Tolokeleni

Tolokeleni muye pa fyebo fya bubili

Tolokeleni muye pa filukusangwamo

Bamboni sha BaYawe

IciLamba

Sambisheni Abana Benu

 ICISAMBILILO 10

BaYesu Lyonse Balukumfwila

BaYesu Lyonse Balukumfwila

Kani cipubile lyonse ukumfwila abafyashi bobe?— Shimbi impindi cikosele. Kani uliishi ati baYesu balukumfwila baYehova ne bafyashi babo?— Icakubwenako cabo cingakofwako ukumfwila abafyashi bobe ili ifintu fyakatasha. Nga tusambilile na fimbi pali lili ilyashi.

Ili baYesu tabangesa pa calo, bali na baWishibo, baYehova, kwiulu. Pano baYesu bali ne bafyashi na bambi pano pa calo. Bali ni ba Josefi na ba Maliya. Kani uliishi ifi cali pakweba ati babe abafyashi babo?—

BaYehova balikuushishe umweo wa baYesu ukufuma kwiulu ne kuuleta munda muli ba Maliya pakweba ati baYesu bafyalwe ne kwikala pa calo. Ici cali cakukankamika! BaYesu kabakula munda muli ba Maliya koti ni fyefyo abana bambi bakula munda muli banyinabo. Ili papitile cipale imyenshi 9, baYesu kabafyalwa. Ifi efi cali pakweba ati ba Josefi na ba Maliya babe abafyashi ba baYesu pano pa calo.

Ili baYesu bali ne myaka 12, balicitile ifyalangishe ati balibatemenwe ukwakuti baWishibo, baYehova. Ici calicitikile ili baYesu ne cisoolo cabo baile ku Jelusalemi ku Muciluko. Ili balukubwelela ku ŋanda, ba Josefi na ba Maliya tabababwenepo baYesu. Kani ungeshiba uku baali baYesu?—

Nindo baYesu babelele pe tempuli?

Ba Josefi na ba Maliya kababwelelamo ulubilo ku Jelusalemi mu kufwaya-fwaya baYesu. Balibombomene makosa pakuti tabababwenepo. Ili papitile inshiku shitatu, kababasanga mwi tempuli! Kani ungeshiba umulandu baYesu babelele pe tempuli?— Pakuti epo bali ne kusambilila pali baWishibo, baYehova. BaYesu balitemenwe baYehova kabili balukufwaya ukusambilila ifya kubasangalasha. Na lyelyo bakulile, baYesu lyonse lukoso balukumfwila baYehova. BaYesu balukumfwila nangaba ati cali icikateshe ne kubalenga bo ukupenga. Kani baYesu balukubomfwila ba Josefi na ba Maliya?— Inya, Baibolo efi ilabila.

Findo ungasambililako kuli baYesu?— Nangaba ati ifintu fikatashe shani, ulyelelwe ukumfwila abafyashi bobe. Kani ukalukucite’fyo?—