Tolokeleni

Tolokeleni muye pa fyebo fya bubili

Tolokeleni muye pa filukusangwamo

Bamboni sha BaYawe

IciLamba

Kani Findo Baibolo Itusambisha?

 ICAPITALA 8

Kani Ubufumu bwa BaLesa Cindo?

Kani Ubufumu bwa BaLesa Cindo?

1. Kani nilisa itembelo ilishibikilwe makosa ili twakwambaalapo?

ABANTU abakuti ubwingi balilishi itembelo ilishibikilwe makosa ili beta ati Mwe baWishifwe, neli itembelo lya baShikulu. BaYesu balipyungiishe ili itembelo pa kusambisha abasambile babo ifyakutembela. Findo batembelelepo muli lili itembelo? Kabili nindo ili itembelo licindamine kuli fwebo ino myaka?

2. Nifisa fintu fitatu baYesu batusambishe ukutembelelapo?

2 BaYesu balilabiile ati: “Sombi mulukutembela ifi ati: ‘Mwe baWishifwe abakwiulu, ishina lyenu licindikwe [neli, libe iliswetele]. Ubufumu bwenu bwise. Ukufwaya kwenu kucitwe, panshi pano koti ni kwiulu.’” (Pendeni Matayo 6:9-13.) Nindo baYesu batusambishishe ukutembelela ifi fitatu?—Boneni Ifyebo na Fimbi 20.

3. Findo twelelwe ukwishiba pa Bufumu bwa baLesa?

3 Twalisambilile ati ishina lya baLesa ni baYawe. Kabili twalisambilile na fyefyo ubufwayo bwa baLesa buli ku bantunshi ne calo. Pano baYesu balyalwile’ndo ili balabile ati: “Ubufumu bwenu bwise”? Muli cino icapitala twakusambilila pa Bufumu bwa baLesa, ifi bukacita, na fyefyo bukalenga ishina lya baLesa ukusweta.

KANI UBUFUMU BWA BALESA CINDO?

4. Kani Ubufumu bwa baLesa cindo, kabili Imfumu ya buko ninani?

4 BaYawe balibikileko ubuteko ubwa kwiulu kabili balisalulwile baYesu ukuba Imfumu. Baibolo ileta ubu ubuteko ati Ubufumu bwa baLesa. BaYesu ni ‘Mfumu ya babo  abekalika koti ni mfumu, baShikulu ba babo abekalika koti ni bashikulu.’ (1 Timote 6:15) BaYesu balikwete amakosa akucita ifintu ifiweme ukucila abantunshi bonse lukoso abekalika, kabili balikwete amakosa ukucila abantunshi bonse abekalika.

5. Nikwisa Ubufumu bwa baLesa bwikalikila? Bukekalika pali bani?

5 Panuma ya nshiku 40 ukufuma akasuba babuukile, baYesu balibwelelemo kwiulu. Mukupelako, balibasalulwile ukuba Imfumu ya Bufumu kuli baYawe. (Ifyacitilwe 2:33) Ubuteko bwa baLesa bukekalika icalo ca panshi ukufuma kwiulu. (Ukufisulula 11:15) Emulandu Baibolo iitila Ubufumu bwa baLesa ati ‘Ubufumu bwa kwiulu.’—2 Timote 4:18.

6, 7. Nindo tungalabilila ati baYesu bekalikishi abaweme ukucila abekalikishi abantunshi?

6 Baibolo ilalabila ati baYesu balicililepo pa mfumu shonse ni pakuti bo ‘ba mweo uwa kubulo’kufwa.’ (1 Timote 6:16) Abantunshi bonse balafwa, pano baYesu tabakafwapo. Fyonse ifiweme baYesu bakatucitila kuntangiile fikabako umuyayaya.

7 Baibolo ilashimika ati baYesu bakaba ni Mfumu iyakubula umusalululo kabili iya nkumbu. Ilalabila pali bo ati: “Lomba umupashi wa baYawe ukalukwikele pali ye, umupashi wa mano ne kalango, umupashi wa kufunda ne makosa, umupashi wa kwishiba ne wa kubatonda baYawe. Akalukutemenwa mu kubatonda baYawe. Kabili taakasololola koti kubona kwa menso akwe, neli kupaata [ukufunda] koti kumfwa kwa matwi akwe. Sombi ku kulungama eko akasololola ne bapengele.” (Esaya 11:2-4) Kani na mwebo mulafwaya imfumu yenu ukuba koti ni fifi babuulishisha?

8. Kani tulishi shani ati baYesu tabakekalikapo benka?

8 BaLesa balisalulwile abantunshi bambi ukwikalika  pamo na baYesu kwiulu. Ku cakubwenako, intangishi Paulu yalibuulile Timote ati: “Kani tulukukoselela, tukalukwikele ne bufumu pamo nabo.” (2 Timote 2:12) Ni banga abakekalika koti ni mfumu na baYesu?

9. Nibanga abakekalika na baYesu? Nilwisa baLesa batatikile ukubasalulula?

9 Koti nifyefyo twasambilile mu Capitala 7, intangishi Yoane balimulangishe icakubona umu abwene baYesu ninshi ni Mfumu kwiulu pamo na ba 144,000. Kani ba 144,000 ni bani? Yoane abuulishisha ati “bali ne shina lyakwe [baYesu] ne shina lya ba Wishi ililembelwe pa mpumi shabo. Abo e babo aba tabalibifishe ne banakashi; pakuti bashike abaswetele, abo e babo abalonda umwana wa mbelele [e kweba ati baYesu] uko konse ukwalukuya. Abo baliulilwe pakati pa bantunshi.” (Pendeni Ukufisulula 14:1, 4.) Ba 144,000 baKlistu ba bucetekelo babo baLesa basalulwile ‘ukwikalika icalo ca panshi’ pamo na baYesu. Ili bafwa, balabuushiwa ukufuma pa bafwile ukuya kwiulu. (Ukufisulula 5:10) Ukutatika lukoso mu mpindi ya ntangishi, baYawe balasalulula abaKlistu ba bucetekelo pakweba ati bakakumanishe impendwa ya ba 144,000.

10. Nindo tungalabilila ati baYawe balicitile bwino pa kusalulula baYesu na ba 144,000 ukwikalika abantunshi?

10 BaYawe balitutemenwe makosa icakweba ati baalyanshikile ati abantunshi bambi bakekalike na baYesu. BaYesu bakaba bekalikishi abaweme ni pakuti balitwishi bwino fwense. Balishi ifi cumfwanika ukuba umuntunshi ne kupenga. Paulu alilabile ati baYesu balatulangulukilako, pakuti bo ‘balomfwana na fwebo mu kunaka kwesu,’ kabili ‘balyeshiwe mu fintu fyonse koti ni fyopele’fyo na fwebo.’ (AbaEbeya 4:15; 5:8) Ba 144,000 nabo balishi ifi cumfwanika ukuba  umuntunshi. Kabili balipitile mukukatashiwa pakuti pa kubula ukuwaminina ne malwashi. Namuli fyefyo tungacetekela ati baYesu na ba 144,000 bakomfwisha makosa ifi tumfwa eli ne makatasho tulukupitamo.

FINDO UBUFUMU BWA BALESA BUKACITA?

11. Nindo baYesu basambishishe abasambile babo ukutembelela ukufwaya kwa baLesa ati kucitwe kwiulu?

11 BaYesu balisambishe abasambile babo ukutembela ati ukufwaya kwa baLesa kucitwe kwiulu. Nindo ba babuulile’fyo? Twalisambilile mu Capitala 3 ati Satana Umusenseshi alifutukiile baYawe. Panuma ili Satana afutukile, baYawe baalimusuminishe ye ne nkalamba shimbi ishi tashalipo sha bucetekelo neli ifibanda, ukwikala kwiulu pa mpindi lukoso. Popele talipo ni bonse kwiulu abaalukucita ukufwaya kwa baLesa. Mu Capitala 10, tukasambilila ifingi pali Satana ne fibanda.

12. Kani nifisa fintu fibili ificindeme ifilabilwepo pa Ukufisulula 12:10?

12 Baibolo ilabuulishisha ati panuma ili baYesu babeele Imfumu ya Bufumu bwa baLesa, baalile mukulwa na Satana. (Pendeni Ukufisulula 12:7-10.) Apakupenda pa 10 palabuulishisha ifintu fibili ificindeme ifyacitikile. Ubufumu bwa baLesa bwatatika ukwikalikwa na baYesu, na Satana bamupoosa pa calo ukufuma kwiulu. Koti nifyefyo tukasambilila, ifi twalabila filicitikile kale.

13. Findo fyacitikile kwiulu ili Satana bamupoosele pa calo?

13 Baibolo ilalabila pa kusangalala kwa nkalamba sha bucetekelo panuma ili Satana ne fibanda ba bafumisheko kwiulu. Tulapenda ati: “Sangalaleni mwe maulu, na mwe mwikalamo!” (Ukufisulula 12:12) Pano ino mpindi kuli  umutende ne kwikatana kwiulu ni pakuti bonse abaliko balacita ukufwaya kwa baLesa.

Pali ukupenga pa calo ukufuma ili Satana ne fibanda fyakwe babaposele pa calo ukufuma kwiulu. Uku ukupenga kukashila bukumo

14. Ifi Satana aposelwe ukufuma kwiulu, findo filukucitika pa calo?

14 Pano ubwikashi pa calo bulipuseneko. Ifintu ifyakukatasha filacitika ku bantu “pakuti umusenseshi aliselukile kuli mwebo, ali ne bukali ubukulu, pakuti aliishi ati ndi ne mpindi ice lukoso.” (Ukufisulula 12:12) Satana ali ne bukali makosa. Balimuposele pa calo ukufuma kwiulu kabili aliishi ati akonalwa bukumo lukoso. Alapyunga apapelele amakosa akwe pakweba ati angaleta amakatasho, ukusomenwa, ne kupenga pa calo conse.

15. Kani ukufwaya kwa baLesa pa calo nikwisa?

15 Pano ukufwaya kwa baLesa pa calo takwalukilepo. Bacili balafwaya abantunshi ukwikala umuyayaya mu paladaiso pa calo. (Amasamo 37:29) Popele, kani Ubufumu bwa baLesa bukalenga shani ici ukucitwa?

16, 17. Kani Danyeli 2:44 ilatubuule’ndo pa Bufumu bwa baLesa?

16 Ukushimika ukulembelwe pali Danyeli 2:44 kulalabila ati: “Popele pa nshiku sha mfumu isho, baLesa ba kwiulu bakemika ubufumu, ubu tabukonalwa ne nshiku pee, koku; kabili ubupyani bwa buko tabukashilwa abantu bambi; sombi bukapalaishisha ne konaala ubu-bufumu bonse, nabo ubwine ne kwimakana inshiku shonse isha kulukuyayaya.” Kani uku ukushimika kulatusambishe’ndo pa Bufumu bwa baLesa?

17 Icakutanga, kulatubuula ati Ubufumu bwa baLesa bukatatika ukwikalika “pa nshiku sha mfumu isho.” Ici cilukwalula ati ukwikalika kwa bantunshi kukalukulipo ili ukwikalika kwa baLesa ku katatika ukwikalika. Ica bubili, ukushimika kulatubuula ati Ubufumu bwa baLesa bukekalika umuyayaya kabili tapapo ukwikalika ukukapyana pali bo. Ica butatu, kukaba inkondo pakati ka  Bufumu bwa baLesa ne bwa bantunshi pa calo. Ubufumu bwa baLesa bukacimfya kabili e bukashala bulukwikalika pa calo ponse. Iyo mpindi, abantunshi bakakwata ubuteko ubwakuti ubune ubu bapengela.

18. Kani inkondo ya kupelako iikabako pa Bufumu bwa baLesa ne kwikalika kwa bantunshi iletwa ati shani?

18 Kani Ubufumu bwa baLesa bukatatika shani ukwikalika icalo conse? Ili inkondo ya kupelako iitwa ati Amagedono, taingatatika, ifibanda fikatumpaika ‘imfumu isha mu calo conse ica panshi icilimo abantu, mu kushibunganishisha ku nkondo iya kasuba ako akakulu aka baLesa aba Makosa onse.’ Inya, ukwikalika kwa bantunshi kukalwa ne Bufumu bwa baLesa.—Ukufisulula 16:14, 16; boneni Ifyebo na Fimbi 10.

19, 20. Nindo tupengela Ubufumu bwa baLesa ukwikalika abantu?

19 Nindo tupengela Ubufumu bwa baLesa? Kuli milandu itatu. Uwa kutanga, tatuwamininepo, popele tulalwala ne kufwa. Pano Baibolo ilalabila ati mu Bufumu bwa baLesa, tukekalilila umuyayaya. Muli bucine, pali Yoane 3:16 palalabila ati: “Pakuti baLesa balitemenwe aba pa calo ca panshi ukwakuti, fyopele filya baaliposele Umwana wabo uli enka, ati abantu bonse, uulukupema-mo muli ye taakonalwa, yo; sombi ati akalukuli ne Mweo uwa muyayaya.”

20 Umulandu wa bubili tupengela Ubufumu bwa baLesa ni pakuti mu calo muli bumbifi. Abengi balabepa ubufi kabili bali ne mibelo iibipile. Tatukwetepo amakosa akufumyapo bumbifi, sombi baLesa bakabufumyapo. Abantu abapitilisha ukucita bumbifi bakonaalwa pa Amagedono. (Pendeni Amasamo 37:10.) Umulandu wa butatu tupengela Ubufumu bwa baLesa ni pakuti ukwikalika kwa bantunshi kulifililwe, takukwetepo inkumbu, kabili kwa mashinka kanwa. Takukoseleshapo abantu  ukumfwila baLesa. Baibolo ilalabila ati ‘umuntu ali ne bukulu pa mubyakwe ku kulukumupensha.’—Uwakutulisya 8:9.

21. Kani Ubufumu bukalengesha shani ukufwaya kwa baLesa ukucitwa pa calo?

21 Panuma ya Amagedono, Ubufumu bwa baLesa bukalengesha ukufwaya kwa baLesa ukucitwa pa calo. Ku cakubwenako, bukafumyapo Satana ne fibanda. (Ukufisulula 20:1-3) Mu kupelako, tapapo uukalwala neli ukufwa. Pakuti pa mulubulo, bonse abantunshi babucetekelo bakekala umuyayaya mu Paladaiso. (Ukufisulula 22:1-3) Ubufumu bukalenga ishina lya baLesa ukulemiwa. Kani ici cilukwalule’ndo? Cilukwalula ati, ili ukwikalika kwa baLesa kukekalika icalo, abantu bonse bakacindika ishina lya baYawe.—Boneni Ifyebo na Fimbi 21.

NILWISA BAYESU BABEELE IMFUMU?

22. Kani tulishi shani ati baYesu tababeelepo ni Mfumu ili baali pa calo neli ili babuukile lukoso?

22 BaYesu balisambishe abasambile babo ukutembela ati: “Ubufumu bwenu bwise.” Ici calishinine ati Ubufumu bwa baLesa bwali ne kwisa kuntangiile. Pa kutanga lukoso baYawe baali ne kubikako Ubufumu ne kusalulula baYesu ukuba Imfumu. Kani baYesu balibabikile pa Bufumu  ili babwelelemo lukoso kwiulu? Koku, baali ne kupembelela. Panuma ili baYesu babushiwe, Petilo na Paulu balibuulishishe ici ili balabiile pa kushimika ukulembelwe pa Amasamo 110:1 ukulosha kuli baYesu. Muli kuku ukushimika baYawe balilabiile ati: “Ulukwikala kulwine lwanji, Ili nshingatwalula utupondo tobe cipuna ica kusamina-po amakasa obe.” (Ifyacitilwe 2:32-35; abaEbeya 10:12, 13) Butali bwa kuba shani baYesu baali ne kupembelela pakweba ati baYawe babekalike pa Bufumu?

Ubufumu bwa baLesa bukalengesha ukufwaya kwa baLesa ukucitwa pa calo

23. (a) Nilwisa baYesu batatikile ukwikalika mu bufumu bwa baLesa? (b) Findo tukasambilila mu capitala cakonkapo?

23 Imyaka iingi ili 1914 taingafika, ibumba lya baKlistu ba bucine balishibile ati uyu umwaka wali ne kuba mwaka uucindeme ukulosha ku kushimika kwa mu Baibolo. Ifilukucitika mu calo ukutatika mu 1914 filabuulishisha lukoso ati ifi baishi fyali fyacine. Muli wenka ulya umwaka baYesu balibele Imfumu kabili balitatikile ukwikalika. (Amasamo 110:2) Panuma ya kube’mfumu, Satana balimupoosele pa calo, kabili “aliishi ati ndi ne mpindi ice lukoso.” (Ukufisulula 12:12) Mu capitala cakonkapo, emo tukabona mucinenene ati tulukwikala muli yeyo mpindi. Kabili tukasambilila ati bukumo lukoso Ubufumu bwa baLesa bukalengesha ukufwaya kwa baLesa ukucitwa pa calo.—Boneni Ifyebo na Fimbi 22.