Tolokeleni

Tolokeleni muye pa fyebo fya bubili

Tolokeleni muye pa filukusangwamo

Bamboni sha BaYawe

IciLamba

Akatambo ka Wakulama (Akakusambililamo)  |  November 2016

 UMUTWI WA INO MAKASHINI | IFITOFWAKO UKWISHIBA IFI KWIULU KULI

Ifyakwipusha Pali Baabo Abekala Kwiulu

Ifyakwipusha Pali Baabo Abekala Kwiulu

Kani mulingalangulukepo pe ulu na baabo abekalako? Kani efi cili, tamulipo mwenka. Pa myaka iyakuti ubwingi, abantu balalabila ifilekenelekene pali lili ilyashi. Bambi balicetekele ati kwiulu e kwikele ifikolwe fyabo ifyelelwe ukucindikwa. Bambi balalanguluka ati mupunda ukuli makosa umutende, ukuli inkalamba ne bantu abaweme abafwile. Eli, bambi balabona ati iulu mupunda ukwikala balesa abakuti ubwingi.

Abantu abengi balalabila ati tekuti twishibepo ifili fyonse pe ulu ni pakuti takulipo uwileko kwiulu ne kwisa mu kutubuulishisha ifi kuli. Pano, ukulanguluka kwa kube’fyo takulipo bwino. BaYesu Klistu baali kwiulu ili tabangesa pa calo. Balibuulishishe ku ntangishi sha mapempelo ishaliko mu mpindi ya basambile ukwa kubulo’kupita na mu mpelo ati: “Nshiselukile ukufuma kwiulu mu kucito’kufwaya kwanji, sombi ni mu kucita koti kufwaya kwa babo abantumine e mo nselukile.” Popele, baYesu baalukulabila pa fintu ifi balibwenene abene ili balabiile ku basambile babo ati: “Mu ng’anda ya baTata muli apa kwikala apenji.”Yoane 6:38; 14:2.

Ukuba, baWishibo baYesu, ni baLesa, ishina lyabo ni baYawe, kabili balekala kwiulu. (Amasamo 83:18) Penka, takulipo uungabuulishisha bwino ifi kwiulu kuli ukucila pali baYawe na baYesu. Baalifisulwile ifi kwiulu kuli ku bantu abaali ba bucine ukupitila mu fyakubona.

Iciputusha cakonkapo cilukulabila pa fiputusha fya mu Baibolo ifibuulishisha ifyakubona ifi abantu babwene. Ili mulukusambilila pali fifi ifyakubona, mulukwanuka ati iulu tulukulabilapo talipo cintu ici tungekata, kabili muli ifintu ifi tekuti tubonepo. Popele, ili baLesa baalukubuulishisha ifi kwiulu kuli tabaapyungishepo amashiwi aangomfwa lukoso ifilengelwe fya mupashi, sombi baalibuulishishe mu nshila ya kweba’ti na fwebo tungomfwisha. Ifi ifyakubona fyakumofweniko ukwishiba abekeele “apa kwikala apenji” kwiulu.