Tolokeleni

Tolokeleni muye pa filukusangwamo

 ICAPITALA 15

Ukupempela BaLesa mu Nshila Iyelelwe

Ukupempela BaLesa mu Nshila Iyelelwe

1. Nibani bangatubuula inshila iyelelwe iya kupempelelamo baLesa?

ABA MAPEMPELO abengi balalabila ati balasambisha bucine pali baLesa. Pano ifyo talipo efi bacita, ni pakuti tabasambishapo bucine pali baLesa ne nshila twelelwe ukubapempelelamo. Tungeshiba shani inshila iyelelwe iya kupempelelamo baLesa? Ni baYawe lukoso e bangatubuula inshila bafwaya ukubapempelelamo.

2. Mungeshiba shani inshila iyelelwe iya kupempelelamo baYawe?

2 BaYawe balitupeele Baibolo pa kweba ati tusambilile inshila iyelelwe iya kubapempelelamo. Popele, mulukusambilila Baibolo kabili baYawe bakamofweniko ukubwenamo muli fyefyo basambisha ni pakuti balimubikileniko akalango.—Yisaya 48:17.

3. Findo baLesa bafwaya fwebo ukucita?

3 Abantu bambi balalabila ati baLesa balapokelela ukupempela konse, pano ifyo talipo efi baYesu basambishe. Kabalabila ati: “Abakulabila kuli nebo ati: ‘BaShikulu! BaShikulu!’ tabali bonse abakenjila mu Bufumu bwa Kwiulu, sombi benka abo abacita koti kufwaya kwa baTata abakwiulu.” Penka tulyelelwe ukusambilila ukufwaya kwa baLesa ne kukucita. Ukucite’fyo kucindeme ni pakuti baYesu baalipalenye abakaana ukumfwila baLesa ku tupondo, ‘abakucite’fisendeme.’—Matayo 7:21-23.

4. Findo baYesu baalabiilepo pa lwa kucita ukufwaya kwa baLesa?

4 BaYesu baalibuulishishe ati kani tulukufwaya ukucita ukufwaya kwa baLesa, tukapita mu fyakwesha. Baalilabiile ati: “Ingileni pa mulyango uuce: pakuti umulyango uukulu  ne nshila iikulu iile mukupela ku konalwa; mopele umo emuya ne bantu abengi. Pakuti umulyango uuce ne nshila iice iile mukupela ku mweo, sombi uyo ulabona abace.” (Matayo 7:13, 14) Inshila iice, neli inshila ya kupempelelamo baLesa iyelelwe ilatwala ku mweo wa muyayaya. Inshila iikulu, neli ukupempela baLesa mu nshila iitayelelwepo, kulatwala ku mfwa. Pano baYawe tabafwayapo umuntu uuli onse ukufwa. Balipeele abantu bonse ishuko lya kusambilila pali bo.—2 Petilo 3:9.

UKUPEMPELA BALESA MU NSHILA IYELELWE

5. Mungeshiba shani abapempela baLesa mu nshila iyelelwe?

5 BaYesu baalilabiile ati tungabeshiba abapempela baLesa mu nshila iyelelwe. Tungacite’fyo ukupitila mu kwishiba ifi basumiinemo na fyefyo bacita. Kabalabila ati: “Mukabeshibila ku fisepo fyabo.” Kabalundapo ne kweba ati: “Imiti yonse iiweme ilekata ifisepo ifiweme.” (Matayo 7:16, 17) Ici tacalulapo ati abapempela baLesa mu nshila iyelelwe bawaminine. Pano, lyonse balesha ukulukucita ifilungeme. Lomba nga tusambilile ifingatofwako ukwishiba abapempela baLesa mu nshila iyelelwe.

6, 7. Nindo ukupempela kwa cine kusambishisha ifili mu Baibolo? Kani findo tungasambililako kuli fyefyo baYesu baalukwambula amalembo?

6 Tulyelelwe ukusambisha ifili mu Baibolo. Baibolo ilalabila ati: “Amalembo onse alunjikilwe afumine kuli baLesa alielelwe ukusambisha, ne kucenjesha, ne kulunjika, ne kufunda ukulungeme: ati umuntu wa baLesa akalukuli uwaminine, uukonshiwe lukoso ukulukucite’milimo yonse iiweme.” (2 Timote 3:16, 17) Intangishi Paulu yalilembele ati: “Ili mwapokele kuli fwebo ishiwi lya kumfwa ilya baLesa, mwalilipokelele koti lishiwi lya bantunshi teko, sombi koti nififi ifi lili icine, lishiwi lya baLesa.” (1 AbaTesalonike 2:13) Ukupempela kwa cine  kulasambisha lukoso ifi Baibolo isambisha. Takusambishapo ukulanguluka kwa bantunshi, ifyakutantaka, neli fimbi lukoso.

7 Fyonse lukoso ifi baYesu baalukusambisha fyalukufuma mu mashiwi abaLesa. (Pendeni Yoane 17:17.) Impindi ishingi baalukwambula amalembo. (Matayo 4:4, 7, 10) Abapyungishi ba baLesa abacine balalonda icakubwenako ca baYesu, kabili fyonse ifi basambisha filafuma mu Baibolo.

8. Findo baYesu basambishe pa lwa kupempela baYawe?

8 Tulyelelwe ukupempela lukoso baYawe. Pa Amasamo 83:18 palalabila ati: “Mwe muli ne shina lya baYawe, Nimwe Bacilile lukoso na pa calo conse.” BaYesu baalukufwaya abantu ukwishiba baLesa bacine, kabili baalibasambishe ishina lya baLesa. (Pendeni Yoane 17:6.) BaYesu baalilabiile ati: “Ulukucindika ba Shikulu Lesa wobe, kabili ulukubapyungila bo benka!” (Matayo 4:10) Popele fwe bapyungishi ba baLesa tulalonda icakubwenako ca baYesu. Tulapempela lukoso baYawe, tulapyungisha ishina lyabo, kabili tulasambisha bambi ishina lya baLesa eli na fyefyo bakacitila abantunshi.

9, 10. Tulalangisha shani ubutemwe kuli bambi?

9 Tulyelelwe ukutemwanshanya. BaYesu baalifundile abasambile babo ukutemwanshanya. (Pendeni Yoane 13:35.) Pa kulangisha ubutemwe tatwelelwepo ukulanguluka uku umuntu afumine, ifi akulile neli kani mubile neli mupengele. Ubutemwe bulyelelwe ukutwikatanya koti bana bankashi. (AbaKolosai 3:14) Popele tatwelelwepo ukuya ku nkondo ne kwipaya abantu. Baibolo ilalabila ati: “Abana ba baLesa ne bana ba musenseshi balibwenekele muli fifi: ati abantu bonse utaacite’filungeme taali wa kuli baLesa, neli ni woyo utaatemwo’mukwabo.” Nakabili ililabiile ati: ‘Tulyelelwe ukutemwanshanya:  ati tekucita koti ni fyefyo ifi acitile Kaini, uwali wa kuli yeyo-mbifi, ne kwipayo’mukwabo.’—1 Yoane 3:10-12; 4:20, 21.

10 Tulapyungisha impindi yesu, amakosa ne maboni, pa kofwako ne kukoselesha bambi. (AbaEbeya 10:24, 25) ‘Tulacite’fiweme ku bantu bonse.’—AbaGalatya 6:10.

11. Nindo twelelwe ukusuminina muli baYesu ati enshila ya kupulukilamo?

11 Tulyelelwe ukumfwila baYesu ni pakuti bo e nshila ya kupulukilamo. Baibolo ilalabila ati: “Mu bantu bambi bonse neli umo tamuli-po ukupuluka; pakuti kabili panshi pano tapali-po ishina limbi iliilikilwe ku bantu ilyelelwe fwebo ukupulukila-mo.” (Ifyacitilwe 4:12) Mu Capitala 5 ica lilino ibuuku, twalisambilile ati baYawe balitumine baYesu mu kufwila abantu abacumfwila. (Matayo 20:28) BaYawe balisalulwile baYesu ukuba imfumu iikekalika icalo conse. E mulandu Baibolo itubuulila ati tulyelelwe ukumfwila baYesu kani tulafwaya ati tukabe ne mweo wa muyayaya.—Pendeni Yoane 3:36.

12. Nindo tatulibikilamo mu fya mapolitiki?

12 Tatwelelwepo ukulibiikamo mu fya mapolitiki. BaYesu tabaalukulibikamo mu mapolitiki. Ili baalukweshiwa baalimubuulile Pilati imfumu ya baLoma ati: “Ubufumu bwanji tabuli bwa mu calo cino ica panshi, koku.” (Pendeni Yoane 18:36.) Tulatuntulula baYesu, pa kupitilisha ukuba aba bucine ku Bufumu bwa baLesa ubwa kwiulu, e mulandu tatulibikilamo mu fya mapolitiki nangaba neko tuli. Nangabe’fyo, Baibolo ilatubuula ukumfwila abekalikishi. (AbaLoma 13:1) Tulomfwila amafunde amu calo twikala. Pano kani amafunde abekalikishi alukutubuula ukucita ifi baLesa bakenye, tulatuntulula ifyalabiile intangishi ati: ‘Tulyelelwe ukumfwila baLesa ukucila ukumfwila abantu.’—Ifyacitilwe 5:29; Mako 12:17.

13. Findo tutulisha pa Bufumu bwa baLesa?

 13 Tulicetekele ati Ubufumu bwa baLesa e bukashilisha lukoso amakatasho onse aali mu calo. BaYesu baalilabiile ati “Icebo ici iciweme ica Bufumu,” cikatulishiwa mu calo conse. (Pendeni Matayo 24:14.) Takulipo ubwikalikishi bwa bantunshi ubungacita ifi Ubufumu bwa baLesa bukatucitila. (Amasamo 146:3) BaYesu baalitusambiishe ukutembelela Ubufumu bwa baLesa ili baalabiile ati: “Ubufumu bwenu bwise. Ukufwaya kwenu kucitwe, panshi pano koti ni kwiulu.” (Matayo 6:10) Baibolo ilatubuula ati Ubufumu bwa baLesa bukonaala ubwikalikishi bwa bantunshi ‘nabo ubwine ne kwimakana inshiku shonse ishakulukuyayaya.’—Danyeli 2:44.

14. Mulukulanguka ati ni bani abapempela baLesa mu nshila iyelelwe?

14 Panuma ya kusambilila fyonse ifi, lipusheni ati: ‘Nibani abasambisha ifili mu Baibolo? Nibani abatulisha ishina lya baLesa kuli bambi? Nibani abalangisha ukutemwanshanya kabili abacetekele ati baLesa baalitumine baYesu mu kutupulusha? Nibani aba tabalibikamo mu fya mapolitiki? Nibani abatulisha ati Ubufumu bwa baLesa lukoso e bukashiliisha amakatasho tupitamo?’ Ukwakubula ne kukanika ni Bamboni sha baYawe.—Yisaya 43:10-12.

FINDO MWEBO MUKACITAPO?

15. Findo twelelwe ukucita pakweba ati baLesa bapokelele ukupempela kwesu?

15 Ukucetekela ati baLesa eko bali talipo e cipengelwa lukoso. Ifibanda nafyo filicetekele ati baLesa eko bali, pano tafibomfwilapo. (Jakobo 2:19) Kani tulukufwaya baLesa ukupokelela ukupempela kwesu, tatwelelwepo ukucetekela lukoso ati baLesa eko bali sombi tulyelelwe ne kucita ifi batubuula.

16. Nindo twelelwe ukukaanina ukupempela kwa bufi?

 16 Pakweba ati baLesa basumine ukupempela kwesu tulyelelwe ukukaana ukupempela kwa bufi. Uwakushimika Yisaya alilembele ati: “Mufume-mo mukati muli wo; mulisweshe.” (Yisaya 52:11; 2 AbaKolinto 6:17) E mulandu twelelwe ukukaanina fyonse ifikumine ukupempela kwa bufi.

17, 18. Kani “Babiloni Umukulu” cindo, kabili nindo cicindamine ukufumamo bwangu muli ye?

17 Kani ukupempela kwa bufi cindo? Kupempela ukuli konse ukusambisha abantu ukupempela baLesa mu nshila iipusene na fyefyo Baibolo isambisha. Baibolo ileta ukupempela konse ukwa bufi ati “Babiloni Umukulu.” (Ukufisulula 17:5) Nindo kwitilwe’fyo? Panuma ya Bulobe bwa menda ubwa mu mpindi yakwe Noa, ifisambisho ifingi ifya mu kupempela kwa bufi fyalitatikile mu mushi uwalukwitwa ati Babiloni. Ifyo ifisambisho fya bufi, fyalisalangene mu calo conse. Ku cakubwenako, abantu abalukwikala mu mushi wa Babiloni baalukupempela bulesa butatu. Na pali ino mpindi, amapempelo aengi alasambisha ati muli baLesa bamo muli batatu, pano Baibolo ilasambisha apatubile ati kuli lukoso baLesa bacine bamo, baYawe kabili ati baYesu, bana baLesa. (Yoane 17:3) Abaalukwikala mu mushi wa Babiloni baalisumiine ne kwaba ati kani umuntu afwa kulaba cimo ici tacifwapo kabili ati cingapenshiwa mu mulilo. Ifyo talipo fya cine.—Boneni Ifyebo na Fimbi 14, 17, na 18.

18 BaLesa balishimikile ati bukumo lukoso ukupempela kwa bufi konse ku konaalwa. (Ukufisulula 18:8) Kani mwaumfwisha umulandu cicindamine ukufumamo bwangu mu kupempela kwa bufi? BaYawe Lesa balukufwaya ati mufumemo bwangu ili impindi taingashila.—Ukufisulula 18:4.

Kani mwasalululapo ukupyungila baYawe pamo ne bantu babo, mukaba mu cisoolo ca mu calo conse

19. Kani mwasalululapo ukupyungila baYawe, bakamofweniko shani?

 19 Ili mwasalululapo ukufuma mu kupempela kwa bufi ne kutatika ukupyungila baYawe, ababyenu ne ba mu cisoolo cenu bambi cipale tekuti bomfwishepo umulandu mwasalulwilapo ukucite’fyo, kabili bangatatika ukumukatesheni. Pano baYawe bakalukuli na mwebo. Mukaba mu cisoolo ca mu calo conse umuli amamilyoni abantu abatemwanshenye mucinenene kabili mukakwata ishuko lya kwikala umuyayaya mu calo ca bukumo ica baLesa. (Mako 10:28-30) Na mukupelako, cipale ifibusa fyenu ne ba mu cisoolo bambi abaalukumukanyeni ukupyungila baYawe, bangatatika ukusambilila Baibolo.

20. Nindo cicindamine ukupempela baLesa mu nshila iyelelwe?

20 Bukumo lukoso, baLesa bakafumyapo bumbifi bonse kabili Ubufumu bwabo bukekalika icalo conse. (2 Petilo 3:9, 13) Mama ifi iyo mpindi ikawama! Bonse bakalupempela baYawe mu nshila baYawe bafwaya. Popele, cicindeme kuli mwebo ukusalululapo lwenka luno ukulukupempela baLesa mu nshila iyelelwe.