Tolokeleni

Tolokeleni muye pa filukusangwamo

 ICAKWIPUSHA 3

Kani Ningambaala Shani ne Bafyashi Banji?

Kani Ningambaala Shani ne Bafyashi Banji?

UMULANDU CICINDAMIINE

Ili mulukumfwana ne bafyashi benu, eli ifintu fikamuwamineni mu mweo wenu.

FINDO MWEBO MUNGACITA?

Alakanyeni pali cici: Ni pa Citatu ubushiku. Geoffrey uuli ne myaka, 17, ashila ukupyunga imilimo pa ng’anda, pano ni mpindi yakutusha kuli ye! Aasha TV kabili aikala mu cipuna atemenwe.

Penka apo, baWishi baingila, kabili bakalipa.

“Geoffrey! Nindo ulukonawile’mpindi ukutamba TV ili waishiba ati ulyelelwe ukofwako umwanice obe ne fya kusukuulu? Taucitapo ifi bakubuula!”

Geoffrey alabila mwi shiwi lya munshi pano ilyumfwanikile ati: “Mwatatikako na kabili.”

Bawishi baasuka. “Ati shani walabila?”

Geoffrey aasuka ati “Tapapo na mwebo tata.”

Bawishi pano bakalipa ne kulabila ati “Wikabweleshapo ukulabile’fyo kuli nebo!”

Nga nimwe mwali Geoffrey, mungaciicila shani ukwambaala kwakube’fi ukucitika?

TANGENI UKWALAKANYAPO!

Ukwambaala ne bafyashi benu kuli koti kwensha motoka. Kani mwasanga icaciicila inshila, mungafwaya inshila imbi.

 KU CAKUBWENAKO:

Leah alilabiile ati “Cilankatasha ukwambaala na batata. “Impindi shimbi ndesha ukulabilako nabo panini, pano balangasuka ati, ‘Mfitulukileko, wacilalabila nanebo?’”

PALI INSHILA SHITATU ISHI LEAH ANGASALULULAPO.

  1. Ukupaatila bawishi.

    Leah apunda, “Ifi ndukulabila ficindeme! Kutikeni!”

  2. Ukuleka ukulabila na bawishi.

    Leah aleka ukulabila na bawishi pa bukatasho bwakwe.

  3. Ukupembela impindi iyelelwe iyakulabila pali lyelyo ilyashi na kabili.

    Leah alabila na bawishi impindi imbi, neli ukubalembela inkalata pa bukatasho bwakwe.

Niisa inshila pali shishi shitatu mungabuula Leah ukulonda?

LANGULUKENI PALI CICI: Bawishi Leah balukutabataba—kabili tabeshibilepo ati umwana wabo akalipa. Popele kani Leah Asalululapo A, ukupunda kwakwe kungaba kwa lukoso. Ukusalululapo A tekuti kulengeshepo bawishi ukubika akalango kuli fyefyo alukufwaya ukubabuula, kabili tekuti cilangishepo ati alibacindikile. (AbaEfesa 6:2) Na muli fyefyo, ukusalululapo A tekuti kushilishepo ubukatasho.

Koti ni fyefyo mungafwaya inshila imbi ili mwasangana inshila mulukuyamo baiciicila, mungafwaya inshila imbi iya kumfwaninamo ne bafyashi benu

Ukusalululapo B kungaba ukupubile ukucita, pano tekuti ciwamepo ukucite’fyo. Nindo twalabilile’fyo? Pakweba ati ashilishe bwino amakatasho akwe, Leah alyelelwe ukwambaala ne bafyashi bakwe—pakweba ati bawishi bamofweko, balyelelwe ukwishiba ifi alukupitapo mu mweo wakwe. Ukuba lukoso celele takushilishapo ifili fyonse.

Ukusalululapo C, kungabuulishisha ati Leah talekelepo icili conse ukumuciicila ukwambaala na bawishi. Na muli fyefyo, asalulula ukwambaalapo impindi imbi. Kabili kani asalululapo ukulemba inkalata, Leah angomfwa bwino penka’po.

Ukulemba inkalata kungamulengesha ukulabila fyonse lukoso ifili ku mukoshi. Ili bawishi bapenda inkalata, bakeshiba ifi umwana wabo acilafwaya ukubabuula, icingabofwako ukumfwisha ubukatasho akwete. Ukusalululapo C kungalengesha Leah na bawishi ukwambaala bwino. Nangaba ati mwaambaala neli ukulemba inkalata, ukusalululapo C kulomfwana ne kufunda kwa mu Baibolo ukulabila ati, “nga tufilonde’fintu ifileto’butende.”AbaLoma 14:19.

Ni findo fimbi Leah angasalululapo ukucita?

Kani kuli inshila imbi iimulukulanguluka, mungailembapo panshi apa. Eli mulembe ne fingafumamo mu kulonda iyo inshila.

 MWILUKULENGESHA ABAFYASHI BENU UKULANGULUKA FIMBI

Mulukwanuka ati ifi mulabila na fyefyo abafyashi benu balanguluka tafibapo fintu fimo.

KU CAKUBWENAKO:

Abafyashi benu bangamwipusheni umulandu mulukubonekela ababombomene. Mungalabila ati, “Nshilukufwaya ukulabilapo.”

Pano abafyashi benu bangomfwa koti mwalabila ati: “Tekuti mubuulenipo pakuti nshimucetekelenipo. Nkabuulako ababyanji pa bukatasho nkwete aikona mwebo.”

Alakanyeni ati muli ne bukatasho ubukulu, eli abafyashi benu bafwaya ukumofweniko. Kani mwabila ati: “Mwibombomana. Nakupyungilapo nemwine.”

  • Abafyashi benu bangomfwa ati:

  • Mungasuka bwino kani mwalabila ati: