Tolokeleni

Tolokeleni muye pa filukusangwamo

 Isambililo 12

Mungapalamina Shani Kuli BaLesa?

Mungapalamina Shani Kuli BaLesa?

1. Kani baLesa balakutika ku matembelo onse?

BaLesa balukwita abantu ukufuma mu mishobo yonse ukweba ati balukupalamina kuli bo mwi tembelo. (Amasamo 65:2) Pano, tabakutikapo, neli ukupokelela, amatembelo onse. Ku cakubwenako, tabakutikapo ku matembelo amuntu uupensha abakashi bakwe. (1 Petilo 3:7) Kabili, ili abaIsilaeli bapitilishe ukucita ifyakubifya, baLesa baalikeene ukukutika ku matembelo abo. Mu kubwenesha, itembelo lishuko. Nangabe’fyo, baLesa balomfwa amatembelo abaabo abacita ifyakubifya ifikulu kani balapila.—Pendeni Yisaya 1:15; 55:7.

2. Kani tungatembela shani?

Itembelo kabeya ka kupempela kwesu, popele tulyelelwe ukutembela lukoso ku Balengeshi besu, baYehova. (Matayo 4:10; 6:9) Popele, pakuti tatuwamininepo, tulyelelwe ukutembela ukupitila mwi shina lya baYesu ni pakuti baalifwile pakuti pa fyakubifya fyesu. (Yoane 14:6) BaYehova tabafwayapo fwebo ukulukutembela amatembelo antu amo neli aalembelwe. Balafwaya fwebo ukutembela ukufuma panshi ya mutima wesu.—Pendeni Matayo 6:7; AbaFilipoi 4:6, 7.

Abalengeshi besu koti bakutika na ku matembelo amu mutima. (1 Samweli 1:12, 13) Balafwaya tulukutembela kuli bo impindi yonse lukoso, ili tatungatatika ukupyunga imilimo ako kasuba na lyelyo tulukuya mu kulaala, ili tulukufwaya ukulya, na lyelyo tuli mu kukatashiwa.—Pendeni Amasamo 55:22; Matayo 15:36.

3. Kani nindo abaKlistu babunganina pamo?

Ukupalamina kuli baLesa talipo cintu icipubile ni pakuti tulukwikala ne bantu abatabacetekelepo muli baLesa kabili  abapufya ukulaya kwabo ukwa kweba ati bakaleta ubutende pa calo. (2 Timote 3:1, 4; 2 Petilo 3:3, 13) Pano tulafwaya abaKlistu babyesu ukweba ati balukutucenjeshako, nabo balafwaya ati tulukubacenjeshako.—Pendeni AbaEbeya 10:24, 25.

Ukulukwambaala ne bantu abatemenwe baLesa kulatofwako ukupalamina kuli baLesa. Ukubungana kwa Bamboni sha BaYehova kulatulenga twakoselako pakuti pa kubona ubucetekelo bwa bambi.—Pendeni AbaLoma 1:11, 12.

4. Mungapalamina shani kuli baLesa?

Koti mwapalamina kuli baYehova kani mulukwalakanya pali fyefyo mulukusambilila mu Mashiwi abo. Mulukulanguluka pa kupyunga kwabo, ukufunda kwabo kabili ne kulaya kwabo. Ukutembela ne kwalakanyapo mu mitima yesu koti kwatofwako ukumfwisha ubutemwe bwa baLesa ne mano abo.—Pendeni Josyua 1:8; Amasamo 1:1-3.

Koti mwapalamina kuli baLesa kani mwabacetekela, kabili kani muli ne bucetekelo muli bo. Pano ubucetekelo buli koti cintu ica mweo icipengela ifyakulya. Impindi shonse mulyelelwe ukuliisha ubucetekelo bwenu ukupitila mu kulukwalakanyapo pali fyefyo musumiinemo.—Pendeni Matayo 4:4; AbaEbeya 11:1, 6.

5. Ni bwisa bune mungasanganamo kani mwapalamina kuli baLesa?

BaYehova balalama abo ababatemenwe. Koti babalama kuli fyonse lukoso ifingonala ubucetekelo bwabo ubwa kukwata umweo wa muyayaya. (Amasamo 91:1, 2, 7-10) Balatucenjesha ukutalamuka ku fingonala umweo wesu na kuli fyefyo ifingatulengesha ukubulo’kuba ne kusangalala. BaYehova balatusambisha ifya kwikala amekalilo aaweme.—Pendeni Amasamo 73:27, 28; Jakobo 4:4, 8.