“Mulukukonsha ukutemwanshanya; pakuti ubutemwe bulafimba pafyakubifya ifinji.”—1 Petilo 4:8

Pakuti eli mwatatika lukoso ukwikala pamo ne benakwenu, amakatasho aapusenepusene akabapo. Akesa pakuti pa kupusana kwa fyefyo mulanguluka pa fintu fimo, ifi mumfwa, na panshila bamikushishemo. Neli amakatasho angafuma kumbi lukoso eli ne fyakupwalamukilwa lukoso.

Cingaba kweshiwa ukubulo kusumina ati efi ifintu fili pali yeyo mpindi, pano Baibolo ilatufunda ati tulukupyungila pa makatasho tuli nao. (Matayo 5:23, 24) Ukupyungisha ukufunda kwa mu Baibolo e nshila lukoso iiweme iya kushilisha amakatasho.

 1 AMBALENIPO PA BUKATASHO MUKWETE

IFI BAIBOLO ILABILA: ‘Kuli impindi. . . yakulabila.’ (Uwakutulisya 3:1, 7) Boneni ukweba ati mwakwatako Impindi iikulu iya kwambaalapo pa bukatasho muli nabo. Mulibucine babuleni abena kwenu ifi mulukumfwa pa bukatasho nafyefyo mulukulangulukapo. “Lyonse mulukwambaala ifyacine” kubena kwenu. (AbaEfesa 4:25) Nangaba’ti mwafitwa, cicileni ukutosha ukwingalengesha ukulwa. Ukwasuka ukunakilile kungalengesha ukwambaala kwenu ukubula ukufika pakutosha ukungalengesha mwalwa.—Ifisimpi 15:4; 26:20.

Nangaba ati tamulukufwaapo ifi bamukakwenu balukulabila, ishibeni ifyakuliteeka neli ukulilama, mwilubako ati mulyelelwe ukulangisha ubutemwe ne mucinshi kuli bamukakwenu. (AbaKolosai 4:6) Esheni ukushilisha ubukatasho penka’po, kabili mwilekapo ukulukwambaala. —AbaEfesa 4:26.

IFI MUNGACITA:

  • Paatuleniko impindi iingelelwa ukwisa mukwambaalapo pa bukatasho mukwete

  • Kani ni mpindi yenu iya kukutika, mwilukucicila ababyenu. Namwe ilukufika impindi yakulabilapo

 2 MULUKUKUTIKA NE KUMFWISHA

IFI BAIBOLO ILABILA: ‘Kamutemwanshanya; ku fyabuleme nafyo mulukutangishanya.’ (AbaLoma 12:10) Ukukutikisha kucindeme makosa. Esheni ukumfwisha ifi bamukakwenu balukulabila ne ‘kubalangulukilako palifyefyo balukumfwa . . . kabili licefyeni’ (1 Petilo 3:8; Jakobo 1:19) Tekuboneka lukoso koti mulukukutika kanshi tamulukumfwapo. Kani cingaba icelelwe, lekeni ifimulukucita ne kubika akalango kuli fyefyo abenakwenu balukulabila, neli mungabepusha kani cingaba icelelwe ukwambaala impindi imbi. Ngamulukubona abenakwenu ati bakupyungila pamo nabo ukucila ukubabona koti bapate benu, kani caba koti nifyefyo, “tamukalukumanamapo ukulukufitwa.”—Uwakutulisya 7:9.

IFI MUNGACITA:

  • Pitilisheni ukukukutika, nangaba ati ifibalukulabila tamufitemenwepo

  • Ishibeni umulandu balabilila ayo amashiwi. Boneni ukuboneka kwabo ili balukulabila ne kumfwanika kwe shiwi

3 PYUNGILENIPO PALI FYEFYO MWAAMBAWILE

IFI BAIBOLO ILABILA: ‘Abapyungisha makosa balabwenamo mu kupyungisha kwabo konse; pano ukulakaka kwa milomo kulaleta ukupenga lukoso.’ (Ifisimpi 14:23) Tamwelelwepo ukupeleela lukoso pa kusuminanshanya ukupyungila pa fiweme. Mulyelelwe ukupyungilapo pali fyefyo mwasalulula ukucita mwense bobilo. Pakweba ati mucite’fi cilapengela ukupyugisha makosa ne kulibikilishako, pakuti mulafuma ifiweme. (Ifisimpi 10:4) Kani mwapyungila pamo, mukapoka “icakubwena-po iciweme” pakuti pakupyuŋga kwenu.—Uwakutulisya 4:9.

IFI MUNGACITA:

  • Salululenipo ifi umo umo angacita pakweba ati mushilishe ukukatasha muli nako

  • Impindi ne mpindi mulukupitulukamo ukubona kani mulukucita bwino