“Nalukubona ati Baibolo ikateshe ukumfwisha.”—Ba Jovy

“Nalukubona ati yalukumfwisha ubufila ukuipenda.”—Ba Queennie

“Kani nabona ifi Baibolo ikulile, nalukumfwa ubufila bwa kutatika ukupenda.”—Ba Ezekiel

Kani mulyeseshepo ukupenda Baibolo pano mwafilwa pakuti pa kumfwa koti ni baba abalabilwapo peulu? Abengi balabona ati ukupenda Baibolo kukateshe. Pano nga kani mwaishiba ati ukupenda Baibolo kungamulengesheni ukuba abasangalele mu mweo wenu? Nakabili, nga kani mwaishiba ati kuli ifi mungacita pakweba’ti mulukulitemwesha ukupenda Baibolo? Kani mungalitemenwa ukutatika ukupenda Baibolo?

Langulukeni pa fyalabiile bamo bamo ababwenenemo ili batatikile ukupenda Baibolo.

Ezekiel, uucilileko lukoso panini pa myaka 20, aalilabiile ati: “Akale, nali koti muntu uulukwensha motoka ukwakubula ukwishiba uku alukuya. Pano ukupenda Baibolo kulingofweleko ukwishiba ifintu ificindeme mu mweo wanji. Mu Baibolo muli ukufunda uku ningapyungisha inshiku shonse lukoso.”

Frieda, naye uuli mu myaka ya ba 20, aalibuulishishe ati: “Akale nalukucita ifintu ukwakubula ne kulangulukapo. Pano, pakuti pa kupenda Baibolo, ndisambilile ifya kuba ne mibelo ya kulilama. Ici cilingofweleko ukwishiba ifya kwikala ne bantu, penka ndikwete ifibusa ifingi.”

Ba Eunice abali mu myaka ya ba 50 baalilabiile pali Baibolo ati, “Ilukungofwako ukuba umuntu umuweme ne kuleka ukucita ifibipile.”

Koti ni fyefyo abalabilwapo peulu basambilile ukubikako na bambi abakuti ubwingi, ukupenda Baibolo kungamofweniko ukuba abasangalele mu mweo wenu. (Yisaya 48:17, 18) Ukulunda pa fintu fimbi, ingamofweniko (1) ukulukusalululapo bwino pa fintu, (2) ukupanga ifibusa fya cinenene, (3) ukwishiba ifya kupyunga ne makatasho, na (4) ukusambilila bucine pali baLesa, icili icicindeme makosa. Ukufunda ukuli mu Baibolo kulifumine kuli baLesa, popele cili icelelwe ukulonda ifilembelwemo. BaLesa tabatupeelapo ukufunda ukubipile.

Icicindeme kutatika ukupenda. Findo mungacita pakweba’ti mutatike ukupenda Baibolo ne kulitemwesha ukuipenda?