Tolokeleni

Tolokeleni muye pa fyebo fya bubili

Tolokeleni muye pa filukusangwamo

Bamboni sha BaYawe

IciLamba

Icebo Iciweme Ukufuma Kuli BaLesa!

 Isambililo 7

Kani Ubufumu bwa baLesa Cindo?

Kani Ubufumu bwa baLesa Cindo?

Mba nindo baYesu belelwe ukubeela Imfumu?—MAKO 1:40-42.

1. Ubufumu bwa baLesa cindo?

Ubufumu bwa baLesa buteko bwa kwiulu. Bukapyana ukwikalika konse kabili baLesa bakapyungisha Ubufumu bwabo ukucita ukufwaya kwabo kwiulu na pa calo. Cebo iciweme ica kweba ati fyefyo efi baLesa bakapyungisha Ubufumu bwabo. Bukumo Ubufumu bwa baLesa bukacitila abantu ifi bafwaya ubuteko ubuweme ukubacitila. Bukekatanya abantu bonse pa calo.—Pendeni Danyeli 2:44; Matayo 6:9, 10; 24:14.

Ubufumu bulyelelwe ukukwata imfumu. BaYehova baalisalulwile Umwana wabo, baYesu Klistu, ukuba Imfumu ya Bufumu Bwabo.—Pendeni Ukufisulula 11:15.

2. Mba nindo baYesu belelwe ukubeela Imfumu?

Umwana wa baLesa ewelelwe ukuba Imfumu ni pakuti alikwete inkumbu, kabili alafwaisha ukucita ifilungeme. (Yoane 1:14) Nakabili, alikwete ne makosa akofweleshako abantu ni pakuti akalukwikalike’calo ukufuma kwiulu. Ili babuushiwe, baliile kwiulu ne kwikala kulwine lwa baYehova ukulukupembelele. (AbaEbeya 10:12, 13) Impindi yalifikile ili baLesa bapeele baYesu amakosa akutatika ukwikalika.—Pendeni Danyeli 7:13, 14.

3. Mba ni bani abakalukwikalika na baYesu?

Ibumba iliitwa ati ‘abalungeme’ e bakalukwikalika na baYesu kwiulu. (Danyeli 7:27) Abakutanga ukusalululwa ukuba abalungeme ni ntangishi sha bucetekelo isha baYesu. BaYehova balipitilishe ukusalulula abalalume ne banakashi aba bucetekelo ukufika na bubuno bukumo. Koti ni baYesu, balabuushiwa ne mibili ya mupashi.—Pendeni Yoane 14:1-3; 1 AbaKolinto 15:42-44.

 Mba ni banga abelelwe ukuya kwiulu? BaYesu baleta abo abaya kwiulu ati ‘itanga linini.’ (Luku 12:32) Bonse pamo bakaba 144,000. Bakalukwikalika icalo na baYesu.—Pendeni Ukufisulula 14:1.

4. Kani findo ifyacitikile ili baYesu batatikile ukwikalika?

Ubufumu bwa baLesa bwalitatikile ukwikalika mu 1914. * Ica kutatikilapo ici baYesu bacitile kupoosa Satana ne fibanda fyakwe pa calo ca panshi. Satana alikalipile ukwakuti kabili alitatikile ukuleta amakatasho pa calo conse. (Ukufisulula 12:7-10, 12) Ukufume’yo impindi, amakatasho abantunshi alaya ili afula. Inkondo, insala, amalwashi, ne fitulika, fyonse kabeya ka ‘keshibilo’ ka kweba ati bukumo Ubufumu bwa baLesa bukawamye’fintu pa calo.—Pendeni Luku 21:7, 10, 11, 31.

5. Kani Ubufumu bwa baLesa findo bulukucita kabili findo bukacita kuntangiile?

BaYehova balitatikile kale ukwikatanye’bumba lya bantu ilikulu ukufuma mu mishobo yonse ukupyungisha umulimo wa kutulisha. Abantu abakuti ubwngi abalicefya balukusumina ukwikalikwa na baYesu, Imfumu ya Bufumu bwa baLesa. Ubufumu bwa baLesa bukabalama ili bukonala buno ubwikashi ububipile ubwa pa calo. Popele, bonse abalukufwaya ukulitemwesha mu Bufumu bwa baLesa balyelelwe ukusambilila ifi bangalukumfwila baYesu abalukwikalika.—Pendeni Ukufisulula 7:9, 14, 16, 17.

Mu myaka 1,000, Ubufumu bukacita ifi baLesa baalukufwaya ukucitila abantunshi pa kutanga. Icalo conse cikaba paladaiso. Mu kupelako, baYesu bakabubwelesha Ubufumu kuli baWishibo. (1 AbaKolinto 15:24-26) Kani kuli aba mwiishi aba mungafwaya ukubuulako ifya Bufumu bwa baLesa?—Pendeni Amasamo 37:10, 11, 29.

^ par. 12 Kani mulukufwaya ukwishiba ifi Baibolo yashimikile umwaka wa 1914, boneni amabula 215-218 mwi buuku lya Kani Findo Baibolo Muli Bucine Isambisha?