Kani kulipo uwakwebeleko icamfiso?— * Baibolo ilalabila pa ‘camfiso’ icilibelele icifumine kuli baLesa. Ciletwa ati icamfiso ni pakuti abantu tabaciishipo akale. Inkalamba nasho shalukufwaya ukwishibilapo ifingi pali cici icamfiso. Kani ungafwaya ukuciishiba ici icamfiso?—

Findo ulukulanguluka ati efi inkalamba shalukufwaya ukwishiba?

Akale, baLesa baalilengele umwalalume wa kutanga ne mwanakashi. Baalukwitwa ati Adamu na Efa. BaLesa balibapeele umushi uuweme uwalukwitwa ati ibala lya Edeni. Adamu na Efa nga baumfwilile baLesa, bo ne bana babo nga balilengele icalo conse ukuba paladaiso koti libala lya Edeni. Kabili nga balukwikala mu Paladaiso umuyayaya. Pano ungaanuka ifi Adamu na Efa bacitile?—

Adamu na Efa tabaumfwililepo baLesa, kabili uyo e mulandu tatwikalilapo mu paladaiso. Pano baLesa baalilabiile ati bakalenga icalo conse ukuba iciweme, kabili bonse lukoso bakaba abasangalele ne kwikalamo umuyayaya. Kani bakacita shani ifyo? Pa mpindi iikulu, abantu tabaishipo. Cali camfiso.

Ili baYesu baishile pa calo, baalisambishe abantu ifingi pali cici icamfiso. Balilabiile ati icamfiso cali Bufumu bwa baLesa. BaYesu balyebele abantu ukutembela ati ubu Ubufumu bwise. Bukalenga icalo ukuba ni paladaiso iiweme.

Kani wasangalala ukwishiba ici icamfiso?— Ulukwanuka ati abomfwila baYehova e bakekala mu Paladaiso. Baibolo ilatweba amalyashi aengi pa balalume ne banakashi abalukumfwila baYehova. Kani ungafwaya ukusambilila pali bo?— Nga tusambilile pali bamo bamo aba abantu na fyefyo tungaba koti ni bo.

^ par. 3 Mu lyashi lyonse, mwakulukubona aka akashilwa (—) panuma ya fyakwipusha fimo fimo. Ni mpindi iiweme iya kubako celele panini ne kweba umwana wenu ati aasuke.