Tolokeleni

Tolokeleni muye pa fyebo fya bubili

Tolokeleni muye pa filukusangwamo

Bamboni sha BaYawe

IciLamba

Icisoolo Cenu Cingaba Icisangalele

 ISAMBILILO 7

Ifyakusambisha Umwana Wenu

Ifyakusambisha Umwana Wenu

‘Lomba amashiwi, andukukufunda akasuba kano, akalukuli pa mutima wobe; ukalukwasambisha ne munkosha ku bana bobe.’—Ndutelonomi 6:6, 7

Ili baYehova balengele babikileko icisoolo, balipeele abafyashi umulimo wakuceba pa bana. (AbaKolosai 3:20) Mulimo wenu mwe bafyashi ukusambisha umwana wenu ukutemwa ba Yehova ne kumukusha ukuba umuntu ucetekelwe. (2 Timote 1:5; 3:15) Kabili mulyelelwe ukwishiba ifili mu mitima ya bana benu. Tanje cine, icakubwenako cenu cicindeme makosa. Mungafunda bwino umwana wenu amashiwi abaYehova kani mwebo mwatanga ukuabika mu mutima wenu.—Amasamo 40:8.

 1 LEKENI CILUKUPUBA KU BANA BENU UKWAMBAALA NA MWEBO

IFI BAIBOLO ILABILA: “Abantu bonse ngabekale bakwangufyo’kumfwa, bakukokolo’kulabila.” (Jakobo 1:19) Mulukufwaya abana benu ati balukuba abakakulukile ukumubuuleniko fyonse lukoso. Balyelelwe ukwishiba ati muli abalyanshikile ukukutika kuli bo impindi shonse bafwaya ukulabila. Beni ababutende kulibo pakweba ati cilukubapubila ukulabila ifili ku mutima kuli mwebo. (Jakobo:18) Kani balimwishini ati mulasasuka neli ati mulasololola bwangu pa fintu, muli bucine tekuti babepo abakakulukile ukulabila na mwebo. Batekanishisheni abana benu, ne kubabuulishisha mu mpindi ne mpindi ati muli batemenwe.—Matayo 3:17; 1 AbaKolinto 8:1.

IFI MUNGACITA:

  • Mulukulitemenwa ukukutika kani pali ifi balukufwaya ukumubuuleni

  • Impindi ishingi mulukwambaalako ne bana benu, tekulukwambaala lukoso nabo ili kwaba amakatasho

2 ESHENI UKUMFWISHA IFIBALUKULABILAPO

IFI BAIBOLO ILABILA: “Uyo ukutika ishiwi eukabona ifiweme.” (Ifisimpi 16:20) Shimbi’mpindi, mulyelelwe ukwalakanya pa calenga umwana wenu ukulabila ifyebo fimo pakuti mwishibe ifi umwana wenu alukumfwa muli bucine. Abanice abengi balalabila mu nshila iipuseneko na fyefyo ifintu fili neli ukulabila mu nshila tabacelelwapo ukweba ati balabile. ‘Uyo uwasuka ili taangomfwa, kutumpa ne nsoni kuli ye.’ (Ifisimpi18:13) Mwilukufitwapo bwangu.—Ifisimpi 19:11.

IFI MUNGACITA:

  • Mulikutule mwebene ukubula ukubacicila neli ukubapaatila, nangaba ati balabile ifili shani

  • Anukeni ifi na mwebo mwalukumfwa ili mwali abasankwa neli bamoye ne kwanuka ifimwalukubona ati ficindeme

 3 LEKENI ABANA BABONE ATI MULIKATENE

IFI BAIBOLO ILABILA: “We mwana wanji umfwa ubusambishi bwa bawiso; tekulileke’funde lya banoko.” (Ifisimpi 1:8) BaYehova balipeele abafyashi bonse bobilo amakosa akuceba pa bana. Mulyelelwe ukusambisha bana benu ukumupeeleni umucinshi ne kumumfwileni. (AbaEfesa 6:1-3) Abana baleshiba kani abafyashi ‘tabekatenepo bwino ne mutima umo, ne kulanguluka kumo.’ (1 AbaKolinto 1:) Kani mwe bafyashi mulukupikishanya, mwilukupikishanya ninshi ne bana balukumfwako cingalengesha abana ukubulo kumupeeleni umucinshi woyo belelwe ukumupeeleni.

IFI MUNGACITA:

  • Ambaaleni ne kusuminanshanya ifi mwakulukufunda abana benu

  • Kani mulikwete ilangulushi ilipusene pa kusambisha abana, esheni ukubona inshila abenakwenu balukubwenamo ifintu

 4 ANSHIKILENI LIMO IFYAKUCITA

IFI BAIBOLO ILABILA: “Sambisha umwana ati ende pa nshila iyelelwe.” (Ifisimpi 22:6) Ubusambishi ubuweme ubwakusambisha abana benu tabukesapo lukoso koti meno amukanwa. Mulyelelwe ukwanshika bwino ifingapyunga, ukucitefyo kulisankenemo ne kulunjika abana benu. (Ifisimpi 127:4; Ifisimpi 29:17) Ukulunjika takulukwalulapo ati ku mupama, sombi kofwa umwana wenu ukumfwisha umulandu amafunde abeleleko. (Ifisimpi 28:7) Nakabili, sambisheni abana benu ukutemwa Amashiwi abaYehova ne kulukwalakanya pa mafunde abo. (Amasamo 1:2) Ukucite’fyo kukabalengesha ukuba na cimanga umuweme uwa makosa akwalakanya bwino pa fintu.—AbaEbeya 5:14.

IFI MUNGACITA:

  • Shininkisheni ukweba ati abana benu balabona baLesa ati muntu uwa cinenene ubangacetekela

  • Bofweniko ukwishiba ne kubula ukucita imibelo iibipile koti ni yeyo iisangwa pa Intaneti, pa TV na pa mafoni. Bafundileni limo ifi bangakaana kani pali ulukufwaya ukucita nabo ubucencemeshi

“Sambisha umwana ati ende pa nshila iyelelwe”