Ukufuma lukoso ku bwanice, Samweli alukwikala ne kupyungila pe sema, apo abantu balukuya mu kupempela baYehova. Kani waishiba icalengele ati Samweli atatike ukwikala pe sema? Tange, nga tusambilile pali banyina Samweli, ba Ana.

Pa myaka iingi, Ana taakwetepo umwana nangaba ati alukumufwaisha. Na muli fyefyo, kaatembela kuli baYehova ne kubalomba ati bamofweko. Kaalaya ukweba ati kani akakwate umwana, akamupeela ukulukwikala ne kupyungila pe sema. BaYehova kabaasuka itembelo lyakwe, kabili alikwete umwana umwalalume. Kaamwinika ati Samweli. Kabili koti ni fyefyo Ana alaile, ili Samweli aali ne myaka itatu neli ine, kaamutwala pe sema mu kupyungila baLesa.

Eli ali e mupapatilishi umukulu pe sema. Abana bakwe abalalume babili nabo epo balukupyungila. Anuka ukweba ati isema lyali ni ŋanda ya kupempelamo baLesa, kabili abantu balyelelwe ukulukucita ifintu ifiweme. Pano abana bakwe Eli balukucita ifibipile ukwakuti. Samweli alukubona ifi balukucita. Kani Samweli alukucita ifibipile koti bana bakwe Eli?— Koku, ye alukucita lukoso ifilungeme, koti ni fyefyo abafyashi bakwe bamusambishe.

Kani ulukulanguluka ati findo Eli aelelwe ukucita ku bana bakwe?— Alyelelwe ukubapanika kabili nga taabasuminishepo ukulukupyungila pa ŋanda ya baLesa. Pano Eli taacitilepo ifyo, kabili baYehova balimufiitilwe ye ne bana bakwe babili. BaYehova kabasalapo ukubapanika.

Samweli alyebele Eli ifi baYawe balabiile

Bumbi bushiku ili Samweli ali mu tulo, alyumfwile uwalukumwita ati: ‘Samweli!’ Kaabutukila kuli Eli, pano Eli kaalabila ati: ‘Nshacikwitapo nebo.’ Ifi kaficitika nakabili imikwi ibili. Pa mukwi wa butatu, Eli kaeba Samweli ati kani omfwe ishiwi nakabili, alyelelwe ukulabila ati: ‘Labileni, mwe baYehova, ndikutikile.’ Fyenke’fyo efi Samweli acitile. Eli baYehova balabiile kuli Samweli ati: ‘Umwebe Eli ati nkapanika icisoolo cakwe pakuti pa fibipile ifi bacita.’ Kani ulukulanguluka ati cali icipubile kuli Samweli  ukweba Eli ici icebo?— Koku, tacalipo icipubile. Nangaba ati Samweli alitiinine, alicitile ifi baYehova bamwebele. Ifi baYehova balabiile fyalicitikile. Abana bakwe Eli babili balibepeye, na Eli na ye alifwile.

Samweli cakubwenako iciweme kuli fwebo. Alukucita ifilungeme nangaba ati alukubona bambi abantu balukucita ifibipile. Nga webo? Kani ukaba koti ni Samweli ne kulukucita ifilungeme? Kani ukalukucite’fyo, ukalenga baYehova ne bafyashi bobe ukusangalala.