli baalukufwaya ati balukupyungila pamo koti libumba? Pakuti umuntu umo tekuti atulishepo ku ‘mishobo yonse,’ abasambile babo balyelelwe ukulukupyungila pamo koti libumba. Ici eci baYesu balukuloshako ili babuulile abasambile babo ukuba “bakwikashe’sabi.” (Pendeni Matayo 4:18-22.) Tabalukuloshapo ku wakwikashe’sabi umo uulukupyungishe’ndobo, alukupembelela ati isabi limine’ndobo. Sombi, ukwikashe’sabi uku baYesu baalukuloshako kulisankenemo ukwa kupyungisho’tombe neli amasumbu. Uku ukwikashe’sabi kulapengelo’kupyungisha, ukulyanshika bwino, ne kupyungila pamo.—Luku 5:1-11.

5. Ni fisa fyakwipusha twelelwe ukwasuka, kabili nindo?

5 Pa kwishiba abalukutulisha icebo iciweme shino nshiku, tulyelelwe ukwasuka ifi ifyakwipusha fine:

  • Ni cisa cebo abasambile ba baYesu belelwe ukulukutulisha?

  • Nindo belelwe ukupyungila umulimo wa kutulisha?

  • Ni shisa nshila belelwe ukupyungisha pa kutulisha?

  • Kani umulimo ulyelelwe ukukula shani, kabili ulyelelwe ukupyungwa ukufika lwisa?

Ukwasuka ifi ifyakwipusha kwakutofwako ukwishiba abalukupyunga umulimo uukalengesha abantu ukupuluka. Nakabili, kwakutofwako ukupitilisha ukulukutulisha.—1 Timote 4:16.

NI CISA CEBO ICELELWE UKUTULISHIWA?

6. Tuliishi shani ati Bamboni sha BaYawe e balukutulisha icebo icelelwe?

Pendeni Luku 4:43. BaYesu baalukutulisha “icebo iciweme ica Bufumu,” kabili balukufwaya abasambile babo ukulukucita fintu fimo. Kani ni bani abalukutulisha ico icebo ku mishobo yonse? Ni Bamboni sha BaYawe lukoso! Na babalya abatabatutemenwepo balasumine’fyo. Ku cakubwenako, umfweni ifi intangishi ya mapempelo iyapyungilepo bumishonali mu fyalo ifilekenelekene yabuulile Mboni umo. Mu fyalo fyonse umu uyu mishonali apyungiilepo, alukwipusha Bamboni sha BaYawe icebo ici balukutulisha. Alilabiile ati, “Bonse baalipuneme ica kweba’ti baalukwasuka lukoso fintu fimo ati: ‘Icebo iciweme ica Bufumu.’” Pano ifyalabiile uyu mishonali filalangisha ati tatupunemepo sombi tulikatene. (1 AbaKolinto 1:10) Nakabili, Akatambo ka Wakulama Akatulisha Ubufumu bwa BaYawe kalalabila makosa pa Bufumu bwa baLesa. Iyi makashini ilaalulwa mu milaka 254, kabili umwenshi ne mwenshi iya ku bantu bonse ilapulintwa ukufika kuli 59,000,000, fyopele’fyo efipulintwa ne ya kusambililamo. Pakuti pali fifi, iyi makashini e makashini iitulishiwa makosa mu calo conse!

7. Kani tuliishi shani ati intangishi sha mapempelo tashitulishapo icebo icelelwe?

7 Intangishi sha mapempelo tashitulishapo pa Bufumu bwa baLesa. Kani balabilako pa Bufumu,  abengi balalabila ati buli mu mutima wa muntu. (Luku 17:21) Tabasambishapo abantu ati Ubufumu buteko bwa kwiulu ubwikalikwa na baYesu. Pano, balalabila makosa pali baYesu kani kuli Icilishimishi neli Isita. Tabasambishapo abantu ati Ubufumu e bukashilisha amakatasho abantunshi kabili ati bukumo lukoso bukafumyapo bumbifi bonse pa calo. (Ukufisulula 19:11-21) Kanshi twabona ati intangishi sha mapempelo tashishipo ifi Imfumu ya Bufumu bwa baLesa, baYesu, ikacita. Kabili pakuti tabeshipo icebo ca baYesu, tabeshipo ne mulandu belelwe ukulukutulishisha.

NINDO TWELELWE UKUPYUNGILAKO UMULIMO WA KUTULISHA?

8. Findo ifi tafyelelwepo ukutulengesha ukupyungako umulimo wa kutulisha?

8 Abasambile ba baYesu tabelelwepo ukulukutulisha pakweba’ti bakwate indalama neli bebake ifyakwibaka ifiweme. BaYesu baalilabiile ati: “Mwalukupoka lukoso, kamulukupela lukoso.” (Matayo 10:8) Popele, umulimo wa kutulisha tawelelwepo ukuba koti busulwishi. (2 AbaKolinto 2:17) Abasambile ba baYesu tabelelwepo ukulomba ati babalipile pakuti pa kutulisha. (Pendeni Ifyacitilwe 20:33-35.) Nangaba’ti ifi baYesu balabiile filyumfwanikile bwino, aba macalici abengi balibikile akalango ku kupoke’ndalama pakweba’ti amacalici abo alukuliko ne kulipila intangishi sha mapempelo na baabo bengishe incito. Pakuti pali fifi, intangishi sha mapempelo ishingi shilikwete indalama ishakuti ubwingi.—Ukufisulula 17:4, 5.

9. Kani Bamboni sha BaYawe balilangishe shani ati balapyungo’mulimo wa kutulisha pakuti pa milandu iyelelwe?

9 Kani Bamboni sha BaYawe balapitamo ukupoka ifya mpese pa Mulenda wa Bufumu neli pa mabungano? Koku! Umulimo wabo ulofweleshiwako ne ndalama ishipeelwa mu kulitemenwa. (2 AbaKolinto 9:7) Nangabe’fyo, umwaka wafumako Bamboni sha BaYawe balipyungile amaawala apepi na 2 bilyoni mu mulimo wa kutulisha icebo iciweme kabili umwenshi ne mwenshi baalukusambisha amasambililo a Baibolo ukucila pali 9 milyoni. Tababalipilapo pa kupyungo’mulimo wa kutulisha, pano balalitemenwa ukupyungishe’ndalama shabo ku kofweleshako uyu umulimo. Uufwaya-fwaya ifyebo umo alilabiile pa mulimo Bamboni sha BaYawe bapyunga ati: “Ici bafwaisha kutulisha ne kusambisha.” Nakabili, alilabiile ati Bamboni sha BaYawe tabakwetepo intangishi shesho balipila. Pano kani tatutulishapo pakweba’ti tukwate indalama, cindo icitulengesha ukutulisha? Mu kulitemenwa tulapyunga uyu umulimo ni pakuti tulitemenwe  baYawe ne bantu. Ici cilakonsho’kushimika ukulembelwe pa Amasamo 110:3. (Pendeni.)

NI SHISA NSHILA ISHELELWE UKUPYUNGISHIWA?

Tulatulisha konse lukoso uku twasangana abantu (Boneni palakalafu 10)

10. Ni shisa nshila baYesu ne basambile babo baalukupyungisha pa kutulisha?

10 Kani ni shisa nshila baYesu ne basambile babo baalukupyungisha pa kutulisha? Baalukuya konse lukoso uku balukusangana abantu. Ku cakubwenako, balukutulisha mu misebo na mu mamaliketi. Baalukuya na ku mang’anda abantu. (Matayo 10:11; Luku 8:1; Ifyacitilwe 20:20) Ukutulisha ku mang’anda onse yali ni nshila iweme iya kutulishishamo ku bantu bonse.

11, 12. Kani ni kwisa kupusana ukuli pali fyefyo abantu ba baYawe batulisha icebo iciweme na fyefyo aba mapempelo ambi bapyunga?

11 Kani aba macalici ambi balatulisha icebo iciweme koti ni fyefyo baYesu baalukucita? Impindi ishingi, intangishi sha mapempelo ishi balipila shilatulisha lukoso ku ba mu calici lyabo. Ishi intangishi tashipangapo abasambile pano shilalama lukoso balya benka abali kale mu calici lyabo. Shimbi impindi, baleshako ukukoselesha aba mu macalici abo ukutulisha kuli bambi. Ku cakubwenako, mu mwaka wa 2001, Popu John Paul II alilembele mu nkalata ati aba mu calici balyelelwe ukutulisha Icebo Iciweme ne kuba ne munkonsha koti ni ntangishi Paulu, iyalabiile ati: “Nga nshilukutulisha Icebo Iciweme, nga ndukushamo’kwakuti.” Popu aalilabiile ne kweba’ti abelelwe ukupyungo’mulimo wa kutulisha talipo lukoso ba mu calici abanini abasambishiwe sombi ni bonse lukoso. Nangabe’fyo, banini abalondele ifi alabiile.

12 Mba pano Bamboni sha BaYawe? E benka lukoso abatulisha ati ukufuma mu 1914 baYesu ni Mfumu kwiulu. Balomfwila baYesu kabili balicindikile makosa umulimo wa kutulisha ukucila ifili fyonse. (Mako 13:10) Ibuuku lya Pillars of Faith—American Congregations and Their Partners lyalilabilie ati kuli Bamboni sha BaYawe, umulimo wa kutulisha ucindeme ukwakuti. Nakabili lyalilabiile ne kweba’ti kani basangana abali ne nsala, ababombomene, ne balwashi, balabofwako, pano tabalubako ati umulimo wabo uukulu kutulisha pa kushila kwa calo ne kusambisha abantu pa fingabofwako ukupuluka. Bamboni sha BaYawe balipitilishe ukutulisha ico icebo kabili pa kutulisha balapyungisha inshila baYesu ne basambile babo baalukupyungisha.

KANI UMULIMO ULYELELWE UKUKULA SHANI, KABILI ULYELELWE UKUPYUNGWA UKUFIKA LWISA?

13. Kani umulimo wa kutulisha ulyelelwe ukukula shani?

13 BaYesu balilabiile ati abasambile babo baali ne kutulisha ne kusambisha icebo iciweme “monse mu calo ca panshi.” Balibabuulile ukupanga abasambile mu ‘mishobo yonse iya bantu.’ (Matayo 24:14; 28:19, 20) Ici cilukwalula ati icebo iciweme calyelelwe ukutulishiwa mu calo conse.

14, 15. Findo filangisha ati Bamboni sha BaYawe balikonseshe ukushimika kwa baYesu ukulosha ku kukula kwa mulimo wa kutulisha? (Boneni ifikope ifili pe buula 13.)

14 Ni Bamboni sha BaYawe lukoso abakonsha ukushimika kwa baYesu ukwa kweba’ti icebo iciweme cikatulishiwa mu calo conse. Nindo twalabilile’fyo? Mu United States muli intangishi sha mapempelo 600,000, pano muli Bamboni sha BaYawe 1,200,000 abatulishe’cebo iciweme. Mu calo conse kuli abapatili ba ba Katolika apepi na 400,000, pano Bamboni sha BaYawe abatulishe’cebo iciweme mu fyalo 240 balicilile pali 8 milyoni. Caboneka apaswetele ati Bamboni sha BaYawe balukutulishe’cebo iciweme mu calo conse. Ici icebo cilalengesha baYawe ukulemiwa!—Amasamo 34:1; 51:15.

15 Fwe Bamboni sha BaYawe, tulafwaya ukutulishe’cebo iciweme ku bantu abakuti ubwingi ili ukushila takungesa. Pakweba’ti tukonshe uyu umulimo, tulyalwile ne kupulinta amabuuku aakuti  ubwingi, amamakashini, amatalakiti, utupepala twa kwitilapo abantu kwi bungano na ku Cakwanuka mu milaka ukucila pali 700. Fyonse ifi tulafipeela ku bantu apakubulo’kulipila. Uyu mwaka, twalipulintile amabuuku aalabila pali Baibolo apepi na 4.5 bilyoni. Nakabili, tulipulintile amaBaibolo ya Amalembo ya Calo Cipya ayali 200 milyoni mu milaka ukucila pali 130. Pali webusaiti yesu pali ifyebo mu milaka ukucila pali 750. Ni Bamboni sha BaYawe lukoso abalukupyunga uyu umulimo uukulu makosa.

16. Tuliishi shani ati Bamboni sha BaYawe balatangililwa ne mupashi wa baLesa?

16 Kani umulimo wa kutulisha ukapyungwa ukufika lwisa? BaYesu balilabiile ati icebo iciweme cikatulishiwa mpaka ukushila kukese. Fwe Bamboni sha BaYawe, tulipitilishe ukupyungo’mulimo wa kutulisha muli shishino inshiku sha kupelako ni pakuti umupashi uswetelele uwa baYawe eutofwako. (Ifyacitilwe 1:8; 1 Petilo 4:14) Bambi aba mu macalici balalabila ati: “Tuli ne mupashi uswetelele.” Pano kani bangakonsha ukupyungo’mulimo woyo Bamboni sha BaYawe balukupyunga muli shishino inshiku sha kupelako? Ambi amacalici alyesesheko ukutulisha koti ni fyefyo tutulisha, pano alifililwe. Bambi balafwayo’kutulisha, pano balatulisha lukoso pa mpindi inini. Bambi balapyungo’mulimo wa ku mang’anda onse, pano tabatulishapo icebo iciweme ica Bufumu. Popele, tekuti bapyungepo umulimo woyo baYesu batatikile.

NI BANI MULI BUCINE ABALUKUTULISHA ICEBO ICIWEME?

17, 18. (a) Tuliishi shani ati Bamboni sha BaYawe ebalukutulishe’cebo iciweme ica Bufumu shino nshiku? (b) Kani tulakonsha shani ukupyungo’yu umulimo?

17 Kani ni bani abalukutulisha icebo iciweme ica Bufumu shino nshiku? Ni Bamboni sha BaYawe lukoso! Kani tuliishi shani ifyo? Ni pakuti tulatulisha icebo icelelwe, e kweba’ti icebo iciweme ica Bufumu. Ili tulukutulisha, tulafwaya-fwaya abantu konse uku bangasangwa, popele tulapyungisha inshila ishelelwe. Tulatulisha pakuti pa milandu iyelelwe, e kweba’ti tulitemenwe baYawe ne bantu. Umulimo wesu uwa kutulisha ukulu makosa, ni pakuti tulatulisha ku bantu aba mishobo yonse kabili mu milaka iingi. Kabili tukapitilisha ukutulisha icebo iciweme ica Bufumu mpaka ukushila kukese!

18 Ukulanguluka pa mulimo abantu ba baYawe balukupyunga uwa kutulisha icebo iciweme muli shishino inshiku sha kupelako kulatusangalasha. Pano, kani tulakonsha shani ukupyungo’yu mulimo? Intangishi Paulu yalibuulishishe ati: “Ni baLesa ebalukulengela muli mwebo ukufwaya ne kupyunga pakuti pa kutemwa kwabo.” (AbaFilipoi 2:13) BaYawe nga bapitilisho’kutupeela amakosa pakweba’ti tulukutulishe’cebo iciweme apapelele amakosa esu!—2 Timote 4:5.