Tolokeleni

Tolokeleni muye pa filukusangwamo

Kani Mulabona ati Mulyelelwe Ukusambishako Bambi Imilimo?

Kani Mulabona ati Mulyelelwe Ukusambishako Bambi Imilimo?

“Nebo ndamupeleni ukusambisha ukuweme.”—IFISI. 4:2.

INYIMBO: 93, 96

1, 2. Nindo twelelwe ukusambishishako bambi ifya kupyunga imilimo ya mu kwanshika kwa baLesa?

BAYESU baalibikile makosa akalango ku mulimo wa kutulisha icebo iciweme ica Bufumu. Nangabe’fyo, baalukusambishako bambi ukuba abembeshi kabili abasambishi. (Mat. 10:5-7) Nangaba’ti Filipo alikwete ifyakucita ifingi mu mulimo wa kutulisha, alukofwako abana bakwe bane abanakashi ukwishiba bwino ifya kusambisha bambi bucine bwa mu Malembo. (Ifyacit. 21:8, 9) Kani ukusambisha bambi kulicindeme shani muli shishino inshiku?

2 Mu calo conse, abantu abalukusambilila bucine balukuya ili bafulilako. Aba bukumo abatabangabatishiwa balyelelwe ukwishiba umulandu ukukwatila isambililo lya pa lwabo kucindamiine. Nakabili, balyelelwe ukwishiba ifya kutulisha icebo iciweme kuli bambi ne kubasambisha bucine. Mu makelesha esu, abakwabesu balyelelwe ukukoseleshiwa pakweba’ti bapyungishe ukufika pa fipengelwa ukuba abapyungishi bakofwako neli abakulu ba mwi kelesha. Ukupitila mu ‘kusambisha ukuweme,’ abaKlistu abakulu mu fya baLesa  bangofwako aba bukumo ukukula mu fya baLesa.—Ifisi. 4:2.

OFWENIKO ABA BUKUMO UKWISHIBA IFYA KULISAMBISHA AMASHIWI ABALESA

3, 4. (a) Kani Paulu alibuulishishe shani ifi ukulisambisha Baibolo kungatofwako mu mulimo wa kutulisha? (b) Ili tatungakoselesha abasambile ukulukulisambisha Baibolo, findo twelelwe ukucita?

3 Kani ukulukulisambisha Baibolo kulicindeme shani? Icasuko kuli cici icakwipusha cili mu mashiwi Paulu alembeele abaKlistu abaali mu Kolosai. Alibalembeele ati: “Na fwebo, ukufuma ku kasuba ako twaumfwile, tatulekapo ukumutembeleleni ne kukombetela ati mukesule ukwishibisha ukufwaya kwabo mu mano onse ne kalango aka ku mupashi; ukulukwenda abelelwe baShikulu ukuleto’kutemwesha konse, ne kulukwikate’fisepo mu milimo yonse iweme, ne kulukukula mu kubeshibisha baLesa.” (AbaKolo. 1:9, 10) AbaKlistu abaali mu Kolosai kani babeshibisha baLesa, baali ne kulukwenda “abelelwe baShikulu ukuleto’kutemwesha konse.” Ici caali ne kubalengesha ukupitilisha ‘ukwikate’fisepo mu milimo yonse iweme,’ makosa makosa mu mulimo wa kutulisha. Pakweba’ti umuntu apyungile bwino baYawe, alyelelwe ukulukulisambisha Baibolo lyonse. Ukofwako abasambile ba Baibolo ukumfwisha ici icebo kucindeme.

4 Ili tatungofwako bambi ukubwenamo mu kulisambisha Baibolo, fwe bene tulyelelwe ukutango’kwishiba umulandu ukucitile’fyo kucindamiine. Na cine, tulyelelwe ukulukulisambisha Baibolo lyonse. Popele, mungalipusha ati: ‘Ili abo ndukutulishako balabila ifipusene na fyefyo Baibolo isambisha neli baipusha ifyakwipusha ifikateshe, kani ningabaasuka ukwelelwa na fyefyo Baibolo isambisha? Ili ndukupenda pali fyefyo baYesu na Paulu baali ne munkonsha wa kutulisha, kani ndalakanya pali fyefyo ukupyungisha kwabo kungangofwako ili ndukupyungila baYawe?’ Fwense tulapengela amano ne kufunda ukufuma mu Mashiwi abaLesa. Kabili kani tulukubuulako bambi ifi tubwenamo mu kulisambisha Baibolo, tungabalengesha nabo ukulukubwenamo makosa mu kulisambisha Baibolo.

5. Labileni inshila mungapyungisha pa kofwako aba bukumo ukulukulisambisha Baibolo lyonse.

5 Cipale mungepusha ati, ‘Ningasambisha shani umusambile wanji ukulukulisambisha Baibolo lyonse?’ Mungatatikilapo ukumulangisha ifya kwanshikila isambililo ili mukwata nakwe. Mungamubuula ukupenda ifiputusha fimo ifili mu fyebo na fimbi ifye buuku lya Kani Findo Baibolo Muli Bucine Isambisha? ne kupenda amalembo aalimo. Mofweniko ukwishiba ifya kwanshika ukubungana pakweba’ti akaye mu kwasukapo. Mukoselesheni ukulukupenda amamakashini ya Akatambo ka Wakulama na Loleni! aafuma lyonse pa Watchtower Library na pa LAIBLALI YA PA INTANETI iya Watchtower kani eko ili mu mulaka wakwe, kabili mungamulangisha ifyakuipyungisha pa kwasuka ifyakwipusha fya mu Baibolo.  Kani mwamofwako muli yiyi inshila, umusambile wa Baibolo akalukulitemwesha ukulukulisambisha Amashiwi abaLesa.

6. (a) Kani mungofwako shani umusambile wenu ukutemwa makosa Baibolo? (b) Findo umusambile wa Baibolo akacita kani atemwa makosa Amalembo?

6 Ukuba, tatwelelwepo ukupangilisha uuli onse ukulukupenda ne kulisambisha Baibolo lyonse. Umusambile alyelelwe ukulitemwesha ukusambilila Baibolo, kabili ilyelelwe ukumofwako ukubeshiba bwino baYawe. Popele, tulyelelwe ukupyungisha ifi ukwanshika kwa baYawe kutupeele ku kofwako abasambile besu ukutemwa makosa Baibolo. Mu kupita kwa mpindi, umusambile angatatika ukumfwa koti ni fyefyo umwimbishi wa masamo aumfwile uwaimbile ati: “Sombi ukwelelwa nebo ukupalamina kuli baLesa: Ndibele ati baShikulu Yawe cakupulucilamo nebo.” (Amasa. 73:28) Umupashi wa baYawe ukofwako uyu umusambile uubikile makosa akalango ku fya baLesa.

SAMBISHENI ABA BUKUMO IFYA KUTULISHA NE KUSAMBISHA BWINO

7. Kani baYesu balisambishe shani intangishi shabo ukulukutulisha icebo iciweme? (Boneni icikope icili pe buula 25.)

7 Muli Matayo icapitala 10, tulapendamo ifyebo ifi baYesu baabuulile intangishi shabo 12. BaYesu baalukushinkamika pa kushibuula ifya kutulisha. [1] Intangishi shaalukukutika ili baYesu balukushibuula ifya kulonda pa kutulisha bwino. Eli pano bashitumine mu kutulisha. Pakuti ishi intangishi shaalilondele fyonse lukoso ifi baYesu bashibuulile, shalibeele basambishi abaweme aba Malembo. (Mat. 11:1) Na fwebo tungofwako abasambile besu ukuba bakutulisha abaweme aba cebo iciweme. Nga tulabile pa nshila shibili ishi tungacitilamo ifyo.

8, 9. (a) Kani baYesu balukwambaala shani ne bantu ili baalukutulisha? (b) Kani tungofwako shani abasambile ukulukwambaala ne bantu koti ni fyefyo baYesu baalukucita?

8 Ukwambaala bwino ne bantu. Impindi ishingi baYesu balukulabila ne bantu pa Bufumu. Ku cakubwenako, balyambawile bwino ne mwanakashi uwali pa mukalo wakwe Yakobi uwali apepi ne mushi wa Saika. (Yoa. 4:5-30) Nakabili baalilabiile na Matayo uwaishibikilwe ne kweba’ti Lefai, uwali musonkeshi. Mu mabuuku a Cebo Iciweme ane tamulipo ifyebo ifingi ifi baYesu balabiile nakwe, pano Matayo alisumiine ifi baYesu bamubuulile kabili alitatikile ukubalonda. Matayo eli na bambi balyumfwileko ifyebo ifingi ifi baYesu balabiile ili baali pa citenje icabelele pa ng’anda yakwe Matayo.—Mat. 9:9; Luku 5:27-39.

9 Pa mpindi imbi, baYesu balyambawile na Natanyeli muli bucibusa, uwapufishe abantu ba ku Nasaleti. Nangabe’fyo, Natanyeli alyalwile ilangulushi lyakwe. Alisalulwilepo ukwishibilapo na fimbi pali baYesu. (Yoa. 1:46-51)Kanshi twabona ati ukusambisha abasambile ba Baibolo ukulukulabila ne bantu mu nshila iweme kabili iya bucibusa kucindeme. [2] Abo tukofwako muli yiyi inshila bakomfwa bwino ukubona ifi abantu balukutulishako balukusumina bucine.

10-12. (a) Kani baYesu baalukofwako shani abalukufwaisha ukumfwa icebo iciweme? (b) Kani tungofwako shani aba kutulisha ba bukumo ukuwamyako ukusambisha kwabo?

10 Ukubwelela kuli baabo abatemenwe bucine. BaYesu baalikwete impindi inini iya kupyunga umulimo wa kutulisha. Nangabe’fyo, baalukofwako abantu abalangishe ati baalukufwaisha ukumfwa icebo iciweme. Ku cakubwenako, baYesu baalisambishe ibumba lya bantu, ninshi balimakene mu bwato. Pali ilye’mpindi, baYesu mu cimpelampela baalilengeshe Petilo ukwikashe’sabi ilyakuti ubwingi ne kumubuula ati: “Ukufuma ku mpindi ino wakulukwikasha’bantu.” Findo fyafuminemo muli fyefyo baYesu balabiile ne kucita? Petilo ne babyakwe baliletele “amato abo ku mutunta, nabo ne kuleka fyonse, ne kulukubalonda baYesu.”—Luku 5:1-11.

11 Nikodemo, uwa mu Sanikedilini, alitemenwe ifi baYesu baalukusambisha. Alukufwaisha  ukwishibilapo na fimbi pano alukutiina ifi abantu baali ne kulabila kani bamubona alukwambaala na baYesu. BaYesu baalukulitemenwa ukwalulako impindi ya kutulisha. Popele, baalikumene na Nikodemo mu mpindi ya bushiku ili takwalipo bambi abantu. (Yoa. 3:1, 2) Findo tungasambililako kuli aya amalyashi? BaYesu baalukufwaya impindi ya kukosha ukucetekela kwa muntu umo umo uwalukufwaisha ukwishibilapo na fimbi. Kanshi twabona ati na fwebo tulyelelwe ukulukubwelela kuli baabo twatulisheko ne kulukutangilila amasambililo a Baibolo.

12 Abakutulisha ba bukumo bangawamyako makosa ukusambisha kwabo kani tulukupyungila pamo nabo mu mulimo wa kutulisha. Tungabofwako ukulukubwelela ku bantu bonse lukoso abalangishe ati bangatemwa ukwishibilapo na fimbi. Tungababuula ukuya na fwebo ili tulukubwelela kuli babo twatulisheko na mu kutangilila amasambililo a Baibolo. Kani twabasambisha bwino, abakutulisha ba bukumo bakalukufwaisha ukubwelela kuli baabo baatulisheko ne kutangilila amasambililo a Baibolo abene benka. Nakabili bakasambilila ati balyelelwe ukutekanya ili balukupanga abasambile ba Baibolo kabili balyelelwe ukuba ne munkonsha.—Galatya 5:22; boneni akabokoshi akalukulabila ati “ Ukuba ne Munkonsha Kucindeme.”

SAMBISHENI ABA BUKUMO IFYA KUPYUNGILA ABAKLISTU BABYESU

13, 14. (a) Findo mungasambililako ku bantu abalembelwe mu Baibolo abaalukulipeelesha pakuti pa bantu bambi? (b) Ni shisa inshila mungapyungisha pa kusambisha abanice ne bakutulisha ba bukumo ukulukulangisha ubutemwe ku bakwabesu ne nkashi?

13 Baibolo ilabuulishisha ishuko tukwete ilya ‘kutemwanshanya koti bana bankashi’ ne kupyungilanshanya. (Pendeni 1 Petilo 1:22; Luku 22:24-27.) Abana ba baLesa baalipeele fyonse, ukubikako ne mweo wabo, pakweba’ti bapyungile abantu bambi. (Mat. 20:28) Dokasi “alifulile imilimo iweme ne fya luse ifi alukupa.” (Ifyacit. 9:36, 39) Maliya, inkashi iyali mu Loma, ‘yalukupyungila ukwakuti’ abaali mwi kelesha. (Loma 16:6) Kani tungofwako shani aba bukumo ukwishiba ifi ukofwako abakwabesu ne nkashi kucindeme?

Mulukusambisha aba bukumo ukulukulangisha ubutemwe ku baKlistu babyesu (Boneni amapalakalafu 13 na 14)

14 AbaKlistu abakulu mu fya baLesa bangapintako aba bukumo ili balukuya mu kufakashisha abalwashi ne bacekulu. Kani cingelelwa, abafyashi bangapintako abana babo ili balukuya mu kufakashisha abalwashi neli abacekulu. Abakulu ba mwi kelesha bangapyungila pamo na bambi ku kofwako abacekulu ukukwata ifyakulya eli ne kubawamishako ifintu pa ng’anda. Icikafumamo ca kweba’ti, abanice ne ba bukumo bakasambilila ifya kulangisha inkumbu kuli bambi. Umukulu wa mwi kelesha umo, kani alukutulisha aalukufakashisha Bamboni babyakwe pa mpindi lukoso inini pakweba’ti abone ifi bali. Umukwabesu umwanice uwatemenwe ukupyungila pamo nakwe alisambilile ati alyelelwe ukulangisha ubutemwe ku ba mwi kelesha bonse.—Loma 12:10.

15. Nindo abakulu ba mwi kelesha belelwe ukubikila akalango ku bakwabesu abalukukula mu fya baLesa?

15 Pakuti baYawe balapyungisha abalalume aba mwi kelesha ku kusambisha abantu, cicindeme ku bakwabesu ukulukuwamyako ukusambisha kwabo. Mwe bakulu ba mwi kelesha, nindo tekuti mukutikileko ku mupyungishi wakofwako ili alukwanshika ilyashi lyakwe? Kani mwamofwako, angawamyako makosa ukusambisha Amashiwi abaLesa.—Neya. 8:8. [3]

16, 17. (a) Kani Paulu alyofweleko shani Timote ukukula mu fya baLesa? (b) Kani abakulu ba mwi kelesha bangasambisha shani abakaba abembeshi kuntangiile?

16 Abembeshi balukupengelwa makosa mwi kelesha lya buKlistu, kabili abakalukupyunga imilimo ya kube’fi kuntangiile balyelelwe ukulukusambishiwa. Paulu alibuulishishe ifi umuntu angasambishiwa ili abuulile Timote ati: “We mwana wanji, ukose mu luse ululi muli baKlistu Yesu. Kabili ifintu ifyo ifi waumfwile kuli nebo  mu mboni ishinji, ifyo ukabapele abantu abakucetekelwa, abakalukuli ne mano akubasambisha na bambi.” (2 Tim. 2:1, 2) Timote alisambilile ukupitila mu kupyungila pamo na Paulu, umwalalume uwali umukulu mu fya baLesa. Panuma, Timote naye alukupyungisha inshila ishi asambilile kuli Paulu ili alukutulisha na pa kupyunge’milimo imbi iya baLesa.—2 Tim. 3:10-12.

17 pPaulu talekelepo ati Timote akalukulisambisha umwine. Alukupyungila pamo nakwe. (Ifyacit. 16:1-5) Abakulu ba mwi kelesha bangatenteka Paulu ukupitila mu kupintako abapyungishi bakofwako abafikilepo ili balukuya mu kwembela, lyonse ili caelelwa. Abakulu ba mwi kelesha kani balukucite’fi ninshi balukofwako abapyungishi bakofwako ukulibwena ukusambisha kwabo, ukucetekela kwabo, ukutekanya kwabo, ne butemwe abalukutangilila belelwe ukulangisha. Ici cilofwako ukusambisha abakalukwembela “itanga lya baLesa.”—1 Pet. 5:2.

UMULANDU UKUSAMBISHA BAMBI KUCINDAMINE

18. Nindo twelelwe ukubikila akalango ku kusambisha bambi imilimo?

18 Ukusambisha bambi imilimo kucindeme ni pakuti abakupyunga imilimo balukupengelwa kabili kuli imilimo iyakuti ubwingi mu kwanshika kwa baYawe. Inshila baYesu na Paulu balukupyungisha pa kusambisha na ino mpindi shilapyunga. BaYawe balafwaya abapyungishi babo aba ino mpindi ukusambishiwa bwino ifya kupyunga bwino imilimo ya mu kwanshika. BaLesa balitupeele ishuko lya kusambisha aba bukumo ukwishiba ifya kupyunga bwino imilimo ya mwi kelesha. Ili ifintu filukuya ili fibipilako mu calo kabili ili umulimo wa kutulisha ulukuya ili ukulilako, tulyelelwe ukusambisha bwangu bambi kabili ukucite’fyo kucindeme.

19. Nindo mwelelwe ukucetekela ati ukupyungisha kwenu ukwa kusambisha bambi imilimo kukafumamo ifiweme?

19 Fya cine ati cilapengela ukupyungisha pa kusambisha bambi imilimo. Pano baYawe ne Bana babo bakamofweniko ne kumupeeleni amano pakweba’ti musambishe bwino bambi. Tukasangalala ukubonako ili abo tulukusambisha ‘balukupyungisha.’ (1 Tim. 4:10) Nakabili, fwe bene nga tupitilishe ukulukukula mu fya baLesa ili tulukupyungila baYawe.

^ [1] (palakalafu 7) Pa fya kulonda ifi baYesu balabiilepo pali na: (1) Ukutulisha icebo ca Bufumu. (2) Ukuteeko’mutima kuli fyefyo baLesa babapeele. (3) Ukubulo’kupikishanya na babo baalukutulishako. (4) Ukucetekela muli baLesa ili balukupenshiwa. (5) Ukubulo’kuba ne mwenso.

^ [2] (palakalafu 9) Mwi buuku lya Nonkelenimo mu Masambililo ya Isukulu lya Butumikishi Ilya Bulesa, pa mabuula 62-64, pali ifyebo ifiweme ifilangisha ifi twelelwe ukwambaala ne bantu ili tulukutulisha.

^ [3] (palakalafu 15) Mwi buuku lya Nonkelenimo mu Masambililo ya Isukulu lya Butumikishi Ilya Bulesa, pa mabuula 52-61, balibuulishishe ifi umukwabesu angacita pakweba’ti eshibe ifya kusambisha bwino ibumba.