Tolokeleni

Tolokeleni muye pa fyebo fya bubili

Tolokeleni muye pa filukusangwamo

Bamboni sha BaYawe

IciLamba

Ifyasuko ku Fyakwipusha 10 Abacanice Bepusha

 ICAKWIPUSHA 6

Ningacita Shani pa Kukana Ukupangilisha kwa Babyanji Ukubipile?

Ningacita Shani pa Kukana Ukupangilisha kwa Babyanji Ukubipile?

UMULANDU CICINDAMIINE

Ili mulukulisalulwilapo ifyakucita, tamukalekapo abantu bambi ukulukumusalulwileniko ifyakucita.

FINDO MWEBO MUNGACITA?

Alakanyeni pali cici: Ili abasambilila na Brian balukwisa mupepi kuli ye, aumfwa umwenso. Imikwi ibili mu mulungu, balyeseshe ukweba ati naye atatike ukupeepa. Uno pano wabutatu baisa.

Umusankwa wa kutanga alabila ati:

“Uli lukoso wenka nakabili? Leka nkulangisheko icibusa na cimbi.”

Pa kulabila ati “icibusa” alukumutinisha ili alukubuula fimo mu cola cakwe ne kupeela Brian.

Brian abona fwaka mu minwe ya mu byakwe. Eli pano umwenso wacila kuli Brian.

Brian alabila ati “Umfitulukileko, ndikubuulile kale ati nshilukufwayapo . . . ”

Umusankwa wa bubili aasuka ati: “Nindo ubelele ne mwenso ifi?”

Brian mulupata aasuka ati, “talipo efi ndi!”

Umusankwa wa bubili apampansha Brian pa cifushi ne kulabila mwi shiwi ilinakilile ati, “poka lukoso.”

Umusankwa umbi aleta umushanga apepi na Brian ne kumubuula ati, “tatukabuulapo uuli onse. Tapaapo uukeshiba.”

Nga nimwe mwali Brian, mungacita shani?

 TANGENI UKWALAKANYAPO!

Kani ababyakwe Brian balangulukapo pali fyefyo balukucita? Kani bo, bene baalisalulwililepo ifyakucita? Koku. Popele tungalabila ati baalukulonda lukoso ifi bambi balukucita. Balukufwaya ati bambi babasumine, popele balisumiine fyonse ifi bambi balukubabuula.

Kani ifyakube’fi fyamucitikileni, mungasalulula shani inshila imbi ne kuciicila ukupangilisha kwa fibusa ukubipile?

  1. UKULYANSHIKA KU FINGAFUMAMO

    Baibolo ilalabila ati: “Umuntu uuncenjele alabubona bumbifi ne kufisama; sombi abatumpile balapita lukoso, lomba ne kubono’mulandu.”—Ifisimpi 22:3.

    Impindi ishingi, mungabwena limo ubukatasho bwa kuntangiile. Ku cakubwenako, kani wabona abana besukuulu babyobe balikuntangiile, kabili balukupeepa fwaka. Ukubwena limo ubukatasho kukamofweniko ukulyanshika.

  2. LANGULUKENIPO

    Baibolo ilalabila ati: “Mwikale na bacimanga abaweme.”—1 Petilo 3:16.

    Lipusheni ati, ‘Ningomfwa shani mukupita kwa mpindi kani nalondaisha lukoso ababyanji?’ Fyacine, tamulukufwayapo ababyenu ukubona ati tamusalulwilepo bwino. Pano mungomfwa shani panuma? Kani mungalitemenwa ukonaala ishina lyenu pakuti pa kusangalasha aba musambilila nabo?—Ifyakufuma 23:2.

  3. SALULULENIPO BWINO

    Baibolo ilalabila ati: “Umuntu wa mano alatiina ne kufumapo pa kubifya.”—Ifisimpi 14:16.

    Bukumo neli kuntangiile, tulyelelwe ukusalulula ifyakucita ne kwishiba ati ifikafumamo fikesa pali fwebo. Baibolo ilalabila pa balalume abali koti ni Josefi, Jobo na baYesu abasalulwilepo bwino. Ilalabila na pali Kaini, Eso, na Juda, aba tabasalulwilepo bwino. Findo mwebo mungacita?

Baibolo ilalabila ati: ‘Ulukulonda ifilungeme fyenka.’ (Amasamo 37:3) Kani mulyalakenyepo kale ne kwalula ilangulushi lyenu, cingapuba ukulabila ifi musalulwilepo—kabili mulafuma ifiweme.

Mwibombomana—tamwelelwepo ukulabila ifingi. Amashiwi aapubile aali koti ni KOKU angelelwa. Neli pakweba ati ababyenu babone ati tamulukufwayapo, mungalabila lukoso ati:

  • “Mwimbikamo!”

  • “Nshicitapo ifyakube’fyo!”

  • “Talipo efi munjishi ifyo!”

Iciweme kwasuka penka’po kabili mulyelelwe ukulicetekela. Kani mwacite’fyo, mukakankamana ukubona ifi ababyenu bakaleka bwangu ukumupangilisheni!

 IFYAKUCITA KANI BALUKUMUTONGAALENI

Kani mwalondaisha ifi ababyenu balukumupangilisheni, mukaba koti cintu icibalukubuula lukoso ifyakucita

Nga pano kani ababyenu balukumutongaaleni? Nga kani balabila ati, “Findo fyakatasha—uli wa mwenso ayi?” Mulyelelwe ukwishiba ifi ukutongaala kwakube’fyo kwalula—kupangilisha kwa fibusa ukubipile. Mungaasuka shani? Kuli inshila shibili ishi mungasalululapo.

  • Mungasumina lukoso. (“Fyacine mulukulabila, ndi wa mwenso!” Babuulishisheni umulandu mwalabilile’fyo.)

  • Mungabasuka ifi tabacicetekelapo ukumfwa kuli mwebo. Buulishisheni umulandu mwakanina kabili balengesheni ukulangulukapo pa ficitwa fyabo. (“Nalukubona ati ukupeepa fwaka takwelelwepo ku bantu ababoneka bwino koti ni mwebo!”)

Kani ababyenu bapitilisha ukumutongaaleni, fumenipo lukoso! Anukeni ati kani mwakokola ukuba pamo, bakacilamo ukulukumupangilisheni. Kani mwafumapo, ninshi mulukulangisha ati tamulukufwayapo bambi ukwalula ifi muli.

Muli bucine, tekuti mufisamepo ku kupangilisha kwa babyenu ukubipile. Pano mungasalululapo ifi mulukufwaya ukucita, labileni ifi musalulwilepo, ne kucita fyopele’fyo. Mukupelako, kusalululapo kwenu mwebene!—Josyua 24:15.