Tolokeleni

Tolokeleni muye pa fyebo fya bubili

Tolokeleni muye pa filukusangwamo

Bamboni sha BaYawe

IciLamba

Icebo Iciweme Ukufuma Kuli BaLesa!

 Isambililo 4

Kani BaYesu Klistu ni Bani?

Kani BaYesu Klistu ni Bani?

Kani niisa imibelo ya baYesu iyalukulenga abantu ukuya kuli bo?—MATAYO 11:29; MAKO 10:13-16.

1. BaYesu baalifumine pi?

BaYesu baalipuseneko ku bantunshi bonse ni pakuti ili tabangafyalwa pa calo, baali ni nkalamba kwiulu. (Yoane 8:23) Baali bulengeshi bwa kutanga ubwa baLesa kabili balyofwelesheko ukulenga ifintu fimbi fyonse. Ni benka lukoso e balengelwe kuli baYehova abene, namulifyefyo ebelelwe ukwitwa ati Umwana “enka” uwa baLesa. (Yoane 1:14) BaYesu baalukulabililako baLesa, popele baletwa ati ‘Ishiwi.’—Pendeni Ifisimpi 8:22, 23, 30; AbaKolosai 1:15, 16.

2. Mba nindo baYesu baishile mu kucita pa calo?

BaLesa balitumine Umwana wabo pa calo ili bakuushishe umweo wakwe ukufuma kwiulu ukwisa mu kufyalilwa muli Maliya moye umuJuda. Kanshi baYesu tabafyelwepo kuli bawishi abantunshi. (Luku 1:30-35) BaYesu baliishile pa calo (1) mu kusambisha bucine pali baLesa, (2) mu kutulangisha ifi tungacita ukufwaya kwa baLesa nangaba ati tuli ne mapensho, na (3) mu kupeela umweo wabo uuwaminine ‘icakulubula.’—Pendeni Matayo 20:28.

3. Mba nindo tupengelwa umulubulo?

Umulubulo ni woyo balipila ati balubule umuntu ku mfwa. (Ifyakufuma 21:29, 30) BaLesa pa kutanga tabafwailepo ati abantu balukufwa ne kucekula. Kani tulishibile shani ifyo? BaLesa balyebele umwalalume wa kutanga, Adama, ati kani akacite ici Baibolo iita ati “ukubifya,” akafwa. Popele Adama ngataabifishe, ngataafwilepo. (Ifyakutaŋga 2:16, 17; 5:5) Koti ni fyefyo Baibolo ilabila, imfwa ‘yalingiile’ mu calo pakuti  pali Adama. Namulifyefyo, ukubifya ne mfwa ifyafumine kuli Adama fyalikumene ku bantu bonse. Umulubulo ulyelelwe ukutulubula ku mfwa iitwapyene ukufuma kuli Adama.—Pendeni AbaLoma 5:12; 6:23.

Mba ni nani uwelelwe ukutulubula ku mfwa? Kani twafwa tulalipila lukoso ilambulo lya kubifya kwesu. Takulipo umuntu uungalubula abantu bambi ku fyakubifya fyabo.—Pendeni Amasamo 49:7-9.

4. Mba nindo baYesu baafwilile?

BaYesu tabaalipo koti ni fwebo, baali abawaminine. Popele tabaelelwepo ukufwa pakuti pa fyakubifya—tabacitilepo ukubifya neli kumo. Nangabe’fyo, baalifwile ni pakuti pa fyakubifya fya bantu bambi. BaLesa baalilangishe ati balitemenwe abantunshi ukwakuti ili batumine Umwana wabo ukwisa mu kutufwila. BaYesu nabo baalilangishe ubutemwe bwabo kuli baWishibo ni pakuti balukubomfwila kabili balipeele umweo wabo pakuti pa kubifya kwesu.—Pendeni Yoane 3:16; AbaLoma 5:18, 19.

5. Kani baYesu ino mpindi balukucite’ndo?

Ili baali pa calo, baYesu balukuposha amalwashi, ukubuusha abafwile, ne kupulusha abantu ku fyalukubaletelo’mwenso. Namulifyefyo, balilangishe ifi bakacitila abantunshi ababomfwila kuntangiile. (Matayo 15:30, 31; Yoane 5:28) Ili baYesu bafwile, baLesa balibabuushishe ne kubapeele umweo mu mupashi. (1 Petilo 3:18) Ukufuma pali yeyo impindi baYesu baalipembelele kulwine lwa baLesa mpaka ili baYehova babapeele amakosa akuba Imfumu ya kwikalika icalo conse. (AbaEbeya 10:12, 13) Pali ino mpindi baYesu balukwikalika kwiulu, kabili ababomfwila balukutulisha icebo iciweme mu calo conse.—Pendeni Danyeli 7:13, 14; Matayo 24:14.

Bukumo lukoso, baYesu bakapyungisha amakosa abo ukushilisha amapensho ne konala imbifi. Bonse ababucetekelo muli baYesu bakaba ne mweo mu paladaiso pa calo.—Pendeni Amasamo 37:9-11.