Tolokeleni

Tolokeleni muye pa fyebo fya bubili

Tolokeleni muye pa filukusangwamo

Bamboni sha BaYawe

IciLamba

Icisoolo Cenu Cingaba Icisangalele

 ISAMBILILO 2

Mulukuli Ababucine Kuli ba Mukakwenu

Mulukuli Ababucine Kuli ba Mukakwenu

“Ifyo ifi balundenye balesa, abantu bonse tekufilekanya neli umo.”—Mako 10:9

BaYehova balafwaya ati fwebo ‘tulukutemwa bucine.’ (Mika 6:8) Ukucite’fyo kucicindeme makosa makosa mu cupo cenu ni pakuti apakubula bucine tapabapo ukucetekelanshanya. Kabili ukucetekelanshanya ekulengesha ubutemwe ukukula.

Ino myaka, kuli ifintu ifilukulengesha bucine ukushila mu fyupo. Pakulama bwino icupo cenu, mulyelelwe ukukosapo ukucita ifintu fibili.

 1 MULYELELWE UKUBIKA MAKOSA AKALANGO KU CUPO CENU

IFI BAIBOLO ILABILA: ‘Mwishibe ifintu ificindamishe makosa’ (AbaFilipoi 1:10) Icupo cenu cili pa fintu ificindamishe makosa mu mweo wenu. Mulyelelwe ukubiikako makosa akalango.

BaYehova balukufwaya mwebo ukubika makosa akalango kuli ba mukakwenu ne kulukwikala pamo mu “kusemba.” (Uwakutulisya 9:9) Balilabiile apatubile ati tamwelelwepo ukulekelesha ba mukakwenu sombi, ati, mulukufwaya- fwaya inshila sha kubasangalashishamo. (1 Abakolinto10:24) Langisheni ukweba ati mulitemenwe makosa ukuba na bamukakwenu.

IFI MUNGACITA:

  • Shininkisheni ukweba’ti mulukuba pamo impindi ishingi, kabili tekupumbulwa ku fintu fimbi.

  • Mulukulabila ati “fwebo” ukucila ukulabila ati “nebo”

 2 LAMENI UMUTIMA WENU

IFI BAIBOLO ILABILA: “Abantu bonse uwakutambo’mwanakashi ne kumukumbwa, uyo kale acita nakwe ubucende mu mutima wakwe.” (Matayo 5:28) Kani umuntu apitilisha ukulukwalakanya pa fibipile, mu nshila imbi, ninshi aba uwakubula bucine kumubyakwe wa mu cupo.

BaYehova balilabiile ati mulyelelwe “ukulama umutima wenu.” (Ifisimpi 4:23; Jelemiya 17:9) Pakucite’fyo, mulyelelwe ukulama amenso yenu. (Matayo 5:29, 30) Londeni icakubwenako cakwe Jobo, uwalayene ne menso akwe ati takaloleshapo umwanakashi umbi ne ku mukumbwa. (Jobo 31:1) Mulibuulishisheni mwebene ati tamukatambapo ifyalukoso. Kabili teshi ukulangisha ubutemwe ku muntu umbi uutali mulume neli mukashi wenu.

IFI MUNGACITA

  • Langeni bambi ukweba ati muli babucine kuli ba mukakwenu.

  • Balangulukileniko pali fyefyo balukumfwa, kabili penka’po shilisheni bucibusa na bambi ubungalengesha bamukakwenu ukufitwa