Tolokeleni

Tolokeleni muye pa fyebo fya bubili

Tolokeleni muye pa filukusangwamo

Bamboni sha BaYawe

IciLamba

Icebo Iciweme Ukufuma Kuli BaLesa!

 Isambililo 8

Mba Nindo BaLesa Basuminishishe Bumbifi ne Kupenga?

Mba Nindo BaLesa Basuminishishe Bumbifi ne Kupenga?

BaLesa balisuminishe abantu ukwikalika pa mpindi iyelelwe pa kulangisha ati abantunshi abene tekuti bashilishepo amakatasho bakwata

1. Kani bumbifi bwalitatikile shani?

Bumbifi bwalitatikile pa calo ili Satana abepele ubufi bwa kutanga. Satana mu kutanga lukoso aali ni nkalamba iiwaminine, pano “taemakanine muli bucine.” (Yoane 8:44) Alitatikile ukukumbwa ukupempela ukwelelwe baLesa lukoso. Satana aalibepele umwanakashi wa kutanga, Efa, ne kumutekenesha ati amumfwile teshi ukumfwila baLesa. Adama alilondele Efa ukupulaisha kuli baLesa. Ukusalululapo kwakwe Adama kwaliletele ukupenga ne mfwa.—Pendeni Ifyakutaŋga 3:1-6, 19.

Ili Satana abuulile Efa ati apulaishe kuli baLesa, alitatikile ukufutukila ubukulu bwa kwikalika ubwa baLesa. Abantunshi abengi balibele ku kabeya kakwe Satana mu kukaana baLesa ati e Mfumu yabo. Pakuti pali fyefyo, Satana alibeele “imfumu ya calo ca panshi.”—Pendeni Yoane 14:30; 1 Yoane 5:19.

2. Kani ubulengeshi bwa baLesa bwali ne bulema?

Imilimo ya baLesa yonse iwaminine. Abantunshi ne nkalamba baLesa balengele baali ne makosa akubomfwila baLesa mu kuwaminina. (Ndutelonomi 32:4, 5) BaLesa balitulengele ne makosa akusalulula ukucita ifiweme neli ifibipile. Ayo amakosa akulisalulwila alatupeela ishuko lya kulangisha ifi tubatemenwe baLesa.—Pendeni Jakobo 1:13-15; 1 Yoane 5:3.

3. Mba nindo baLesa basuminishishe ukupenga mpaka na bubuno bukumo?

Pa mpindi ice ukufuma apa baLesa babafutukile mwi bala lya Edeni, baYehova balisuminishe abantu ukufutukila ubukulu bwabo ubwa kwikalika. Mba nindo bacitiile’fyo? Balukufwaya ukulangisha ati Takulipo neli kumo ukwikalika ukungalenga abantu ukushuka apakubula bo. (Uwakutulisya 7:29; 8:9) Panuma ya myaka 6,000 iya kwikalika  kwa bantunshi, ifintu filibwenekele apaswetele. Abantunshi balifililwe ukufumyapo inkondo, bumapushi, ukusendama, neli amalwashi.—Pendeni Jelemiya 10:23; AbaLoma 9:17.

Ukupusanako ne kwikalika kwa bantunshi, ukwikalika kwa baLesa kulalenga abo abakupokelela ukushuka. (Yisaya 48:17, 18) Bukumo, baYehova bakafumyapo konse lukoso ukwikalika kwa bantunshi. Ni baabo lukoso abantu abasalululapo ukwikalikwa na baLesa e bakalukwikala pa calo.—Yisaya 11:9.—Pendeni Danyeli 2:44.

Ifitusalululapo ukucita filalangisha kani tulukufwaya baLesa ukuba abekalikishi besu

4. Kani umutimanteeka wa baLesa ulatupeela lisa ishuko?

Satana alipikishe ukweba ati takulipo umuntu neli umo uungapyungila baYehova pakuti pa kubatemwa mu cinenene. Kani lomba mulukufwaya ukushinawila ubo ubufi? Mungacita fyopele’fyo! Umutimanteeka wa baLesa ulatupeela fwense ishuko ilya kulangisha kani kwikalika kwa baLesa tufwaya neli kani kwa bantunshi. Ifi tucita mu mekalilo esu efilangisha ukusalululapo kwesu.—Pendeni Jobo 1:8-12; Ifisimpi 27:11.

5. Mba tungasalululapo shani ati baLesa e Mfumu yesu?

Tungasalululapo ati baLesa e Mfumu yesu kani twafwaya-fwaya ne kulukucita ifya kupempela kwa cine ifyelelwe ne Mashiwi abaLesa, Baibolo. (Yoane 4:23) Tungamukaana Satana ukube’mfumu yesu kani twalitalamushako ku fya mapolitiki ne nkondo, koti ni fyopele filya baYesu bacitile.—Pendeni Yoane 17:14.

Satana alapyungisha amakosa akwe pa kulengesha imibelo ya bucencemeshi na imbi imibelo iibipile ukulukuboneka koti iiweme. Kani twakaana imibelo ya kube’fyo, fimbi ifibusa ne bakwabesu cipale bangatutongaala neli ukutucicila. (1 Petilo 4:3, 4) Popele tulyelelwe ukusalululapo. Kani tukalukwambaala ne bantu abatemenwe baLesa? Kani tukalukulonda amafunde abo umuli amano ne butemwe? Kani twacita fyopele’fyo, tukamushinawila Satana ati aalibepele ili apikiishe ukweba ati kani umuntu akatashiwa tapalipo neli umo uungacita fyopele’fyo baLesa balabila.—Pendeni 1 AbaKolinto 6:9, 10; 15:33.

Ubutemwe bwa baLesa ku bantunshi e bulangisha bucine bwa kweba ati bumbifi ne kupenga fikashila. Abo abalangisha ati balapemamo muli fifi bakalitemwesha ukwikala pa calo umuyayaya.—Pendeni Yoane 3:16.