Tolokeleni

Tolokeleni muye pa fyebo fya bubili

Tolokeleni muye pa filukusangwamo

Bamboni sha BaYawe

IciLamba

Sambisheni Abana Benu

 ICISAMBILILO 11

Balilembele Ifyebo Pali BaYesu

Balilembele Ifyebo Pali BaYesu

Kani wababona abalalume mu cikope?— Ni Matayo, Mako, Luku, Yoane, Petilo, Jakobo, Juda, na Paulu. Bonse aba abalalume eko baali ili baYesu baali pa calo, kabili balilembele ifyebo pali baYesu. Nga tusambililepo pali bo.

Findo wishipo pali baba abalalume?

Abalalume batatu pali bo baali ni ntangishi ishalukutulisha na baYesu. Kani ulibeshi abo?— Ni Matayo, Yoane, na Petilo. Intangishi Matayo na Yoane baalibeshi bwino baYesu, kabili bonse bobilo balilembele ifyebo pali  baYesu. Intangishi Yoane yalilembele ne buuku lya Ukufisulula ne nkalata shitatu ishiitwa ati 1 Yoane, 2 Yoane, na 3 Yoane. Intangishi Petilo yalilembele inkalata shibili ishili mu Baibolo. Shiletwa ati 1 Petilo na 2 Petilo. Mu nkalata yakwe iya bubili, Petilo alilembele pa mpindi baYehova balabiile pali baYesu ukufuma kwiulu, ati: ‘Uyu e Mwana wanji. Ndimutemenwe, kabili emo nsangalalila.’

Bambi abalalume abali mu cikope nabo balatusambisha pali baYesu mu mabuuku balembele. Umo pali bo ni Mako. Cipale epo ali ili baYesu babekete kabili alibwene fyonse lukoso ifyacitikile. Na umbi ni Luku. Ali mulaye wa mu cipatela kabili alibele umuKlistu cipale panuma ya mfwa ya baYesu.

Bambi abalembeleko Baibolo babili abali mu cikope bali banice ba baYesu. Kani ulibeshi amashina?— Ni Jakobo na Juda. Pa kutanga, tabacetekelepo muli baYesu. Balukulanguluka ne kweba ati baYesu balifuntile. Pano ili papitile impindi balicetekele muli baYesu ne kuba abaKlistu.

Uwakupelako uuli mu cikope uwalembeleko Baibolo ni Paulu. Ili tangaba umuKlistu, alukwitwa ati Saulu. Alibapatile abaKlistu kabili taalukubomfwilapo inkumbu. Kani uliishi icalengele ati Paulu abe umuKlistu?— Kambi kasuba, ili Paulu aali pa lwendo, ukwa kubulo’kucetekela alyumfwile ishiwi ukufuma kwiulu. Baali ni baYesu e balukulabila! Balipwishe Paulu ati: ‘Nindo ulukubapensesha abo abacetekele muli nebo?’ Panuma ya fyefyo, Paulu alibeele muKlistu. Paulu alilembele amabuuku 14 aamu Baibolo, ukufuma pa AbaLoma ukufika ku AbaEbeya.

Tali tulapenda Baibolo inshiku shonse?— Kani tulukupenda Baibolo, tulasambilila ifintu ifingi pali baYesu. Kani ungatemwa ukusambililapo na fimbi pali baYesu?—