1. Findo mwelelwe ukwalakanyapo panuma ya kusambilila lino ibuuku?

MULI lilino ibuuku mulisambilile bucine bwa mu Baibolo ubwingi, mulisambilile pali fyefyo baLesa bamulaileni ukwikala umuyayaya, fyefyo abafwile bali, kabili ne bucetekelo bwa kubuuka kwa bafwile. (Uwakutulisya 9:5; Luku 23:43; Yoane 5:28, 29; Ukufisulula 21:3, 4) Cipale mulitatikile kale ukusangwa ku kubungana kwa Bamboni sha BaYawe ne kubona ati ifi bapempela e bucine. (Yoane 13:35) Cipale mulitatikile ukuba na bucibusa ubupalamishe na baYawe kabili cipale mulafwaya ukubapyungila. Na  muli fyefyo mungalipusha ati, ‘Findo njelelwe ukucita pa kupyungila baLesa?’

2. Cindo calengeshe umwalalume umu Etiopia ukufwaya ukubatishiwa?

2 Ifyo efi umu Etiopia uwaliko mu mpindi ya baYesu alangulukile. Pa mpindi imo ninshi baYesu balibuukile baliile na kwiulu, umusambile wa baYesu Filipo, kaatulisha ku mwalalume umu Etiopia. Filipo alyofweleko uyu umwalalume ukushininwa ati baYesu e baMasaya. Ifi uyu mwalalume aumfwile fyalimufikile pa mutima icakweba ati penka’po kaalabila ati: ‘Boneni! Amenda nga; nindo tekuti mbatishiwilwe?’—Ifyacitilwe 8:26-36.

3. (a) Kani ni liisa ifunde baYesu bapeele abasambile babo? (b) Kani umuntu alyelelwe ukubatishiwa shani?

3 Baibolo ilibuulishishe mu kumfwanika ati kani mulukufwaya ukupyungila baYawe, mulyelelwe ukubatishiwa. BaYesu baalibuulile abasambile babo ati: “Mukalukusambisha imishobo yonse ya bantu, ne kubabatisha.” (Matayo 28:19) BaYesu abene baalilangishe icakutuntululako ili babatishiwilwe. Baalibebishe umubili onse mu menda, talipo kubetila lukoso amenda pa mutwi. (Matayo 3:16) Na pali ino mpindi umu Klistu pa kubatishiwa, alyelelwe ukwibishiwa umubili onse mu menda.

4. Kani ukubatishiwa kwenu kulabuulishishe’ndo kuli bambi?

4 Kani mwabatishiwa, ninshi mwalangisha bambi ati mucinenene mulukufwaya ukuba icibusa ca baLesa ne kubapyungila. (Amasamo 40:7, 8) Popele mungalipusha ati, ‘Cindo njelelwe ukucita pakweba ati mbatishiwe?’

UKWISHIBA NE BUCETEKELO

5. (a) Cindo mwelelwe ukutanga ukucita ili tamungabatishiwa? (b) Nindo ukubungana kwa buKlistu kucindamiine?

5 Ili tamungabatishiwa, mulyelelwe ukwishiba baYawe na baYesu. Mulitatikileko kale ukucite’fyo ukupitila mu kusambilila Baibolo. (Pendeni Yoane 17:3.) Pano kuli na  fimbi ifipengelwa. Baibolo ilalabila ati “mukesule ukwishibisha” ukufwaya kwa baYawe. (AbaKolosai 1:9) Ukusangwa ku kubungana kwa Bamboni sha BaYawe ku kamofweniko ukukosha bucibusa bwenu na baYawe. Uyo, e mulandu cicindamine kuli mwebo ukusangwa ku kubungana lyonse.—AbaEbeya 10:24, 25.

Ili tamungabatishiwa, mulyelelwe ukusambilila Baibolo

6. Kani mulyelelwe ukwishiba fyonse pakweba ati mubatishiwe? Buulishisheni.

6 Na cine, talipo ati mulyelelwe ukwishiba fyonse lukoso ifili mu Baibolo pakweba ati mufikepo ukubatishiwa. Fyopele’fyo, talipo ni fyonse umwalalume umu Etiopia aishibile ili tangabatishiwa. (Ifyacitilwe 8:30, 31) Kabili tukapitilisha ukusambilila pali baLesa umuyayaya. (Uwakutulisya 3:11) Pano pakweba ati mubatishiwe, mulyelelwe ukwishiba ne kusumina ifisambisho fya mu Baibolo ifya kutanga.—AbaEbeya 5:12.

7. Kani ukusambilila Baibolo kulimofweleniko shani?

7 Baibolo ilalabila ati: “Apakubulo’kucetekela tapeshiba ukubatemwesha [baLesa].” (AbaEbeya 11:6) Na muli fyefyo, ili tamungabatishiwa mulyelelwe ukuba ne bucetekelo. Baibolo ilatubuula ati, ili bambi abantu mu mushi wa kale uwa Kolinto baumfwile icebo ici abasambile ba baYesu batuliishe, “balicetekele ne kubatishiwa.” (Ifyacitilwe 18:8) Koti ni fyopele’fyo, ukusambilila Baibolo kulimofweleniko ukucetekela imilayi ya baLesa ne makosa amulambu wa baYesu, aangatupulusha ku kubifya ne mfwa.—Josyua 23:14; Ifyacitilwe 4:12; 2 Timote 3:16, 17.

MULUKUBUULAKO BAMBI BUCINE BWA MU BAIBOLO

8. Cindo cingamulengesheni ukubuulako bambi fyefyo musambilile?

8 Ili mulukupitilisha ukusambilila Baibolo ne kubona ifi ingamofweniko mu mweo wenu, ukucetekela kwenu  kukakoselako. Mukafwaisha ukubuulako bambi ifi mulukusambilila. (Jelemiya 20:9; 2 AbaKolinto 4:13) Pano ni bani mwelelwe ukubuulako?

Ukucetekela kulyelelwe ukumulengesheni ukubuulako bambi ifi musuminemo

9, 10. (a) Ni bani mungatatikilapo ukubuulako ifi mulukusambilila? (b) Mulyelelwe ukucita shani kani mulukufwaya ukulukutulisha pamo ne kelesha?

9 Cipale mungafwaya ukubuulako aba mu cisoolo cenu, ifibusa, aba mwikala nabo apepi, neli aba mupyunga nabo ifi mulukusambilila. Ukucite’fyo kuli bwino, pano mulyelelwe ukucite’fyo mu butemwe ne nkumbu. Mukupita kwa mpindi, mungatatika ukutulisha pamo ne kelesha. Ili mwabona ati mulyelelwe ukucite’fyo, mungabuula Mboni uumusambisheni Baibolo ati mulukufwaya ukulukupyungila pamo ne kelesha mu mulimo wa kutulisha. Kani uumusambisheni abona ati mulilyanshikile kabili ati mulukwikala ukwelelwa ne kufunda kwa mu Baibolo, mwense bobilo mukakumana ne bakulu ba mwi kelesha.

10 Pali kuku ukukumana findo mukambaala? Abakulu ba mwi kelesha bakambaala na mwebo pakweba ati babone kani mulyumfwishishe ne kucetekela ifisambisho fya mu Baibolo ifya kutanga, kani mulekala ukwelelwa ne kufunda kwa mu Baibolo, kabili kani mulukufwaisha ukuba Imboni ya BaYawe. Mulukwanuka ati abakulu ba mwi kelesha balalama aba mwi kelesha bonse, ukubikako na mwebo, na muli fyefyo tamwelelwepo ukutiina ukwambaala nabo. (Ifyacitilwe 20:28; 1 Petilo 5:2, 3) Pa kushila kwa kukumana, abakulu ba mwi kelesha bakamubuuleni kani mungatatika ukutulisha pamo ne kelesha.

11. Nindo cicindamine ukwaluka umulukupengelwa ili tamungatatika ukutulisha pamo ne kelesha?

11 Cipale abakulu ba mwi kelesha bangamubuuleniko  umu mwelelwe ukwaluka makosa ili tamungatatika ukutulisha pamo ne kelesha. Nindo cicindamine ukwaluka umulukupengelwa? Ni pakuti ili tulukulabila kuli bambi pali baLesa, tulemakaninako baYawe kabili tulyelelwe ukulukubalemya mu mekalilo esu.—1 AbaKolinto 6:9, 10; AbaGalatya 5:19-21.

LAPILENI NE KWALULUKA

12. Nindo abantu bonse belelwe ukulapila?

12 Kuli na cimbi ici mwelelwe ukucita ili tamungabatishiwa. Intangishi Petilo yalilabiile ati: “Lapileni, mwaluluke, ati ifyakubifya fyenu fishimangane.” (Ifyacitilwe 3:19) Cilaalule’ndo ukulapila? Ukulapila, kumfwa ububi pa fibipile ifi tucitile. Ku cakubwenako, kani mwalukucita ubucencemeshi, mulyelwe ukulapila. Nangaba ati mu mweo wenu onse mulipyungiishe ukulukucita ifilungeme, mulyelelwe ukulapila, ni pakuti fwense tuli bakubifya kabili tulapengela ukulomba baLesa ukutufitulukila.—AbaLoma 3:23; 5:1.

13. Kani ishiwi lya kweba ati ‘ukwaluluka’ lilaalule’ndo?

13 Kani mulyelelwe ukupelela lukoso pa kumfwa ububi pa fibipile mwacitile? Koku. Petilo kalabila na kabili ati mulyelelwe ‘Ukwaluluka.’ Ici cilaalula ati mulyelelwe ukuleka ukucita ifibipile mwalukucita ne kutatika ukucita ifilungeme. Ku cakubwenako, alakanyeni ati mulukuya ku mupunda uku tamungayapo. Ili tamungafika ukutali, mwabona ati mwaluba. Kani mungacita shani? Ukwakubula ukukanika mungaaluluka, ne kupyungisha inshila iilukuya ku mupunda mulukuya. Fyopele’fyo, ili mulukusambilila Baibolo, mungasangana ati muli umu mwelelwe ukwaluka. Litemenweni ‘ukwaluluka’—ekweba ati, ukuleka ukucita ifibipile mwalukucita—ne kutatika ukucita ifilungeme.

 LITUULENI MWE BENE

Kani mulilaile baYawe ati mukalukubapyungila?

14. Kani mungalituula shani kuli baLesa?

14 Icintu na cimbi icicindeme ici mwelelwe ukucita ili tamungabatishiwa, kulituula kuli baYawe. Kani mwalituula kuli baYawe ninshi mwabalaya mwi tembelo ati, nibo lukoso benka ebo mukalukupempela ne kulukucita ukufwaya kwabo mu mweo wenu onse.—Ndutelonomi 6:15

15, 16. Cindo cingalengesha umuntu ukulituula kuli BaYawe?

15 Ukulaya ukupyungila baYawe cili koti kulaya uumutemenwe ati mukalukuli nakwe umweo wenu onse. Alakanyeni ati umwalalume alukufwaya ukwambisha umwanakashi. Ili aishiba bwino umwanakashi ne kubona ati ali ne mibelo iiweme, umwalalume amutemwa ukwakuti kabili afwaya ne kumuupa. Pakuti amutemwa, angasalululapo ukumuupa nangaba ati ukucite’fyo kulisankenemo ifingi.

16 Ili mulukusambilila pali baYawe, mukabatemwa ukwakuti kabili mukafwaya ukulukubapyungila ne mweo wenu onse. Ukucite’fyo kukamulengesheni ukubabuula mwi tembelo ati mukalukucita ukufwaya kwabo. Baibolo ilalabila ati onse uufwaya ukulonda baYesu alyelelwe ‘ukulikanya.’ (Mako 8:34) Kani ico cilaalule’ndo? Cilaalula ati mu mweo wenu, mulyelelwe ukulukutanga ukucita ifi baYawe bafwaya. Ukucita ukufwaya kwa baYawe kucindeme ukucila na pali fyefyo mufwaya ukucita.—Pendeni 1 Petilo 4:2.

MWILUKULANGULUKA ATI TEKUTI MUKONSHEPO

17. Nindo abantu bambi batiinina ukulituula kuli baYawe?

17 Abantu bambi balatiina ukulituula kuli baYawe, pakuti balalanguluka ati tekuti bakonshepo ukucita ukufwaya kwa baYawe. Nakabili balalanguluka ati bangomfwisha  baYawe insoni neli ati kani tabalituulilepo kuli baYawe tekuti babasololweshe ne kubapanika pali fyefyo bacita.

18. Nindo ingamofweniko ukubula ukulanguluka ati tekuti mukonshepo ukulukucita ukufwaya kwa baYawe?

18 Ukutemwa baYawe kukamulengesheni ukulituula kuli bo, ukwa kubula ukutiina. Pakuti mulibatemenwe, mukapyungisha ukulukucita ukufwaya kwabo. (Uwakutulisya 5:4; AbaKolosai 1:10) Tacikalukubonekapo icikateshe ukucita ukufwaya kwa baYawe. Intangishi Yoane kalemba ati: “Pakuti ubutemwe bwa baLesa ni bubu, ati tulukulama’mafunde abo: lomba amafunde abo taalemene, tau.”—1 Yoane 5:3.

19. Nindo tamwelelwepo ukutiina ukulituula kuli baYawe?

19 Talipo ati mulyelelwe ukuba abawaminine pakweba ati mulituule kuli baYawe. Baliishi apa tungapelela kabili tabacetekelapo fwebo ukucita ifi tekuti tukonshepo. (Amasamo 103:14) Bakamofweniko ukucita ifilungeme. (Yisaya 41:10) Kamupemamo muli baYawe ne mutima wenu wonse, kabili ‘bakalukumulangisheni inshila shenu.’—Ifisimpi 3:5, 6.

UKULIFISULULA UKWA KULETA UKUPULUKA

20. Ili mwalituula kuli baYawe, cindo cimbi ici mwelelwe ukucita?

20 Kani mulilyanshikile ukulituula kuli baYawe? Ili mwalituula kuli baYawe, mulyelelwe ukucita icintu na cimbi. Mulyelelwe ukubatishiwa.

21, 22. Kani mungalangisha shani ati mulilituulile kuli baYawe pa bantu abengi?

21 Mulyelelwe ukwishibisha uwa kwikatanya ibumba lya bakulu ba mwi kelesha lyenu ati mulilituulile kuli baYawe, kabili ati mulukufwaya ukubatishiwa. Akanshika abakulu ba mwi kelesha bambi ati bakapitulukemo na mwebo mu fisambisho fya mu Baibolo ifyakutanga. Kani aba abakulu bakasumine ati mwafikapo,  bakamubuuleni ati mungabatishiwa pa kubungana ukukulu ukukakonkapo ukwa Bamboni sha BaYawe. Pali kuku ukubungana kukaba ilyashi ilikalukulabila pali fyefyo ukubatishiwa kwaalula. Uukalabila ilyashi akabuula bonse abakaba pa mulongo wa kubatishiwa ukwasuka ifyakwipusha fibili ifipubile. Ukwasuka kwenu kuli fyefyo ifyakwipusha  fibili, kukabuulishisha ukucetekela kwenu muli baYawe pa bantu abengi.—(AbaLoma 10:10)

22 Eli pano mukabatishiwa. Mukebishiwa umubili onse mu menda. Ukubatishiwa ekukeshibisha apaswetele ati  mulilituulile kuli baYawe kabili pano muli Mboni ya BaYawe.

IFI UKUBATISHIWA KWAALULA

23. Kani cilaalule’ndo ukubatishiwa “mwi shina lya baTata ne lya Mwana ne lya mupashi uswetelele”?

23 BaYesu baalilabiile ati abasambile babo bakalukubatishiwilwa “mwi shina lya baTata ne lya Mwana ne lya mupashi uswetelele.” (Pendeni Matayo 28:19.) Kani ici cilaalule’ndo? Cilaalula ati uulukubatishiwa alyelelwe ukwishiba ubukulu bwa BaYawe ne mulimo baYesu bakwete mu kwanshika kwa baLesa, kabili na fyefyo baLesa bakonsha ukufwaya kwabo ukupyungisha umupashi wabo uuswetelele.—Amasamo 83:18; Matayo 28:18; AbaGalatya 5:22, 23; 2 Petilo 1:21.

Ili mwabatishiwa, cilalangisha ati mulukufwaya ukucita ukufwaya kwa baLesa

24, 25. (a) Kani ulubatisho lulemakaninako indo? (b) Findo tukambaalapo mu capitala cakupelako?

24 Ukubatishiwa kulemakaninako icintu icicindeme. Ukwibishiwa mu menda kulalangisha ati mwafwa kuli fyefyo ifi mwalukucita akale. Ukutumpulwa mu menda, kulalangisha ati pano muli abalabi mu kucita ukufwaya kwa baLesa. Cilalangisha ati ukufuma pa kubatishiwa mukalukupyungila baYawe. Anukeni na kabili ati mulilituulile kuli BaYawe abene, talipo ni ku muntunshi, kwi bumba, neli ku mulimo.

25 Ukulituula kwenu kukamofweniko ukuba na bucibusa ubukosele na baLesa. (Amasamo 25:14) Ici tacalulapo ati kani umuntu abatishiwa ninshi cashila akapuluka. Intangishi Paulu yalilembele ati: “Kamukonsha ukupuluka kwenu mwe bene ne kutiina ne kututuma.” (AbaFilipoi 2:12) Ukubatishiwa citati lukoso. Pano mungakosha shani bucibusa bwenu na baYawe? Icapitala cakupelako muli lilino ibuuku cikaasuka ico icakwipusha.