Tolokeleni

Tolokeleni muye pa fyebo fya bubili

Tolokeleni muye pa filukusangwamo

Bamboni sha BaYawe

IciLamba

Akatambo ka Wakulama (Akakusambililamo)  |  November 2016

 UMUTWI WA INO MAKASHINI | IFITOFWAKO UKWISHIBA IFI KWIULU KULI

Ifyakubona Pali Baabo Abekala mu Maulu

Ifyakubona Pali Baabo Abekala mu Maulu

Baibolo ilalabila pa fyakubona fimo ifitofwako ukwishiba fimo pali fyefyo kwiulu kuli. Tulukumukoselesheni ukubikako akalango ku fyakubona ifyabuulishishiwa muli cicino iciputusha. Nangaba’ti tekuti tulabilepo ati ifintu kwiulu fili lukoso koti ni fyefyo fyabuulishishiwa mu fyakubona, ifi ifyakubona fingamofweniko ukwalakanya pali baabo abali kwiulu ne kwishiba ifi bangamofweniko.

BAYAWE E BACILILE

“Lomba kusanga ni kwi tebe iliikalikilwe mwiulu, na pe tebe napo palukwikala umbi; kabili uyo uwaikele walibwenekele alipalile ibwe lya yashipa ne lya sadyo; kabili pe tebe palishingulukile inkongolo iya bwenekele ilipalile shimalajido.”Ukufisulula 4:2, 3.

“Nalibwene icali koti kuboneka kwa mulilo; lomba ukusasamuka kwalimushingulukile. Koti kuboneka kwa nkongolo ili mwi kumbi pa kasuba ka mfula, fyopele’fyo e fyali ukuboneka kwa kusasamuka ukwashingulukile. Uko e kuboneka kwa kupalana kwa buleme bwa baYawe.”Esiceli 1:27, 28.

Ifi ifyakubona, ifyalangishiwe ku ntangishi Yoane ne wakushimika Esiceli, filalangisha ubuleme bwa baLesa Abacilile, baYawe, kabili filalabila pa fintu ifi tungalakanya ifili koti mabwe amutengo, inkongolo, eli ne tebe lya buleme. Filatubuula ati ukwikala baYawe kwa bulombe ukwakuti, kuweme, kabili kwa mutende makosa.

Uku ukubuulishisha pali baLesa kulasuminanshanya ne mashiwi amwimbishi wa masamo uwaimbile ati: ‘Pakuti baYawe bakulu, abelelwe ukulemiwa ukwakuti: Balielelwe ukubatiina ukucila na pali balesa bonse. Pakuti balesa ba bantu fibumbwabumbwa bonse: Sombi ni baYawe e balengele amaulu. Ubuleme ne bufumu buli pa menso abo: Amakosa ne bulombe ali pa mupunda wabo uswetelele.’Amasamo 96:4-6.

Nangaba’ti baYawe e Bacilile, balatubuula ukupalamina kuli bo mwi tembelo kabili balatubuula ati balomfwa ukutembela kwesu. (Amasamo 65:2) BaLesa balitutemenwe kabili balitubikileko akalango ica kweba’ti intangishi Yoane yalilembele ati: “BaLesa e butemwe.”1 Yoane 4:8.

BAYESU BALIMAKENE KU LWINE LWA BALESA

‘[Stefano umusambile] uwiswile umupashi uswetelele, ne kutontomekesha kwiulu, ne kubona ubuleme bwa baLesa na baYesu baliimakene pa lwine lwa baLesa: ne kulabila ati: Boneni, ndukubona iulu lyalekana, ne Mwana wa Muntunshi aliimakene pa lwine lwa baLesa.’Ifyacitilwe 7:55, 56.

Ili kwashele impindi iinini ati Stefano akabone ici icakubona, baYesu baalipaiwe ku ntangishi sha baJuda shenka shilya Stefano alukulabilako aya amashiwi. Ici icakubona calukulangisha ati baYesu baali ne mweo kabili ati baalibushiwe ne kulemiwa. Ukulosha kuli cici, intangishi Paulu yalilembele ati: “Ili [baYawe] bababuushishe pa bafwile [baYesu], ne kubekalika pa lwine lwabo mu maulu, peulu apacilile na pa bufumu bonse, ne bukulu, ne makosa, ne kukomeka, ne mashina onse ashimbwilwe, pa mpindi ino penka tepo, sombi na pa mpindi iyo ikesa napo.”AbaEfesa 1:20, 21.

Ukulunda pa kubuulishisha umulimo woyo baYesu bapeelwe, Amalembo alalangisha ati koti ni baYawe, balibikile akalango ku bantunshi. Ili baYesu baali  pa calo, baalitendulwishe abalwashi, abalemeene, kabili baalibushishe ne bafwile. Ukupitila mu mfwa yabo, baalilangishe ati baLesa balitemenwe makosa abantunshi. (AbaEfesa 2:4, 5) BaYesu, abemakeene pa lwine lwa baLesa, bukumo lukoso bakapyungisha amakosa abo ne kuleta amashuko pa bantunshi bonse abali ne cumfwila.

INKALAMBA SHILAPYUNGILA BALESA

“Kambona [e kweba’ti uwakushimika Danyeli], lomba ne kubikwa amatebe, ne kwikala umbi Umucekulu uwa Kalekale [baYawe]. . . . Amasausande na masausande alukumupyunjila, ne bantu mpangana mpangana ne kwimakana pa menso akwe.”Danyeli 7:9, 10.

Muli cici icakubona, Danyeli tabwenepo lukoso inkalamba imo, sombi alibwene inkalamba amasausande ne masausande. Mame ifi ici icakubona cali cakukankamika! Inkalamba bantu abali ne mibili ya mipashi, abalemiwe, abali ne kalango kabili abakwatishe amakosa. Shimbi inkalamba shiletwa ati baselafi eli shimbi ati bakelubi. Baibolo ilalabila pa nkalamba impindi ukucila pali 250.

Bambi abantu balisumiine ati bamo abantu abafwa balaya kwiulu mu kuba inkalamba. Nangabe’fyo, ubu ubusambishi talipo bwa cine. BaLesa baalilengele inkalamba ili tabangalenga ne bantu. Ili icalo calukulengwa lukoso, inkalamba shalukubonako kabili shalibilikishe pakuti pa kusangalala.Jobo 38:4-7.

Inshila imo inkalamba shipyungila baLesa kupitila mu kofweleshako umulimo uucindeme  makosa uulukupyungwa pa calo pali ino mpindi, e kweba’ti umulimo wa kutulisha icebo iciweme ica Bufumu bwa baLesa. (Matayo 24:14) Akabeya kabo muli uyu umulimo kaalibuulishishiwe mu cakubona intangishi Yoane yabwene, yalilembele ati: “Nalibwene inkalamba imbi ilukupalala mu kati mwiulu, ili ne cebo iciweme ica muyayaya ica kutulisha kuli babo abekele pa calo ca panshi, na ku mishobo yonse, na ku bena bonse, na ku milaka yonse, na ku mikoka yonse.” (Ukufisulula 14:6) Nangaba’ti inkalamba tashilabilapo ne bantu koti ni fyefyo shalukucita akale, shilatangilila abalukutulisha icebo iciweme ku bantu abafwaya ukusambilila bucine.

SATANA ALATUMPAIKA ABANTU ABENGI

“Palibele ne nkondo kwiulu: Mikayeli [baYesu Klistu] ne nkalamba shakwe shalilwile inkondo na kongamato; na kongamato naye ne nkalamba  shakwe shalilwile; sombi tashacilile amakosa, ne mupunda washiko nawo tawabwenekele libili kwiulu. Popele kongamato uyo umukulu waliposelwe panshi, insoka iyo iya kale, iilikilwe ati Musenseshi, ni Satana, uwa kutumpaika abantu bonse aba mu calo ca panshi, waliposelwe panshi pa calo, ne nkalamba shakwe nasho shaliposelwe panshi pamo nakwe.”Ukufisulula 12:7-9.

Talipo ni lyonse kwiulu kwalukuba umutende. Ili abantunshi balengelwe lukoso, inkalamba imo, yalitatikile ukufwaya ukuipempela, popele yalifutukiile baYawe ne kuba Satana, icaalula ati “Uuciicila.” Panuma, inkalamba shimbi shalimulondele ne kuba ifibanda. Pakuti Satana ne fibanda fyakwe babipile, balalwisha baYawe kabili balilengeshe abantu abakuti ubwingi ukulukucita ifintu ifi baYawe bapatile.

Satana ne fibanda fyakwe tabalipo ne nkumbu neli panini. Bapate ba bantunshi bonse kabili balilengeshe abantu abengi pa calo ukulukupenga. Ku cakubwenako, Satana aalipeye inama sha mwalalume wa bucetekelo Jobo ne bapyungishi bakwe. Nakabili, aalipeye abana bakwe Jobo abaali 10 pa kulengesha “icipupu icikulu” ukonaala ing’anda yeyo baalimo. Panuma ya fyefyo, Satana aaliletele pali Jobo “ne mapute akateshe mu mubili monse ukutatikila mukati ka lukasa ne kufikila na pa lumbushi.”Jobo 1:7-19; 2:7.

Nangabe’fyo, Satana ali ne konaalwa bukumo lukoso. Ukufuma lukoso ili bamupoosele pa calo, aliishi ati ali “ne mpindi ice lukoso.” (Ukufisulula 12:12) Satana ali ne konaalwa. Ico cilatusangalasha ukwakuti!

ABASALULWILWE UKUFUMA PA CALO

“Mwaliipailwe [baYesu], ne kubolila baLesa ku milopa yenu abantu aba bena bonse, aba milaka yonse, aba mikoka yonse, aba mishobo yonse; ne kubaalula bufumu ne bupapatilishi ubwakuli baLesa besu; nabo balukwikaliko’bufumu pa calo ca panshi.”Ukufisulula 5:9, 10.

Fyopele filya baYesu babuushiwe ne kuya kwiulu, efi ciba na kuli bambi. BaYesu baalilabiile ku ntangishi shabo isha bucetekelo ati: “Ndukuya mu kumwanshikileni umupunda. Penka . . . nkabwela ne kumupokeni kuli nebo ne mwine, ati mukalukwikele kopele uko uku nkalukwikele nebo.”Yoane 14:2, 3.

Abo abaya kwiulu balikwete umulimo bakalukupyunga. Pamo na baYesu, bakapanga Ubufumu ubukekalika abantunshi bonse pa calo ne kuleta amashuko pali bo. Ubu e Bufumu baYesu baalukulabilapo ku basambile babo ili baalukubasambisha ifya kutembela ati: “Mwe baWishifwe aba kwiulu, ishina lyenu licindikwe. Ubufumu bwenu bwise. Ukufwaya kwenu kucitwe, panshi pano koti ni kwiulu.”Matayo 6:9, 10.

IFI ABA KWIULU BAKACITA

“Naliumfwile [intangishi Yoane] ishiwi ilikulu ilya kufuma kwi tebe, ilya kulabila ati: Bona! Umutanda wa baLesa uli ku bantu, . . . bakabasumwina iminsoshi yonse ku menso abo; tapakalukuli imfwa libili, neli ni nsoni, neli kulila, neli kusomenwa konse, tau; pakuti ifintu ifya kutanga filipitilile.”Ukufisulula 21:3, 4.

Ici icakubona cilalabila pa mpindi ili Ubufumu bwa baLesa bukashilisha ukwikalika kwakwe Satana ne kulenga icalo conse ukuba Paladaiso. BaYesu na baabo abasalulwilwe ukufuma pa calo e bakapanga ubu Ubufumu. Fyonse ifilengesha abantu ukulukupenga fikashila. Ne mfwa nayo ikashila.

Pano, findo fikacitika ku bantu abakuti ubwingi abafwile kabili abatabakabuukilapo kwiulu? Kuntangiile, bakaba ne shuko lya kwikala umuyayaya mu Paladaiso penka pano pa calo.Luku 23:43.

Ifi ifyakubona filatofwako ukwishiba ati baYawe ne Bana babo, baYesu Klistu, ukubikako ne nkalamba sha bucetekelo na baabo abasalulwilwe ukufuma pa calo, balitubikileko akalango kabili balafwaya ifintu ukutuwamina. Pa kwishiba ifingi ifi aba bonse bakacita, tulukumukoselesheni ukubona Bamboni sha BaYawe neli ukuya pali webusaiti yesu iya, www.jw.org/lam ne kukopolola ibuuku lya Kani Findo Baibolo Itusambisha?