Tolokeleni

Tolokeleni muye pa filukusangwamo

 ISAMBILILO 9

Mulukupempela BaYehova Pamo mu Cisoolo

Mulukupempela BaYehova Pamo mu Cisoolo

“Mubatonde  . . . abo abacitile iulu ne calo ca panshi.”—Ukufisulula 14:7

Koti nifyefyo mwasambilila muli ino bloshuwa, muli Baibolo muli ifyebo ifingi ifingamofweniko mwebo ne cisoolo cenu. BaYehova balafwaya mwebo ukuba abasangalele. Balilaile ukweba ati kani mwabika ukubapempela pantangiile, “popele ifintu ifyo fyonse fikalundwa-po pali mwebo.” (Matayo 6:33) Mucinenene balafwaisha mwebo ukuba icibusa cabo. Pyungisheni impindi yonse mwakwata kukusha bucibusa na baLesa. Ili lishuko ilikulu makosa umuntunshi angakwata.—Matayo 22:37, 38.

 1 KOSHENI BUCIBUSA BWENU NA BAYEHOVA

IFI BAIBOLO ILABILA: ‘‘Nkaba wishinwe, namwebo mukalukuli muli bana banji abalalume ne banakashi,’ ifyo efi balabile baYehova abamakosa onse.’ (2 AbaKolinto 6:18) BaLesa balukufwaya mwebo ukuba icibusa cabo icipalamishe kuli bo. Mungacite’fyo ukupitila mwi tembelo. BaYehova balukumubuuleni ati “mulukutembela ukwakubulo’kuleka.” (1 AbaTesalonike 5:17) Balafwaisha ukukutika kuli fyefyo mumfwa na pali fyefyo ifimubombomanikeni. (AbaFilipoi 4:6) Ili mulukutembela ne cisoolo cenu, bakabona ifi baLesa bali abacinenene kuli mwebo.

Pakabeya kakulabila na baLesa, namwebo mulyelelwe ukukutika kuli bo. Mungacite’ci ukupitila mu kusambilila Baibolo ne mabuuku aalabila pali Baibolo. (Amasamo 1:1, 2) Mulukwalakanya pali fyefyo mulukusambilila. (Amasamo 77:1, 12) Ukukutika kuli baLesa kulisankenemo ne kulukusangwa ku kubungana lyonse.—Amasamo 122:1-4.

Ukutulisha kuli bambi pali baYehova ninshila naimbi iicindeme iyakukoseshamo bucibusa bwesu na baYehova. Ili mulukupyungisha makosa eli mukapalamisha makosa kuli baYehova.—Matayo 28:19, 20.

IFI MUNGACITA:

  • Mulukupaatulako impindi iya kupenda Baibolo ne kutembela cila kasuba

  • Icisoolo conse cilyelelwe ukubika pantangiile ifya baLesa ukucila na pa fintu fyonse ifyakulisangalasha ne kutuusha

2 MULUKULITEMWESHA PA MAPEMPELO ACISOOLO

IFI BAIBOLO ILABILA: ‘Palamineni kuli baLesa, eli bakapalamina kuli mwebo.’ (Jakobo 4:8) Mulyelelwe ukutantika ne kulukulonda fyefyo mwatantika ukupempela kwa cisoolo. (Ifyakutaŋga 18:19) Kabili mulyelelwe ukucita ne ficilile na pali fyefyo. BaLesa balyelelwe ukuba akabeya ka cisoolo cenu cila kasuba. Kosheni bucibusa bwa cisoolo cenu na baLesa pa kulukulabila nabo ‘pa kwikala mu ŋanda yenu, na pakwenda mu nshila, na pakulala, na pakubuka.” (Ndutelonomi 6:6, 7) Mulukuba koti ni Josyua, uwalabile ati: ‘Sombi nebo ne ba muŋanda yanji twakulukubapyungila baYehova.’—Josyua 24:15.

IFI MUNGACITA:

  • Lyonse mulukucita ifintu ifingalenga aba mucisoolo cenu bonse umo umo ukulukusambililako