Tolokeleni

Tolokeleni muye pa filukusangwamo

 Isambililo 6

Kani Nibwisa Bucetekelo Buli ku Bakwabesu Abafwile?

Kani Nibwisa Bucetekelo Buli ku Bakwabesu Abafwile?

BaLesa baalibuulile Adama ati: “Webo ewe fukutu, kabili ukabwelela na kwi fukutu.”—IFYAKUTAŊGA 3:19.

1. Mbe’cebo iciweme pali baabo abafwile ni ciisa?

Ili baYesu bafikile ku Betania apepi na Jelusalemi, Lasalo umubyabo ninshi alifwile palipitile ne nshiku shine. BaYesu baliile uku bamushikile na Malita na Maliya, inkashi shakwe Lasalo uwafwile. Impindi lukoso inini, ne bantu kababungana. Alakanyeni ifi Malita na Maliya basangalele ili baYesu babushishe Lasalo.—Pendeni Yoane 11:21-24, 38-44.

Malita aalishibiile limo icebo iciweme pa bafwile. Alishibile ukweba ati baYehova bakabuusha abafwile ne kwikala pa calo nakabili.—Pendeni Jobo 14:14, 15.

2. Kani abafwile bali muli isa mibelo?

Abantunshi balilengelwe ukufuma kwi fukutu. (Ifyakutaŋga 2:7; 3:19) Tatulipo mipashi iikala mu mubili wa munefu. Tuli bulengeshi ububoneka, popele tapalipo neli cimo icipuluka kani twafwa. Ili twafwa, na tompwe nayo ilafwa, ne kulanguluka kwesu kulonaika. Fyopele’fyo, Lasalo taalabiilepo akantu neli kamo pa kufwa kwakwe ni pakuti abafwile tabeshi neli kantu.—Pendeni Amasamo 146:4; Uwakutulisya 9:5, 6, 10.

Kani baLesa balakululusha abantu mu mulilo panuma ili bafwa? Pakuti Baibolo ilabuulishisha ati abafwile tabeshi neli kantu, ukukululusha abantu mu mulilo cisambisho icilengesha  abantu ukupeela baLesa imilandu pa fintu ifi tabacitapo. Ilangulushi lya kweba ati balakululusha abantu mu mulilo lilabanekasha ku mutima.—Pendeni Jelemiya 7:31.

3. Kani abafwile bangalabila na fwebo?

Abafwile tekuti balabilepo neli ukumfwa. (Amasamo 115:17) Pano inkalamba shimbi shilibipile makosa, shilalabila ku bantu bambi ne kubepesha koti bantu abafwile balukulabila. (2 Petilo 2:4) BaYehova balatukaanya fwebo ukwesha ukulabila ne bafwile.—Pendeni Ndutelonomi 18:10, 11.

4. Mba ni bani abakabuuka?

Abantunshi abakuti ubwingi abali mu filende bakaba ne mweo nakabili pa calo. Ne bantu bambi abatabaishipo baLesa abaalukucita ifyakubifya bakabuuka.—Pendeni Luku 23:43; Ifyacitilwe 24:15.

Abakabuuka bakaba ne shuko lya kusambilila bucine pali baLesa ne kulangisha ubucetekelo muli baYesu pa kubomfwila bo. (Ukufisulula 20:11-13) Abo abakabuuka ne kulukucita ifiweme e bakalitemwesha umweo wa muyayaya pa calo.—Pendeni Yoane 5:28, 29.

5. Kani ukubuuka kulatubuule’ndo pali baYehova?

BaLesa baalilengele ubucetekelo bwa kubuuka ukubako pakuti pa kutuma Umwana wabo ukwisa mu kutufwila. Popele twabona ukweba ati ukubuuka kulatubuula pa butemwe bwa baYehova ne luse lwabo. Ili abafwile bakaba ne mweo nakabili, ni bani mulukufwaya ukweba ati mukabone?—Pendeni Yoane 3:16; AbaLoma 6:23.