Tolokeleni

Tolokeleni muye pa filukusangwamo

 ICISAMBILILO 8

Josaya Ali ne Babyakwe Abaweme

Josaya Ali ne Babyakwe Abaweme

Kani ulukulanguluka ati cikosele ukucite’filungeme?— Abantu abengi efi balanguluka. Baibolo ilatubuula ati cali icikosele makosa ku musankwa Josaya ukucite’filungeme. Pano alikwete ababyakwe abaweme abamofweleko. Nga tusambililepo na fimbi pali Josaya na pa babyakwe.

Bawishi Josaya baali ni ba Amoni, imfumu ya baJuda. Amoni ali umubipile kabili alukupempela ifibumbwabumbwa. Ili bawishi Josaya bafwile, eli Josaya abele imfumu ya baJuda. Pano aali lukoso ne myaka 8! Kani ulukulanguluka ati ali umubipile koti ni bawishi?— Koku, ye aali umuweme.

Sefaniya kaacenjesha abantu ati belukupempelapo ifibumbwabumbwa

Neli aali umwanice, Josaya alukufwaisha ukubomfwila baYehova. Na muli fyefyo, alisalile lukoso ababyakwe abatemenwe baYehova. Kabili kabamofwako ukulukucita ifilungeme. Kani ni bani bamo bamo abali ababyakwe Josaya?

Umo umubyakwe ali ni Sefaniya. Sefaniya ali wakushimika uwacenjeshe abantu ba mu Juda ati ifibipile fyali ne kubacitikila  kani balukupempela ifibumbwabumbwa. Josaya alikutikile ukucenjesha kwakwe Sefaniya kabili alukupempela baYehova benka lukoso.

Umbi umubyakwe Josaya ali ni Jelemiya. Tabapusenepo sana imyaka kabili balukwikala cabe apepi ne kukulila pamo. Balitemwanshenye ukwakuti ica kweba ati ili Josaya afwile, Jelemiya kaalemba ulwimbo ululibelele ulwalelabila ifi camubipiile pakuti pa mfwa yakwe Josaya. Jelemiya na Josaya balukofwana ukucite’filungeme ne kumfwila baYehova.

Josaya na Jelemiya balukofwana ukucite’filungeme

Findo ungasambililako ku cakwebanako cakwe Josaya?— Neli Josaya ali umwanice lukoso, alukufwaya ukucite’filungeme. Alishibile ukweba ati alyelelwe ukuba ne babyakwe abatemenwe baYehova. Na webo ulyelelwe ukupanga ababyobe abatemenwe baYehova kabili abangakofwako ukucite’filungeme!