Tolokeleni

Tolokeleni muye pa filukusangwamo

 UMUTWI WA INO MAKASHINI

Ili Umukwabenu Afwa

Ili Umukwabenu Afwa

“BaLesa baliishi ifingakuwamina. . . . Leko’kulila.”

Ifyo efi bamutepeteele pa kutwi umwanakashi uwitwa ati Bebe. Aali pa cililo ca bawishi abafwile mu bukatasho bwa pa musebo.

Ba Bebe balitemenwe makosa bawishibo. Eli, uwalabiile’fi ni woyo bonse aba mu cisoolo ca ba Bebe baishibile bwino. Pano, ifi alabiile tafyabasangaleshepo ba Bebe, sombi fyalibasoomesho’mutima. Ili baalukulila, balukulabila lukoso ati, “Imfwa ya batata taiwemepo kuli nebo.” Ili ba Bebe balukulemba mwi buuku ifya pa mfwa ya bawishibo ninshi palipitile ne myake’ingi, calibwenekele ati baali bacibombomene pakuti pa mfwa ya bawishibo.

Ba Bebe balishile mu kwishiba ati palapite’mpindi iikulu pakweba ati umuntu aleke ukubombomana makosa, tanje cine kani alimutemenwe uwafwile. Baibolo ilibuulishishe bwino ati imfwa ‘kapondo aka kupelako.’ (1 AbaKolinto 15:26) Ilesa pali fwebo, impindi ishingi mu kupwalamuka lukoso, ili tatulyanshikilepo, ne kupinta baabo tutemenwe. Tapalipo neli umo uungaiciicila. E mulandu tufililwa ne kwishiba ifyakucita ili umukwabesu afwa na panuma ya cililo.

Cipale na mwebo mulilangulukilepo ati: ‘Ni mpindi ya kuba shani iyelelwe ukupitapo pakweba ati umuntu aleke ukubombomana? Kani umuntu angacefyako shani ukubombomana? Ningasangalasha shani abafwilwa umukwabo? Kani kuli ubucetekelo ku bakwabesu abafwile?’