ICAKWIPUSHA 2

# Nindo Mbombomanina Makosa Pali Fyefyo Mboneka?

Nindo Mbombomanina Makosa Pali Fyefyo Mboneka?

UMULANDU CICINDAMIINE

Kuli ifintu ificindeme ukucila pali fyefyo mubona mu cilolelo neli mwi kalashi.

## FINDO MWEBO MUNGACITA?

Alakanyeni pali cici: Kani Julia alolesha mwi kalashi, alalibona lukoso ukwina. “Ndyelelwe ukondako,” efi alibuula—nangaba ati abafyashi bakwe ne babyakwe bamubuule ati “mondele.”

Bukumo, Julia alilangulukilepo pali fyefyo angacita pakweba ati abwesheko “2.27kg” ku mubili wakwe. Ici angacita lukoso kwikala insala pa nshiku shinini . . .

Kani mulyumfwilepo koti ni Julia, findo mungacita?

## TANGENI UKWALAKANYAPO!

Tacibipilepo ukubika akalango kuli fyefyo muboneka. Pakuti, na Baibolo ililabiilepo bwino pali fyefyo abantu bamo baalukuboneka akale, ukubikako Sala, Laceli, Abigayili, Josefi, na Dafidi. Baibolo ilalabila ati umwanakashi uwe shina lya Abisyaji aali “uweme pa menso ukwakuti.”—1 Imfumu 1:4.

Popele, abanice abengi balibikile makosa akalango kuli fyefyo baboneka. Ico cingabalengesha ukuba mu makatasho. Langulukeni pali cici:

• Mwi sambililo limo balibuulishishe ati, pali ba moye 100, abali 58 balilabiile ati baliniishe, ili muli bucine, ni 17 lukoso ebainiishe.

• Kumbi ukufwailisha kwalibuulishishe ati, pa banakashi 100, paali abali 45 abondele abalukulibona ati balinine makosa!

• Mukufwaisha ukonda, abanice abengi balibasangile ne bukatasho bwa kutiina ukwina—ubwisako kani umuntu talukulyapo ifyakulya.

Kani mulikwete ubukatasho bwa kutiina ukwina neli ukulya, lombeni ukofwewa. Tatikilenipo ukubuulako abafyashi benu neli abakulu aba mucetekele. Baibolo ilalabila ati: ‘Icibusa cilatemwa impindi shonse, kabili umukwanu kulifyelwe pa mpindi ya makatasho.’ —Ifisimpi 17:17.

## IFI MUNGACITA PA KUWAMYAKO!

Muli bucine, ifi umuntu ali mukati efilengesha bambi ukumutemwa neli ukubulo’kumutemwa. Langulukeni pali Abisalomi, umwana wa mfumu Dafidi. Baibolo ilalabila ati:

“Tapalipo uwakumucila Abisalomi ukulemiwa pakuti pa bulombe bwakwe. . . . Tapalipo neli cisemba pali ye.”—2 Samweli 14:25.

Pano, uyu umusankwa aali ne kulitoota ukutumpile, icikani, ne kutumpaika abantu! Na muli fyefyo, Baibolo, tailangishapo ati Abisalomi aali muweme; ilamulabilapo ukuba umuntu uutalukumfwilapo kabili uwalukwipaya abantu.

Emulandu Baibolo itufundila ati:

‘Tufwale Ubuntu bwa bukumo.’—AbaKolosai 3:10.

“Ifya matangalo fyabo fiiba fya posonde . . . , sombi nga fibe untu uufishilwe mu mutima.”—1 Petilo 3:3, 4.

Nangaba ati tacilubenepo ukufwaya ukuboneka bwino, icicindamishe pali fyefyo muboneka, mibelo yenu iya mu mutima. Mukupita kwa mpindi, imibelo yenu iiweme eikalengesha bambi ukumutemweni, ukucila na fyefyo muboneka! “Ubulombe bulalengesha umuntu ukubonwa bwangu,” efi moye uwe shina lya Phylicia alabila, “pano ifili mu mutima wenu ne mibelo yenu iiweme efi abantu bakalukwanuka makosa pali mwebo.”

## NGA TULABILE PALI FYEFYO MUBONEKA

Kani impindi ishingi tamutemwapo ifi muboneka?

Mulilangulukilepo ukusuba amafuta ya ku kashikisha neli mulilekele ukuliisha pakweba ati mondeko?

Findo mungatemwa ukwalulako kuli fyefyo muboneka? (Shilenipo ifi mwasalulula.)

• IFUMBI

• IFI MULEMA

• IMISHISHI

• IFI MUBONEKA

• ICINSO

• UMUSHOBO WA NKANDA

Kani mwacasuka ati inya ku fyakwipusha fibili ifyakutanga ne kusalululapo fibili neli ukucilapo ku cakwipusha ca butatu, langulukeni pali cici: Abantu cipale tabamubonenipo koti nifyefyo mwebene mulibona. Cipubile ukucishamo ukubombomana pali fyefyo tuboneka.—1 Samweli 16:7.