Tolokeleni

Tolokeleni muye pa fyebo fya bubili

Bamboni sha BaYawe

IciLamba

Kani Mungafwaya Ukwishiba Bucine?

Kani Mungafwaya Ukwishiba Bucine?

Bucine pando? Pa fyakwipusha ificindamishe ifi abantunshi bafwaya ukwishiba ifyakufyasuka. Pambi na mwebo mulilangulukilepo pa fyakwipusha koti ni fifi:

  • Kani baLesa muli bucine balatulama?
  • Kani inkondo ne kupenga fikashila?
  • Cindo cicitika kani umuntu afwa?
  • Kani kuli ubucetekelo bwa kweba’ti abafwile bakabuka?
  • Koti natembela shani pakweba’ti baLesa bankutike?
  • Koti nasangana shani ukusangalala mu bwikashi?

Nikwisa uku mungasangana ifyasuko kuli fifi ifyakwipusha? Kani mwaipusha abantu abapusenepusene bakamupeeleni ifyasuko ifipusenepusene. Neli nga mwaipwishe abamano ne bakulu bambi, ifi bangamwasukeni filalilengulula. Fimbi ifyasuko filapyunga pa mpindi inini lukoso pano pa kupita kwa mpindi filaleka.

Nangabe’fyo, kuli ibuuku limo ililimo ifyasuko ifinenene. Muli lili ibuuku tamusangwapo ubufi. BaYesu Klistu kabalabila kuli baLesa mwi tembelo ati: “Isiwi lyenu ebucine.” (Yoane 17:17) Pano buno bukumo tuliishi ati lyelyo Ishiwi ni Baibolo Uswetelele. Pa mabula akonkapo, mulukusangana ifi Baibolo yasuka ifyasuko ifiswetele, ifya cinenene ku fyakwipusha ifili peulu.

Kani BaLesa Muli Bucine Balatulama?

Umwalalume ashingulukwa ne bumba lya bantu

UMULANDU ABANTU BEPUSHISHE’FI: Tulekala mu calo iciswilemo ukukululusha ne kusendama kwa kubifya. Ukupempela ukwingi kulasambisha ati uku ukupenga tupitamo kufwaya kwa baLesa.

IFI BAIBOLO ISAMBISHA: BaLesa talipo e balenga ifibipile. Pali Jobo 34:10 palalabila ati: “Ŋgakube ukutali nakuli baLesa ati bangacito’kubifya, nakuBamakosa onse ati bangacito’kusendama.” BaLesa balafwaya ukucitila abantunshi ifiweme. E mulandu baYesu batusambishe ukulukutembela ati: “MwebaWisifwe abakwiulu,…Ubufumu bwenu bwise. Ukufwaya kwenu kucitwe, pansi pano koti nikwiulu.” (Matayo 6:9, 10) BaLesa balatulama makosa icakweba ati balipyungile apakulu pakweba’ti bucine bwa kufwaya kwabo kungakonshiwa.—Yoane 3:16.

Pendelenipo Ifyakutaŋga 1:26-28; Jakobo 1:13; na 1 Petilo 5:6, 7.

Kani Inkondo ne Kupenga Fikashila?

Abashilikani

UMULANDU ABANTU BEPUSHISHE’FI: Impendwa ya bantu abalukufwa mu nkondo tekuti ibelengwepo. Fwense lukoso ukupenga kulitukumine.

IFI BAIBOLO ISAMBISHA: BaLesa baalilabile ukweba’ti kukaba impindi ili bakaleta ubutende pa calo. Mu Bufumu bwabo, ubuteko bwa kwiulu, abantu tabakalukusambilila inkondo libili. Pa mupunda wa fyefyo, “impoko syabo bakasikuŋka ati sibe mase.” (Yisaya 2:4) BaLesa bakafumyapo ukusendama kwa kubifya ne kupenga. Baibolo ilalaya ati: “Popele baLesa bakabasumwina iminsosi yonse kumenso abo; tapakalukuli imfwa libili, neli ninsoni, neli kulila, neli kusomenwa konse, tau; pakuti ifintu ifyakutaŋga [ukubikako ukusendama kwa kubifya ne kupenga kwa ino mpindi] filipitilile.”—Ukufisulula 21:3, 4.

Pendelenipo Amasamo 37:10, 11; 46:9; na Mika 4:1-4.

Cindo Cicitika Kani Umuntu Afwa?

Ifilende

UMULANDU ABANTU BEPUSHISHE’FI: Ukupempela ukwingi ukuli mu calo kulasambisha ati kuli icipuluka kani umuntu afwa. Abantu bambi balisumiine ati imipashi ya bafwile ingasomesha abalabi. Bambi nabo balisumiine ati baLesa balakululusha imbifi mu mulilo wa nshiku pee.

IFI BAIBOLO ISAMBISHA: Umuntu kani afwa ninshi cashila, tabako. Tulapenda mu Uwakutulisya 9:5 ati: “Abafwile tabesi neli kantu.” Pakuti abafwile tabeshibapo, tabomfwapo, neli ukucita akali konse, tekuti basomeshepo—neli ukofwako—abalabi.—Amasamo 146:3, 4.

Pendelenipo Ifyakutaŋga 3:19 na Uwakutulisya 9:6, 10.

Kani Kuli Ubucetekelo bwa Kweba’ti Abafwile Bakabuka?

Umwanice alukulila pakuti pa mfwa ya mukwabo

UMULANDU ABANTU BEPUSHISHE’FI: Tulafwaya ukulukuli ne mweo, kabili tulafwaya ukusangalala pamo na baabo tutemenwe. Cifyalilwa cesu icakufwaisha ukubona libili abakwabesu abafwile.

IFI BAIBOLO ISAMBISHA: Abantu abengi abafwile bakabuka. BaYesu balilaile ukweba’ti ‘abali mu filende bakafumamo.’ (Yoane 5:28, 29) Koti kufwaya kwa baLesa ukwa pa kutanga, abo abakabuka mu buntunshi bakaba ne shuko lya kwikala mu paladaiso pa calo. (Luku 23:43) Mu kulaya kwa kuntangiile emuli ne kulaya kwa kukwato’mweo wa muyayaya kabili uuswetelele kuli baabo abomfwila baLesa. Baibolo ilalabila ati: “Abaluŋgeme bakapyane’calo, bakalukwikala-mo insiku syonse lukoso.”—Amasamo 37:29.

Pendelenipo Jobo 14:14, 15; Luku 7:11-17; na Ifyacitilwe 24:15.

Koti Natembela Shani Pakweba’ti BaLesa Bankutike?

Umwalalume alukutembela

UMULANDU ABANTU BEPUSHISHE’FI: Abantu mu mapempelo onse balatembela. Pano abengi balabona koti amatembelo abo taasukwapo.

IFI BAIBOLO ISAMBISHA: BaYesu balitusambishe ati twilukubweleshapo amashiwi antu amo mu matembelo esu. Kabalabila’ti: “Pakutembela, tekulukusimbula lukoso icisimbulesimbule.” (Matayo 6:7) Kani tulukufwaya baLesa ukukutika amatembelo esu, tulyelelwe ukulukutembela mu nshila iibasuminishe. Pakweba’ti tucite’fyo, tulyelelwe ukusambilila ukufwaya kwabo eli tungatembela koti kufwaya kwabo. 1 Yoane 5:14 alalabila’ti: “Kani tulombe icintu koti kufwaya kwabo [baLesa], balatumfwa.”

Pendelenipo Amasamo 65:2; Yoane 14:6, 14; na 1 Yoane 3:22.

Koti Nasangana Shani Ukusangalala mu Bwikashi?

Umwanakashi alukufwaya-fwaya ukusangalala pa kupenda Baibolo

UMULANDU ABANTU BEPUSHISHE’FI: Abantu abengi balisumiine ati bangasangalala kani bakwata amaboni, baishibikwa, neli balukuboneka bwino. Namulifyefyo balapyungisha makosa ati bafikwate’fi—pano tabasangalalapo.

IFI BAIBOLO ISAMBISHA: BaYesu balitulangile inshila ya kusangilamo ukusangalala ili balabile ati: “Balisyucile abo abomfwa amasiwi abaLesa, nekulukwalama.” (Luku 11:28) Tungasangana ukusangalala kwa cinenene ili tulukwikusha insala ya ku mupashi—ukulukufwaisha ukwishiba bucine pali baLesa ne kufwaya kwabo. Ubu bucine bulasangwa mu Baibolo. Ukwishiba bucine ku katofwako ukulekanya ificindeme na fyefyo ifitaficindemepo. Kani tulukutungululwa na Baibolo muli fyefyo ifi tusalululapo na muli fyefyo ifi tucita, ubwikashi bwesu bukaba bwa kusangalasha.

Pendelenipo Ifisimpi 3:5, 6, 13-18 na 1 Timote 6:9, 10.

Apa twalabilapo finini lukoso pa fyakwipusha fisanu na cimo (6) ifi Baibolo yasuka. Kani mungafwaya ukwishibilapo na fimbi ukucila pali fifi? Kani na mwebo muli koti ni baabo abomfwa insala ya ku mupashi, ukwakubula ne kukanika mungafwaya ukwishibilapo na fimbi. Mungalukulanguluka pa fyakwipusha na fimbi koti ni fifi: ‘Kani baLesa balatulama, mba nindo basuminishishe ifintu ifibipile ne kupenga ukupitilila? Findo ningacita pakweba’ti icisoolo canji cilukwikele icisangalele?’ Baibolo ilasuka bwino ifi ifyakwipusha na fimbi ifingi.

Pano buno bukumo, abantu abengi tabafwayapo ukupenda Baibolo. Balabona’ti libuuku ilikulu makosa kabili likosele ukumfwa. Kani mungafwaya abakumofweniko ukusangana ifyasuko mu Baibolo? Bamboni sha baYehova bali ne nshila shobilo ishi bangamofwelenimo na mwebo.

Mu kutanga lukoso, ibuuku lya Kani Findo Baibolo Muli Bucine Isambisha? lililembelwe abantu abatabakwetepo impindi ya kweba’ti bangeshiba bwangu ifi Baibolo yasuka ifyasuko ifiswetele ku fyakwipusha ificindeme. Ica bubili lisambililo lya Baibolo ilya lukoso ilya pa ŋanda. Apakubula ne malipilo, Bamboni sha baYehova abasambisha bwino abekala apepi na mwebo, koti balukwisa penu pa ŋanda neli kumbi ku mupunda uku mungatemwa mwebene ne kusambilila pa mpindi iinini umulungu ne mulungu. Abantu abengi lukoso ukufika ukupelele icalo efi basambilila Baibolo muli yenke’yi inshila. Abengi lukoso balyumfwishishe ne kulabila’ti: “Eli nasangana bucine!”

Takupo amaboni aangacila pakwishiba bucine. Bucine bwa mu Baibolo bulatukakulula ku kutiine’mipashi, icimfulunganya, ne mwenso. Bulatupeela ubucetekelo, ukulandakanya, ne kusangalala. BaYesu balilabile ati: “Mukalukwisiba bucine, nabo bucine bukamukakululeni.”—Yoane 8:32.

1. Umwalalume alukusambilila fyefyo Baibolo isambisha; 2. Umwanakashi alukusambilila fyefyo Baibolo isambisha