Tolokeleni

Tolokeleni muye pa filukusangwamo

 ICAKWIPUSHA 1

Kani ndi Muntu Wakuba Shani?

Kani ndi Muntu Wakuba Shani?

UMULANDU CICINDAMIINE

Ukwishiba bwino ifi muli na fyefyo mufwaisha ukucita fikamofweniko ukusalululapo bwino ili bambi balukumubuuleni ukucita ifi tamulukufwayapo.

FINDO MWEBO MUNGACITA?

Alakanyeni pali cici: Karen ali ku paate, kabili ili amamineti 10 taangakumana, aumfwa ishiwi ku numa yakwe ilya muntu eshi.

“Nindo waimakanina lukoso apo?”

Karen aaluluka, kusangana ni Jessica umubyakwe ali ne mabotolo abili umuli ifyakunwa. Karen aishiba ati muli ubwalwa. Jessica atambika Karen ibotolo lya bwalwa ne kulabila ati “Tali ino e mpindi welelwe ukulisangalashako?”

Karen alukufwaya ukukaana, pano Jessica mubyakwe. Kabili Karen talukufwayapo umubyakwe ukulanguluka ati ye alishaliile. Eli cimbi, Jessica alishibikilwe bwino. Kabili kani alukunwa, takolwapo. ‘Kunwako lukoso,’ Karen alukulilabisha. ‘Ukunwa takulipo koti kunwa imiyanda iikola.’

Kani mwali nimwe Karen, mungacita shani?

TANGENI UKWALAKANYAPO!

Pakweba ati musalululepo bwino ukulosha kuli cici icakucitika, mulyelelwe ukulishiba bwino mwe bene. Ukulishiba kuulanguluka kwa mu mutima ukumubuuleni ifi muli na fyefyo mufwaya ukucita. Ukwishibe’fyo, kungamofweniko ukulisalulwilapo ifyakucita mu mweo wenu ukucila bambi ukumusalulwileniko.—1 AbaKolinto 9:26, 27.

Mungakosha shani amakosa enu aakulisalulwilapo? Ukwasuka ifyakwipusha fyakonkapo kwakumofweniko.

 1 NI FINDO IFI NKONSHA UKUCITA?

Ukwishiba ifi mukonsha ukupyunga ne mibelo yenu iiweme fikamulengesheni ukufwaisha ukulukucita fyopele’fyo.

ICAKUBWENAKO CA MU BAIBOLO: Intangishi Paulu yalilembele ati: “Nangaba ati ndi wa lukoso pa kulabila, nshili wa lukoso pa fya kwishiba, koku.” (2 AbaKolinto 11:6) Ukumfwisha amalembo, kwalyofweleko Paulu ukupitilisha ukuba umukosele ili bambi balukumukatasha. Taalekelepo ati banashe ukufwaisha kwakwe ukwa kucita ifi angakonsha.—2 AbaKolinto 10:10; 11:5.

LISALAALENI MWEBENE: Lembenipo apa, umulimo mwishi bwino ukupyunga.

Pano buulishisheni imibelo imo iiboneka makosa muli mwebo. (Ku cakubwenako, kani mulalama bambi? mulapeela? mungacetekelwa? mulalonda impindi ya kufika?)

2 NI FISA IFYAKUNAKA FYANJI?

Koti ni fifi umunyololo uli, apa ukoseele epo uputukila, efi cili na kukulishiba, ifintu fingabipa kani mwaleka ifyakunaka fyenu ukumutangilileni mu mweo wenu.

ICAKUBWENAKO CA MU BAIBOLO: Paulu aalishibile ifyakunaka fyakwe. Kaalemba ati: “Ndatemenwa mwi funde lya baLesa koti buntu ubwa mu mutima, sombi ndukubona ifunde limbi nalyo mu filewa ifya mubili wanji Iilukulwa ne funde lya milangwe yanji, ne kunteka pali bukalume bwe funde lya kubifya.”—AbaLoma 7:22, 23.

LISALAALENI MWEBENE: Ni fisa ifyakunaka fyenu ifi mungapyungilapo?

 3 FINDO MFWAYA UKUCITA?

Munganina muli motoka ne kubuula uulukwensha ati alukumushingulusheni pantu pamo mpaka amafuta muli motoka yakwe yashila? Tekuti mubepo amano mu kucite’fyo—kabili mungalipila indalama ishingi!

Twasambililako indo? Ifi mufwaya ukucita, fingamulengesheni ukubula ukulukushinguluka pantu pamo. Mukeshiba ukwakuya ne fyakucita pa kufika uko kwenka.

ICAKUBWENAKO CA MU BAIBOLO: Paulu kaalemba ati: “Ndabutuka, sombi koti wakubulo’kwishiba, teko.” (1 AbaKolinto 9:26) Ukucila ukuleka ifili fyonse ukulukumucitikila, Paulu aalishibile ifi aalukufwaya ukucita kabili fyopele’fyo efi aalukucita.—AbaFilipoi 3:12-14.

LISALAALENI MWEBENE: Lembenipo apa, fitatu ifi mulukufwaya ukucita mu mwaka wakonkapo.

4 FINDO NCETEKELEMO?

Kani mwalishiba makosa, mukaba koti citi icili ne mishu iikosele icingakonsha ukwimakana na ku cipuupu icikulu

Ukulondaisha bambi kungamulengesheni ukufilwa ukusalululapo bwino pa fintu. Koti ni fifilya fulunyemba ali, mukalukwaluka-luka pakweba ati mucite ifi bambi balukufwaya—ekeshibilo ka kweba ati tamulishipo mwebene.

Mukupusanako, kani ifi mufwaya ukucita fyaeyamina pali fyefyo musumiinemo, mukakonsha ukuficita—tamukalondaishapo bambi.

ICAKUBWENAKO CA MU BAIBOLO: Ili uwakushimika Danyeli aali lukoso mwanice, “aalilifundile mu mutima wakwe” ati akulukumfwila amafunde abaLesa, nangaba ati akashe icisoolo cakwe. (Danyeli 1:8) Ukucite’fyo kwalimofweleko ukulicetekela. Danyeli aalyeamine pali fyefyo asumiinemo.

LISALAALENI MWEBENE: Findo mucetekelemo? Ku cakubwenako: Kani mulicetekeele muli baLesa? Ni pakuti pando? Findo filengesha mwebo ukucetekela ati eko bali?

Kani mulicetekele ati amafunde abaLesa aalungeme alibeleleko ku bune bwenu? Nindo mwalabilile’fyo?

Mu kupelako, ni cisa mungatemwapo ukuba—ibuula lya citi ilipintwa na kuli kabesha iinini, neli iciti icingakonsha ukwimakana na ku cipuupu icikulu? Kani mwalishiba bwino, mukaba koti citi ico. Kabili ukucite’fyo kukamofweniko ukwasuka icakwipusha cakweba ati, Kani ndi Muntu Wakuba Shani?