Tolokeleni

Tolokeleni muye pa filukusangwamo

 UMUTWI WA INO MAKASHINI | IFI MUNGABWENAMO MAKOSA MU KUPENDA BAIBOLO

Kani Baibolo Ingawamyako Shani Amekalilo Anji?

Kani Baibolo Ingawamyako Shani Amekalilo Anji?

Baibolo libuuku ililibelele. Muli ukufunda ukufumine ku Balengeshi besu. (2 Timote 3:16) Ifyebo ifilimo fingatofwako ukwakuti. Baibolo iine ilabuulishisha ati: “Ishiwi lya baLesa lili ne mweo, lilasantuka.” (AbaEbeya 4:12) Ilikwete amakosa akutofwako mu nshila shibili, (1) muli ukufunda ukututangilila mu mekalilo esu ino mpindi, na (2) ilatofwako ukwishiba baLesa ne milayi yabo.1 Timote 4:8; Jakobo 4:8

Mungawamyako amekalilo enu pali ino mpindi. Baibolo ingamofweniko mu fintu fya pa lwenu. Ukufunda ukulimo kulapyunga bwino ukulosha

  • Kuli fyefyo twelelwe ukucita ku bantu bambi.—Efesa 4:31, 32; 5:22, 25, 28, 33.

  • Kuli fyefyo tulangulukapo mu mutima na fyefyo tungalilama ku mubili.—Amasamo 37:8; Ifisimpi 17:22.

  • Ku mibelo.—1 AbaKolinto 6:9, 10.

  • Ku maboni.—Ifisimpi 10:4; 28:19; Efesa 4:28. *

 Aboopene aba ku Asia baalitootele makosa pali fyefyo ukufunda kwa mu Baibolo kwabofweleko. Koti ni fyopele filya ciba ku bengi kani eli baupana lukoso, nabo baalukukatashiwa pakweba ati beshibe bwino bamukakwabo ne fi bangacita pa kuba abakakulukile pa kwambaala. Pano baalitatikile ukupyungisha ifi balukupenda mu Baibolo. Findo fyafuminemo? Ba Vicent, abalume, baalilabiile ati: “Ifi napendele mu Baibolo fyalingofweleko ukwishiba ifyakushilisha amakatasho amu cupo cesu mu nshila iweme. Ukupyungisha ukufunda kwa mu Baibolo kulitulengeshe ukulitemwesha mu cupo cesu.” Ba Annalou, abakashi babo, baalisuminisheko ati: “Ukupenda pa fyakubwenako ifili mu Baibolo kwalitofweleko. Ino mpindi, ndalyumfwa umusangalele kabili ndalitemwesha mu cupo cesu ili tulukupyungila pali fyefyo tusalulwilepo ukucita.”

Ifi mungeshiba bwino baLesa. Fimbi ifi ba Vicent baalabiilepo fyakweba ati: “Ukupenda Baibolo kulampalamisha makosa kuli baYawe ukucila ifi cali akale.” Ifi ba Vicent baalabilepo filukubuulishisha icebo icicindeme icakweba’ti, Baibolo ingamofweniko ukwishiba baLesa. Ukucite’fyo kukamulengesheni ukubwenamo mu kufunda kwa baLesa, kabili mukabeshiba bwino. Nakabili mukeshiba ati baLesa balabuulishisha ifiweme ifikacitika kuntangile, impindi ili mukalitemwesha “umweo wa cine” uukabako umuyayaya. (1 Timote 6:19) Takulipo ibuuku limbi ilibuulishisha bwino ifi.

Kani mwapitilisha ukupenda Baibolo, na mwebo mungabwenamo; mukawamyako amekalilo enu pali ino mpindi kabili mukabeshiba baLesa. Nangabe’fyo, ili mulukupenda Baibolo, mukaba ne fyakwipusha ifingi. Kani mwaba ne fyakwipusha, mulukwanuka intungu (icilolo) ya ku Etiopia iyaliko imyaka 2,000 ku numa. Yali ne fyakwipusha ifyakuti ubwingi pali Baibolo. Ili bayipwishe kani yalyumfwishishe ifi yalukupenda, yalyasukile ati: “Njishibe shani ne wakubulo’muntu wakumbulishishako?” Popele, yalisumiine ukuyofwako kuli Filipo, umusambile wa baYesu uwaishi bwino ukusambisha Baibolo. (Ifyacitilwe 8:30, 31, 34) Na mwebo kani mulukufwaya ukwishiba ifingi pali Baibolo, mungalomba ukumusambisheni. Mungacite’fyo ukupyungisha intaneti pa www.jw.org/lam neli mungalemba ukupyungisha adresi iibuulishishiwe muli yenka ino makashini. Mungabona na Bamboni sha BaYawe neli mungaya pa Mulenda wa Bufumu uuli apepi ne ku mwikalila. Mba nindo tekuti mutatikile ukupenda Baibolo yenka ino mpindi, ne kuleka ati ilukumutangilileni mu mweo wenu?

Kani mulukulanguluka ati tamukabwenamo mukupenda Baibolo, mwane mungatamba ka vidyo ka kweba ati How Can We Be Sure the Bible Is True? Mungacita sikani neli mungaya pa jw.org ne kutinika apali ati search ne kulembamo umutwi wa vidyo.

^ par. 8 Kani mulukufwaya ukwishibilapo ukufunda kwa mu Baibolo na kumbi, mungaya pa webusaiti yesu, iya jw.org/bem. Mungabona apali ati AMASAMBILISHO YA MU BAIBOLO > AMASUKO KU MEPUSHO YA MU BAIBOLO.