Cipale mungaanuka ati ba Gail, abalabilwapo mu ciputusha ca bubili, baalukukanika kani baali ne kuleka ukubombomana pakuti pa mfwa ya balume babo, ba Robert. Nangabe’fyo, balafwaisho’kwisa mu kubonana nabo mu calo ca baLesa ica bukumo. Balilabiile ati: “Ilembo ntemenwe makosa lilembo lya Ukufisulula 21:3, 4.” Palalabila ati: “BaLesa abene, bakalukuli nabo, e baLesa babo. Popele baLesa bakabasumwina iminsoshi yonse ku menso abo; tapalukuli imfwa libili, neli ni nsoni, neli kulila, neli kusomenwa konse, tau; pakuti ifintu ifyakutanga filipitilile.”

Ba Gail balilabiile ati: “Uku ukulaya e kubuulishishe’fingi ifikacitika kuntangiile. Ndabomfwile’nkumbu abantu abafwililwe abakwabo pano abatabeshipo uku ukulaya ukwa kweba ati kuntangiile bakabonana ne bakwababo abafwile.” Ba Gail balalonda ifi basumiinemo pa kulukupyungako umulimo wa mpindi shonse, ukulukofwako abantu ukwishiba ukulaya kwa baLesa ukwa kuntangiile ili “tapalukuli imfwa libili” pa calo.

Cipale mungalabila ati, ‘Ifyo tekuti ficitikepo.’ Pano, langulukeni pali Jobo. Alilwele makosa. (Jobo 2:⁠7) Nangaba ati Jobo alukufwayo’kufwa, alicetekele ne kweba ati baLesa bakamubuusha. “Nga mumfise mu Sheoli . . . Mwebo mungeta, na nebo ningamwasukeni; mungafwaisha imicitilo ya ku minwe yenu.” (Jobo 14:13, 15) Jobo aalicetekele ati baLesa bakwe bakamufunga kabili bakafwaisha ukumubuusha.

Bukumo lukoso, baLesa bakacita fyopele’fyo. Bakamubuusha Jobo na bambi lukoso abengi ili cino icalo cikaaluka Paladaiso. (Luku 23:42, 43) Pa Ifyacitilwe 24:15, palalabila ati: “Kukesa ukubuka pa mfwa kwa balungeme ne basendeme.” BaYesu balatubuulishisha ati: “Tekulukukankamana pakuti pali fyefyo; pakuti ikesa impindi iyo lomba, abantu bonse abali mu filende bakomfwe’shiwi lyakwe, ne kufumamo. (Yoane 5:28, 29) Jobo akabonako ili uku ukulaya kukakonshiwa. Akaba ne shuko lya kulukuli koti musankwa kabili umunefu wakwe ukawama “ukucila na pa wa mwanice.” (Jobo 33:24, 25) Fyopele’fyo efikacitika kuli baabo bonse abalangisha ati balatoota baLesa pa kutupeela ubucetekelo bwa kweba ati abafwile bakabuuka.

Kani umukwabenu alifwile, ifi twalabilapo cipale tekuti fishilishepo ukubombomana kwenu. Pano, mungaba ne bucetekelo bwa cinenene kabili mukakoshiwa kani mulukwalakanya pa kulaya kwa baLesa ukubuulishishiwe mu Baibolo.—1 AbaTesalonike 4:13.

Kani mungafwaya ukumfwilapo na fimbi ifingamofweniko ukucefyako ukubombomana? Neli kani mulukufwaya ifyasuko ku fyakwipusha, ifili koti ca kwipusha ca kweba ati “Mba nindo baLesa basuminishishe bumbifi ne kupenga?” Mwane kamuyeni pa webu saiti ya www.jw.org/lam, ne kubona ifyebo fya mu Baibolo ifyakusangalasha kabili ifingamofweniko.